اول الـغــيــث

هو انا مش قولت
يعنى اللى ما اخدش باله انى قولت العلاوة هتتعوض من جيوبنا كلنا نفر نفر يراجع البوست اللى فات
هو مش قالهم أخلقوا موارد علشان العلاوات
بدءوا فعلا يخلقوا الموارد
من الصبح
من الصبح مين ده من الفجر
نازلين حملات الله ينور على المحلات التجارية والغير تجارية
حتى اللى قاعد فى الشارع يقول حاجه لله يا محسنين برضه بيروحوا له
تلاقى موظف داخل شايل شنطة معفنة تحت باطه وتلاقيه داخل يقولك انا الاستاذ بتاع من الغرفة التجارية هات اوراقك
واوراق عيلتك كلها وجيرانك
خرج موظف الغرفة التجارية داخل 4 اشخاص وبرضه فيهم واحد شايل نفس الشنطة اللى كان شايلها الشخص الاول ... مباحث الكهرباء
اخر ايصال فييييييين
اسمك وسنك وعنوانك ومقاس جزمتك
خرجوا بسم الله ما شاء الله
مباحث الأموال العامة جت
وبقول مباحث الاموال العامة والكهربا مش قولت الاداب علشان الناس اللى بتسمع كلمة مباحث وتحرف الكلام على مزاجها والله العظيم لو آداب لاقول ومش هخاف من حد انا مبخافش غير من ربنا ....
نرجع لموضوعنا
هو فى ايه بقى
الموظفين يزيدوا 30 % وياريتهم 200 % كنا قولنا الزيادة تستاهل المهرجانات دى كلها
طيب هو بيشوف الاوراق اللى بيطلبها بياخد البيانات ليه بقى ؟؟؟
حد يقولى ومش سالتيه ليه السؤال ده جاية تقرفينا احنا ليه
هرد جوا قناة استاكيوس وانا صوتى عالى طبيعى واقوله وحياة الغاليين سالته ... رد السيد المحترم وقالى ده مجرد روتين .. ولما قولت له نفس الكلمتين دول سمعتهم قبل كدا من زميل لسيادتك من سنتين بالظبط قالى مجرد روتين وبعد ما اخد بياناتى راح واخد بعضه وطالع على القسم عاملى محضر إدارة سيبر بدون ترخيص ... حلو كدا ومقطط على مقاسى وابن ناس ... ... امال الملف اللى فى امن الدولة ده يبقى ايه بقى تهريج مثلا .. ولا اسمى اللى موجود فى جميع الجهات الحكومية والغير حكومية ... مزاج عندى الشهرة والنجومية ... متقلقوش مش اتحبست الحكم كان غرامة 100 جنيه حار ونار فى جتتهم
طيب ايه انا النهارده مليت بياناتى يجى 5 مرات كدا لو على كل محضر 100 جنيه يبقى 500 جنيه ... كل موظف يدخل البلوج بتاعى يبعت لى الـ 30 % اللى اخدهم زيادة من الحكومة حتى لو مش اتعملى محاضر برضه ابعتوا الزيادة اذا كان ده اول الغيث امال السيول هتبقى ايه ؟؟؟
معلشى سؤال واقف فى زورى .... هى العلاوة مش 30 % ... امال لو كان المرتب اتضاعف مرتين ولا 3 مرات كان ايه اللى حصل
؟؟؟؟؟؟

تعليقات

‏قال فاتيما
ربنا يكون فى عونك يا قطة بس غنتى عارفة أختك على الحميد المجيد بس لو رجعونى الشغل هشوفك برضو إحنا اخوات برضو ....
و ربنا يهد القوى بقى
و يفرجها علينا كلنا
أومال بعد أول سبعة هيحصل إيه ؟؟
‏قال Empress appy
كل محضر وانت طيب يا راجل يا طيب ههههههههه
تعالى اقعدي جنبي بقولهم فى الشغل النهارده قالوا ليه مش عندنا فوت علينا بكره يا سيد اخدت شنطتي وتزلت اصل ميعاد الشغل خلص هههههههههههههه
ما هى دي الكوره اللى قولنا عليها رابطنها فى ايديهم
‏قال Layla
ربنا معاكي...انشاءالله ده يكون اخر الغيث مش اوله

