والله وعملوها الرجالة

مع انى طول الوقت كنت بقول يارب مصر تخسر علشان الثورة اللى الناس عاملاها من شهر فات وكله قاعد يكيد ويكيد ويدعى على الجزائر دعوة رجل واحد ... وقبل المبارة بيومين قولوا تلاته الاقى كل المحلات معلقة علم مصر والبلكونات والعربيات والعيال الصغيرة راسمة علم مصر على وشوشها وانا كل لما اشوف المناظر دى ازداد غيظاً مش لأنى جزائرية لا سمح الله انما انا شهادة ميلادى وبطاقتى الشخصية بتقول انى مصرية مية فى المية .. لكن لأنى شايفة الوضع فى مصر مزرى للغاية وقلة الادب والانحطاط والفساد ده غير اكوام الزبالة التى ضاهت الاهرامات فى علوها من حوالينا محتاجين الف وقفة ووقفة زى وقوفنا فى وجه العدو الجزائرى يوووه سورى اللعيبة الجزائريين .. جه يوم المباراه والجميع قاعد يدعى من قلبه من صباحية ربنا بل اكاد اجزم ان الجمع قام صلى الفجر حاضر وفضل قاعد للساعه السابعة والنصف يبتهل الى الله رب العالمين ان يلهم المحروسة النصر المبين .. الا ما عملتوها والنا بتموت فى طوابير العيش ولا لما الدوقة وقعت على راس اللى فيها .. الساعه 5 مفيش اى كائن حى فى الشارع .. طيب ده لسه ساعتين ونص الناس راحت فين ؟؟؟
الساعه وصلت سبعة .. رحت عملت لنفسى كوباية شاى محصلتش وقاعدة بكل برود اتفرج على الناس اللى على اعصابها وكانهم طالعين الجبهة .. المباره بدأت فى معادها ومع اول دقيقتين عمرو ذكى دخل اول جون الدنيا من حواليا اتقلبت وكراسى اتخبطت فى بعضها ... وناس وصلت السقف ونزلت تانى ... وانا قاعدة بكل برود اقول ربنا يشفى .. خلصت المبارة باحراز عماد متعب الهدف التانى .. والاقى التليفونات تنهار عليا اكاد انتهى من تليفون الاقى تليفون تانى . ده غير الويتنج .. ليه كل ده بقى مش لانى احرزت هدف وبيهنونى ولا حاجه لا سمح الله لاء كله شمتان فيا لانى كنت بقولهم مصر حتخسر .. فالجميع حب يطلع لى لهم لسانه أول لما خلص الماتش .. وهنا الاقى صديقاتى العزيزات بيغيظونى وبيقولوا لى نازلين الشارع وأنتى لاء .. قولت جاااااااااااااااااية ... نزلت معاهم والاقى الشارع بالمنظر ده