تعالى فى الجلابية واتصدر

عندما يرشح نائب نفسه فى الانتخابات ويذهب اهل دائرته لاختيار الاصلح وخير من يمثلهم ويتحدث بلسانهم عن مشاكلهم وطبعا ده مش بيحصل لان اى نائب بيعمل خده مداس ايام الانتخابات ورايح جاى يسلم ويبوس الناس على اختلاف درجاتهم حتى لو مش بيستحموا عملاً بمبدأ ان كان لك حاجه عند اللى مش بيستحمى ويلاعب الاطفال الصغيرين ويمثل بقى انه منهم واليهم .. بس اهو على الاقل بيدخل المجلس يتكلم عن المشاكل اللى بتحصل فى البلد عموما وحتى لو كان من هواة التصفيق ورفع الايد للموافقه فقط برضه اسمه بيعمل حاجه .. إنما لما يدخل نائب مجلس الشعب .. وبدل ما يتكلم فى مشاكل البطالة او التعليم او الصحة او الطرق او رغيف العيش اوووووو لانى لو قعدت اقول او مش هيكفينى مدونات بلوجر كلها حصر للمشاكل اللى فى البلد .. لما يسيب كل ده ويقولك احنا عايزين الجلابية تبقى الزى الرسمى للمصريين لأنها الاصل يبقى ده اسمه ايه ؟؟؟

استخفاف بعقول الناس اللى اديته صوتها امانة وانتخبته علشان يتكلم بلسانها ؟؟ ولا استهبال ؟؟ ولا مش لاقى حاجه يقولها قام حب يكون له دور راح قايل الاتى :-

تقدم عضو مجلس الشعب مصطفي الجندي بمشروع قانون يطالب فيه باعتماد "الجلابية" زياً رسمياً باعتباره ثقافة مصرية خالصة وعودة الي الجذور فهو زيا تراثيا ينتشر في محافظات مصر وقراها سواء في الوجه البحري او القبلي او السيناوي او البدوي او النوبي لذا يجب المحافظة عليه فنحن اسبق من دول الخليج في ارتداء الجلباب ورغم ذلك فالشعوب الخليجية حافظت علي الجلباب بينما أهمله المصريون .

وياريته قال كدا وسكت ألا طالب كمان من الرئيس مبارك انه يبتدى ويلبس الجلابية ويحضر بيها المؤتمرات والاجتماعات علشان يبقى قدوة للشعب ومثال قوم ايه بقى يا حضرات الشعب يقلده ويروح لابس الجلابية على طول وكله ايمان ان الرئيس هيقبل دعوته

فى الوقت ذات نفسه اللى السيد النائب بيدعو فيه المصريين للبس الجلابية كان قاعد فى مجلس الشعب بكامل آيافته

مش المفروض كان سيادته يبتدى بنفسه وهو بينادى بهذا المطلب العبقرى

حقيقى يا جدعان صدق اللى قال الكلام نوعان كلام فارغ وكلام مليان كلام فارغ

وانا بقى تيمناً بهذا العضو العبقرى صاحب الحل الجذرى لجميع مشاكل المصريين وهى الجلابية اللى كانت تايهه عن خاطرنا طول السنين اللى فاتت اطالب بعودة الاندر وير اللى هو شبه البنتاكور ( راجع اى مسلسل صعيدى وانت تعرف شكله ) .. والحمد لله انه اتكلم على الزى الرجالى وهو الجلابية البارتى اما النساء ينعمون بما يحلو لهم بشتى انواع الموضه