علمونى أن أنكر الاصوات

كنت وانا صغيرة لما اتكلم بصوت عالى الاقى ماما تقولى ان انكر الاصوات لصوت الحمير .. ولما اضحك بصوت عالى الاقيها تقولى يا بنتى الرسول كان بيبتسم .. لحد لما دخلت المدرسة وأول درس فى النصوص كان حفظ آية ان انكر الاصوات لصوت الحمير وتفسيرها .. ولما كبرت شوية وبدأت اعرف يعنى ايه مشكلة وازاى ممكن أحلها كان دايما يتقالى الصوت العالى بيخلى صاحبه فى موقف ضعف حتى لو هو صاحب الحق ولحد كدا مفهوم لكن اللى مش مفهوم لحد دلوقتى .. انى لما كنت اسمع الاذان اروح لماما اسألها هو انتى مش بتقولى لى انكر الاصوات امال ده صوته عالى ليه ؟ بعد التكشيرة التمام لاقيتها بتقولى اخر مرة اسمعك تتكلمى بالطريقة دى ثانياً علشان يذكرنا بوقت الصلاة ونقوم نصلى الصلاة حاضر وفى وقتها .. امممممم مش مقتنعة اصل اللى اعرفه ان مفيش حد مستنى واحد تانى يفكره بواجبه وفروضه ده احنا من اول يوم فى المدرسة بنصحى فى معاد معين ونروح من غير ما حد يفكرنا ... وبما ان ماما قالت لى اخر مرة اسمعك تتكلمى كدا روحت سالت الميس تانى يوم نفس السؤال .. قالت لى اطلعى بره ومش تيجى غير وانتى معاكى ولى الامر .. لما كلكوا رافضين امال أسأل مين ؟

لما تبقى محظوظ زى وبيتك خلفه مسجد وعلى يمينه مسجد وقصادة مدرسة وقبل الفجر بساعة تلاقى انطلق سباق مين هيفوز بأعلى صوت وبعد الفجر بساعه اللى خلف بيتك يخلص اللى على يمينك يخلص بعده بنص ساعة ولسه هتبتدى تقول اخيرا مفيش ازعاج تلاقى طابور المدرسة إبتدى ياخى A7A

لما يبقى كل شارع فيه مسجد لكل مواطن وميكرفون لكل من هب ودب يبقى من حقى أعرف مين اللى قالهم إن ده من الدين ؟

مش ربنا هو اللى قال برضه انى قريب اجيب دعوة الداعى إذا دعى ؟ و مش هو اللى يسمع من فى القبور ؟ ومش هو اللى يعلم السر والجهر ؟

امال مين اللى قال للناس اللى ساعات بتحط المايك فى بؤها لدرجة انك غالبا مش تقدر تميز هو بيقول ايه ؟ والاصوات النشاز اللى طالعة من كل اتجاه ان ده هو الدين ومش ينفع صلاة من غير الإزعاج اللى بتعملوه للبشرية ده ؟

هو مش المفروض فى الصلاة الخشوع ؟ ليه بقى اخر حاجه تفكروا فيها واصبح المسيطر ايديولوجيا الاستبداد و القهر باسم المقدس .