ايه إحساسك ؟

كان إحساسك ايه وانت بتأذى حد حتى لو الصلة بينكو مجرد مصالح مش لازم تكون الأذية جسدية ؟ ممكن تكون معنوية
إحساسك أيه لما بتلاقى حد ضعيف وتخرج قهرك وضعفك وسطوتك عليه ؟
إحساسك إيه لما بتحاول بكل جهدك تفرق الناس عن بعضها لا لشئ غير ان فى سؤال واحد بس يلح عليك ليه انا مش معاهم ؟ إحساسك أيه لما تكون شايف واحد عايش فى عذاب ولما تخرجه من أزماته يكون أنت اول واحد يعض إيده ؟
إحساسك أيه لما كل الناس اللى بتقابلها فى حياتك تشتكى من الحال والأحوال مش ملاحق تسمع مين ولا ترد على مين . وفاكرين علشان مش بتشتكى انك مولود فى بؤك معلقة دهب فى حين أن جواك نزيف محدش شايفه ولا حاسه غيرك ؟
وياترى إحساسك أيه وانت بتقرأ تصريح لوزير المالية انه ما بينام ليل ولا نهار من أجل توفير حياة أفضل للمواطنين انا مصدقاه فعلا انه مش بينام ليل ولا نهار لكن من اجل التفكير فى كيفيه تنضيف جيوب المواطنين ده ان اتبقى لهم اصلاً حاجه يلبسوها فيها جيوب ؟ احساسك ايه لما تسمع قنوات الإرهاب وهى بتقول على امك او اختك او بنتك انها عورة وانها مساويه بالكلب لان كلاهما ينقض الصلاة ؟
احساسك ايه وانت ماشى فى الشارع ترتكب الموبقات فى حق اى واحدة تقابلك لمجرد انها مش محجبة اصل ده اسمه جهاد ؟ واحساسك ايه لما تسمع عن الاخوة اللى بيسرقوا محلات المخالفين فى العقيدة لان اموالهم حل لهم ؟
احساسك ايه لما جرحت حد شاركك لحظة حلوة ؟ واتقاسم معاك ولو ضحكة من القلب ؟
بيجى لك نوم ازاى وانت ظالم حد ؟ بتعرف تخرج من البيت ازاى وانت حاسس انك منتهك حقوق حد ومعتدى على حريات غيرك ؟
مش عارفه ليه نفسى ادخل جوا كل الناس واعرف فين كلمة السلام ؟
واحد صاحبى كان بيقولى مشكلتك انك عايزة كل الناس محترمة .. مكنتش عارفه ان الاحترام الايام دى بقى مشكلة !!