أكــل لحـــم ميــــت

لاء مش قصدى الفراخ المصابة بأنفلونزا الطيور ... ولا لحم الحمير الميتة القضية الشهيرة فى الفترة الأخيرة
ولو أنها أخف وطأة من أكل لحوم البشر بعضهم لبعض .... ولا أقصد أيضاً بعض القبائل البدائية من آكلى لحوم البشر ولكن مقصدى هنا هو الغيبة والنميمة .... التى سادت وأنتشرت بشكل مقزز ... أثناء تواجدى فى أحد التجمعات العامة كان يجلس بجوارى رجلين يتكلمون بصوت مسموع .... فى البداية كان حديثاً عادياً وما لبث أحدهم ان ذكر اسم شخص فأخذ الآخر يعدد من سيئاته وينتقل بالحديث من شخص لشخص آخر والغريب أنه لا أحد ممن ذكرهم توجد به حسنة واحدة ترضى الله ... وكأنه هو الملاك ذو الأجنحة البيضاء الذى هبط لنا على الأرض فجأة .... عجبت حقاً ووجدت نفسى اتسائل إن الله سبحانه وتعالى نهى عن محاسبة البشر لبشر آخر فما بال من يجلس ويجمع حوله الآخرين ليغتاب هذا ويلعن ويسب هذا ويخوض فى عرض ذاك ... أهذا الشخص متناسى قول الله سبحانه وتعالى " ايحب أحدكم أن يأكل لحم أخيه ميتاً " ( صدق الله العظيم )
أهذا الشخص ومن هم على شاكلته من يخضون فى أعراض الناس متناسين " كما تدين تدان والديان لا يموت "
وهنا تذكرت مناقشه بينى وبين احد الاشخاص عندما سالته لماذا عندما يرى اسم شخص كان صديق ودود له او يتحين الفرص هو لذكر اسمه ليظل يسب ويلعن فيه فاجابنى لانه انسان كداب ... طيب كذب عليك فى ايه ؟؟ كان بيوصلنى كلام على لسانه من ناس قريبين ليه .... وبتصدق ليه انا مؤمنة بمبدأ إذا سمعت أذناك لابد أن ترى عيناك ... كان جوابه لاء هو كداب ومنافق والقاء العديد من السباب الى مالا نهاية فكان لابد من قفل النقاش قبل ما اصاب بهارت اتاك .... وفى النهاية اكتشفت الموضوع مكانش كدب قد ما هو كان موقف واختلاف لم يوافق هوى الشخص الذى كنت اتناقش معه ... الهذا الحد اصبح من يختلف مع رؤيتنا وهويتنا انسان كداب ومنافق و العديد من الاتهامات ؟؟؟؟
.... واعود بفكرى الى عالمنا الالكترونى لاتذكر البعض يجلس خلف شاشات الحاسب باسماء مستعارة ويظل يسب ويلعن وفى النهاية يستشهد بآية قرآنية قاصص منها ما يتناسب مع هواه ... وكأنه اثناء سبه والخوض فى عرض الناس يظن أنه يعمل عمل عظيم او كانه يجاهد فى سبيل الله ليختتم كلامه اللاعقلى بقول مأثور او آيه قرآنية وكأنه اثناء غيبته للآخرين كان متلذذ بطعم لحم أخيه الذى كان يغتابه ..... وهنا اذكر نفسى والجميع بحديث الرسول صلى الله عليه وسلم
( إن المفلس من أمتي يأتي يوم القيامة بصلاة وصيام وزكاة، ويأتي قد شتم هذا، وقذف هذا، وأكل مال هذا، وسفك دم هذا، وضرب هذا، فيعطى هذا من حسناته، وهذا من حسناته، فإن فنيت حسناته قبل أن يقضى ما عليه أخذ من خطاياهم فطرحت عليه، ثم طرح في النار! ) صحيح مسلم

تعليقات

‏قال tamer.sala7
ربنا يهدي الجميع بس مش النميمة وبس اللي بيمتاز بيها الشعب المصري

ده حاجات كتير اوي ومشهورين بيها برة

وكلها حاجات مش كويسة ويا ريت كل واحد يبدأ بنفسه
‏قال Unknown
ازيك يا قطة عامله ايه

بصي يا قمر انا معاكي في كل حرف انتي قولتيه

و للأسف في ناس بنتصب نفسها قاضي علي اخلاق و معتقدات غيرها و حتي علاقتهم بربهم و يعينوا نفسهم اوصياء علي الناس متفهميش مين اي اداهم الحق ده و ليه هما يعني

