من قلب ميدان التحرير

طبعا مش كان الهدف الميدان لكن للأسف هو كان طريقى لانى كنت رايحة طلعت حرب قوم ايه بقى وانا طالعة من المترو لاقيت الشرطة العسكرية بيقولوا لى بطاقتك .. قولت لالالالا مش فينا من كدا بطاقة ايه وبتنجان ايه .. قالى معلشى ده اجراء قانونى .. طالما قانونى اطلع يا دفعه هو انا اصلا اقدر اخالف القانون .. الا نظام بقى ستكنا له لاقيته بيقولى افتحى شنطتك .. لالالا كله الا كدا ضحك وقالى تانى ده اجراء قانونى .. يعنى هو لما تطبقوا القوانين تيجى فيا انا ؟ ما علينا المهم طلعت الميدان وانا فى الطريق كنت سمعت ان ميدان التحرير فيه 4مليون قولت يا للهول هما هدوا العمارات المحيطة علشان ياخد العدد ده ولا ايه ؟ واول ما اطلع الميدان حسيت انى فى الهايد بارك وليس ميدان التحرير بس هايد بارك اون ليبيا وليس مصر كل واحد عاجبه صوته واقف يهتف لليبيا وحواليه 20واحد بيرددوا وراه .. قولت لا فعلا العدد 90مليون اصل شكلهم استوردوا شعب زيادة .. ده ايه العدد المهول ده .. يا خراشى ده انا حتى شايفه الناس بتتمشى واخر انشكاح والمنقبات فارشين الارض وقاعدين ياكلوا كشرى وكل رب وربة اسرة جايبين العيال وجايين يصوروهم على الدبابات ... وبما ان هايد بارك التحرير ويوم عائلى لجميع الاسر اللى عايزة تخرج فكان لازم بقى نسليهم والمسليات كانت عبارة عن طبل ودى جى وليبيا وتونس وغزة يا اخى احه قافلين البلد ومستمرين فى خرابها علشان غزة وليبيا وتونس ؟ وادى هتافات المناضلين من الميدان

واضح ان القذافى لما طلع بيانه افرحوا وارقصوا كان بيتكلم من التحرير

خرجنا من طلعت حرب فى طريقنا للمهندسين اختلفت الاشكال وكانت وجوه بصراحة تستحق الضرب بالشوز كانت فى استنتاجات ان هيحصل مشاكل لأن فعلا الاشكال اللى كانت موجودة كان شكلها مخيف وقد كان راحوا استفزوا الجيش علشان تحصل اشتباكات .. هو مين اللى من مصلحته الفراغ الامنى فى البلد لإحداث الفوضى ؟ قالوا الامن بيعذب وولاد ستين فى سبعين وجابوا عصابات وهجموا عليهم فى الاقسام وهربوا المساجين وقتل منهم من قتل واصيب منهم من اصيب ودلوقتى الدور على الجيش ؟ طيب استعدوا يا حلوين للإعدام جلوساً على الخازوق


يناشد الجيش المصرى جميع المصريين اللى لسه مش اتصوروا جنب الدبابات يروحوا والنبى باقصى سرعه علشان يتصوروا بقى اصل خلاص زهقوا وقرفوا من الرخامة وعايزين يرجعوا تانى الثكنات

كانوا بيعملوا ايه فى الميدان ؟ هما بتوع الدين دورهم بقى اشعال الفتنة ؟