الإخوان يقاطعون إضراب 6 إبريل

من كام يوم بشوف الأخبار لفت نظرى ان مهدى عاكف مش محدد موقفه من الاضراب بعد ما توجهت عدة احزاب تدعوه هو وجماعته لمشاركتهم فى الاضراب فكان رده .. لم نحد موقف حتى الآن وسيتم الرد خلال ايام .. وامبارح بقى تفاجأنا نفس الصحف بخبرين اولهم مش غريب لانه كما هو الحال أى حاجه تصب فى مصلحة مصر غير مشاركين فيها وهى تطلع ايه مصر دى يعنى انشاء الله طز فى مصر وشعبها .. المهم هو حماس وكيفية شحن المواطن المصرى علشان يسيب اكل عيشه ويطلع يصوت ويلطم على وشه فى الشوارع ويقفلوها من شرقها لغربها من اجل حماس وصب اللعنات والويلات على الحكومة المصرية العميلة الخاينة اللى بتحافظ على الحدود المصرية .. مصر مين دى اللى يساهموا فى حل مشكالها .. وبالطبع كان القرار المتوقع لن نشارك فى اضراب ابريل .. اولا لم تتم دعوتهم .. نفس السبب الواهى بتاع السنة اللى فاتت .. على اساس انهم رايحين فرح عايزين حد يبعت لهم كرت دعوة .. ثم تقريبا عاكف الزهايمر عامل معاه شغل تمام لان هو بنفسه اللى صرح قبل كدا وقال لم نحدد موقفنا بعد من اضراب ابريل ردا على الاحزاب اللى دعته .. السبب التانى ان السادة الاخوانجية القواد متنبأين بفشل الإضراب وعلشان كدا هما مش بيشاركو فى حاجه فاشلة .. ولحفظ ماء الوجه ان كان فيه نقطة لسه هو هيسيب شباب الجامعات يشاركو فى الاضراب .. لا كتر الف خيرك وفرهم فى الصويت واللطم وتقطيع الهدوم على غزة اصلها لسه محتلة ..
الخبر التانى بقى وده اللى اغرب من الغريبة ان مهدى خلاص قرر يتنحى ويستقيل من منصبه بالسلامة والقلب داعى لك .. بس افلح ان صدق مش بعد كام يوم يرجع فى كلامه كالعادة عمره ما قال كلمه وثبت عليها كانه بيلعب حلق حوش .. اللذيذ كمان ان الخبر بيقول انهم يدرسوا اختيار المرشد القادم ويؤكدوا انه سوف يتم اختياره من خارج مصر .. وان شاء المخبر اللى هيتم اختياره من خارج مصر ده هينفذ سياسات مين ؟؟ وال88كرسى اللى فى مجلس الشعب هيتكلموا على اى اساس ده اذا كانوا بيتكلموا اصلا دلوقتى اكبر انجاز عملوه من يوم دخولهم المجلس هو رفع الجزم .. انا مش معترضة على اختياره من خارج مصر بس ياريت يبقى يكمل جميله وياخدهم عنده .. ولاول مرة احترم لمهدى عاكف تصريح بس على الله يكون صادق