هو كله ضرب ضرب مفيش شتيمة

كل لما ادخل المصرى اليوم الاقى فى الصفحة الرئيسية صورة نظيف بيه اللى اثناء حلفه اليمين حلف ينظف جيوب الشعب وجنبه مانشيت طويل عريض يا اما زيادة فى الاسعار يا اما الاسعار فى زيادة
نفسى مرة قبل ما اموت اشوف كلمة زيادة فى المرتبات
مرة واحده بس فى العمر ياباشا وهدعيلك
ابشروا بقى
الدقيق الفاخر سعره زاد ....يعنى مفيش كيك ولا بسكويت بعد اليوم ... برضه الزيت سعر زاد .... لا قلية بعد اليوم ماله المسلوق يعنى ده حتى صحى ومفيد وهايل جدا فى الريجيم على الاقل الشوارع مش هيبقى فيها زحمة وهتبقى رايقه شوية ... اصلى كل لما اشوف واحده ماشية احس انها زحمة لدرجة انى بتخيل ان فى حد تانى لازق فيها ماشى وراها بس فى الاخر بكتشف ان كل ده واحد ... بدل بدل ما حتبقى اتنين فى واحد حتتفك وحتبقى واحد لوحده بس شوفتوا الحكومة قلبها علينا ازاى والنبى انا قربت احب الحكومة دى .. بس انا خايفه لما نبطل قلية وناكل مسلوق يقطعوا علينا المية هى اينعم كدا كدا مية مجارى وحمير ميته ومخلفات مصانع بس اهو الموجود يسد انما يقطعوها خالص كدا ارجع فى كلامى واكرههم .... قبل ما انسى كمان السكر برضه سعره زاد

وده الخبر اللى يفتح النفس على الصبح
الحكومة ترفع سعر الدقيق الفاخر والزيوت للمرة الثانية خلال أسبوعين

تعليقات

‏قال walaa
لا حول ولا قوة الا بالله كده يا قطه على الصبح كده مش عارفه الواحد هيعمل ايه بعد كده هما عايزين ايه بالظبط
بس انت عارفه احنا اللى ساكتين على المهزله دى

ولاء
‏قال ملك الكبدة
يا خسارة فاتني اول كومنت

يالا البركة في ولاء

المهم ماري انطوانيت قالت لو الشعب مش لاقي ياكل بسكويت مكن ياكل جاتوه

انا بقول طالما هيبقى في ازمة في الكحك و البسكويت و البيتي فور

يبقى ملك الكبدة بينصح الشعب في الحالة دي انه ياكل دانش و سفلادة

ولا اقولكم عربية الكبدة مفتوحة
‏قال Empress appy
اممم
انتى بقيتى بنت هقوده ليه كته على الهكومه بتاعتنا مس هرام عليكى
وبعدين مس لازم يعنى زيت زيت العربيات كويس انتم مش فاهمين الهكومه بتاعت الاحنا بتهافظ على صهتنا
ايه ما علينا مش انا اكتشفت نظرية الغلايان بتاعت الزيت من بدرى واستبدلتها بغليان المياه هههههههههههههه
حرام عليكى بقى انا ناقصه ماعلينا انا كده زعلانه علشان الشوكليت بووول بتاعتى اللى بجيبها من مونجينى هتغلى
وبعدين مين طلع اشاعه دقيق فاخر ده
اسمها هاله فاخر بطلوا جهل
‏قال Unknown
انتي كده زي القطط تاكلي و تنكري
مش سايبينلك الهوا ببلاش ولا هاننكر بقي يا شعب قليل الادب
عايزين ايه تاني
الحكومه هاتعمل ايه ولا ايه سيبه البني آدم رخيص و متالوش تمن تعمل ايه تاني

