الجانى مختل عقلياً .. براءة

هى علامات الإضطراب النفسى مش بتظهر ؟ ولا الخلل العقلى بقى بيظهر فجأة و المحيطين بالشخص مش بيعرفوا غير لما يقتل ويصيب أشخاص لا يعرفهم ولا ليه معاهم سابق عداء أو خصومة ؟
هو معهد أمناء الشرطة بقى دلوقتى بيذبل ؟ مختلين عقلياً على بلطجية على مسجلين خطر يبقى العيب الحقيقى مش عليهم على اللى بيقبلهم وبيسلمهم سلاح علشان يعتدوا بيه على الأرواح
ثم إشمعنا الخلل النفسى مش طلع غير على الأسرة القبطية تحديداً مع ترديد الله أكبر ؟
أى عقيدة فاسدة دى اللى فهمته إن ده جهاد وإن قتله للأبرياء هو الطريق الوحيد للوصول لأنهار الخمر والنساء ؟
من فضلكو مش عايزة حد يجيب لى سيرة إنسانية ولا ليبرالية تانى مع الأشكال دى لأنهم لا يستحقوا إلا معاملتهم بنفس الطريقة وشربهم من نفس المشروب اللى بيسقوه لناس أبرياء ولو فضلنا نقول إنسانية ومهلبية يبقى محدش يتكلم لما الدور يجى عليه لأنه هيجى عليهم وقت ويصعب السيطرة عليهم ويبقوا زى الوباء اللى بيتنقل دون معاد أو سابق إنذار
محتاجه حد يفهمنى أى رب يتبعوه وأى إله يعبدوه
مين اللى قالهم ان التقرب لله اللى هيدخلهم الجنة بالقتل وسفك الدماء والغدر والسرقة وهتك الأعراض ؟
مين الإله اللى إدالهم توكيل بمحاسبة عبادة على الأرض والمختلف معاهم يبقى نساؤهم وأموالهم حل لهم ؟ وإن كان عندهم غلمان مفيش مانع ؟
هو برضه مش الإله اللى قال ( إنى قريب أجيب دعوة الداعى(
ومش هو برضه ( غافر الذنوب ولو كانت مثل زبد البحر(
هى آيات الرحمة والمغفرة اللى فى القرآن دى موضعها أيه من الإعراب ؟
ولا الاخوة السلفيين والوهابيين والمجاهدين مش بيعرفوا يقروا ؟ ولا متحرم عليهم يقربوا من القرآن ؟
واحد بيقولى انتى جاهله انتى اللى مش بتعرفى تقرى قرآن وقاعدة تفتى وخلاص
لما قولت له هات دليلك على جهلى ؟ راح جاب لى الآية دى ؟
)وقاتلوا في سبيل الله الذين يقاتلونكم ولا تعتدوا إن الله لا يحب المعتدين(
كان نفسى أرد عليه بصوت عميق من الحنجرة ماراً بالأنف لكن الكى بورد مش فيها الأصوات دى للأسف
أصل اللى أعرفه إن قاتلوا لازم يبقى حد سبق وإعتدى عليك يعنى أمر القتل مش أنت اللى تبتدى بيه ؟
كمان الذين يقاتلونكم يعنى فى ميدان المعركة مش ناس بتصلى وتروح تفجرهم ؟ ولا ناس راكبة قطر وتروح تقتلهم ولا تسرق محلات وصيدليات وعلشان تبرر عهرك الأخلاقى تصرخ وانت رافع سلاح وتقول أموالهم حل لنا
مش عارفه ليه رده كان كله شتيمة وقلة ادب .. قولت له هو ده بقى جهاد الكلمة ؟ قالى ما انتى حلوة أهو وبتفهمى


لما الكمونى اللى قتل 7المحامى بتاعه راح يطلع شهادة انه مختل عقلياً ؟
واللى فجر كنيسة القدسين مختل عقلياً
والقاتل اللى المفروض انه أمين شرطة محترم وزوجته المحترمة بتفتخر فى وسائل الإعلام إنه بيعاملها وحش وبيعامل بنته اللى عمرها 3سنوات وحش ومختل عقلياً

إذن نناشد السيد رئيس الجمهورية بإسناد مهام وزير الداخلية لوزير الصحة حرصاً على الأمن العام من المختلين عقلياً