الغيبه و النميمه طبعآ منهي عنها في كل الكتب و الشرائع السماويه غير انها غير مقبوله اخلاقيآ


ده طبعآ غير الناس الي بتصدر احكام بالتكفير و فساد المله و حاجات كتير كده متعرفيش جابوها منين

تحياتي يا قطتنا
‏قال Abo 7anf
السلام عليكم
ازيك يقطه
اكيد الناس دى مش واخده بالها انها زى مبتشتم بتتشتم
وانها بثبت جبنها لان لو عندها جراءه كانت قالت الكلام دا فى وش الشخص التانى
ازيك ياقطتى

عايزة اقولك حاجة ان اللى يسمح لنفسه يكون وصى على حد وعلى كلامه وتصرفاته ده انسان مش طبيعى بمعنى انه لو ابوه او امه او ماشبه ذلك اكيد ليه حق ولكن عادة تلاقى ناس غريبة تدخل نفسها طويب وانت مااالك خليك فى نفسك واخلاقك انت
حاجة غريبة
ربنا يحمينا من الغيبة والنميمة


تحياتى
‏قال Mafrousa
ربنا يكفيكى و يكفينى و يكفى الناس كلها شرها ...قولى آمين يا قطه
برافو عليكى يا قطة..
بس أقولك على حاجة..
لما تلاقى النوعية دى من الناس إعملى حاجة من إتنين ..
1-ما تشتركيش معاهم فى الغيبة أو النميمة و حسسيهم إنك مشمئزة من حديثهم..؟
2-لو وجهوا لكى الكلام بالسؤال مثلا عن أخلاق فلانة أو لبس علانة أو أخت ترتانة..سيبيهم و قومى و قوليلهم أنا ما باغتابش حد و ربنا يصلح حالها و حالنا..
ساعتها حيحصل حاجة من إتنين برضه
1-يحسوا قد إيه هما صغيرين قدام بعض و بيعملوا حاجة غلط فعلا
2- تكونى إنتى نفسك المادة التالية فى جلسة النميمة بتاعتهم و ساعتها تلاقى حد تاخدى من حسناته يوم الموقف العظيم..
دمتى بكل خير أختاه
‏قال Unknown
ابشع شى انك تتكلم على حد بكل صفة سية وبعد كدة لما تقابلة تكلمة بكل حب وكانك مقولتش اى شى
ربنا يرحمنا
النميمة من اسوا الاشياء فى المجتمعات ومن هنا ادعو الجميع ونفسى البعد عن النميمة والغيبة
كفانا الله شرهما
تحياتى
‏قال غير معرف…
على فكرة .. أجمل حاجة إن الانسان يكون مهذب .. يعنى عندك كلمة طيبة كان .. والا فالصمت أحلى

يقول الرسول عليه السلام

انكم لن تسعوا الناس بأموالكم .. فسعوهم ببسط الوجه والخلق الحسن

ماعلهش
‏قال الميكروباص
سيرة الناس و الذم فيهم هي فاكهه الحديث في مجتمعنا
أما بالنسبة لمن يكتب موضوع فيه سب ولعن وفي النهايه يستشهد بحديث أو يضع آيه قرآنيه
فهذا من باب انه في نهاية الحديث يجب أن يذكرك بأنه رجل بردو بيعرف ربنا
وبالمرة يؤكد لك ان كلامه على فلان يدخل تحت طائلة الحلال وانه لا يفتري عليه
حيث أن العارفين بالله أمثاله رأيهم دائما صواب
‏قال Unknown
بصى اعتقد بالاضافة الى انها عادة
كمان عامل الفراغ والثقافة العامة يعنى الموروث العام والجهل بالدين سببا فى انتشار تلك العادة السيئة
كل الاحترام
‏قال شـمو نشـادر
عندك حق يا كات ..
اغلب الناس بقت كده اساسا والمشكله ان محدش حاسس ان فى مشكله ..
بقت حاجه طبيعيه يعنى ..
يشتم ده و يجيب فى سيرة ده ويشوه صورة ده ..
يا ريت كل واحد يراعى ربنا فى الكلام اللى بيقوله ..
و تحياتى ليك يا جميل ..
أسامة أمين
‏قال Unknown
تحياتى على الموضوع
‏قال NIDAAL .R
بصى المشكلة انه فيه ناس كتير ماشيين بمبدأ امريكا فى الحوار ده
من ليس معنا فهو ضدنا
فدول ناس الى يعترض على كلامهم او يبقى ليه راى تانى يبقى مابيفهمش و غبى و كداب و كله كله بقى
شكلك عايزة توقعينى فى غلط ههههههههههههه
عموما ربنا يهدى الجميع
ً
‏قال سنووايت
انتي عارفة يا قطة
لما بأقرا ايات النهي عن الغيبة في القران بأقول سبحان خالق الانسان اللي عارف نفس الانسان وطباعه
شوفي اد ايه ديننا جميل لو بس اخدنا الاخلاقيات والسلوكيات من اوامره ونواهيه بس للاسف دلوقتي زي ما قلتي كل واحد بيجيب اية ويمسك في حاجة معينة وينصب نفسه حاكم علي الناس وعلاقتهم بربنا وفاكر انه هيصلح الكون وان ربنا بعته علشان يهدي الناس
ربنا يهدينا جميعا , بوست حلو اوي
‏قال ألآسطى بلية
دى عادة ومرض