:)
‏قال وجهة نظري
إنتي لسه شوفتي حاجه، كله من دا يا حوش علشان تتربوا. مش عايزين زياده وعاملينلي إضرابات، ماشي متعيطوش بقي

السنه الجايه حيقولوهم تاخدوا 50% علاوه، حيوطوا علي ريجله يبوسوها ميزودش ولا مليم كفايه أوي كده
‏قال Heart Beat
Dear Desert Cat

هو كويس اوي ان ده اول الغيث

اصل الحكومة قصدها ان الشعب يبطل بقى يدعي و يقول العلاوة و المنحة و الزيادة و كلام الفلوس ده

عشان لو الشعب طلب زيادة تاني الحكومة هاتوريه سيول الزيادة و خيراتها اللي هاتغرق الشعب كله

ربنا يكفيكي شر بتوع المحاضر دول و الغرامات اللي بتيجي من وراهم

و مع اني مش من موظفي الحكومة المبجلة و لا اصابتني كرامات الزيادة التلاتينية الا اني هاتبرع لك بمبلغ الغرامات كله

هو احنا عندنا كام قطة مخربشة
‏قال Mafrousa
ياااااحليله....
والنبى ياقطتى لو لقيتى حد يسلفك تبقى تقوليلى علشان استلف منه انا كمان
‏قال ملك الكبدة
لولا الرقابة كنت قلتلك هيطلبوا ايه لو كانت الزيادة الضغف او تلات اضعاف

و عموما اللي ييجي منهم احسن منهم
‏قال انين الحزن
ياقتطي

عامله ايه ياقمر

انا زي ما قلتلك لو ليا نصيب في الــ 30% دول هديك 15% يله عيشي بقه

بس هما يجيوا وانا اظبطك

سلامووووووووز

وزة
امال يجيبوا الزيادات منين
تحياتى لكى
‏قال Tamer Nabil Moussa
لسة فى سيول ووبركان شايفة جاى من بعيد ياقطة

كويس واحمدى ربنا انهم مش قالوا انك خطعتى السيبر من واحد ههههه

خلينا نشوفك ياقطة


مياوووو

تحياتى
‏قال Abo 7anf
مهو كان باين من الاول
الزياده مفاجاه
ومش مقتنع انها مدروسه
و مهياش هديه
وكل شويه بيتقال عندنا ديون وعجز ميزانيه
فمينفعش تتطلعلنا زياده اذ بها فجاه
منين
ولو ينفع تتدبر الموارد مكان من زمان وحلينا مشاكلنا
‏قال أحلام عمرنا
ممكن انونو انا كمان
بصي انا اتقهرت اووووي بال 30% دول يطلعوا ايه يعني
تخيلي المرتب كده زاد معايا 50 جنيه
يا فرحتي يا سعدي يا هنايا
حتجوز بيهم واكون نفسي واحوش الباقي كمان واطلع اصيف بيهم في البيسين اللي ورانا
ايه الذل ده
الدنيا بتولع اضعاف اضعاف ويقولولي 30% يا ناس حرام عليكمم بجد
يرضي مين ده بس
انا مكسوف اقول الاساسي بتاعي كام بس كفايه اقولكم اني موظف حكومه لكم ان تتخيلوا بقى
ربنا يستر علينا
‏قال wanna b a physician
كانوا اخدوا السيبر نفسه وقالولك عليكم ايجار فى البيت ونور وزبالة واقامة شادر بدون اذن وسرقة كهربا للشادر ده ودقى يا مزيكا
‏قال shreen
دة انت مستقصدينك بقى
يا ترى دة المحضر رقم كام؟


