جنازة جماعية على هتك عرض الديموقراطية



اشاهد بمنتهى التعجب والعجب والإستعجاب والإندهاش حالة العزاء الجماعى المقامة من الشعب المصرى بكل فئاته وكل طبقاته بل وكل عياله وذكوره واجداده وخلاته وعماته وجميعهم يعزفون انشودة النشاز التى لم تمتعنى حقاً ويقيمون الحداد الجماعى على هتك عرض الديموقراطية امام العالم أجمع فى أول جولة من إنتخابات مجلس الشعب والجميل فى الشعب ده انه بيحب يجامل حتى لو مش عارف وتلاقى اللى له واللى مالوش قاعد يردد كلام ويقولك ده عار على جبينا كلنا وكأنهم يعون فعلاً ماهى الديموقراطية وما فائدتها وكيف يستخدمونها .. أنا لاأقلل من شأن أحد ولكن أحدهم سألنى بعد أن قرأ لى تعليق على ستاتيوس لأحد الأصدقاء وهل الديموقراطية تتعارض مع الدين ؟ إن الدين الإسلامى دين دنيا وآخرة وشامل لكل شيئ .. فأجبته الديموقراطية لا تتعارض مع الدين ولكن الدين هو الذى يتعارض مع الديموقراطية .. لأن الديموقراطية معناها المفهوم حكم الشعب للشعب ولكن ابسط مثال الاخوان المسلمين حينما توجه لهم اى نقد يتم اتهامك بالكفر دون تردد ويعتبرون الديموقراطية غزو ثقافى ومؤمرات على الدين ناهيك عن عدم إمتلاكهم لمنهج او برنامج يفهمه المثقف لا العامة من الناس وعلى الرغم من ذلك يعتبرون امثالهم ملاك الحقيقة المطلقة على الرغم من انه لا يوجد حقيقة مطلقة سوى الموت .
فكان سؤاله اليس من الجهل ان تصفيهم بما ليس فيهم دون أن تجربى حكمهم فالإخوان يريدون الحكم بالشريعة وضرب لى مثلاً بأمرهم شورى بينهم .
فكان ردى واليس أمامى إخوان حماس كتجربة وكان شعارهم الانتخابى ايضا وامرهم شورى بينهم ؟ ومن يضمن لى انهم عندهم يحكمون لا يفعلون مثل ما فعل الخليفة فى إبن المقفع حين وجه له النصيحة فأمر بقطع جميع اطرافة وبقي ينزف حتى مات .. فكان الرد بسرعة الصاروخ وهى إنه كان شاكك فيا بجد من البداية انى كافرة ودلوقتى بس اتأكد علشان كدا هيعملى بلوك وقعد يحسبن ويحوقل ويستعيذ بالله منى ومن أمثالى اللى بناخد معونات من أمريكا بنت ستين فى سبعين علشان نخرب عقول شباب المسلمين .. طيب استنى يا كابتن قبل البلوك بس قولى فين ماء السماء الطهور اللى قال عليه المرشد بتاعكو مش شفع لكو ليه بس كان زمانكو محتلين كل كراسى مجلس الشعب من غير انتخابات ولا بطيخ . بس تقريبا كان سبق السيف العزل وعمل بلوك على صوباعى وانا لسه بكتب اخر حرف على الكيبورد .
شخص بالعقلية دى اتعلم على ايد الكبار اصحاب نظرية طز فى مصر الشهيرة والمعارض هياخد بالجزمة واخرهما احدث نظرية انهم يملكون ماء السماء الطهور اللى هيطهر الشعب ابن الكلب النجس ده هيدخل مجلس الشعب يتكلم فى أى قوانين ؟ فاكرين العضو على لبن اللى قلع لهم الجزمة تحت قبة البرلمان اثناء الحرب على غزة اللى فضل ملف الغزو مفتوح فى مجلس الشعب على مدار اسبوع وكانه كان مجلس شعب فلسطين مش مصر ولما فكروا بس يناقشوا مشكلة التعليم فى مصر ردا على أحد الإستجوابات قالهم لالالالا تعليم اطفال مصر مين أطفال غزة أهم دول اطفال مسلمين وبعد الاعتراض كان لا صوت يعلو صوت الجزمة تحت قبة البرلمان .
