هو ليه بقى العيد مرتبط بالتحرش

سؤال راودنى امبارح بالليل وانا ماشية فى الشارع وامبارح بالليل ده اللى هو كان ليله العيد تحديداً وانا شايفة الشارع على الجانبين شباب ومش سايبين ولا واحدة ست كبيرة ولا حتى طفلة الا لما يسمعوها ما لذ وطاب من الالفاظ .. وان الظروف ساعدته مفيش مانع يلمس اى حاجه ايده تقع عليها .. وبالطبع انا مش بنفى حالات السفالة دى طول السنة لانها عرض مستمر والاقى الولد متحفز للبنت اللى ماشية ولازما وحتما ولابد هيقل ادبه عليها باى لفظ قذر .. حتى لو البنت غيرت اتجاهها تلافيا لسماع اللفظ ده او اى حاجه ممكن تحصل لها .. تلاقيه بيجرى وراها بكل ما اوتى من طاقة لاتمام عمله على اكمل وجه وكأنه شغل بيقوم بيه ولازم يرضى ضميره ... ده لو شغل بجد مش هيشتغل بالامانة والضمير ويبذل الجهده كله .. لكن بتزيد وتتزايد اكتر فى الاعياد .. طب والحل ؟؟
ده انا لفت نظرى ولد بيعاكس بنت اخرها12 سنة وجسمها يكاد منعدم علشان الجماعة اللى بيقولوا اصل البنات اللى بيلبسوا مش عارف ايه علشان اثارة الشباب .. البنت مجرد هيكل ماشى على الارض فين الاثارة اللى فيها علشان اللوح اللى راح يقل ادبه عليها واصحابه واقفين يهللوا مبسوطين بانتصار صديقهم القذر فى موقعة التحرش العظمى .. والعيال الصغيرة كمان بتعاكس وتتحرش ليه ؟ عندها كبت ؟
ليه الشارع بيبقى على الجانبين شباب علشان لو بنت او ست مشيت تكون ماشية فى النص ويبتدى الشاب المثار على روحه باطلاق اقذع الالفاظ لمجرد ان حظها العاثر ساقها للنزول يمكن نازلة تتشرى اكل لولادها ولا دواء لاحد والديها ؟؟
لكن ازاى ؟؟ طالما نازلة فى اليوم ده يبقى نازلة مخصوص علشان الشباب يتحرشوا بيها مش تلوم الا نفسها بقى ..
بعد صلاة العيد المفروض الناس بتنصرف لذبح الاضحية او معايدة اهاليهم وقرايبهم او الخروج مع عائلتهم .. وشبابنا الواعد بينصرف لاكتر الاماكن تجمع يمكن ايده تلمس هنا ولا هناك .. وان حد فكر يقوله عيب كدا ده ان يعنى حد فكر يكون رده فى منتهى البجاحة .. الله وهى نازلة النهاردة ليه يعنى ماهو اكيد نازلة علشان كدا ..
من شوية كنت بتفرج على نايل سبورت شوفت اعلان فيه شوية شباب مصرى زى الورد وكل واحد بيقول جملة مختلفة عن التانى واحد بيقول انا من النهاردة هشتغل علشان افيد بلدى .. وواحد تانى بيقول انا من النهاردة ها اعامل كل البنات زى اخواتى .. انا اتبسطت اوى بامانة وقولت خلاص الاعلام بقى له فايدة وبيوجه الشباب كويس اهو ..الا فى اخر الاعلان الاقى كل واحد هيتغير علشان عربية ؟؟
اه بجد علشان عربية .. يعنى لو مش العربية دى يبقى شغل ايه وبتاع ايه ؟ هو ياخد المصروف من ماما وينزل يشرب حاجه ساقعة ويقف مع صحابه اللى شبهه فى الشوارع يقل ادبه على اللى رايحة واللى جاية .. ولو مش العربية مفيش حد زى اخته غير اخته ؟؟
من يجى اسبوعين كتبت فى الفيسبوك .. عايزين نكتب طلب لوزير الداخلية ونجمع عليه توقيعات كل الناس المستائة من التحرش والمعاكسات والسفالة اللى فى الشوارع دى .. نطالبه بوضع كاميرات مراقبة لضبط المتحرش .. فى ناس كتير اوى وافقت ومن بينهم رجالة سبحان الله لما سالتهم انتوا موافقين على اى اساس ومش بتقولوا اصل البنت السافلة هى السبب .. قاوا احنا مش من الناس اللى بتدين المجنى عليه ونطلع مبرر للجانى .. لينا اخوات بنات بيتبهدلوا هما كمان فى الشوارع .. بس برضه فى ناس احبطتنى وقالت لى الكاميرات مكلفة ووزير الداخلية مش هيعمل كدا حتى لو جمعتوا توقيع الـ80 مليون مصرى .. وفى ناس قالت البنت بتبقى مبسوطة بالتحرش والمعاكسة ..
قوم ايه خير الله اجعله خير كدا الاقى النهاردة جريدة الدستور ناشرة ان حديقة الحيوانات بالجيزة وضعت كاميرات مراقبة فى الجونينة لضبط المتحرشين .. اى والله وده لنك الخبر اهون

كاميرات مراقبة في حديقة حيوان الجيزة لمنع التحرش الجنسي في أيام العيد

طيب طالما فى خطوات ايجيابية وموضوع الكاميرات ده متاح ليه بقى سايبين البلطجية والعواطلية والسفلة دايرين كدا فى الشوارع دون وازع او رادع ؟؟