الناس دى مية ميه

٥٣ رجل دين سعودياً يطالبون بمنع ظهور المرأة فى التليفزيون والصحف
هما رجال الدين السعوديين دول سايبين كل المصايب اللى بتحصل وقاعدين علشان يتفننوا فى تشيئ المرأة وكأنها لم تخلق إنسان .. سايبين الكفيل ياكل مال اللى بيشتغل عنده بكل سهولة ويسر والاطفال اللى يتم اغتصابهم بواسطة السواقين اللى عند اللى جابوهم ولا الخدامات اللى يتم انتهاك جميع حقوقهم بما فيها كرامتهم ونهاية الليل اغتصابهم
زين والله رجال الدين بتوع السعودية دول .. الا هما شغلتهم ايه بالظبط وتم اختيارهم بناء على ايه ؟؟ .. اصل الشريعة الاسلامية مش فيها مهنة اسمها راجل دين ده حتى الرسول اللى هو ربنا اصطفاه كان راعى غنم واشتغل برضه تاجر .. برضه اللى عرفناه من الاسلام ان السيدات كانوا بيخرجوا للحرب والسيدة عائشة كانت تبلغ احاديث عن الرسول .. ورفيدة اول طبيبة فى الاسلام كانت تخرج فى الحروب لعلاج المصابين .. ولا هما قصدهم شريعة انسان الغاب طويل الناب ؟؟
وبعد رجال الدين اللى مش عارفين حاجه من الحياة غير المرأة يصدق على كلامهم
وزير الداخلية السعودى، الأمير نايف بن عبدالعزيز، أن بلاده لا تحتاج إلى تمثيل للمرأة فى البرلمان
بس ده كمان جه بالطامة الكبرى يعنى هى ملهاش اى لزوم خالص فى الحياة هى تاكل وتشرب وتضاجع مولاها الراجل اخر الليل وان خلفت له ولد تبقى الزوجة الصالحة وان خلفت بنت يبقى جابت له العار
إذن الوأد هو الحل .. هى دى تقريبا الفتوى الجاية يعنى .. هما بدأوا بمنعها من القيادة ثم يطالبوا بإخفائها وعدم ظهور اى صور ليها يبقى اى بنت تتولد فى السعودية بعد كدا يلفها ابوها ويخرج فى الفجر يحفر لها فى الصحراء الجرداء ويدارى عاره
بعدها يعود للقبيلة مرفوع الراس وفى الغروب ياخد الربع ويطلعوا على الصحراء يشربوا درينك وفى الصبح يروحوا سوق الجوارى اصل الجوارى اللى فى بيوتهم عفا عليهم الزمن وأهو التجديد مطلوب
ويا أهلاً وسهلاً بالجاهلية الأولى