ادارة سيبر بدون ترخيص

و100 جنيه غرامة
والراجل اياة بتاع اشنطنة المعفنة

ايه يا بنتى دة؟

هو ايه اللى بيحصل

علشان الزيادة
هيدفعونا ضريبة حرق دم عليها

على كل حال
انا عارفة انك قطة عند اللزوم
واسد عند االزوم برضه

كل الحب
‏قال Eldebug
ههههههههههههههه
كويس اوى كده ده احنا نبوس ايدينا وش وضهر ... ده انا من يوم ماقال الخبر ده وانا عمال بدور فى كل الجرايد على خبر واحد

عرض الهرم الاكبر للبيع

بس الحمد لله انتى كده طمنتينى
‏قال Rania Lelah
بجد بداو يعملوا كدة
طب هاروح استخبالى يومين بقى
و متقوليش لحد على مكانى
:)
طب احنا مالنا و مال العلاوة
دى للحكوميين و احنا مش حكوميين و شكلنا لحد ما انموت مش هنبقى تبعهم بردة
طب ليييييييييه
لنا الله يا قطتى

تحياتى
:(
‏قال الربان
تحياتي

المشكلة اننا الدولة بتقول شيء و تعمل
نقيضه....بيقولوا بنشجع الشباب ان يكون له مشاريعة للتخلص من البطالة
و يقفلوا في وجوههم الابواب...فلا يستطيعوا ان يستخرجوا تصاريح رسمية..


بينما لرجال الاعمال الامور ايسر...
رجال الاعمال يحصلون علي الطاقة باقل
من سعرها...و الشباب يدفعون ما تمليه
عليهم شركات الكهرباء...

لو اردنا تشجيع الشباب بجد...و القضاء علي البطالة...لابد من تيسير اجراءات التراخيص للشباب..
وإعفائهم من اي رسوم...و محاسبتهم بالنسبة للكهرباء كما يحاسبوا رجال الاعمال ...الذين يستفيدون من دعم
الكهرباء و الغاز...و مصانعهم كثيفة
استخدام الطاقة...

تحياتي و تقديري
‏قال الربان
اختي الفاضلة قطة الصحراء

لا أجد ما يفيك حقك...من ردك الكريم
علي المجهول الذي دخل و علق في مدونتي
علي بعذ زملائنا المدونين الاخرين...لم يعلق علي الموضوع المكتوب بمدونتي و لكنه
استغل مدونتي لمهاجمة أخرين..

حقيقي كل كلمات الشكر لا تفيك حقك..
لكن هذا ينم عن معدنك الطيب الاصيل.

اعتزازي و شكري و تقديري.
‏قال Migo Mishmish
لا ده اللي غلب وغطي عالكل قانون المرور الجديد. الغرامه من خمسين جنيه بقت 300 جنيه واللي هيركن عربيته في الشارع هيتسجن والتاكساجي اللي مش هيركب الناس هيخش السجن وغرامة الحزام للسواق و300 للي جنبه300.يعني ان شالله اللي هيروح يجدد مش زي زمان هيلاقي عليه 2000 او 3000 جنيه مخلفات خدها في حتت ما يعرفش هي فين اصلاً لا هتلاقي عليه غرامات بتاع 1/2 مليون جنيه كده في التوت
اجدعها عربية فيكي يا مصر مش هتلاقي اللي يشتريها ب 20 جنيه لا قال وانا كنت زعلانه من كام يوم ان انا وميجو معندناش عربيه واتاري -بالمسيحي "كل الاعمال تعمل معاً للخير للذين يحبون الله" وبالاسلامي "عسى ان تكرهوا شيئاً وهو خيراً لكم"- شكراً يا رب وسامحني علشان مافهمتش العبرة من اني معنديش عربية
love,
MishMish
love,
MishMish
‏قال Unknown
بعتذر جدا للتعليق خارج الموضوع
أرجوا زيارتى لأمر هام ضرورى