هى مش الديموقراطية برضه معناها التعددية الفكرية والدينية وحرية المعتقد
طيب ما تيجو فلاش باك بس لسنة واحدة مش هنروح اكتر من كدا اصل انا شخصياً مصابة بالزهايمر وذاكرتى اخرها تحتفظ باحداث سنة مش اكتر ممكن اقل كمان .. فاكرين ليلة عيد الميلاد لما اتقتل 7 شباب فى عمر الزهور بعد صلاة القداس .. عارفين السبب ايه اللى اتقتل علشانه الولاد دول ؟ بامانة مش ليهم اى ذنب ولا عملوا اى حاجه بس اتقالك العيال دول اتقتلوا اصل فى ولد مسيحى اغتصب بنت مسلمة على الطريق الزراعى وقبضوا عليه .. طيب الناس اللى ماتت دى ذنبها ايه ؟ قالك مش مسيحيين زى بعض !! .. بعدها بشهر الولد اللى ابوه وعمه اتقتلوا اصل ابنهم قليل الادب المسيحى كان بيحب بنت مسلمة وصورها على الموبايل ونشرها على النت .. حد شاف صور البنت على اليوتيوب ؟ اصل البنت كان واضح جدا انها مستمتعة ومبسوطة وبتتصور بمزاجها .. وبالرغم من كدا قامت الدنيا واهل الولد قتل منهم ما قتل واتكسر محلات وصيدليات الاقباط .. يليها منزل دعارة المنيا اللى مفتوح من سنين على مرأى ومسمع من الجميع .. لكن معلشى ده بيت دعارة مسلم على الشريعة الاسلامية إنما يدخله مسيحى لا وألف لا فالمومس المسلمة لا ينكحها الا صايع وبلطجى مسلم .. فاكرين بقى الجماعة البهائيين ؟ اللى حرقوا بيوتهم وهما نايميين وخرجوهم من بيوتهم حافيين ؟
ديموقراطية ايه اللى بتعيطوا عليها وحرية ايه اللى بتفكروا فيها ؟ وانتوا اساسا لا تفقهوا معانها ؟
ديموقراطية منع المحجبات من الشواطئ والخمارات اللى فريد اسماعيل مقدم عليها بتاع الفين استجواب هما المحجبات اللى كان داخل المجلس علشانهم دول بيدخلوا خمارات وشواطئ عراه يعملوا فيها أيه ؟ ومش شوفناه اتكلم عن اطفال الشوارع ولا سكان العشوائيات ولا مهدودى الدخل وعمال الاعتصامات ؟ مش شوفنا حد اتكلم عن الأعراض اللى بيتم انتهاكاها كل يوم فى الشوارع والمواصلات على مرأى ومسمع وكل جاهل يبرر عجزه بكلمة مش شايفه هى لابسه آيه ؟ وياترى العجوز اللى عندها 75 سنة واغتصبوها فى المقابر كانت لابسه اية ؟ وسيدة كفر الشيخ اللى نزلوها من بيتها تحت تهديد السلاح اغرتهم إزاى ؟ والطفلة اللى عمرها 9 سنوات واغتصبوها وهى راجعة من تحفيظ القرآن آثارت السفلة اللى بتطلعوا مبررات لشهوتهم الحيوانية باى مسمى إزاى
لما تعرفوا يعنى ايه تعدييه فكرية ودينيه وحرية المعتقد ومفيش لدين سلطة على دين اخر لما تعرفوا ان جميع الاديان متساوية تحت قبة البرلمان لما تعرفوا انه علشان يسود المجتمع روح الحب مش الحقد اللى مالى القلوب بدون اى ذنب او مبرر وقلة الادب والسفالة على الضعيف لما تعرفوا معنى حرية المعتقد وعدم التمييز على اساس الدين أو الجنس ولما تتخلوا عن دخول المجلس برفع شعارات العنصرية الدينية والطائفية والقومية وقتها بس انا هكون اول واحدة انوح واصوت على الديموقراطية اللى سابتكو وذهبت مع الريح

