الله يفضحهم دول طلعوا بتوع نسوان

بالرغم من إنى مش ليا فى الكورة ولا من اللى بيعطلوا شغلهم علشان يفضوا نفسهم للماتشات لكنى محتفظة بهويتى اوى وبحب بلدى اوى علشان كد يهمنى عدم طمس هويتها وقلع المصريين من جذورهم بجلب عادات بدوية صحراوية قميئة ... لما مصر بتلعب مع أى فرق خارجية بفرح اوى لما بتكسب وبزعل اوى لما بتخسر لدرجة انى فى الدورى الافريقى خرجت انا وصحابى ولفينا بالعربيات مع الناس اللى كانت بتلف وفرحنا اوى معاهم وكنا بنهتف من قلبنا باسم مصر بمعنى ان اللى بيتكلم او بيلعب بيكون بيلعب باسم مصر كلها وبيتكلم باسم مصر كلها .. المنتخب فرح الناس فى البرازيل ومواجهته مع ايطاليا والناس كلها خرجت الشارع وهتفت وكانوا مستنين امريكا لسبب ما او عدم توفيق من ربنا خسروا المباراة .. المفروض نعلق لهم المشانق ؟؟؟؟

مش دول اللى شرفونا ورافعوا راسنا من كام يوم ؟؟

مش دول اللى عمرو اديب اللى قاعد يجعر فى الفيديو ويقول اصل الملعب كان فيه نجاسة علشان كدا احنا خسرنا قدام امريكا وهانى شاكر متصل يقوله انا بعزيك فى الاخلاق والاخ اللى مقيم فى قطر متصل يقول البقاء لله ..عمرو نفسه اشاد بيهم وبكفاءتهم فى الملعب بعد ماتش البرازيل وبعد ماتش ايطاليا فين الشهامة بتاعتة الناس فى وقوفهم جنب المنتخب ؟؟ طيب المنتخب رجالة مش بنات ماشية فى الشارع شباب بيتحرش بيهم علشان الناس تغمض عينيها وتقول البنت هى السبب خارجة من بيتها ليه مش كفاية انها بنت خرجة من بيتها كمان

يعنى ايه جنوب افريقيا علشان يداروا على واقعة السرقة ألفوا إشاعات وقالوا ان اللعيبة جابوا نسوان غرفهم ؟؟ من جمال نسوان جنوب أفريقيا أوى هيجيبوهم غرفهم ؟؟ يعنى بدال ما يحققوا فى جريمة السرقة وفضايحهم قدام العالم يرموا بلاهم على الفريق المصرى ؟؟

انا كنت فاكرة ان اشاعات الشرف بتطلع على جنس حواء بس طلعت كلمة الشرف لبانة سهله تطلع من فم اى انسان عايز ينفى جريمة على نفسه ذلك الشرف الذى لن ينال منه سم زلق مريض يسيل من ألسنة عكرة كصحفى جنوب افريقيا وعمرو اديب اللى قاعد يجعر دون أى دليل مادى ايه عايز يبرء حضرته حرامية جنوب افريقيا .. المبالغ اللى اتسرقت من اللعيبة مش شوية ثم ازاى نسوان هيطلعوا لهم غرفهم دون ان يتم تسجيلهم ؟؟ وفين السكيورتى ؟؟ ايه كانوا ملبسينهم طاقيه الاخفاء ؟؟