والانسان المفروض يعرف ان مفيش حد كامل

وكمان لايصح ولايجوز ولا هو من الدين ان الواحد يجرح فى انسان غير موجود ويقول علية كلام

تحياتى
‏قال الربان
تحياتي

اشكرك انك فكرتينا و ذكرتينا...
الغيبة و النميمة من اخطر الامراض
التي تفتك بالمجتمعات....

المشكلة اننا كلنا أعين او عيون مفتوحة
علي الاخرين...و لا نتبصر او نبصر أخطاؤنا نحن...و ما أكثرها...

من اراد ان يعيش سعيدا فعلية ان ينظر
الي داخلة...يتفحص نفسه..يري عيوبه
فيعالجها...يستاصلها ان تمكن...

تعسا لعبد تتبع عورات الناس...اي عيوبهم....و هنيئا لعبد علم عيوبه
فعكف عليها يستأصلها ...فيهنأ براحة بال...

اللهم كف السنتنا عن القيل و القال
و الجدال...و ذكر نقائص الناس ..اشغلنا بأنفسنا عن الاخرين
ونقي صحائفنا...

بارك الله فيك
و لك كل التحية و التقدير....
‏قال غير معرف…
قطتنا العسل

صباح الفل ياقمر

الغيبه و النميمه انتشرت اوي في الزمن اللي بنعيش فيه

كل واحد كمان بقه شايل سيفه في وش اللي بيعترض عليه

كل واحد فاكر نفسه صح دايما

المصيبه مش بس في النميمه و الغيبه ياقطه المصيبه في انهم مش حاسين انهم بيعملوا حاجه غلط مفكرين انهم بكده صح و علي الطريق القويم

للاسف الانترنت ساهم برضه في كده زي ماذكرتي تلاقي الواحد او الواحده من دول داخل بأسم مستعار و هاتك ياقله ادب و اسلوب غير راقي في الحوار بالمره و مطلوب مننا اننا نسكت عشان لو اتكلمنا نبقي زيهم و لو سكتنا يقول علينا جبناء

زمان كانوا بيتهموا الستات انهم هما اللي بدعوا النميمه دلوقتي صدقيني و من اللي بشوفه الرجاله بقت بتنم اكتر

ربنا يكفينا شر النميمه و الغيبه

تحياتي ياقمرايه علي البوست الواقعي و يارب الكل يفكر فيه
‏قال محمد صالح
موضوع جرئ اخر
احب اقولك ان الغيبه والنميمه دى بقى شئ عادى فى مجتمعنا لان مينفع يوم يعدى الا ما شخص يتكلم عن التانى ويقولك دا بيعمل كذا ودا بيعمل كذا ويحقد عليه وممكن يوصل الامر ان يعطله عن شغله وخلافه لكن الاختلاف فى الرائ دا مبدء لسه مش منتشر اوى فى مصر بمعنى ان لو فى واحد مختلف معايا يبقى م بيحبنى وعاوز يضرنى ولازم اكون له بالمرصاد وارجو من المولى عزوجل ان يهدى البشر جميعا
‏قال الدرعمي
الإنسان اللي يتكلم على إنسان من وراه