تعليقات

‏قال انا التزوير الأصلى بالحجاب والخمار…
شوفى المحجبات والمختمرات وهم بيزوروا الأنتخابات فى سيدى جابر بالأسكندريه...ابشع صور الغش والفوضى امام الأمن
‏قال مشكلة الأخوان لها حل…
قطه
بصى مواجهة من يدعون للحكم باسم السماء مع انهم لا هم انبياء ولا معصومين ليس بالأسلوب الغشيم الذى يتبعه النظام معهم فيكسبهم دور الضحيه والناس البسطاء تكره الظلم لطول ما عانوه منذ اقدم العصور.. وكما قلت الحل مواجهتهم باسلوب السياسه وفضح افلاسهم الفكرى فهم لا برنامج ولا فكر سياسى لهم ويتهربون من اعلان برنامج مفصل وليس كلاما مبهما انشائيا
وتضييق النظام على ظهور احزاب تقود الناس يصب فى مصلحتهم
لأنه يتركلهم الساحه خاليه
‏قال انا التزوير الأصلى بالحجاب والخمار2…
المحجبات والمختمرات يقمن بالتزوير
http://www.youtube.com/watch?v=Z8AHmkU3ccc
‏قال Ms Venus
هههههههه تعرفى لما بقراء كلامك بحزن اكتر

لانى شايفة ناس زيك يا قطة فاهمين وعندهم ضمير وبردو حالنا زى ما هو

طيب امال الامل فين ؟
‏قال Elmasryeffendi
احنا بالظبط عاملين زى المتخلف فى فيلم البداية لما كان بيشتم احمد زكى و يقول له امشى يا ديمقراطى يا كافر، شعب جاهل و ممثلوه اجهل منه
‏قال ELVIRA
ماذا تتوقعون من شعب لدية ذاكرة تيفال
المهم انهم ليسوا فى المجلس وخلاص
حاجة ومطالوهاش
‏قال Kontiki
اظرف حاجة الاخوانجية كانوا بيضربوا من الامن ويقولوا بالروح و الدم نفديك يا اسلام !!! مصر مش فى دماغ حد :( المهم يحشروا الدين فى المجلس وفى الدولة عشان عيشتنا تتنيل اكتر الهدف مش ديموقراطية الهدف تنفيذ ما يسمى شرع الله وما ادراك لو الهمج اتسلطوا على البشر و بداءوا ينفذوا شرع الله من وجهه نظرهم حيبقى اية الوضع
‏قال غير معرف…
عمري ماحقدر أفهم إنتي بتجيبي الشجاعة دي منين. عايمة ضد التيار وأكيد بتواجهي رفض واستنكار يهد جبال. بافكر زيك أكيد لكن أعرف أعمل زيك أكيد لأ. حاسة بجبن شديد وأنا كل اللي باعمله إني بنونو معاكي بس باسيبك لوحدك في المقدمة تواجهي التخلف وتتحملي الهجوم. نفسي أفهم إنتي إزاي مش محكومة بالثوابت وفكرك مابيتأثرش بضغوط ومسلمات الكل بينحني قدامها أو على الأقَل بيعديها علشان وجع الدماغ. بتخليني أحس إن فيه أمل في جنس البشر. اوعي تتغيري.

مصرية من كندا.
‏قال تحرش سياسى بعدالتحرش الجنسى…
ادعوك لقراءة مقال جلال امين بالشروق عن التحرش
أى تأمل بسيط لوجوه وسلوك هؤلاء الصبية الشباب الصغير يبين لك على الفور أنهم مجموعة من الشباب الضائع

الذين لم يقم بتربيتهم أحد، لا أسرة ولا مدرسون، ولا يمكن أن يردعهم أحد، لا أب ولا أم ولا ناظر مدرسة، وإن

أقصى ما يمكن أن يتلقوه من دروس فى السلوك هو ما يرونه ويسمعونه من التليفزيون الذى تختلط فيه مشاهد الإثارة

الجنسية، مع إعلانات السلع المثيرة لرغبات لا يستطيعون تحقيقها، مع أحاديث دينية ومواعظ منبتة الصلة بواقع

حياتهم اليومية.

ليس من الصعب بالمرة أن تتخيل ما لابد أن يحدث لهؤلاء الصبية مع تقدمهم فى السن، سواء دخلوا جامعة أو معهدا

فنيا أو اشتغلوا فى ورشة أو بالخدمة فى مطعم، أو بوظيفة توصيل الطعام إلى المنازل، أو منادين فى أماكن ركن

السيارات، أو فشلوا فى الحصول على أى فرصة من هذه الفرص الرائعة فجلسوا أمام أى تليفزيون فى أى منزل أو

حجرة فى إحدى العشوائيات أو فى أى مقهى قريب.