و لكم جزيل الشكر
‏قال همس الاحباب
ههههههههههههه
هى جات فيكى يا قطة
يلا ولا يهمك دول30% للحكومة بس ولسه القطاع الخاص يعنى المحاضر اتبقى زى الرز مع انى لسه ما اخدتش العلاوة بس انا متبرع بيهم علشان القطة وكل محضر وانتى طيبة يا قطة
مع انه لو كان حبس ايكون احسن كنا انجيب عيش وكباب
تحياتى يا قطة
‏قال Dr. Diaa Elnaggar
والله حقولك حاجة، القانون مش وحش، بس يطبق على الجميع بلا استثناء. وهي دي المشكلة الأساسية في مصر: الفساد على كافة المستويات، وخاصة المحليات والإدارة، ولذلك لا تجدي تعاطفا من الشعب تجاه من يقومون بتفنيذ القانون لعلم الشعب أنهم لا يفعلون هذا مع الجميع وليس حبا في سيادة القانون بشكل عام !!!!!! 0

هو بس سؤال صغير: السيبر ليه من غير ترخيص؟

عميق تحيتي وخالص مودتي
‏قال بحبك يامصر
ربنا ينتقم منهم هما هيعملوا فينا ايه تااانى؟
وفى كمان تلميح لزيادة المواد البتروليه الجاز والبنزين
سعنى هيلموهم فى يوم ولا اتنين اضعاف
‏قال Desert cat
فاتيما
طيب ما ترجعى بسرعه الشغلي ا تام يوسف اهم التلاتين جنيه ينفعوا فى الايام دى اختك فى زنقه
ههههههههههههه
والله انتى طيبة اوى ربنا يخليكى
بعد سبع بقى
هنبيع عفش البيت وهدومنا ان شاء الله
ربنا يتولانا برحمته
تحياتى
‏قال Desert cat
appy
ربنا يستر يا آآبى اصل انا بقيت اشهر من فيفى عبده فى الاقسام والمحاكم
هههههههههههههه
المشكلة ان المحاضر بتتعلم وانا بتفاجأ بالغرامة بعد كدا
مش يبعتوا لى حد يقولى مثلا او ينذرنى وحياتك ما بيحصل
ربنا ينتقم حار ونار الفلوس بتاعتى اللى بياخدوها
‏قال Desert cat
M@RV3L
يارب يا مارفل
‏قال Desert cat
وجهة نظري
انا اول ما شوفت الخبر على مصراوى دمى اتحرق والاضراب ماشاء الله ما شاء الله النهارده يعنى كل الناس نزلت راحت اشغالها وبيغنوا كايده العزال انا من يومى ايوه اه
وبيهدوها للريس علشان كاد الشعب كللللللللله
‏قال Desert cat
Heart Beat
انا والله ماليش دعوة يا قلبى بالزيادات دى ولا حتى النقصان
هما يزودوا الموظفين وياخدوا مننا احنا نفر نفر
طيب مش يخلوا عندهم ذوق ويدفعوا لنا كل شهر 2 جنيه علشان نقدر نصرف على المحاضر بتاعتهم
هو لحد دلوقتى مفيش حاجه وربنا يستر
عارفه طول عمرك ذوق وكريمة ا حببة قلبى امال هو مش كدا ليييييييييه
انت بس اللى حتفهمى قصدى
هههههههههههههههه
تحياتى
‏قال Desert cat
واحدة مفروسة
انا محتاجه اخد كورس من عبده الرايق فى تقليب البشرية
وساعتها هستلف لك معايا ولا يمكن اخليكى تقولى لحد سلفنى وانا على وش الدنيا
نورتينى
‏قال Desert cat
ملك الكبدة
هههههههههه
قول ومش تخاف من اى رقابات هما كلها يومين وهنقول ما فى الخمر
ربنا يسترها علينا جميعا