يبقى جبان

وناقص

بس هنعمل ايه ؟

بنقول حسبي الله ونعم الوكيل

والمسيح عليه السلام بيقول

الرب يدافع عنكم وأنتم صامتون


تحياتي


آدم
‏قال Asmaa mahaba
عن معاذ بن جبل -رضي الله عنه- قال: قلت: يا رسول الله، أخبرني بعمل يدخلني الجنة، ويباعدني عن النار
قال: لقد سألت عن عظيم، وإنه ليسير على من يسره الله -تعالى- عليه
تعبد الله ولا تشرك به شيئا
وتقيم الصلاة، وتؤتي الزكاة، وتصوم رمضان، وتحج البيت
ثم قال رسول الله -صلى الله عليه وسلم-: ألا أدلك على أبواب الخير؟
الصوم جنة، والصدقة تطفئ الخطيئة كما يطفئ الماء النار، وصلاة الرجل في جوف الليل، ثم تلا قوله -تعالى-: تَتَجَافَى جُنُوبُهُمْ عَنِ الْمَضَاجِعِ حتى بلغ: يَعْمَلُونَ
ثم قال رسول الله -صلى الله عليه وسلم-: ألا أخبرك برأس الأمر وعموده وذروة سنامه؟ قلت: بلى يا رسول الله
قال: رأس الأمر الإسلام، وعموده الصلاة، وذروة سنامه الجهاد في سبيل الله،
ثم قال:
ألا أخبرك بملاك ذلك كله؟ قلت: بلى يا رسول الله. فأخذ بلسانه وقال: كف عليك هذا. قلت: يا نبي الله، وإنا لمؤاخذون بما نتكلم به؟
قال: ثكلتك أمك يا معاذ، وهل يكب الناس في النار على وجوههم، أو قال: على مناخرهم إلا حصائد ألسنتهم

عفانا الله وعفاكى من حصائد السنتنا السيئه
تياتى ليكى سومه_87
انا بقالى مدة كبيرة بفكر فى الموضوع ده والله فعلا

يمكن اللى بيتضايق من حد غصب عنه بيتكلم عنه بالرغم انه عارف ان كل الكلام ده حرام ...بس ساعات من غيظه يعنى بس وانه مش عارف يقول الكلام ده فى وشه

