يوم 25يناير

انتوا عارفين المظاهرات والمسيرات اساساً هدفها الأول ايه ؟ هدفها تغيير النظام والقانون المتبع قسرا واحتكارا وديكتاتورية في اي بلد عارفين ده فعلاً ولا هدفكو هو تسليم أمن مصر القومى للسفهاء ذاكرتوا التاريخ كويس ولا كعادة الإخوان إستقطاب المسجلين والجهلة لأنهم سهل قيادتهم دون سؤال او معرفة طيب سيبكو من الناس اللى قاعدة تحرضكوا على خراب البلد فى نفس الوقت اللى هيبقوا قاعدين فى مكاتبهم المكيفة وبيتابعوا من خلال الإنترنت وتعالوا القوا نظرة على اللى بيحكموا بالدين وشوفوا إيران وحكمها العادل جدا اوى خالص وشوفوا حماس اللى سايبة المحتل وبتقتل فى ظباطنا على الحدود وبتضحك على العيال الصغيرة اللى فى مصر باسم الجهاد وتخليهم يخربوا البلد عايزين تشيلو حسنى مبارك هأووو هفترض فعلاً إنكم طلعتوا جهابذة ورجالة اوى وفى الشدة شداد فين البديل ؟

الإخوان اللى مش تهمهم مصر وعندهم إستعداد يحكم ماليزى بس مش يحكمها مسيحى مصرى ؟ الإخوان اصحاب نظرية طز الشهيرة فى مصر وأبو مصر ؟

الإخوان اللى قاعدين يحلفوا ويتحالفوا إنهم لو مسكو الحكم المعارض هياخد بالجذمة ؟ وبصراحة عندهم ألف ألف حق عارفين ليه ؟ اصل اللى بيعارضهم يبقى بيعارض الله ماهما المتحدثين بإسم الله فى الأرض بس مش عايزين يوروا التوكيل اللى معاهم لحد خايفين من الحسد بس اعلنوا انهم يملكو ماء السماء الطهور اللى هيطهر الشعب .. طيب قريتوا بيان الإخوان اللى على أساسه حرضوا على مظاهرة 25يناير مش فيه ولا كلمة واحدة عن المواطنة والمرأة تم حذفها والأهداف منه واضحه جدا انهم عايزين الحكم هو مش آن الآوان بقى إن المادة الخامسة من الدستور يتم حذفها ويتم حظر تأسيس حزب على أساس ديني ؟

عايزين مين يحكم البرادعى ؟ مقدرش أنكر انى كنت من أشد المؤيدين ليه فى البداية وكان نفسى انه يحكم لكن لما لاقيته داير يتخبط وشوية يتحالف مع الإخوان وشوية يتحالف مع الوفد وشوية مع مجانين العباسية مش عندى إستعداد يحكمنى البرادعى مع احترامى ليه كشخص وكعالم اعتز جدا بعلمه وأفخر بيه كمصرى لكن مش اعتز بيه كرئيس لمصر .