‏قال Desert cat
انين الحزن
انا الحمد لله يا وزة يارب تكونى بخير
هتدينى 15 % بس يا وزة طيب خليها 20 % والباقى هاخده من اى موظف حكومة تانى
عموما كتر الف خيرك يا حبيبتى على الاقل الموظفة الوحيدة اللى قالت لى هدفع لك
ههههههههه
نورتينى يا جميله
‏قال Desert cat
رئـــــيسـة حزب الأحلام
اى اختراع يختروعوه ياخدوا فلوسه من جيوبنا
بيقولوا فى موضه دلوقتى اى لبس من غير جيب خاااااالص
‏قال Desert cat
Tamer Nabil
اه ربنا يستر والاقيهم بيقولوا انى سارقااااااه
هجى لك حالا يا تامر انا اقدر اتاخر
تحياتى
‏قال Desert cat
Abo 7anf
هو اخد قرار مفاجئ علشان عارف اننا شعب جبان اى حاجه هيفرضوها علينا هندفع وكله هيتعوض من جيوبنا
ربنا يستر بقى
تحياتى
‏قال Desert cat
أحلام عمرنا
طبعا اسمح لك تنوتنو وتخربش كمان
مرتبك ذاد خمسين جنيه يعنى الاساسى بتاعك 150 جنيه
بتعمل بيهم ايه بقى
دول حتى مش مكفيين مواصلات
والله ربنا معاك ومعانا
‏قال Desert cat
wanna b a physician
ههههههههههه
لاء انت مش واخد بالك يا دكتور
هو دلوقتى انا واللى زى بنشتغل عندهم اه والله مش مصدق
ما احنا بنشتغل طول الشهر علشان ندفع فواتير الكهربا ورسوم النظافه للشوارع المعفنة
ولما ينفذ كل ده ومندفعش بعد ما نفلس مش تقلق هيعملوا اللى قولت عليه
‏قال Desert cat
shreen
مش انا لوحدى يا شرى
مش مخليني حد غير وكابسين على نفسه
ده انا كل شوية كنت الاقى حد جاى يسالنى انتى جالك بتاع الاموال اه
وبتاع مباحث الكهربا
وباع الروبابيكيا هو الى كان ناقص
وكلنا متنحين ومذبهلين اخر ازبهلال
ربنا يستر
‏قال Desert cat
Eldebug
هههههههههههههه
الحمد لله جت فى الشعب
هما شايلين الهرم لحاجه كبيرة
‏قال Desert cat
Rania
بدءوا بالفعل يا رونى
فى ناس متزوجيني ويعولوا عارضين ملابسهم للبيع علشان يدفعوا للحكومة
هههههههه
مش تقلقى تعالى استخبى عندى والله تنورينى ومش تخافى محدش هيقول على مكانا
تحياتى
‏قال Desert cat
Rania
بدءوا بالفعل يا رونى
فى ناس متزوجيني ويعولوا عارضين ملابسهم للبيع علشان يدفعوا للحكومة
هههههههه
مش تقلقى تعالى استخبى عندى والله تنورينى ومش تخافى محدش هيقول على مكانا
تحياتى
‏قال Desert cat
الربان
ده لو يعملوا معانا كدا انا كنت اضرب اى حد يذكر كلمة اضراب على لسانه
وبعدين ايه التناقض الغريب ده
رجال الاعمال بيدعموا لهم كل ده واحنا بياخدوا منا علشان يدعموا لهم
البلد فيها كل الموازين مقلوبة نورتينى استاذى العزيز
‏قال Desert cat
الربان
استاذى الغالى
احنا مفيش بينا حاجه اسمها شكر لان كلنا اسرة واحدة واخوات نختلف فى وجهات النظر او نتفق بذوق واحترام لان مش كلنا عقل واحد او تفكير واحد
