قالوا فى الشارع المصرى

يوم 25 يناير هب الجموع للمطالبة بحقوق المفروض انها مشروعة لحد الساعه 3 عصراً لكن من بعد الساعه 3 بدأ يندس بين المتظاهرين الميلشيات الإخوانية وحاولوا اقتحام مقار الأماكن المهمة فى مصر زى وزارة الداخلية ودار القضاء العالى ومجلس الشعب اللى كانوا فاكرين نفسهم فى فلسطين وراحوا حدفوهم بالحجارة .. مطالب الشباب على الفيسبوك كانت المفروض انها مظاهره سلمية لا تحديف حجارة ولا اعتداءات على افراد الأمن على الرغم من ان الأمن كان واخد اوامر بضبط النفس لكن لما توصل المهزلة لقلة الأدب يبقى وزير الداخلية يقال من منصبة لأن الأشكال دى مش ينفع معاها غير ضبط عينيهم على اتجاه واحد وهو اتجاه المحيطات اللى بيغرق فيها الشباب المهاجر لإيطاليا يمكن نخلص .. الشباب الثار نازل الشارع من أجل مستقبل أفضل وحياة آدمية والقضاء على البطالة وتغيير المادة سيئة السمعة من الدستور وده حق لكل مصرى لكن القيادات اللى نزلت الشارع كل واحد حاول يسرق المظاهره لتحقيق أهدافه الشخصية يعنى أعضاء مجلس الشعب السابقين يطالبوا بإعادة الإنتخابات اصل يمكن ينجحوا فى الدورة اللى جاية مش قادرين يستغنوا عن الكرسى .. الإخوان نازلين فاكرين نفسهم هيرجعوا راكبين الخيل الأبيض ويتمخطروا فى ميدان التحرير وهم يعلنوا دولة الخلافة ومقرها العاصمة ( القاهرة ) السلفيين بصراحة ودول ليهم كل الشكر لأن موقفهم واضح من البداية انهم عايزين محمد حسان يبقى رئيس جمهورية .. سورى جمهورية ايه بقى يبقى الخليفة العام للمسلمين فى جميع أنحاء العالم وكسر الحدود بين الدول ... إنتفاضة 77 قام بيها المصريين من أجل رغيف العيش .. لكن يناير 2011 قام بيها كل صاحب مصلحة شخصية .. بعد الإتهامات اللى من يوم 25 تتوجه لى من الإشتراكيين والردايكاليين شوية بالعمالة وشوية بالخيانة وشوية يقولوا لى قبضتى كام علشان تجمعى حواليكى فلاسفة الإنترنت وتقعدوا تحبطوا الناس .. طيب يا جماعة لو الموضوع بقى شغل وقبض كان ممكن فعلاً أنزل اعمل شغل حلو اوى زى اى حد نزل اشتغل وبيقبض دلوقتى وعلى الأقل قبضى كان هيبقى مشروع لأنه فى صميم عملى بصفتى مسؤلة إعلام فى حزب عن محافظة مكونة من 15 مدينة و3798 عزبة وكفر ونجع لكن لو كنت حقبض باليورو عمرى ما خالفت مبادئ ... بس فضولى دفعنى اعرف ردود افعال الناس ورحت أكلم واحد غضبان جداً جداً قولت له ايه رأيك فى اللى بيحصل ده ؟ قالى الروح رجعت لمصر وكلها ايام وهنعيش كلنا فى نعيم وخير بلدنا قولت له هايل انا شكلى ها اروح لاصحابى اللى فى التحرير ابيت معاهم النهاردة فى الشارع بس قولى ازاى هنوصل لده ؟ قالى ما هو النظام الحالى كله هيمشى سيسقط عرش مبارك بصى هو دلوقى ميت فى جلده علشان كدا مش قادر ينطق انا متفائل كلها ساعات ونلاقى البلد بقت بتاعتنا .. قولت له بتاعتنا مين ؟ قالى الشعب .. قولت كل ده ممتاز جدا ومتفقة مع كل حرف فيه .. بس قولى أنت مطلبك ايه ؟ قالى التوزيع العادل للثروات .. قولت له ممكن توضح لى اصلى مش فاهمه ؟ قالى الشركات والمصانع اللى فى البلد دى كلها هناخدها ماهى بتاعة المصريين .. قولت له ناخدها إزاى ؟ واصحابهم يروحوا فين ؟ قالى اصحابهم دول كلهم حرامية ماهم عاملينها من فلوس المصريين الغلابة ؟ قولت له وايه عرفك مش يمكن واحد سافر واتغرب وتعب واشتغل ورجع عمل مشروع وشغل فيه شباب وحل مشكلتهم من البطالة ؟ قالى يعنى الاوضاع الزفت والفساد اللى فى البلد ده ويعمل مصنع ما تخليكى عاقلة كدا .. قولت له يعنى انت نازل الشارع علشان تقاسم فى المصانع والشركات اللى فى البلد اللى كل اصحابها حرامية ؟ قالى مش فلوسنا وحقنا ... مشيت وانا نفسى اروح ارجع اللى فى معدتى .. واحد من الشباب بسأله ايه رايك فى المظاهرات دى ؟ قالى بصى انا كنت الاول مبسوط جدا ومتحمس لها جدا وطلعت فى مظاهرة فى الجامعه يوم 26 لكن بعد كدا لاقيت الهدف اللى انا طالع علشانة مش موجود كل رايح يسقط الريس طيب وبعد ما يسقط ؟ هنروح فينا ؟ قولت له هنروح مارينا .. وده كان الرأى العاقل الوحيد اللى سمعته .. الباقى كله تشنج وعصبية وناس تقول بس مبارك يمشى والبلد هتمشى زى الفل ؟ طيب ازاى وكل واحد طالع فى الكادر بكل قوته يمكن ياخد هو التورته كلها ؟

بصيت على الشارع المصرى من اسبوع لاقيت ان مش الحكومة هى اللى بتخلى واحدة ماشية وتخطف شنطتها وتجرى ؟ ولا هى اللى بترتشى ومسمياها إكرامية ولا هى اللى على أتفع سبب الجار بيقتل جارة والولد بيقتل امه او ابوه اللى مش عرفوا يربوه ولا الزوجة وعشيقها بيقتلوا زوجها علشان يخلصوا منه .. الجزيرة قاعدة تكرر لقطات من وقت الإعتداء الواقع على مجلس الشعب وحرق المطافى فى منطقة الاربعين فى السويس ونهب مركز تدريب الحماية للأطفال كل ده حصل ومبارك لسه فى الحكم امال لو قالت فهمت وسابها هالكو ومشى هتسرقوا البنوك وتبقوا عراق تانية ؟ قالوا المظاهره سلمية طيب إزاى سلمية وكانوا رايحين يقتحموا الاماكن المهمة اللى فى البلد ؟ سلمية إزاى ورايحين يضربوا الأمن ويعتدوا على قسم الشرطة وفرحانيين هييييه ضربنا الامن وكردناهم فى حين إن الأمن لو مش واخد أوامر كان زمانه ابادهم من على وجه البسيطة سلمية إزاى و البدو بيهددوا يضربوا قوات حفظ السلام على حدود اسرائيل لالغاء المعاهدة؟ هى ثورة انا مش مختلفة مع حد خالص واحلف لكو على اى حاجه انتوا عايزينها انها فعلاً ثورة لكن مش باسم الشعب المصرى .. الثورة اتخطفت من الشباب اللى خطط لها وبقت باسم المعارضة اللى قابضين مليارات لانقاذ ايران ؟ ورؤساء الأحزاب اللى ملهاش اى وجود غير فى الخيال العلمى اللى نازلين يمكن ياخدوا حتة من التورتة ده حتى البرادعى حجز على اول طيارة وجه علشان يطلع بمظاهره بعد صلاة الجمعة .. بس كتر خيره طلع رجل أفعال مش قاعد يحرض من الخارج وهو قاعد على النت وقدامه علبة السجاير وفنجان قهوة دوبل وجنيه دفاية علشان رجليه والبرد وكل لما حد يتكلم ويقوله دم الشباب اللى بيموتوا دول فى رقبة مين ؟ والناس اللى فى المعتقلات دى لو ضاع مستقبلها يقول انتوا فلاسفة الإنترنت العاجزين لكن اللى فى الشوارع دول الشباب اللى هيحرروا مصر من الإستعمار البريطانى .. طيب ما تحجز وتنزل تحرر معاهم يمكن التاريخ يذكرك ويقول الناس اللى كانت بره مصر كلها بدل ماهى قاعدة تحرض ولا على بالها ام قلبها يتحرق على ابنها ولا ظابط ولا مجند يموت واولاده يتيتموا ولا طالب مستقبله يضيع فى المعتقلات وكل شوية يكتبوا ارقام فلكية على النت على الرغم من انهم مش فى مصر اصلا ويرد عليهم المصريين لسه راجعين من الشارع حالا يا جماعه ومش فى الأرقام دى ؟ تلاقى سلاح التخوين اترفع فى ثانية .. توضيح اخير انا من أول الناس اللى يهمها التغيير لكن لازم يبقى فى وجود حسنى مبارك .. حسنى مبارك لو نزل من الحكم فى وسط الفوضى دى مصر هتبقى عراق تانية .. الشارع المصرى مليان تيارات مختلفة ظهرت فجأة كلهم بيستغلوا الشباب الثائر لمصالحهم الشخصية .. اطلبوا طلبات محددة وتتنفذ فى وجود الرئيس الحالى ومع تحسين التعليم والوعى وقتها هنقدر نسقط أنظمة ونعين مكانها مع الحفاظ على أمن الوطن