بتقول حماية اطفال الانترنت .. طيب وأطفال الشوارع ؟؟

سيدة مصر الأولى يعنى بصراحة وبكل ادب وذوق كتر ألف خير سيادتك على ما تبذليه من جهد لحماية الأطفال من المواقع الإباحية والحفاظ عليهم من إستغلالهم جنسياً .. لكن انا نفسى أسأل سؤال وياريت من إجابة .. بعد الإهتمام العظيم ده بالأطفال اللى بيدخلوا العنترنت وده معناه إن أهاليهم ميسورين ولله الحمد وجايبين ليهم اجهزة كمبرور فى بيوتهم او حتى بيدخلوا من نت كفاية المهم إنهم يملكوا ثمن رغيف عيش .. طيب وأطفال الشوارع يا ماما شوزى .. مين يهتم بيهم ؟؟ حضرتك مش بتشوفيهم فى الإشارات ولا هو انتى مش بتقفى فى إشارات زينا وبيتقفل لك الشوارع لحد ما تعدى علشان كدا تخيلتى ان كل سكان مصر عايشين فى ترف وساكنين فى عمارات على النيل .. طيب مش سمعتى عن كارثه الدويقة ؟؟ مش عندكو تى فى تتفرجى على حين ميسرة اللى بيعرض فعلاً واقع ملموس أمام الجميع عياناً بياناً .. طيب الأطفال اللى بيدخلوا العنترنت ليهم أهل يراقبوهم او ياخدوا بالهم منهم ويقدروا يحافظوا عليهم من الاستغلال الجنسى أو مش يقدروا هما حرين فى أولادهم .. إنما مش كان ممكن توفرى المجهود ده لأطفال الملاجئ بلاش أطفال الشوارع اللى عايشين حياتهم تحت الكبارى وبيبعوا اعضائهم علشان يعيشوا وبيمارسوا الجنس وهما لازالوا براعم .. حتى اصبحوا يتكاثروا منهم فيهم .. ايون امال كل الاطفال اللى فى الشارع دول ايه ماهم من التكاثر .. دول بيتكاثروا..
السيدة حرم الرئيس ... ستفتتح ندوة حماية اطفال العالم .. واخدين بالكو اطفال العالم مين بقى مع سيادتها فى الندوة
الملكة سيلفيا ملكة السويد وقرينة رئيس المفوضية الأوربية والسيدة لورا بوش قرينة الرئيس الأمريكى السابق والسيدة بيرناديت شيراك قرينة الرئيس الفرنسى السابق والسيدة لودميلا بوتين قرينة الرئيس الروسى السابق ... والنبى نظرة لأطفال مصر .. الواحد نفسه يمشى فى شارع مش فيه عيل هدومه مبهدله وجاى يقوله ادينى اشترى شندوتش يا هانم والنبى يا بيه ربنا يخلي لك الهانم تدينى اتعشى ... اعتقد ان العالم كله على بعضه مش فيه المناظر دى