احنا اسرة واحدة واللى يضايق اخ او اخت لينا يبقى ضايق الاخر شخصيا
دمت بكل خير اخ وصديق غالى افخر به دائما
‏قال Desert cat
Migo Mishmish
مشمشه الجميلة
عاملة ايه وايه اخبار البلكونات الصغنونة هههههههه
يارب يجو بالسلامة
القانون انا لسه قارية الخبر النهارده فى المصرى اليوم ان مجلس الشعب رفض القانون ولاول مرة فى التاريخ مجلس الشعب يرفض شئ حتى الاعضاء اللى دايمن منافقون قصدى موافقون
تحياتى ليكى يا جميلة
ويارب انتى وميجو يبقى عندكو فى القريب العاجل احلى عربية
‏قال Desert cat
عاليا حليم
انا مش قابلة اعتذارك
لان المدونة مدونتك ومن حقك تكتبى فيها اى حاجه وفى اى وقت
انتى بس تعالى نورينى كل يوم
‏قال Desert cat
همس الاحباب
اااااااه
شكلك شمتنا يا خالد
لاء بجد باين عليك شمتان
انا لو شوفتك هقتلك
احترس يابنى واوعى تنزل الشرقية الايام دى تحديدا
‏قال Desert cat
Dr. Diaa Elnaggar
انا متفقه مع حضرتك ان القانون مش وحش فى حالة لو اطبق على الجميع وميبقاش قانون لخراب البيوت وبرضه مش اقول عليه مش وحش
انما اجابة السؤال فهو لو كان فعلا السيبر من غير ترخيص كنت استمريت لحد دلوقتى ؟؟؟؟؟
انا مرخصة من امن الدولة يا فندم وعندى بطاقة ضريبية وسجل تجارى وكل اوراقى تمام واى حاجه يقولوا عليها بنعملها جميعنا مش انا لوحدى
لكن علشان اى امين شرطة اتعود لو دخل عندك وخرج من غير ما تمد ايدك فى الدرج وتديله الى فيه النصيب بيعمل اللى على مزاجه حتى لو كانت اوراقك صحيحة
وكمان لما اتحكم عليا بالغرامة روحت المحكمة علشان اعمل معارضة مش علشان المبلغ انما علشان انا محبش ادفع حاجه بدون وجه حق وازاى يتحكم عليا وانا معرفش ازاى اتفاجا بغرامة يعنى والمفروض انى ادفعها هناك قالوا لى اتلغت دلوقتى اللى بعمل معارضة بس اللى محكوم عليه بحبس اما انتى يا حلوة لازم تدفعى وقد كان
بعدها بشهرين بالظبط اتفاجأت بحكم غرامة تانية وده كان لا شوفت امين شوربة ولا مخبر حتى ولا حد عبرنى لما روحت تانى وسالت اصل اصلا انا بعز المرواح هناك اوى لان مجمع المحاكم قدامى مباشرة
قالوا لى ملناش دعوة ادفعى وبعدين نوحى براحتك
بعدها فكرت انى انصب على بنك او اعمل اى حاجه واهرب بره البلد فى الحاله دى هيقفوا المسؤلين يقولوا لى باى باى طريق السلامة يا جميل
وادى القانون اللى فى بلدنا سيادتك
احترامى وتقديرى
‏قال Desert cat
بحبك يامصر اللهم امين
اان بكتب لك الرد دلوقتى واذان العشا شغال
حسبنا الله ونعم الوكيل
فى اللى يجى على الشعب الغلبان
‏قال Dr. Diaa Elnaggar
كده الصورة وضحت. وربنا معاك. بس تحية كبيرة ليك انك سيبتك من شغل الحكومة وجربت نفسك في مشروع السايبر دا. وربنا يعينك على الفساد والمفسدين.

