دراسات واحكام وصرخات وتستمر التحرشات

68%من موظفات الحكومة بالقاهرة يتعرضن للتحرش الجنسي
ويستمر مسلسل التحرش الجنسى فى الشارع فى السوق فى المواصلات واماكن العمل حتى بعد ما تجرأن النساء واصبحن يعين بحقهن ويتوجهن للإبلاغ عما يتعرضن له من تحرش وعلشان مش اكون ظالمة مش كلهم الشهادة لله فى اللى بتقف تعيط وتخلص كل دموعها تأذياً من الموقف لكنها خايفة تنطق لأنها عارفه إن المجتمع هيقول هى السبب خارجه من بيتها ليه .. مش هى اللى خرجت خليها تتحمل بقى .. وفى اللى هيقول مش شايفين لبسها عامل ازاى حتى لو كانت لابسه كفن مش مهم الأهم إنها لازم تكون هى السبب .. امال يلقوا اللوم على مين يعنى .. هو الدكر اللى خارج من بيته ده حتى لو خارج ومبيت النية إنه يتحرش حد يقدر يوجه له كلام .. هى السبب مخلوقة انثى لازم تتحمل بقى .. أما بقى السيد الباحث اللى عمل الدراسة الجامدة دى فكان المفروض انها مش تتعمل على الموظفات يا جماعه لأن هما فى كل الحالات اللى غلطانين المفروض الموظفة من دول ترضع زميلها الشحط الطول بعرض خمس رضعات مشبعات وهى بعد كدا هتبقى اخته ومش يتحرش بيها ان شاء الله
اخيراً وليس اخراً بقى لو واحده داخله اى مصلحة حكومية وقابلت موظف بالمواصفات الآتية ترجع مباشرة مش مهم الاوراق اللى رايحه تخلصها عنها ما خلصت .
وأكدت الدراسة أن عمر المتحرش يقع بين عامي 29 سنة و59 سنة، ومتعلم تعليماً عالياً (50% ذكرن ذلك)، متزوج (64.3%)، ومدة زمالته بالضحية متوسطة (42.9%)، وخبرته في العمل كبيرة (64.3%)، وعلاقته قوية برؤسائه (78.6%)، مدخن (47.6%)، وله سوابق تحرش بزميلات (61.9%). كما أن مظهره غير جذاب (50%)، رغم كونه متحدث لبق (71.4%)، ودمه خفيف (59.5%)، وعينه "زايغة"، أي يحاول دائما اختلاس النظر إلى الموظفات (83.9%)، ويمزح مع زميلاته (85.7%)، وشخصيته قوية (64.3%)، وغير متدين (73.8%)، واجتماعي (90.5%).

هنخلص امتا بقى من المرض المزمن اللى اسمه تحرش جنسى
حتى بعد صدور حكم ضد متحرش وفى انتظار محاكمة المتحرش الثانى بالصديقة العزيزة آسر ياسر ايضاً لازال التحرش كالسرطان يسرى فى المجتمع وجميع الأعمار