سلام يا قطه
‏قال Desert cat
walaa
ما انا مقدرتش استحمل للظهر يا ولاء قولت لازم الخبر يبقى على الصبح مع ممج نسكافية من غير سكر علشان السكر غلى ومن غير كيك علشان الدقيق كمان غلى
طبها العيب فينا احنا
الناس بصراحة احتاروا فينا وعملوا فينا ما لا يعمل واحنا خرس مش بننطق
‏قال Desert cat
ملك الكبدة
ازيك يا حضرة الملك
مع ان المفروض ان كلمة الملك دى حكر لشخص واحد بس والمفروض انت تغير اسمك
بس حسيبك شوية لو مش غيرت كلمة الملك هبهدلك فى محكمة الاسرة
المهم ياباشا
مش مهم بقى الشعب ياكلايه المهم اللى حاكمين الشعب جيوبهم تبقى عمرانة
الاهم بقى من كل ده
انا مش عارفه اضيف عندك اى كومنتات نافذه الكومنت مش متنشطة تفتكر انا دخلت فى وقت القيلولة وعملت لها ازعاج علشان كدا اعترضت ومش رضيت تخلينى اكتب فيها
شوف لنا الموضوع ده الهى يكرمك
‏قال Desert cat
appy
اه انا بحقد عليهم بصراحة اصلهم بيرفعوا الاسعار ومبيدونيش نسبة من الزيادة دى
مش المفروض يسكتونى بحاجه علشان ابطل اجيب فضايح فى المدونة
‏قال Desert cat
EmY
انا مش عايزاها تعمل حاجه
بس تفضل واقفه كدا
يعنى لا تزود ولا تنقص
ممكن تقولى لهم ؟؟ووقتها حبوسك بوسة كبيرة
‏قال خمسة فضفضة
السلام عليكم ورحمة الله وبركاته

اه يا قطه بتقلبي علينا المواجع ليه

انهارده جبت ازازة زيت عباد شمس لقيتها ب 9جنيه وربع استغربت لاني كنت لسه شاريه واحده زيت دره بتسعه بس من كام يوم

منهم لله ربنا يورينا فيهم يوم
‏قال MAKSOFA
مافيش عيش كلوا جاتوه

--------------------
أشكرك على الزياره وعلى مشاعرك الرقيفه
يا ترى سعر العسلية زاد ؟؟ بصراحة كله يزيد سعره إلا العسلية .. و لو سعرها زاد هازعل
أنا كاتب عن الغلاء برضه بس غلاء تاني خالص

و المية مكتوب في جريدة الدستور إنهم حيغلوها بنسبة 200% يعني حتى المياه غليت
حسبنا الله و نعم الوكيل
‏قال DR.HAMAS
هههههه

طيب كويس ان مفيش شتيمة

و بعدين المية الملوثة = مفيش مية

ده لو مفيش مية و منعوها كان احسن

لانهم بيموتونا بالبطئ

ازعلى منهم ازعلى

ربنا يبدلنا خيرا منهم عن قريب



د.حمـــــاس
‏قال david santos
Hi cat

Excellent post!
Thank you.
have a good day
السلام عليكم
هو فعلا كلة ضرب ومفيش شتيمة
هي الحكومة كده بتضربنا وخلاص
اي حاجه دلوقتي بتغلي مش الدقيق بس
ولا زيت ولا الحاجات دي بس كلة بيغلي وبيغلي زيادة عن اللزوم بس العيب مش عليهم العيب علي اللي راضي بالمهانة دي وواقف مبيعملش حاجه وراضي باللي هو فية
تحياتي ليكي
‏قال Unknown
مفيش عيش
كلو بسكوت
حسبى الله ونعم الوكيل
رغيف العيش بقى بربع جنييييييييه
‏قال أبوشنب
شعب حقير صحيح