عميق تحيتي وخالص مودتي
‏قال Desert cat
Dr. Diaa Elnaggar
اشكرك جدا دكتور ضياء
شرفتنى جدا يا فندم
احترامى وتقديرى لحضرتك
ههههههههههه
ربنا على الظالم
عارفة بقى لو المرتب زاد 3 مرات
كان حصل ايه ؟
حصل خييييير إن شاء الله
و لسه الاسعار حتولع اكتر
و لسه مصاريف المدارس و الكليات الحكومية حتزيد اكتر و لسه رسوم استخراج اى حاجة من اى حتة حتزيد
و لسه و لسه
تحياتى ليكى
‏قال إنسان || Human
ههههههههه...كانوا ضربوا نار
وعملوا فرح العمده ...إنتي عارفه
إحنا شعب عبيييييييييط
‏قال روح شرقيه
انت عن جد مش عاديه
دمك زى السكر
انا هلكت من الضحك هو لسه فى حاجه اسمها سلف
هههههههههههههههههههههههههه
ربنا يكون فى عون الناس ويكرمهم
بجد اسلوبك مجرم
فى سرد الاحداث
تحياتى
امال لو كان المرتب اتضاعف مرتين ولا 3 مرات كان ايه اللى حصل



سؤال وجيه جدا محتاج لاجابة


دمت بخير
ماكانش اتعذر ولا كل جزر ... مافيش
لا علاوة ولا دياولو دخلت بيتي

العلاوة دي لا دخلت بيتي ولا شميت ريحتها
ممكن آه الأسعار هاتولع علي حسها
عادي أيه الجديد ماهو ده الطبيعي
ممكن آه الضرايب هاتذيد عشان مايطلعش الريس صغير قدام موظفين حكومته
و كل علاوة وانتي متأشطة
‏قال غير معرف…
قطتنا العسل

كده يعملوا فيكم كده؟مش كلام ابدا
ماحنا قلنا ياقطه اللي حيدوه باليمين حيرجعوا ياخدوه بالشمال

كنت بسمع تامر امين من فتره في البيت بيتك و كان مستضيف وزير النقل بتاع شيفورليه و اوبل
كان بيقول انه حيرفع اسعار القطارات بتاعت الدرجه الأولي عشان يحسن الدرجه التالته قوم تامر يقول ايه؟ماشي مفيش مشكله احنا راضيين المهم ان الخدمه بتاعت الدرجه التالته تتحسن
مافهمتش الصراحه يعني ايه راضيين ؟مايتكلم عن نفسه
لأ و المستفز يقولك اوكي احنا نقدر ندفع
حاجه بجد مستفزه ال نقدر ندفع
و لا اتكلموا علي الدرجه الاولي ال يعني ميه ميه

