اوعوا تاكلوا عندهم

من اول يوم فى اعدادى لحد اخر يوم فى ثانوى كانت شريكتى فى الديسك اسمها مريان كنا غالبا طول الوقت مع بعض حتى الدروس الخصوصية بتاعتنا كنا برضه مع بعض لو انا قريبة من بيتها بطلع معاها واكل فى بيتها ولو هى قريبة من بيتى بتطلع معايا وتاكل فى بيتنا لو اتاخرت ماما تتصل بمامتها تسال عليا والعكس ماما عمرها ما قالت متروحيش بيتها ومش تشربى ولا تاكلى عندهم ماماتها عمرها ما قالت لها متروحيش بيت مسلمين ولا تاكلى فى بيتهم .. ماما كانت بتحب مريان جدا لاخلاقها العالية وذوقها وتربيتها الراقية ماما ماريان مش كان يحصل مناسبة او عيد غير لما تتصل بماما تهنيها او تقولها كل سنة وانتى طيبة حتى بعد التنسيق ما حدف كل واحدة فينا فى جامعة مختلفة و محافظة مختلفه كنا على اتصال باستمرار ببعض .. بحكى القصة دى كلها ليه ؟ مش ذكريات ولا أيام قاعدة أترحم عليها .. لكن لأنى سمعت إمام مسجد من اللى أخرهم إبتدائية قديمة ويقتص من القرآن آية يستشهد بيها وقت اللزوم .. فى خطبة الجمعه اللى كانت من يومين قاعد هاتك يا تقطيع فى فروة المسيحيين اللى هما اصلا ربنا مش راضى عنهم واللى هما أصلاً هيدخلوا النار لأنهم اختاروا دين الضلال .. ولو عندك زميل مسيحى فى الشغل يبقى مش تقوله غير صباح الخير حتى يهتدى الى الرشد ولا توده حتى يفوق من غيه واحيانا الموظفين بيبقى يجيبوا سندوتشات ويعزموا على زمايلهم اوعى يا أخى المؤمن تأكل من أكله لو مشتريه من المطعم اللى جنب الشغل برضه اوعى تاكل منه حاجه .. توقعت فى البداية ان الراجل ده مختل عقلياً اعتلى المنبر وبعد لما قال كام اوعى ورا بعض قولت الراجل ده بركة وشكله معاه توكيل من ربنا يحرم ويحلل ويدخل اللى على مزاجه النار واللى على مزاجه الجنة .. هو ليه الأوقاف مش بتختار الحمير اللى بتعتلى المنبر ؟؟ هو ليه الناس مش بترد عليه وتقوله عيب تكرهنا فى بعض ؟؟ هو ليه مش ليهم شغلانة غير المرأة و المسيحيين مع ان اخر كلمة للرسول كانت استوصوا بالنساء خيراً والقرآن قال

لَتَجِدَنَّ أَشَدَّ النَّاسِ عَدَاوَةً لِلَّذِينَ آَمَنُوا الْيَهُودَ وَالَّذِينَ أَشْرَكُوا وَلَتَجِدَنَّ أَقْرَبَهُمْ مَوَدَّةً لِلَّذِينَ آَمَنُوا الَّذِينَ قَالُوا إِنَّا نَصَارَى ذَلِكَ بِأَنَّ مِنْهُمْ قِسِّيسِينَ وَرُهْبَانًا وَأَنَّهُمْ لَا يَسْتَكْبِرُونَ وَإِذَا سَمِعُوا مَا أُنْزِلَ إِلَى الرَّسُولِ تَرَى أَعْيُنَهُمْ تَفِيضُ مِنَ الدَّمْعِ مِمَّا عَرَفُوا مِنَ الْحَقِّ يَقُولُونَ رَبَّنَا آَمَنَّا فَاكْتُبْنَا مَعَ الشَّاهِدِينَ"

يبقى الناس دى بتتكلم على أى دين بالظبط ؟؟ وطالما هما حمير إعتلوا المنابر ليييه ؟؟ هل من وقفة يا وزير الأوقاف ؟؟