وايه يعني لما السكر يغلى

ده كله عشان الحكومة بتحب الشعب وعايزاه يغني مع بعضه

والسكر غلي وانا احلي بايه
عادى جدا يا خونا افهمو وجهه نظر الحكومه الحكومه جالها عرض مغرى انها تعمل مصر ملعب جولف كبير وطبعا الزياده السكانيه واقفه حال ضد المشروع القومى فهما ابتدو سياسه تجويع الشعب حتى الموت برفع الاسعار
يلا بقي هنعمل ايه بنأخد علي قفانا وساكتين
هتخليني اعيط يعني مش هاكل بسكويت بعد كده ععععععععععععععع
مهبول
‏قال Desert cat
خمسة فضفضة
بقول لماما الصبح الزيت سعره زاد والسكر لاقيتها بتبص لى من فوق لتحت وبتقولى هو انا ناقصة حرقة دم على الصبح ان شاء الله الاخبار دى مش اكيد
قولت لها يا ماما الدكتورة خمسة فضفضة كانت جايبة ازازة زيت ب9 جنيه اشترتها امبارح بتسعه وربع .. لاقيتها بتبص لى باستنكار وبتقولى خمسة فضفضة ربنا يكملك بعقلك يا بنتى وسابتنى ومشيت
‏قال Desert cat
MAKSOFA
الشعب بيتبطر على الجاتوه
حبيبتى انتى شرفتيى البلوج
المهم انا جاية العزومة
‏قال Desert cat
ابن حـجـر الـعـسـقـلانـى
طيب تعالى نزعل سوا بقى
اصل العسلية سعرها زاد والمصاصة كمان
‏قال Desert cat
مهندس مصرى
ما انا شوفت الموضوع
بس الحمد لله الوضع عندنا مطمئن
‏قال Desert cat
DR.HAMAS
لاء ما هو انا زعلانه منهم خالص
لانهم ادونا على قفانا فى كل حاجه
واحنا مبسوطين بيهم وساكتين
‏قال Desert cat
david santos
thank's dear
have a good day to you
‏قال Desert cat
شاب نفسة يحقق حلمة
المشكلة ان الجميع بيعترض بينه وبين نفسه
تيجى تفوله اعمل حاجه يقولك وانا مالى عندى عيال عايز اربيها
الناس فضلت تمشى جنبى الحيط من الخوف لما بقوا زى الحشرات ماشيين جوا الحيط ولا حد قادر يتنفس
احنا اللى نستاهل برضه
‏قال Desert cat
لماضة
دلوقتى يا حبيبتى ولا عيش ولا بسكويت
احنا ناكل فى نفسنا بقى
‏قال Desert cat
أبوشنب
مش كدا برضه
احنا نقعد نغنى على خيبتنا
والضرب اللى بناخده على قفانا وفرحانين بيه
‏قال Desert cat
رئيس جمهوريه نفسى
تصدق وجهة نظر برضه
وانا بقول بيجرفوا فى الاراضى الزراعية ليه
الدور بقى على البنى ادمين
ما هو المعلب ده برضه اقتصاد
انت ضد الاقتصاد ولا ايه ياريس
‏قال Desert cat
مهبول ومهبوله
لا هتاكل بسكويت ولا عيش
كل بؤصمات
‏قال مروة الزارع
يا حبيبتى افهمى

الدقيق الفاخر والزيوت دى رفاهية

خلاص الشعب استغنى عنها

اةةةةةةةةة ياااانا

حسبى الله ونعم الوكيل
‏قال Desert cat
مروة الزارع
يا مروة يا حبيبة قلبى احنا مش اتسغنينا عنها احنا اجبرنا على الاستغناء عنها
انا كان فى بسكويت بفطر بيه ب3.50 جنيه الصبح رحت اجيبه لاقيته ب 4 جنيه مالها يعنى شوربة العدس ولا بنص جنيه فول بس امانة عليكى انا عارفاكى جدعة وبميت راجل لو جرا لى حاجه تاخدى بحقى
منهم لله
‏قال Zika
واضح زي ما بيقول جرنال المصري اليوم
ان الست اسعار هانم ماشيه علي حل شعرها
‏قال Desert cat
Zika
هو مش ن الأوان تلاقى اللى يلمها ولا هو يعنى الناس ناقصة
دى اسعار هانم دى زادت عن حدها اوى
‏قال Heart Beat
و بعدين يا قطة ايه اخرتها مع الناس دي واخدنا على فين كده

مافيش يوم الا اما تحصل فيه مصيبة زي دي كل شوية يرفعوا سعر حاجه و سلعة مهمة

الناس دي ماعندهاش لا قلب و لا ضمير و عايشيين بينا اساسا

لو كانوا حاسيين بينا ماكنش ده بقى حالنا

الناس خلاص فاض بيها و الطوفان خلاص على الابواب
‏قال kikooooooooo
سلاموووووووووووووووو عليكووووووو

ليه بس كده البوست ده الواحد ما بيصدق ينسي ارتفاع سعار كل حاجة في كل حاجة

أنا لما والدتي دلوقتي تقولي انزل هاتلي طلبات باروح واخد ضعف الفلوس اللي كنت باخدها قبل كده
واقولها يمكن الحاجات تغلي لحد ما وصل للسوبر ماركت