فإذا جاء العيد واستطاعوا بأى طريقة أن يجمعوا بضعة جنيهات وخرجوا إلى الطريق العام، أو ساروا على

كورنيش النيل فى القاهرة أو البحر فى الإسكندرية، ما الذى يمكن أن يصنعوه لقضاء الإجازة بنقودهم المعدودة،

غير التحرش بالناس؟
‏قال تحرش واغتصاب سياسى بعد التحرش الجنسى2…
وما الذى يمكن أن يردعهم أو يخافوا من فقده، احترام الناس؟ أم حب الأب أو الأم؟ أم عطف الأخ الذى حاول

السفر بطريقة غير شرعية إلى إيطاليا أو اليونان بحثا عن عمل، فلم ينجح ورجع خائبا ليجلس أيضا على مقهى أمام

التليفزيون؟ أم يخافون من بطش رجال الشرطة الذين لم يعد حالهم أفضل كثيرا من حالهم، فهم أيضا شباب صغير

شديدو الهزال وسيئو التغذية، ولديهم نفس ما لدى بقية الشباب من مشاعر الإحباط والسخط على مجتمع لا يبالى فيه

أحد بهم؟
لابد إذن أن المسئولين وجدوا طريقة لحساب العمالة والبطالة من شأنها أن يدرج هؤلاء الشبان الضائعون فى عداد

المشتغلين. وعندما رأوا أن هذه الأرقام لم تحل مشكلة الشباب فكروا فى إنشاء وزارة جديدة اسمها «وزارة

السكان والأسرة»، فلم تستطع بدورها حل المشكلة، إذ إن الوزيرة الجديدة لا تستطيع أن تصنع شيئا إلا بالتعاون

مع وزراء الاقتصاد والصناعة والتجارة والتنمية، وهؤلاء الوزراء بدورهم مشغولون بأشياء أخرى أهم لديهم من

مشكلة الشباب والتحرش الجنسى.

لم يبق إذن إلا حل واحد، وهو أن تنظم الوزيرة مظاهرة فى مكان آمن تماما من أى تحرش، وتنضم إليها فيها بعض

السيدات الفاضلات الآمنات بدورهن من أى تحرش، فيرفعن بعض اللافتات التى تنادى شباب مصر بالكف عن أى

عمل يخدش الحياء، على شرط أن تلتقط بعض الصور للمظاهرة، حتى يعم الانتفاع بها.
‏قال وباء الهوس الجنسى فى المشرق العربى…
هل اصيب المشرق العربى كله بالهوس الجنسى؟
مطابع دمشق ترفض طبع لوجه لأن كتف امراه العارى يظهر فى اللوحه
مثل الأمير السعودى الذى دهن منطقة الوسط لتماثيل لفينوس فى قصر اشتراه فى حى الفن فى كاليفورنيا فاصبح الناس يذهبون للتفرج من خلال فتحات سور القصر لهذه الأعجوبه
والعجيب ان المعلقين على الخبر يهللون ويكبرون وكاننا حررنا القدس
ويقول الخبر
العاملون في الجاليري "أنهم يمتنعون أحيانا (عن الطباعة) لمجرد كتف عار لامرأة في اللوحة".
‏قال كارثه من انجازات المتاجرين بالدين…
نتيجة المتاجره بالدين والتشنج فى الشمال اصبحنا امام كارثة انفصال الجنوب فى السودان ومزيد من المشاكل فى موضوع خطير كمياه النيل ...وهذا كل ما انجزوه تجار الدين والمتشنجون ...خلى بقى ماء السماء الطهور ينفعهم
‏قال karim
صحيح ما تشعرى بة لانة شعور جماعى كان الواحد حاسيس انة ممكن يكون فى امل لكن مع الاسف , مفيش فايدة , تحياتى
‏قال Boneta
تصدقي بإيه؟
بقالي كام يوم بدخل اقرأ البوست ومش عارفه اعلق عليه
حاسه ان الكلام خلص خلاص وماعدش ليه لازمه!!
استمري يا قطه ولا يهمك
تقبلي تحياتي
‏قال كما قلنا مرارا ليسوا انبياء اومعصومين ولكن طامعون فى السلطه باى ثمن ايها البلهاء…
أكد مصدر أمني مسؤول بوزارة الداخلية أنه تلقى بلاغًا من المواطن عبد الباسط محمد عاشور بأن عناصر للإخوان المسلمين قد قاموا باختطاف شقيقه مجدي عاشور عضو مجلس الشعب والمرشح للانتخابات البرلمانية الجارية بصفته مستقلا عن مقعد العمال بدائرة النزهة بالقاهرة.