ربنا يهدينا كلنا يارب ويعافينا

بعتذر عن غيابي عن متابعة بلوجتك ياحبيبي
...
‏قال Desert cat
tamer.sala7
انا مش حددت فى الموضوع الشعب المصرى ولا اى شعب يا تامر هو عموما الكلام عام على كل حد بيتناسى انه بشر ومش من حقه الخوض فى حق الناس سواء بكلام او افعال
تحياتى
‏قال Desert cat
EmY
طبعا يا ميمى ردك لوحدة اضافه هايله للبوست
لخص الناس اللى معيين نفسهم اوصياء واللى بياسلموا ويكفروا فى غيرهم وكانهم ملايكة منزلين من السما
مع ان لو كل واحد بص لنفسه اكيد هينشغل عن عيوب الناس
نورتينى يا جميله
على فكرة ياقطه انا بقالي فترة معلقتش لكني متابعه كل بوست كتبتيه
وهقولك حاجه كتير بنقول الاختلاف في الرأي لايفسد للود قضيه
بس فيه امور مينفعش فيهااختلاف فيه امور مسلم بيها ونزل فيها حكم صريح من القران والسنه
زي بالزبط موضوع الغيبه والنميمه اللي ذكرتيه دا
مينفعش ابقى واخده الامور تهريج ومن باب المألسه على فلان وعلان ونقضي القعده تهريج ونقول ادينا بنفضفض ونهيس ونضيع وقت
حقيقي ناس كتير بتتفنن في الاكل دا وبطريقه تضحك
وعاااااااادي
نسيت اقولك اني عايزة اكلمك من فترة بجد وضروري ومش عارفه ازاي اوصلك
‏قال Desert cat
حبيبة القمر
ده ايميلى
nana_catofdesert@hotmail.com
طبعا يشرفنى ضاافتك فى اى وقت
وتنورى ايملى
‏قال Desert cat
Abo 7anf
الموضوع مش جرأة اد ما هو نفاق يا ابو حنف
يعنى اللى يقابل واحد يضحك فى وشه وياخده بالحضن وبعد ما يمشى يقعد يسب ويلعن فيه
ده اعتقد مينفعش نقول عليه محتاد جرأة انما ده محتاج طهارة ونقاء من جواه
تحياتى
‏قال Desert cat
رصيف نمرة خمسة
ازيك يا ايمى
وحشانى جدا
طمنينى على اخبار امتحناتك
تعرفى اللى بتقولى عليه ده بيعين نفسه وصى على الناس
المفروض يكون ردنا عليه
يا ابن ادم لا تنظر لعورة امرئ فللناس السن وعيون
تحياتى يا جميله
‏قال Desert cat
واحدة مفروسة
اللهمخ امين يا حبيبتى
ربنا يكفى الناس ئر بعضها
نورتينى
‏قال Desert cat
واحد من البلد دى
يا فندم والله انا مكنتش قاعده معاهم انا بس كنت راميه ودانى
هههههههههههه
وبعدين بصراحة كتمت نفسى بالعافيه لانى كنت خلاص شوية وهتدخل فى الحوار
بس رجعت قولت من تدخل فيما لا يعنيه نال مالايرضيه وكمان ناس مش عارفاهم يعنى هيكون فضول قاتل
انما لو حصل وقاعده مع حد وجه يتكلم على حد
اما بنسحب خالص من الحوار او مردش عليه اسيبه يكلم فى نفسه
تحياتى
‏قال Desert cat
ايوية
اهو النموذج ده بقى يا يويو بيكون محتاج ابادة من المجتمع
وللاسف انتشر جدا
يقابلك يضحك فى وشك ويبوسك وبالاحضان يا بلادنا يا حلاوة وبعد ما تمشى يعاديك على اللى بيتقال فى ضهرك
بس برضه ده معناه انه ان الحقد ما شاء الله مسيطر عليه وده هو اللى بيتعذب مش اللى بيغتابه
ربنا يشفيهم ويطهر قلوبهم
تحياتى يا جميله
‏قال Desert cat
رئـــــيسـة حزب الأحلام
ربنا يكفينا جميعا شر الغيبه والمغتابين
نورتينى يا سلوى
تحياتى
‏قال Desert cat
Sherif
صح يا شريف لو طبقنا المبدأ ده صدقنى المجتمع هيكون انقى ما يكون
لا خلافات ولا مشاكل لانه مش هيكون فى حقد من الاساس
الكلمة الطيبة صدقة
وتبسمك فى وجه اخيك صدقه
مش ابتسم فى وجهه دلوقتى واطعنه بخنجر فى ضهره اول ما يمشى
شرفتنى جدا
تحياتى
‏قال Desert cat
لورنس العرب
اه طبعا ناس دائما على صواب بدليل استشاهدهم بالقران الكريم واللى يرد عليه ويقوله حجتك بالطله يقوله انت ايش عرفك انت كافر اساسا
روح توب وارجع لربك
على اساس انه يملك صقوك الغفران
تحياتى
‏قال Desert cat
نهر الحب
طبعا وجهة نظرك صحيحة جدا
فالالتزام بالدين وتعاليمه والثقافه عنصر مهم جدا لرقى الانسان وبعده عن ارتكاب اى حماقه
تحياتى
‏قال Desert cat
شـمو نشـادر
والله انت جبت المفيد يا بشمهندس
كل واحد عمال يغلط ويخوض وحاسس ان بيعمل حاجه كويسه كدا هو مش بيغلط الغلطان دائما الطرف الاخر
ربنا يهدى الجميع
تحياتى
‏قال Desert cat
karim
تحياتى على التعقيب
‏قال WhItE HeArT
رأيم محترم جدا

تحياتي
‏قال اهو ده عيبه
والله يا قطتى الغيبة والنميمة بقت من اقذر الصفات اللى موجودة
وممكن يبقى الواحد بيغتاب حد ولسه واكل عيش وملح معاه

ربنا يبعدنا عن الناس دى ويهديهم
‏قال Tamer Nabil Moussa
تعرفى عزيزتى قطة

تعبير اللخم الميت تعبير صادق بجد

يحمل بداخلة معانى كنير للنميمة واصحابها

تحياتى
‏قال .:.-=- ELGaZaLy-=-.:.
قرات مقالك اكثر من 3 مرات...وفيهم كلهم شعرت بانة برغم صغر كلماتة وقوة معانية ...قد مس اناس كثيرة..عارفة كان ليا صديقة عندها الداء دة وفى النهاية اذت نفسها جدا...

بجد تحياتى ربنا يجعل كلمك نقطة نور ..
‏قال الربان
تحياتي

يارب تكوني بخير...

