غرامة 100جنيه

مش عليا غرامات ده المبلغ المذكور وهو مائة جنيه مصرى فقط لا غير غرامة حددتها وزارة المالية لكل من يمتنع عن التعامل بالجنية المصرى المعدنى .. انا قريت الخبر ده من يومين تقريبا النهاردة كنت فى البنك وواقفه فى طابور طول بعرض ما شاء الله لما الناس دى كلها جاية تودع فلوس امال الناس قاعدة تعيط ويقولوا مش لاقيين فلوس ليه .. طلع نصهم رايح يقبض مرتباته والنص التانى هو اللى رايح يعمل ايداع .. المهم واقف قصادى راجل مش كبير اوى ولا صغير اوى ومش طويل اوى ولا قصير اوى وماسك فى ايده لفه ورق افتكرتها فى البداية كيس لب جايبة يتسلى فيه لحد ما دورة يجى اه والله ده اللى جه فى بالى لما شوفه بيطلع اللفة الورق دى من جيبه ... وفى ايده التانية ماسك شوية فلوس ورق فئة الخمسون جنيه ... وجه دور الراجل ويروح مطلع اللفه الورق ويديها لموظف البنك قاله ايه ده ؟؟؟ انا مش باخد العملة المعدنية مع انه هو كان لسه مدى واحد جنيه معدنى قبلها بدقيقة واحدة .. ولما الراجل قاله دى عمله بلد يا بيه ازاى مش تتعامل بيها قاله انا ماليش دعوة

الراجل : يعنى لما البنك مش يتعامل بعملة البلد مين اللى يتعامل بيها هى مش طالعه من عندكو برضه

الموظف : دى تعليمات انا مباخدش الفلوس دى وخلصنا بقى

الراجل : يا بيه دى فلوس مدرسة يعنى انا اشرب 150 جنيه عملة معدنية اعمل بيها ايه ؟؟

الموظف : اللى عليه الدور

الراجل يعنى ايه اللى عليه الدور انت مش محترمنى .. انا بقولك ان انا راجل بشتغل فى مدرسة ودى مصاريف مدرسية العيال بيجو يدفعوا الفلوس وبيجيبوا فها جنيهات معدنية اقولهم لاء ؟؟

زميل موظف البنك اللى جنبه يرفع النضارة من على منخايره ويجعر بعلو صوته والمصحف الشريف دى فلوس مكافأة بطلوا كدب بقى

هى فلوس المكفأة بيبقى بيجى فيها جنيهات معدنية .

راجل كوبارة واقف ورا الراجل بتاع العملة المعدنية : انا عايز افهم لما انتوا مش بتاخدوا الفلوس دى مصنعينها ليه ؟؟ هو الشعب ناقص توهان وبؤس مصنعين فلوس ورافضين تتعاملوا بيها الناس لغلابة ذنبها ايه ؟؟

تشجعت انا بقى : بقولك ايه يا عمو انت تلف الفلوس دى وتاخد بعضك وتطلع على امن الدولة وزارة المالية ناشرة بتقول اللى يرفض التعامل بالجنية المعدنى هيدفع غرامة 100جنيه شوف انت بقى معاك كام جنيه وهتدفع الموظف ده كام 100جنيه عليهم .. ده ممكن يبيع بيته

الموظف : ما تخلصونا يا اخوانا الست اللى قبلى اديت له الدفتر وهو انشغل فى عمل الايداع ليها

الراجل وقف يترجى فيه شوية يا بيه انا اعمل ايه فى المبلغ ده كله والتانى مديله الطرشة فى الآخر راح واخد بعضه ورايح لمدير البنك

رجع قاله مدير البنك بيقولك خد منهم 50جنيه والباقى ربنا يعوض عليا فيه

انا : ياعم الحاج ما قولت لك تاخد بعضك وتطلع على امن الدولة والله انا لو مكانك اعمل كدا انت عايز تمشى وفى جيبك 100جنيه معدن ولما ابنك يطلب منك فلوس يركب مواصلات تعطيه صره من الدنانير

الموظف ساب اللى فى ايده وبص لى شذراً : مش احسن ما يديله جنيه مرسوم عليه قلب وسهمين ومكتوب عليه حب فور ايفر

الناس انفجرت ضاحة وانا طبعا تنحت لانى حسيت بالاهانة

وراح باصص للراجل قاله بص انا مش ها اخد منك غير 20جنيه

الراجل وقف يتحايل ويقوله يابيه المدير يقول 50 وانت تقولى 20 وانا اصلا معايا 150 حسبى الله ونعم الوكيل

انا : يا سيدى ما اان قولت لك الحل انت تروح تبلغ والله ما جايبنا لورا غير التخاذل بتاع الناس ده

واحد واقف فى اخر الصف : يا ابلة الله لا يسيئك ده مش بعيد لو راح هناك يتعلق .. يا ستى انا كنت بشترى الجرنان والراجل بديله جنيه من الملعون ده مش رضى ياخده ولما قولت له هعملك محضر وتدفع غرامة 100 جنيه شتمنى

جه دورى ودخلت اعمل الايداع الموظف بص لى بصة عمرى ما هسامحه عليها ابدا فين الدفتر بتاعك يا شاطرة ؟؟ شاطرة اخصص انا خلصت مدرسة من زمان .. ما علينا انا مش معايا دفتر ... امال جاية تعملى ايه ؟؟ جاية تقوى الناس على بعضها وتقولى لهم روحوا امن الدولة ؟؟ مش علموكى لما تكونى فى مكان وفى ناس كبيرة بتتكلم تسكتى انتى خالص ؟؟ ناس كبيرة وشاطرة ؟؟ والله انا كبيرة يا سيدى مش صغيرة بس اعمل ايه انا بفعل الطبيعة ؟؟ خد يا سيدى الفيزا كارت ؟؟ انا مش عايزة فيزا كارت انا عايز رقم الحساب ولو مش حافظاه تعالى بكرة ... لالالالالالالالا ازاى حافظاه واوعى تقولى الفلوس دى مش تنفع وغيريها ... قالى ازاى ؟؟ علشان تطلعى على امن الدولة .. الله لما انتوا قلقانين من امن الدولة مش بتمشوا الراجل ليه

اللى انا عايزة افهمه بقى .. لما هو فى قانون لتغريم اللى بيعترض يتعامل بالعملة المعدنية الناس ليه بتتخاذل ومش بتروح تشتكى وبيفترضوا انهم لو اشتكو مش حد هيعمل لهم حاجه ؟؟ امال هو القانون نازل ليه ؟؟

مدونتى بقى محجوبة فى الامارات ليه ؟؟

امبارح ساره بتقولى انا مش لاقيه مدونتك شكلها اتسرقت .. يابنتى مش اتسرقت ماهى مفتوحة قدامى اهيه .. وبعدين من قلة المدونات هيسرقوا مدونتى .. قالت والله مش بتفتح عندى اعمل انا ايه بقى ؟؟ قولت لها يبقى النت بتاعك فكسان .. الا اتفاجأ بكومنت الصبح من انجل بتقولى فيه ان مدونتى محجوبة فى الامارات وانها دخلت ببروكسى ... يبقى تتحجب فى الامارات ليه ؟؟ وايه المغزى من حجبها بعد بوست انقلاب عبدالناصر وعصابته ده ايه البركة اللى حلت على البلوج دى ؟