اقوى عروض العيد فى مصر ستان

آخر أمنية كنت بمتناها فى 2010 إن مش يكون فى نجع حمادى ولا عمرانية جديدة ومعرفش ليه كتبتهم غصب عنى مش علشان انا متشائمة لا سمح الله ولا فى حاجه فى البلد دى تدعو لأى بهجه او تفاؤل معاذا الله لكن لأن السادة القائمين على امن الوطن للأسف بقى معندهمش اهتمام بالوطن ومش عايزة اقول مش يهمهم الوطن .

كلمة إرهاب دى أول مرة أسمعها تقريبا كنت فى تانية إعدادى وكان كل تركيزهم على السياح ويقولوا لك اصل دول كفرة وكان الجميع يشجب ويندد ويستنكر واسمع الهتافات كأننا طالعين غزوة بدر وخيبر خيبر يا يهود جيش محمد سوف يعود .. وأنا أقول هو فين جيش محمد ده وهيرجع منين قوم قريحتى الفذة تقترح عليا إن جيش محمد ده هو جيش الرئيس محمد حسنى مبارك أه وربنا ده اللى فضلت فاهماه ! الكلام ده كان فى 92 ايام خط الصعيد والارهابيين اللى كانوا بيستخبوا فى القصب وبعدها بشوية طلع لنا ارهابيين شرم الشيخ اللى فجروا خليج نعمه وبعدها بشويتين إستلموا أتوبيسات السياح والاماكن الآثرية زى القلعة والحسين خلصنا على السياح وعلى مصدر دخل هام فى مصر نشوف بقى الجماعة المسيحيين ماهو كل لما حد يتكلم يقولك ماهم اغنيا دول كلهم عندهم محلات دهب وصيدليات .. ومرة كنت بتكلم مع مريان صحبتى عن الحالة الاقتصادية فى البلد اللى بتنهار قولت لها وانتى مالك طيب انتوا بابكى عنده محل دهب واخوكى كمان عنده محل دهب تشتكى ليه ؟ قالت لى مش كلنا فى مركب واحدة ؟ وبعدين تحبى اخدك من ايدك اعرفك على مسيحيين مش لاقيين ياكلوا ؟

النهاردة أنا مكسوفة أكلم مريان ؟

إمبارح نيفين ناجى بعتت لى اس ام اس ووقتها كنت فى الطريق راجعة من الاسماعيلية وجنبى رانيا ومروة وانا بقرا الرسالة فجأة لاقونى بضحك سألتنى رانيا خير يا حنون قولت لها اصل نيفين بتقولى فى بداية رسالتها لو شوفتى راجل تخين وانا أصلاً بكره الناس التخينة سواء راجل او ست شكلها بتغيظنى .. واول ما وصلت البيت بفتح النت علشان اشوف الاخبار صعقنى الخبر .. طيب ارد اقولها ايه ؟ شكراً على البسمة اللى رسمتيها لى فى نفس الوقت اللى إيد الإرهاب بتقتل فيه إخواتك ؟ طيب أقولها دول مش مسلمين ؟ طيب ابعت لها ماسج اقولها انا ماليش دعوة بدم المسيحيين اللى قدام عينى على الارض ده وانا بحبكوا كلكوا وبريئة من أى شخص وأى دين بالعنف ده ؟ طيب أعمل نفسى مش واخدة بالى وارد عليها بماسج مهما كان محتواها فى وقت زى ده أكيد هتبقى سمجة وملهاش أى معنى ؟ وبعد ما كنا فرحانين باليوم قعدنا احنا التلاته نتصل بكل اصحابنا فى إسكندرية نسألهم على الأخبار مروة قالت لى اسمعى كان اللى بيكلمها بيقولها كان فى مظاهرة امام مسجد ابراهيم اللى قصاد كنيسة القديسيين عملها مجموعة من السلفيين قاموا بتهديد الاقباط حتي يتم الافراج عن السيدتين حسب زعمهم كاميليا ووفاء و بعد ذلك بساعات كانت كارثة كنيسة القديسين فكان سؤالى طيب ده صدفة ولا كارثة مترتب لها ؟؟

ثوانى وظهر الرئيس مبارك على التلفزيون وكأنه مش قادر يقف على رجليه يندد ويتوعد من قاموا بتنفيذ الجريمة ياريس عايزة اقولك ليه تندد بعد الكارثة ما تحصل فين الأمن يا ريس ؟ فين جهاز الشرطة اللى فيه أكتر من 2 مليون ولا كلهم مش فاضيين لحماية الأمن العام الأهم هو أمن قصر القبة ؟ ياريس كان فى مظاهره من شوية شوية بلطجية وسفاحين عملوها وهددوا واتوعدوا ومروا مرور الكرام ..

ياريس النقطة الأساسية فى البيت الأهل بقوا عايزين تربية من أول وجديد علشان يربوا عيالهم صح .. فين أمن الدولة ليه سايبة الإرهاب فى المساجد والشوارع والمواصلات .. لما تركب ميكروباص زى علبة التونة فيه سبعتلاف واحد فوق بعض وسواق ضارب مخدرات وفاتح شيخ من بتوع الميكروباصات قاعد يجعر ويقولك الحجاب قبل الحساب والمسيحى ابن كلب كافر وإن شاف واحدة ماشية لابسه بنطلون يقل ادبه عليها وفى نفس الوقت مش عنده مانع يغتصبها وتلاقيه قاعد منسجم مع الشيخ اللى بيسمع له لكن الراكب لو ادله الاجرة ناقصه ربع جنيه يسب للى جابوه 100 دين

عندك فضائيات فى الإعلام يا ريس قاعد ابو اسحاق الحوينى يجعر ليل نهار ويقولك المسيحى كافر اوعى تهنيه بعيده ومحمد حسان يقول ضيقوا عليهم فى الطرقات .. مستنى ايه من شوية عيال صايعة فاقدة الهدف بعد ما يسمعوا كلام زى ده ؟ وكل واحد فيهم فاهم انه لما يرتكب الإرهاب ويحرق قلب الامهات واول ضحياه اطفال وشيوخ ونساء هيبقى بطل على جثث الابرياء

الصورة دى صورتها رانيا وهى مبسوطة اوى و بتقولى شايفة السما صافية إزاى ؟

والصورة دى انا جايباها من اليوم السابع بس بقولها شايفة دم الاقباط على الارض إزاى ؟؟

الصورة دى مروة بتقولى انا عايزة المطر يبان

مكنتش عارفه انى لما انزلهم فى البلوج هيبقى مكان المطر دم ناس كل ذنبهم إنهم كانوا بيصلوا وبيعبدوا ربهم بطريقتهم زى ما فى مسلمين بيعبدوه فى المسجد برضه بطريقتهم