حجزنا لك مكان معانا في رحلة نهاية الاسبوع....:)

تحياتي
‏قال Miso soup
سلامتك من الهارت اتاك
القافلة تسير و ال... تهوهو!!!! ١
‏قال Miso soup
سلامتك من الهارت اتاك
القافلة تسير و ال... تهوهو !!!!
‏قال Unknown
ايوووووووووووووووه كده
هي دي المواضيع ولا بلاش
متعرفيش لو حد قرأ الموضوع ده واستفاد ربنا هيكافئك اد ايه
وبجد الموضوع هايل ربنا يوفقنا كلنا ويجنبنا الخوض في اعراض الناس

تحياتي يا احلي قطه
‏قال MATRIX
والله العظيم المدونة دى حلوة اوى
نونوة هههههههه
فكرة حلوة اوى
على فكرة انا بحب القطط اوى
نااااااااااااااو
‏قال Zika
اولا ازيك عامله ايه ؟
............
انا اكيد معاكي في اللي انتي بتقوليه
لازم قبل ما نتكلم علي حد تاني
نفكر يا تري هل انا فيا نفس العيب ولا لأ
وقبل ما اتكلم عن بني ادم حتي ولو كنا وحش
لازم اعرف انه كده هياخد حسنات علي حسابي
وكمان حتي لو هو فيه الصفات دي فعلا
انا كمان هاخد ذنوب عشان ده طبعا في حد ذاته حرام
والديليل الحديث اللي انتي قولتيه
برافو عليكي
تحياتي يا قطة
‏قال Desert cat
NIDAAL PAL
لاء هو انا مش بوقعك فى غلط لان انت اللى بتكتب من نفسك مش انا اللى بمليك
هههههههه
ثم موضوع مبدأ أمريكا ده من ليس معى فهو ضدى انا ببعد عن الناس دى مبحبش اتعامل معاها
وفى فرق يا نضال بين الاختلاف فى الراى وبين الغيبة والنميمة
تحياتى
‏قال Desert cat
سنووايت
ماهى المشكلة يا دكتورة فى اللى منصب نفسه الحاكم والجلاد
وكانه منزه عن الاخطاء
اذا كان هو بينقض خطأ فى الشخص اللى بيغتابه اساسا
نورتينى
‏قال Desert cat
هانى
دى المصيبة احيانا مش بتيجى غير من اللى بيدعى التدين يا هانى
تلاقيه عامل مجلس نميمة وفى الاخر يقول استغفر الله العظيم وكانه بكدا خلاص تاب واناب
تحياتى
‏قال Desert cat
الربان
استاذى العزيز لا شكر على واجب يا فندم
هو موقف حصل قدامى حبيت بس اتكلم عنه لان من الواضح ان القلوب محتاجه عملية تطهير علشان نعرف نعيش فى مجتمع سوى
وانا اكمان اتمنى زى حضرتك كل واحد قبل ما ينظر على غيرهه ينظر داخل نفسه
احترامى وتقديرى
‏قال Desert cat
اجندا حمرا
يا صباح الفل على عيون ارق بنوتة فى الدنيا
ما هو انا يا قلبى ملاحظة وكتير زينا ملاحظين ان اللى بينموا ويجيبوا فى سيرة الناس بيكونوا فاكرين انهم صح على طول مع ان سبحان الله مفيش حد دايما صح ومبيغطلش غير الملايكة وعلى ما اظان انهم بنى ادمن موجودين وسطنا يعنى بشر
اما اللى بيستخبى ورا شاشه ده ويشتم فده انسان جبان
ومعندوش اخلاق ...
نورتينى يا جميله
تحياتى ليكى
‏قال Desert cat
محمد صالح
مشكلة الاختلاف فى الرأى يا محمد دى مشكلة تانية للاسف فى ناس غير مؤهله لثقافه الاختلاف
ومش بتعرف تفصل بين اختلاف الرأى وشخصنة الآراء ودى فى حد ذاتها مشكله
بينتج عنها فعلا الغيبة والنميمة
اشكرك جدا على ذوقك
احترامى وتقديرى
‏قال Desert cat
ADAM
طبعا يا ادم ربنا موجود و " يمهل ولا يهمل "
فكل واحد بقى يعمل ما بداله لانه زى ما بياذى حد حتى لو بكلمه فى غيابه هيكون فى اللى ياذيه
تحياتى
‏قال Desert cat
سومه...مجنونه فى بلد عاقل
صدق رسول الله صلى الله عليه وسلم
ربنا يكفينا جميعا شر انفسنا
تحياتى
‏قال Desert cat
كفايـة طيبـة
حمد الله على سلامتك يا جميلة
وربنا يخفف الشغل ده شوية بقى خليكى تروقي لنا من تانى