معلش ياقمر ماتزعليش نفسك
احنا كلنا فداكي
انتي بس قولي لازمك كام و يجيوا لحد عندك علي طوووول احنا عندنا كام قطه
:)))
تحياتي ياقمرايه
‏قال اهو ده عيبه
ولسه ده اول الغيث
بكرة يطلعوا الزيادة دى على جتت الناس كلها
يعنى اللى ادوه باليمين هياخدوا اضعافه بالشمال
‏قال Desert cat
مواطن مصرى نايم
ااااااه
ربنا يبشرك بالخير يا اسلام
تحياتى
‏قال Desert cat
Human
احنا شعب يجمعه الناى ويفرقه العصا
عمرنا ما هنتغير
طيب هى العلاوة اصلا لسه فى علم الغيب لما يدبر الموارلد لهم من دمنا ودمهم برضه
تحياتى
‏قال Desert cat
روح شرقيه
يارب دايما سعيدة وفرحانه ومبتسمة
نورتينى يا جميله
‏قال Desert cat
صاحب المضيفة
اه انا برضه بقول كدا
‏قال Desert cat
مفقوعة مرارتي من حماتــــــــــــي
طيب لو عندكو عربية الحقوا بيعوها اصل اسعار النبزين هتزيد الضعف والعربيات هتبقى برخص التراب
تحياتى
‏قال Desert cat
اجندا حمرا
تعرفى انا بقرا ردك حاسه بكلامك وبانك متضايقة علشان تامر امين اتكلم على لسانا كلنا وده فعلا لانك انسانة رقيقة وبتحسى بالناس وهمومها
انما جيت عند اخر سطر وكنت هعيط وحياة ربنا
بجد انتى انسانة جميلة اوى وقلبك طيب
ربنا يخليكى ليا ولا يحرمنيش منك ابدا
وعموما يا ستى ولا تنقلى هم انا الحمد لله معايا لهم الغرامات بتاعتهم وحار ونار فى جتتهم
انما لو اتسجنت ولا حاجه خليكى جاهزة بمحامى
ههههههههههههههه
تسلمى لى يارب يا ارق بنوتة فى الدنيا
‏قال Desert cat
اهو ده عيبه
هما لسه هيطلعوا
ما هو خلاص طلعت والقادم اسوأ
تحياتى
ازيك ياقطه .. تصدقي ياقمر اني اول ماقريت البوست دا مكدبتش خبر ورحت قفلت السيبر 3 ايام ..
قلت الطيب احسن اروح اجدد ترخيصي بالتي هي احسن انا اصلي مجربه دخلتهم ولاد الايه
وبعدين هو واحد يجي تلاقي الباقيين وراه تقوليش عقد واتفرط
بس وربنا حاطه ايدي على قلبي
خصوصا ان كل تجديد تلاقي الدنيا بحالها جايه تاكل عيش على حس المعاينه والمتابعه والسؤال والبحث والتمحيص والموافقه و..............
وربنا يعمر بيوتهم
‏قال Desert cat
حبيبـــــــة القمـــــر
ايه ده انتى عندك سيبر
تعالى جنبى هنا يا زومل
انا مجربة كل الحاجات دى
تعرفى مرة واحد مخبر طلب من ى فلوس بلسانه وقولت له مش معايا فكة كانى بشحته والله قولت احرجه لانه كان بجح قالى ها اجى لك بكره
واقسم لك بالله جالى فعلا تانى يوم
ده حاجه اخر ارف
ابقى طمنينى انتى عملتى ايه
اومااااااال ياقطه بتتطلب بالبق وبتتمد الايد مترين كمان لحد ماترجع مليانه بحنطورين على ماتفرج
المصيبه انك لما تمشي صح تلاقي الكل جاي يصطاد ولما نقول مش هنجدد متشوفيش حد فيهم غير فين وفييييييين
بس الامر ميسلمش بردو
والواحد بيقول امشي عدل تحتار المصنفات واخواتها فيك
‏قال Desert cat
حبيبـــــــة القمـــــر
هههههههههههه
فكرتينى بالموظف بتاع رسوم النظافة لما كان قارفينى كل يوم جاى عايز 120 جنيه وكان حظه اسود جاى فى يوم انا مزاجى فيه زفت والشارع كان مليان زبالة
وقولت له عايزنى ادفعلك 120 جنيه على المنظر ده قالى وانا مالى هتدفعيهم غصب عنك قولت له خلى عندك ذوق فى الكلام قالى يا ستى انا بلطجى انا جاى ابلطج عليكى وهتدفعيهم يعنى هتدفعيهم قولت له طب امشى اطلع بره
قالى طب وحياة امى لاروح ارفع عليكى قضية تبديد
قولت له برررررررره احسن اقسم بالله اطلع دلوقتى اعملك قضية بلطجة ورشوه والف من يشهد برررررره وكان صوتى جايب من اخر الشارع الراجل اتخض باين لاقيته خد بعضه وجرى
ومن بعدها مش شوفته بس شكله راح فعلا رفع عليا القضية
عادى ما انا متعووووودة دايما على القضايا والغرامات

المشاركات الشائعة