الناس اللى نازلة الشارع دى هدفها ايه غير الفوضى وقلة الأدب على الشرطة وناس تصور علشان يجروا ينشروا على النت ويقولوا شوفوا الشرطة بيعملوا فينا ايه ؟ ونتفرج بقى على الشتيمة وقلة الأدب من كل واحد على راسه بطحة اللى حرامى واللى نصاب واللى عواطلى وعايز الشرطة تصرف عليه وكل واحد يطلع عقد النقص والغل اللى عنده عليهم مع انه اول لما بيخلص الثانوية اهله بيبقى عندهم استعداد يبيعوا اعضائهم علشان يدخل شرطة ولما مش يطولها يبقى الشرطة كلهم ولاد ستين فى سبعين هو ده بقى اللى ينطبق عليه المثل اللى بيقول نفسى فيه وأقول أخيييه وياريت لما تتسرق ولا يجرى لك اى مصيبة مش تروح تعيط لهم طالما قاعد تشتمهم وتقل ادبك عليهم تعالى تخيل نفسك من غير وجودهم فعلا وشوف هيحصلك ايه فى الغابة اللى هتبقى عايش فيها وقتها لما الحرامى يدخل يسرقك مش هيسرقك وبس ده ممكن كمان يعمل فيك حاجات أبيحة يبقى احترم نفسك منك له .. أمن مصر القومى واجب على كل المصريين مش على جهاز الشرطة لوحدهم الناس اللى انت نازل تقل ادبك عليهم دول بتبقى انت نايم وهما فى الشوارع فى عز البرد والحر مفيش شعب بيكره نفسه وبيحقد على نفسه إلا الشعوب الجاهله .. وانظروا الى عشوائية العقول لما رجل اعمال مسجلبن خطر اعتدوا عليه و سرقوا منه40الف جنيه فى الطريق الصحراوى دى حادثة كانت منشورة فى المصرى اليوم كل الردود كانت كلها غل وحقد وسفالة وشماته اصل ازاى رجل اعمال وعنده 36سنة ياترى واخدهم رشوة من مين و زنا مع زوجة مين ولا سارقهم منين .. واللى يقولك لو كان وزعهم على الشباب كان اتجوز بيهم كام واحد ؟ على اساس انه شغال عند ابوهم ناس قاعدة فى بيوتها مأنتخة وهو يشتغل علشان يجوزهم .. دى كانت عينات الردود على حادثة حصلت لواحد كل ذنبه انه رجل اعمال وانه يملك 40الف جنيه .. تخيلوا عشوائية العقول وصلت لفين ؟ فى الدول المحترمة الشباب بيشتغلوا شغل إضافى وممكن يشتغلوا زبالين لتحسين وضعهم المادى على الرغم من انهم ممكن يكونوا اصحاب مناصب فى شغلهم الاساسى .. لكن عندنا تبقى عواطلى ومش عندك مانع تسرق وقاعد فى الشوارع وتعاير اللى بيشتغل لمجرد انه شغلته مش عجباك .. شوفوا المعاقين فى بلدنا بيتعاملوا إزاى ومدى التريقة والسفالة اللى بيتعرضوا لها .. ناس بالقذارة دى ياترى عارفين يعنى أيه مستقبل وطن ؟ من اول انقلاب يوليو بدأت تشوية العقول وتشويه الأخلاق حتى وصلنا لهذا الغباء من لم يفهم التاريخ لا يستطيع أن يعيش ولا يمكن أن يبنى مستقبله . مستقبل الوطن مش بالكسل نضفوا نفوسكو من الغل والحقد على اى حد مستواه احسن منك اشتغل زيه اجتهد زيه اتعب زيه مش كل واحد معاه فلوس يبقى حرامى او مرتشى او بتاع نسوان ولا كل واحدة معاها فلوس تبقى عاهره او كسبتهم بطريقة غير مشروعة .. الشرطة مش هتأكلك ومش هتصرف عليك .. نظام مبارك كلنا عارفين انه فاسد لكن انت عملت ايه ؟؟ نزلت تشتغل ؟ حاولت تعمل على صلاح البلد ولا قاعد تسب وتلعن .. ولو حد ادالك عشرين جنيه عندك استعداد تبوس ايده وتبيع بيهم نفسك

مين الغبى اللى فهم الناس اللى فاكره نفسها هتنزل تحرر مصر يوم25يناير من الاحتلال الانجليزى ان النظام مرعوب وضعيف وخايف فوقوا من اوهامكو ده لو المليون مجند بتوع الامن المركزى نزلوا هيبدوا ال80مليون فى دقايق معدودة ولو الشرطة فشلت ده لو يعنى هينزل الجيش بالمدرعات شوفتوا بقى النظام مرعوب وبيموت من الرعب إزاى ؟

قبل الجعجعة اللى مش من وراها عائد نضفوا قلوبكو وحبوا نفسكو امن مصر القومى مش لعبه مواجهة الأزمة من دواخلنا إحنا من زيادة وعى الشعب المصرى ونضافة النفوس .. وكل سنة والشرطة المصرية بخير وسلام