بصى يا قلبى مش معنى ان اتنين اتخاصموا يبقوا يتكلموا على بعض دى اسمها قلة ادب وخسه قلة اصل
لان الخصام مش معناه مذمة الناس

المهم ابقى طمنينى عنك
تحياتى
‏قال Desert cat
حبيبـــــــة القمـــــر
حبيبى انت يا زومل
طبعا كلامك صح
محتاجين شوية توعية علشان كل واحد يعرف اللى ليه من اللى عليه
نورتينى يا جميله
‏قال Desert cat
WhItE HeArT
ميرسى جدا
تحياتى
‏قال Desert cat
اهو ده عيبه
هههههههه
على راى صديقتى الجميله
كانت بتقول الملح بيدوب والعيش بينهضم واخرته معروفه فين
تحياتى
‏قال Desert cat
Tamer Nabil
اشكرك جدا يا تامر
شرفتنى
‏قال Desert cat
.:.-=- ELGaZaLy-=-.:.
اشكرك جدا يا محمد على ذوقك
وربنا يهدى الجميع للخير
تحياتى
‏قال Desert cat
الربان
انا اسفه جدا والله على التاخير
بس مشغولة شوية وخلاص هانت
عموما انا خلاص روحت اكدت الحجز
:)
احترامى وتقديرى
‏قال Desert cat
Miso soup
ههههههه
الله يسلمك
انا برضه بقول زيك كدا
نورتنى
‏قال Desert cat
bar2ash
ميرسى جدا يا دكتور
تحياتى
‏قال Desert cat
MATRIX
والله انا متشكرة جدا يا ما تريكس
وطالما بتحب القطط بقى
اذن انت من اليوم عضو مهم جدا فى حزب القطط الصحراوية
نورتنى
‏قال Desert cat
Zika
انا الحمد لله كويسه يا زيكا
يارب انت كمان تكون بخير
ماهو لو كل الناس بتفكر بنفس طريقة تفكيرك مكنش بقى فى اى صدامات فى المجتمع حقيقى الادب والاخلاق عمرها ما كانت مرتبطة بسن
وانت ما شاء الله عليك بالرغم من صغر سنك الا ان عقلك كبير
احترامى وتقديرى يا زيكا
السلام عليكم في البداية مدونتك جميلة
جدا مشاء الله
للاسف ناس كتير تناست الحديث الشريف ايحب احدكم ان ياكل لحم اخيه ميتا ومش بقوا بياكلوا بس وكل يوم بيقطعوا في فروته زي مابيقولوا المحزن لما تلاقي الصديق يغتاب صديقه ومن قدامه يعمل نفسه حبيبه وصحبه

جزاكي الله كل خير عن موضوعك وجعله في ميزان حسناتك

تقبل مرورنا وزيارتنا الاولي ولن تكون الاخيرة باذن الله
تحياتنا
مدرس الانجليزي بتاعي الاستاذ عبد المحسن كامل من بلبيس كان منقول من بلدهم لعندنا عقاب..انا كنت باحبه جدا والوكيل بتاعنا ما كاننشي بيحبه واستقصده كذا مرة

وكنا في حصة في مرة والكلام اخدنا وجات سيرة الوكيل فلقيت اني (اوجب ) مع استاذي واقعد اشتم شوية في الوكيل

لكن لقيته راح موقفني وقال انه مبيحبش يسمع الكلام ده ابدا ولما قلتله ان الوكيل هو اللي جايبه لنفسه وان الواحد معذور

قال ان مفيش حاجة اسمها معذور وان الحديث صريح ( وهل يكب الناس علي وجوههم في النار الا حصائد السنتهم !) وانه هو نفسه كان كده لكن في مرة قرر انه يستجمع عزيمته وانه ميتكلمشي علي حد بعدها ابدا