بس للأمانة بضرب الباقي في جيبي .. إوعي تقوليلها ولا حاجة لاحسن تقفلي البلوج

بس بجد أنا مش عارف نفسي أقول لحكومتنا الرائعة جدا ( إلي متي ؟؟؟ ) اللي احنا فيه ده

ونفسي أقول لشعبنا اللي ألذ من الحكومة ده ( إلي متي ؟؟؟) الصمت

بس في حاجة أنا ما بحبش المسلوق .. أعمل ايه

كان معكم ..,
كيكووووووووووووو
‏قال Hypatia
عزيزتى
البوست اللى فات اثر فيا اوى
ربنا يرحمه رحمه واسعه ويعوضك خير وتقابلى من النهارده وكل يوم ناس تقف جنبك وتحبك لوجه الله وانا كمان معاكى كلنا محتاجين لسند فى الدنيا دى



زى ما قلت عند مهندس مصرى احنا فى علينا مؤامره الحكومه حالفه ع المصحف تسرقنا لاخر قرش وتموتنا بحسرتنا وتخرب كل بيت مصرى
لكن ربنا منتقم جبار عادل ميرضاش بالظلم
ربنا معانا
‏قال الربان
تحياتي

الاسعار بترتفع عشوائيا...و ارتفاع غير مبرر... احيانا يقولوا الاسعار العالمية
و احيانا يقولوا الدولار...و احيانا يتركوا الناس تضرب رأسها في الحائط و يستخسروا التبرير او الشرح...

كيف يشعر المسؤلون بلهيب الاسعار و الفقراء...و طوابير الخبز.... و كوب الشاي المفضل لدي عامة الشعب...كيف
يشعر مسؤول بزحام المرور...و مشاكل الناس اليومية ...و هم بداية من رئيس
الوزراء الي الوزراء لهم ركب مرافق يفتح الطريق من أمامهم و يعطلوا خلق الله...كيف يشعروا بنبض الاغلبية الساحقة...الفقيرة و من هم فوق خط الفقر بدرجة...و هم لا يختلطون بالناس
و لكن اغلقوا الدائرة عليهم سواء بارادتهم او بارادة الحاشية من حولهم
الذين دائما يقولون كله تمام و ليس بالامكان أحسن مما كان.

كيف يشعروا...و الاعلام الرسمي يمجد و ابواق المبشرين بالفردوس و النعيم
و يسبحون بحمد التطور الاقتصادي...و استرداد الاقتصاد لعافيته.

المستشار جودت الملط ، رئيس الجهاز المركزي للمحاسبات ، قدم تقريره الي
مجلس الشعب ...و به ما به من مغالطات
و سلبيات الحكومة .... فكان الرد من احد المسؤلين الحكوميين تحديدا اثنين من
الوزراء ، ردا قاسيا لم يتضمن ردودهم علي ما قاله تقرير الملط...لكن كان هجوما شخصيا ...

اللهم وفق ولي الامر الي ما تحب و ترضي
وهيء له البطانه الصالحة التي ترشده الي الحق و الخير و تعينه عليه.


