من تدخل فيما لا يعنيه

لو جارك مضايقك تقدر تخرب بيته وتفرقه عن زوجته بمنتهى السهولة وبكدا تشفى غليلك منه .. ما أنت خربت بيته بقى .. هذا الكلام ده ليس كلامى .. ده كلام العالم العلامة المتعلم العبقرى الرئيس الأسبق للجنة الفتوى بالأزهر الشيخ جمال قطب .. فتوة سيادته تنص على ايه بقى كدا تعالوا نركز سوا ...

يجوز للجيران والأهل أن يطلبوا من القاضي تطليق الزوجين حتى في حالة عدم رغبة أحدهما أو كلاهما، إذا رأوا استحالة العيش بينهما نتيجة لما يشاهدونه باستمرار من مشاكل وشجار بينهما وعجزهم عن حلها أو كفهم عن ذلك.

يا مشاء الله ربنا يكرمك ويبارك لك فى الاولاد يا شيخنا .. يعنى هو حضرتك وانت راجل كبارة وعلامة كدا مش قرأت فى القرآن ان الطلاق أبغض الحلال ؟؟؟

وحضرتك يا شيخنا يا كبير مش قرأت فى السنة ان الرسول صلى الله عليه وسلم قال: " من حسن إسلام المرء تركه ما لا يعنيه

يعنى عدم التدخل فى حياة الآخرين وخصوصياتهم مهما كانت الصلة .. ده الأزواج المحترمين بيحترموا خصوصيات بعض يا شيخ فما بالك بالجيران اللى حضرتك عايز تعينهم أوصياء على بعض .. مش المفروض برضه إن الإنسان يبقى وصى على نفسه ويراقبها بدل ما يقعد رامى ودانه فى بيت جيرانه ويشوفهم بيتخانقوا ولا لاء وكمان يروح يرفع عليهم قضية طلاق يا حلولى .. طب افرض جيرانه اللى بيتخانقوا دول مسيحيين هيرفع عليهم برضه قضية طلاق .. والمصيبة ان حضرة المفتى بيقول حتى لو لم يرغب احد الطرفين .. يعنى طلاق بالإكراه .. يعنى زوج وزوجته مش عايزين يطلقوا بس الجيران ليهم مزاج يطلقوهم يبقى القاضى يطلقهم وفى داهيه العيال لو عندهم وايه يعنى لما يطلعوا اطفال شوارع وعن ما حد حوش .. ده على كدا بقى نص سكان مصر هيتخرب بيتهم .. ماهو اصل لو كل واحد تحته رقاصه البلد كلها هتعزل

يا شيخ الله يبارك لك فى الاولاد من فضلك خليك فى حالك ودع الخلق للخالق وبطلوا تشوهوا فى الدين بفتاويكو اللى جابت الفتاء للشعب دى

==============

على الهامش

ابقوا اشتروا جريدة الجماهير يوم الاربعاء

مقالى : سرطان التحرش الجنسى نازل فيها