وعمري ما لقيته بيتكلم علي حد ابدا

تحياتي
‏قال rovy
ازيك يا قطه وايه اخبار الخربشه
حتصدقينى لو قلتلك انى دخلت كثير قوى وكل مره بعد ما اقرأ البوست ما اعرفش اعلق والله بجد اول ما ادوس على التعليقات النت يعلق واضطر اقفل خالص الاكسبلورر وكل مره تتكرر نفس الحكايه المره دى مصدقتش لما دخل على كل حال الحمدلله
البوست ده هايل وفعلا ابشع شىء بيقززنى النميمه .. سبحان الله العلى العظيم لما صورها فى ابشع الصور ومع ذلك تناست الناس تلك الايه الكريمه
ربنا يهدينا جميعا وكل واحد فينا يتعلم ينقد نفسه قبل الغير
.
دمتى بخير

تحياتى

rovy
‏قال mohamed
تصدقى أن مجتمعنا بنسبة 99.99% مش شاغلهم الا شيئين
الرغى والكلام على الغير
السيد المسيح قال قبل أن تدين القذى التى فى عين غيرك أخرج الشجرة التى فى عينك------ القذى خشبة فى رفع أبرة الخياطة
وفى القرأن الكريم قال ربنا أن اللة لايحب الجهر بالسوء الا لمن ظلم) أظن من المفروض نشغل نفسنا بأمورنا , وأمور الاخرين تخصهم, كما قيل من تتبع عورات الناس تتبع الناس عوراتة
ومن منا ليس لدية عورات أو أخطاء

كما أن الستر حتى للمخطىء قيمة أسلامية وفى كل الاديان
ألم ينهر سيدى محمد علية الصلاة والسلام
الصحابى الذى قال للزانى أن يذهب للرسول ليتطهر ويقيم علية الحد
الم يقل لة (ألأ كنت داريت علية بثوبك) .هذا المجتمع بمنتهى الصراحة أصبح مريض ويحتاج لعلاج نفسى هم أصبحوا من أكلى لحوم البشر . اما أذا رأينا من يتعدى على حق المجتمع وحقوق الناس وكان هذا الشخص قوى أو عندة مال أو سلطة فالنفاق وأسلوب المداراة يتبع معة, بصراحة أنا قرفان
معلش أنا اسلوبى شديد بس الموضوع ذاد عن الاحتمال .
وجعت دماغك
تقبلى أعتذارى
سلام
‏قال Desert cat
بنات صاحبة الجلالة
للاسف النميمة آفة ومرض منتشر لابد من استئصاله بزيادة الوعى وكل واحد يحاسب نفسه قبل ما يحاسب الناس
شرفتينى
سعيدة بزيارتك
‏قال Unknown
مع انتشار التكنولوجيا الحديثة انتشرت معها سيئات اخلاقية كثيرة

ربنا يرحمنا ويهدينا ونعرف نستخدم التطور صح

تقبلى تحياتى
‏قال Desert cat
تايه في وسط البلد
بالظبط زى ما استاذ حضتك عمل بالظبط هو الموضوع فى الاول وفى الاخر عزيمة ده طبعا بالنسبة للناس النمامة
المفروض يكونوا عارفين ان محدش معصوم من الخطأ ويقوفوا مع نفسهم وقفة صدق
تحياتى لحضرتك ولا ستاذك
‏قال Desert cat
rovy
الحمد لله ان فى النهاية الكومنت اتكتب
طبعا ربنا لم يخلقنا هباءاً هو وحده العالم بالنوايا ونفوس البشر
نورتينى
‏قال Desert cat
mohamed
الدين يا محمد واضح وصريح
والصفات السيئة اللى المفروض نبعد عنها من نفسنا مش محتاجه مفتى ولا محتاجه حد يعلمها لنا ... لكن الناس محتاجه تصفى مع بعضها
وكل واحد قبل ما ينظر لعورات الناس ينظر لنفسه
دمت بكل خير
احترامى وتقديرى
‏قال Desert cat
هيثم الدهشان
ماهى التكنولوجيا سلاح ذو حدين والنافع فعلا اللى يستخدم هذا السلاح استخدام صحيح
مودتى
‏قال wanna b a physician
ياقطة دى الحقيقة دلوقت
كل واحد فاكر نفسه ملاك يقولك انا وانا وفلان ده كذا وفيه كذا
ونسى انه مش المفروض ان حد يزكى نفسه
وكمان موضة انت مش عارف انا مين
ماهو ده معناه ان كل واحد برضوة شايف نفسه فوق والباقى تحت
‏قال Desert cat
wanna b a physician
اه يا دكتور كله كوم وموضوع انت مش عارف انا مين ده كوم تانى
ولو جبت اصله ممكن تلاقيه لا شيئ اساسا
ربنا يهدى الناس
تحياتى

المشاركات الشائعة