وقال المبلغ إن عملية الاختطاف حدثت بعد مشادة بمسكن النائب لإصراره على مواصلة المعركة الانتخابية في الإعادة، ورفضه الإذعان لقرار مكتب الإرشاد للجماعة بالانسحاب من الانتخابات، مؤكدًا أن شقيقه اتصل به تليفونيًّا وأبلغه بأنه تم اختطافه إلى خارج القاهرة، وقد أخطرت النيابة العامة ببلاغ المذكور.
‏قال كما قلنا مرارا 2…
هل من اختطفه ارغمه على تسجيل الفيديو قبل وصول الأمن لهم
‏قال من رسائل البلهاء ستصلك فى البريد الألكترونى…
ن سماع القران يقلل من انتشار الخلايا السرطانيه فى الانسان بل يدمرها وان اطاله السجود يقوى الذاكره ويمنع الجلطه وان رفع السبابه للتشهد يزيد من تدفق الدم فى الانسان ليساعد على تقويه القلب كما ان السجود يزيل الشحنات ...الموجبه للجسم لان شحنه الارض سالبه يقول ابليس يحبون الله .........ويعصونه...ويكرهوني ....ويطعونى .........سناخذ60 ثانيه من وقتك فقط...انشرها ولنرى ان كان الشيطان سيمنعك
‏قال حفاظا على الدوله المدنيه…
اذا كنا تؤكد على انه لا دين فى السياسه اتحجيم الأخوان والتيارات المشابهه فيجب ان يحدد دور البابا والكهنه بالمهمه الدينيه فقط دون اى تدخل فى شىء خارج هذا النطاق فهؤلاء الأقباط مصريون يخضعون مثل غيرهم للقانون ...ويجب الا يقبل اى تعليق للبابا او اى كاهن خارج مهمته الدينيه والا يصبح الكيل بمعيارين فالبابا قائد روحى وليس ولا يجب ان يتحول الى زعيم سياسى على اساس طائفى فهذا يتناقض مع الدستور والقانون وتوجه الدوله المدنيه
‏قال نائب الأخوان المنشق يكشف لعبة توظيف الدين للوصول للكرسى…
"إنه على الرغم من قرار جماعة الإخوان بالانسحاب من الانتخابات البرلمانية؛ إلا أن حب الأهالي هو ما دفعني إلى استكمال الطريق حتي النهاية، وانا على على اتم الاستعداد والرغبة الكاملة في العودة مرة أخرى إلى صفوف الإخوان المسلمين؛ ولكن بدون التخلي عن المقعد البرلماني".
‏قال تعليق من الشروق…
المشكلة فى هذا البلد اننا نعانى من مصيبتين الحزب الوطنى الذى يحتكر السلطة بالقوة و الامن و المباحث و يحتكر الوطنية و يتغطى بالفساد من جهة و جماعة الاخوان التى تحتكر ايضا فهم الدين و ايضا تستخدم العنف و الارهاب و هى لا تفهم لا فى الدين و لا فى السياسة و عاجزة عن التطور او فهم العصر بل و اصبحت اكبر سبوبة و ذريعة و فزاعة لتعطيل الديموقراطية و الاثنان يعتمدان على شعب مستكين فى غيبوبة او تخلف و جهل حضارى و علمى و دينى يمشى وراء كل جاهل او دجال لمجرد انه يترك لحيته و يرفع شعار دينى ! لقد استشرى الفساد و التسلط الوطنى الديموقراطى و الموالسة المعارضية و التخلف و النصب بأسم الدين و الدجل السياسى و الجهل العلمى و انتشار التسولية من اعلاميين منافقون من اجل مناصب و منافع و شعب مستكين مقهور ملايين منه على استعداد لاعطاء اصواتهم للفاسدين و اللصوص و الدجالين و بخمسة جنيه فقط ! [^]
‏قال فرعون
اذيك يا قطة ...عاملة ايه .. انشالله تكونى بخير .......كلامك دايما فى الصميم ..
‏قال Boneta
انتي فين يا حنان
بقالك كتير مش بتردي علي الكومنتات ليه
يارب تكوني بخير
‏قال الأبتسام حرام…
وماذا عن هتك عرض عقول البسطاء
تلاميذ الوهابيه يفتكون بعقول البسطاء فالمراة لا تقاوم اى اغراء فلا بد من عدم سفرها بمفردها وممنوع الأبتسام فهو حرام شاهدوا المصيبه السوده بانفسكم
http://www.youtube.com
/watch?v=g9lVC2y-WqU
ولا يتذكر هؤلاء المرتزقه رائدات الفضاء
‏قال هتك عرض عقول البلهاء والبسطاء مستمر…
هبل وخيبه
تربية اللحيه يقوى القدره الجنسيه وتسوية المراه لحواجبها يصيبها بهشاشة العظام
ليس هذا الكلام من حشاش ولكن من واحد يقال له دكتور ولا مانع من هتك عرض عقول البسطاء
http://www.youtube.com/watch?v=W43EtIs_nHA
‏قال Desert cat
انا التزوير الأصلى بالحجاب والخمار

