سرقوا المصاحف

ليست نكتة الموسم

ولم تحدث فى اى دولة أوروبية حتى يطلع علينا اصحاب الحناجر العالية بأن هذه مؤامرة الحاقدين على الإسلام والمسلمين

ولكنها حدثت هنا فى مصر

اليوم بعد الفطار كنت على موعد مهم ولكن نظراً لظروف طرأت فقد خرجت بعد الفطار مباشرة لأنتهى من مشوار كلفتنى به الماما التى لا يمكن أن أرد لها طلب حتى لو أكلت وانا واقفه ونزلت من البيت جرى لتخليص طلبها أولاً علشان مش اتاخر على مشوارى المهم .. أثناء سيرى والشوارع فاضية مش فيها غيرى وانا ماشية مستمتعه اسمع صوت ميكرفون ينطلق من أحد المساجد المصاحف يا مؤمنين الناس اللى بتدخل المسجد تقرأ القرآن وبدل ما يقفلوا المصحف ويسيبوه لغيرهم علشان ده مسجد مش وكالة من غير بواب أخدوا المصاحف فى إيديهم ومشيو .. وكل من أخد مصحف من المسجد يرجعه وأجره والثواب على الله .. فى البداية قولت ايه الراجل اللى بيهزر فى المسجد ده مش معقول يعنى .. وتعمدت التلكأ فى المشى حتى أتأكد من كلماته التى أوهمت نفسى بأنى لم اسمعها جيداً بل توقفت حتى إخترقت النداءات أذناى على المصاحف التى أخذها رواد المسجد بعد إنتهائهم من القراءة وفى كل مرة تتغير نبرة المنادى إلى الترجى لإعادتها مرة أخرى للمسجد ... أكملت طريقى وكنت فى قمة ذهولى بدل من إعمار المساجد وفى الشهر الكريم يذهب المصلين لتقليب المسجد ؟؟