تحياتي و تقديري
‏قال truelove
تصدقي فقرية لان دي نفس الفكرة الي جت فيبالي لما غلوا الاسعار قلت الحكومة همها مصلحجتنا ياجماعة لقت معدلالسمنة في زيادة قالت لازم تعمل رجيم اجباري واهو الناس المليانة هتعمل اكتفاء ذاتي على اعتبار اننا زي الجمال يعني بنعتمد على المخزون والناس النحيفة هي الي هتضطر تشتري وبس كده غلب والنبي يا اختي مش عارفة الواحد هيتجوز ازاي يالا فوتك بعافية يا اختي
‏قال walaa
اخواننا فى غزه محاصرون ومعذبون لايجدون اخواننا فى غزه محاصرون ومعذبون لايجدون طعام ولا ماء ومشردون ويجب علينا ان نفعل لشىء لنصرتهم لذلك قرر مجموعه من المدونين الذهاب الى معبر رفح لكىيرفعوا المعاناه عن الشعب هناك لو تقدر تشارك او اى حد يحب المجيىء معك
يا ريت تبلغنى
‏قال الدبور
احسن حاجه الاحلام دي الحاجه المجانيه الايام دي
‏قال Desert cat
Heart Beat
الناس دى واخدانا سكة اللى يروح ميرجعش
حبيبتى فى مصل بيقول يا فرعون ايه فرعنك قال ملقتش حد يلمنى
هو ده اللى بيتعمل فينا بالظبط
‏قال Desert cat
kikotalaat
طيب انا مش حقول لوالدتك بقى بس ابو قسم
ده احنا بلوجر زى بعض
انت المرة اللى جاية لما تروح تشترى حاجات من الماركت اعمل حسابك على ال3 اشعاف وان كفوا
‏قال Desert cat
Nsreen Bsunee
ميرسى يا نسرين ده من زوقك
بالنسبة لموضوع المؤامرة
فاحنا كمان شركاء فيها
اصلنا عارفين وساكتين وخايفين على العيال اللى اساسا كدا كدا هيموتوا من الجوع
‏قال Desert cat
الربان
صح استاذى الفاضل كلام حضرتك لا غبار عليه
احترامى وتقديرى
‏قال Desert cat
truelove
شوفتى والنبى يا دودو يعنى وجهه نظرى مظبوطة
الحكومة بتحبنا وبتخاف علينا
وعايزانا نعمل ريجيم
ما هو محدش بيلعب رياضة الناس عايشه حياتها اكل وبس
ملقوش حل غير كدا
‏قال Desert cat
walaa
ربنا معاهم ويوفقوا
‏قال Desert cat
الدبور
انا برضه بقول زيك كدا
احنا نحلم قبل ما يحجموها
يا لهوووووووووووووووووي
الزيت سعره زاد تاني
اعمل ايه بس يارب
والدقيق راخر
طب انا بوفر واعمل الفينو في البيت يقوم يزيد تاني
حسبي الله ونعم الوكيل
الله يكرمك انك قلتيلي عشان ما اشتريش ولا ابصله اصلا
مدونتك رائعة ودمها خفيف
ادعوكي وزوارك لزيارة مدونتي بها مقال اهداء لغزة ولبدا القراءة زوروا هذا الرابط اولا
http://nonoymm.maktoobblog.com/
هستناكم
‏قال Desert cat
nonoymm
معلشى يا حبيبتى
اقلمى حياتك بقى على النهارده الزيت ب9 جنيه بكره بعشرة وهكذا
طبعا انا يشرفنى زيارة مدونتك
تحياتى
‏قال كلام لوجيك
وهكذا دائما هى الحكومة المصرية ، تفى دائما بكلامها ووعودها
قالت لا مساس وفعلا لم يمس الكبار
وقالت لن نترك محدودي الدخل ، وفعلا لم تتركهم فى حالهم بل سلطت عليهم نيران الأسعار الملتهبة التى التهمت جيوبهم الفارغة أصلا

وقالت الحكومة أنها ستوفر مليون فرصة عمل ، ووفت بوعدها وقامت بالسماح ل 200 الف موظف أجنبى بالعمل داخل الأراضى المصرية ليزاحموا المواطن فى فرص العمل

انها الحكومة المصرية ، حكومتنا اللى عينها قوية وينضرب فيها رصاصة على وقاحتها وقباحتها وعدم حيائها

واخيرا مع هذه النكتة التى وصلتنى من المهندس أحمد (يامراكبى) عبر الفيس بوك

يروى أن صياداً عاد إلى زوجته
وهو يحمل سمكة كبيرة
طالباً منها أن تقليها في الزيت
فاعتذرت له الزوجة لأنها لا تملك زيتاً
بسبب إرتفاع سعر الزيت
فطلب منها الصياد أن تشويها
فاعتذرت له بسبب إختفاء الردة
وارتفاع سعر أنبوبة الغاز فى الأسواق
فطلب منها أن تطبخها مع الصلصة
فلما علم أن سعر كيلو الطماطم
قد وصل إلى خمس جنيهات
أخذ السمكة وألقاها غاضباً في البحر مرة أخرى


وهنا هتفت السمكة وهي في الماء
تعيش حكومة جمهورية مصر العربية


منقول


خالص مودتى

دمتم فى حفظ الله
‏قال Desert cat
كلام لوجيك
لا فوض فوك سيدى الفاضل
ولا تنسى اننا فى مصر
اطلب ما تريد وستنال ما يريدون هم

المشاركات الشائعة