شوفتهم وعملت لهم فضيحة فى الفيسبوك
هههههههههههه
‏قال Desert cat
Ms Venus
سلامتك من الحزن يا فينوسه
بس اعتقد مفيش فايدة طول ما الغالبية العظمى ماشية ورا القطيع
‏قال Desert cat
elmasryeffendi

بستغرب اوى لما حد يتكلم ويقول اصلنا رجعنا لايام الجاهلية طيب ياريتنا رجعنا لايام الجاهلية اصلى لما قريت فى كتب التراث عرفت ان الناس دى قد ايه بتتظلم لما حد يشبه اللى بيحصل دلوقتى بيهم لو قارنا خنلاقى ايام الجاهلية اناس كان عندها عقل تفكر بيه
‏قال Desert cat
ELVIRA

بامانة يا اوليفا انتى لاتتخيلى مدى سعادتى انهم خلاص غارو من المجلس
‏قال Desert cat
Kontiki
طبعا يا كونتا علشان العشوائيين والمتخلفين يتعاطفو معاهم لازم يحشروا الدين فى كل حاجه
دى عالم وسخة يا بنتى
‏قال Desert cat
Anonymous

اللى انت فيه مش جبن يا صديقتى العزيزة ولكن حفاظ على مشاعر الاخرين
انا بطبعى عصبية ومبعرفش اسايس او احايل علشان كدا تلاقى المشاكل ووجع الدماغ ورايا حتى فى البيت
بس خلاص اتعودت متلقلقيش عليا
:))
‏قال Desert cat
تحرش سياسى بعدالتحرش الجنسى

المقال بجد تحفة
ميرسى جدا للفت انتباهنا ليه
‏قال Desert cat
كارثه من انجازات المتاجرين بالدين

ولسه ده احنا حنشوف ايام سودة بسبب العالم الاوساخ دى والاوسخ منهم اللى بيصدقوهم
‏قال Desert cat
karim
بالعكس
انا كدا بقول فى امل وعمر كمان
‏قال Desert cat
Boneta

مبسوطة انى بقدر اعبر عن اللى بيدور جواكى
ميرسى يا جميلة
‏قال Desert cat
فرعون
اان كويسة
انت اللى مختفى بقالك فترة
بتوحشنا كتير متعملهاش تانى
‏قال Desert cat
Boneta

معلشى شوية شغل على شوية مشاكل
بس متقلقيش انا كويسة
انا متشكرة بجد على سؤالك
متعرفيش اد اليه فرق اوى معايا
‏قال غير معرف…
Amazing issues here. I am very happy to peser your article.
Thanks a lot and I'm looking forward to touch you.
Will you please drop me a mail?

my web site: post250352

المشاركات الشائعة