فين الكاميرات علشان يكون فى 237 حالة تحرش ؟؟؟

قبل العيد بيوم شوفت خبر ان فى مجموعة من الشباب والشابات الرائعين عملوا حملة سموها لحمنا غالى ودمنا حامى والحملة دى كان هدفها انهم هينزلوا الشوارع فى ايام العيد ومعاهم كاميرات يصوروا بيها اى حالة تحرش تحصل وسيتم ملاحقة المتحرش الذى يظهر فى الصورة او الفيديو قضائياً .. طبعاً أنا اتبسطت اوى للخبر وقعدت سعيدة جدا للغاية وقولت كويس العيد السنة دى هيبقى سعيد ومن غير تحرش ولا قلة الادب اللى بتحصل كل سنة .. واذ بى اشوف المواقع الاخبارية انهارده الاقى المصرى اليوم عامل تقرير عن رصد 237حالة تحرش .. قولت ياللهول العيال دى جت ازاى ومنين وفلتت إزاى من الكاميرات ... بس جميل اوى الحملة اللى قامت بيها الشرطة وجميل جدا انهم فعلاً بدأوا يتصدوا للظاهره عقبال ما يتصدوا ليهم كل يوم وتتولد من جديد النخوة فى المجتمع المصرى .. وعلشان الناس اللى بتقول لبس البنات وتطلع اى مبرر للمتحرش ..محرر اليوم السابع نزل ومعاه مصور ورصد الحالات بالصور كمان وفى نهاية مقالة كتب الجملة دى

مخطئ من يعتقد أن ملابس الفتيات، هى السبب الرئيسى فى تعرضهن للتحرش، خاصة أن معظم الفتيات كانت ملابسهن، غير مثيرة على الإطلاق، بل كان هناك بعض الفتيات، ملابسهن عبارة عن إسدال، وسيدات يحملن أطفالا، تعرضن لمضايقات.

"كبت رمضان" و"النهاردة عيد"، كانت الجملتان الأكثر ردا، من المتحرشين لتبرير ما يقومون به من أفعال وألفاظ تجاه الفتيات والسيدات، وربما تفسر هذه الإجابات العابرة أن ظاهرة التحرش التى حدثت فى الأعياد الماضية لم تكن سلوكا عشوائيا أو زوبعة فى فنجان بل تحولت إلى عادة موسمية

ياريت مرتزقة الفضائيات اللى سابين قضايا مهمة جدا المفروض رأى الدين فيها اهرامات الزبالة اللى مالية البلد .. هى النظافة مش من الايمان برضه والمفروض يتكلموا على المهازل اللى فى شوارع مصر دى .. طيب مش سمعوا عن الرى اللى بالمجارى ؟؟ ولا هما الوهابيين بيبعتوا لهم الاكل جاهز ؟؟ ومش مهم الزبالة ومش مهم الصحة ومش مهم مشاكل المواطنين اللى محتاجه تشديد منهم وفتاويهم الرنانة علشان جمهورهم اللى مسلم لهم عقله بدل ما يتحرشوا بالبنت العورة اللى التركيز كله عليها وهى قليلة الادب اللى خارجه من بيتها ليه اكيد كانت سافرة يبقى تستاهل الاغتصاب مش التحرش ولما منقبات ومحجبات يقولوا لهم الشباب الصايع بيتحرش بينا يقولها قرى فى بيتك وربى العيال بتخرجى ليه ؟؟ واعتقد لو حد سال سيدنا الشيخ وقاله الست اتخطفت من بيتها واغتصوبها يكون الحل عنده أوؤدوا البنات .. هو يقدر يلوم الذكر المثار على روحه طول الوقت ده غلبان مش قادر يتحكم ى نفسه يابشر