تم الحكم فى قضية نهى رشدى
جالى الخبر على جايكو من كوكى حالا هى كانت هناك وحضرت الجلسة وتم الحكم فى القضية بالحبس 3 سنين للمتحرش شريف جبريل
انا بشكرك جدا يا نهى لأنك دافع لبنات كتير بتتعرض للمهازل دى وفى اماكن مختلفة وبتسكت علشان خايفة .. لكن اعتقد بعد الحكم ده البنات لازم تتجرأ ومش تسيب حد يتحرش بيها يفلت بعملته السودة .. تصوت وتلم عليه الناس وتعرف انها هتاخد حقها وانها لو سابته بدون اى اجراء يتخذ ضده هيتحرش بغيرها لازم نغير السلبية دى يا بنات
وبشكر كمان القاضى اللى حكم فى القضية بروح أب ومش عمل زى الذكور وقال اصل لبسها واصل مشيتها واصلها بنت ازاى تبهدل نفسها وتدخل قسم شرطة علشان تطالب بحقها
وبشكر كيكى اللى فى المحكمة من الصبح علشان تجيب لنا الاخبار الحلوة دى
تشجعوا بقى يا بنات ومش تسيبوا حقكوا ابدا
وتذكروا دائما انه ما ضاع حق ورائه مطالب
ومبروك عليك الحكم بـ 3 سنين يا شريف وعقبال كل المتحرشين والذكور اللى موجودين فى المجتمع لما نشوفهم خلف القضبان علشان يعرفوا ان الانثى اللى بيتحرش بيها دى انسان وان ليها فى المجتمع زى ما ليه ومن حقها تعيش فى امان ..
فرحانة لك اوى يا نهى
تعليقات
بس ربنا يستر عليها
قصدك ايه يا مصطفى
انا بدأت أقلق
:)
مبرووووك يا نهي مرة تانية
تحياتي
مبروك
و الله فرحانه جدا
انا بستأذنك هنقل الخبر علي مدونتي
و مستنيه ردك
ياسمين
احنا ح نسيبها من غير ما نعمل لها هيصة وظمبليطة في الصالون؟
يا سيدى عندنا الصحرا واسعه
يعملوا لهم فيها سجون ولا اللى يتحرش يعاقبوه بانه يروح يزرع ويعمر فى الصحرا اهو منها يتربى ومنها يتحرم يشوف بنى ادمين ومنها يعمل حاجه مفيدة فى حياته
انقليه يا ياسمين وهى دى محتاجه استئذان واى حد عايز ينشره يتفضله ومن غير اذن
نعمل لها يا زعيمة فى المكان اللى تحدديه :)
http://noteandpen.blogspot.com/
شكرا للقاضى
مودتى
فيه حاجات جميله بتحصل فى مصر
يعنى فيها ناس بتفهم وناس وليعوذ بالله
مبروك الحكم العادل وياريت اعدل يسود مصر
اااامين
طبعا خطوة ايجابيبة جميلة جدا
تحياتى
لكن مسمعتوش عن ستات وبنات تتحرش بالذكوره
افتكروا ده كويس ؟
لما بنت تتحرش بوالد يبقى يلم عليها الناس ويقول بتتحرش بيا
ده اذا مكانش عاجبه يعنى
نهى اتحررت من قيود المجتمع و شريف برضة هيتحرر من قيود ذاته و شهوته
نهى تشجعت و واجهت عالم الذكور بروح محارب و شريف برضة من النهاردة و بسبب الحكم دة هيتشجع و يواجه نفسه بروح مجاهد
اتمنى ان الحكم دة يكون طاقه نور لكل بنت يقع عليها ظلم و إهانة و اتمنى برضة انة يكون عظة لتوبة كل رجل ينظر إلى العالم من نافذة ذكورتة
تحياتى
متحرش تائب
مبروك لنهى ولكل البنات
والف مبروك الحكم على شريف
والف مبروك عليك توبتك
ويارب يثبتك
دمت بالف خير
بس انتي سبقتيني بالبوست
:D:D
المهم مبروك لنهي الف مبروك لبنات مصر كلها
وزي ما قلت في البوست عندي بعد الخبر ده ما ينتشر اي حد هيفكر يتحرش باي بنت هيفكر الف مره انه يلاقي نفس المصير
تحياتي يا قطه
وده عقاب حقيقي لكل متحرش
كنت بتمنى ان العقوبه تبقى اكتر من كده
واظن ان شجاعة البنت دي
هتخلي اي واحد منحرف يفكر الف مره قبل مايعمل الفعل الفاضح ده
بغض النظر عن البنت اللي بيعاكسها
مبروك لنهى وإلى الجحيم يا كل المتحرشين
يا ريت البنات يكونوا اتعلموا حاجة
طالبة من الله ولا يكتر على الله ان الغشاوة تنزاح من على عقولهم ويشوفوا قدر الاحترام اللي بتحظى بيه نهى دلوقتي
هل لو كانت سكتت وتجاهلت الموضوع أو خافت من البهدلة زي ما ناس كتير حاولوا يخوفوها كانت استحقت هذا الاحترام؟
مفيش حل غير اننا ناخد حقنا بنفسنا
الناس خلاص نخوتها ماتت
منطقهم بقى شاذ في التعامل مع القضايا الاخلاقية
لا يمكن الاعتماد على أي قيم لأن المجتمع بقى عديم القيم ومعاييره اصابها التشوه والعفن
يبقى أي متحرش حقير لن يردعه ولن يتصدى له سوى ضحيته
دا الحل الوحيد عشان ننضف الشوارع من الحثالة دول
كان نفسي ياخد مؤبد.. بس الواقعية تحتم اني افرح انه تمت ادانته واخد حكم بالسجن المشدد. 3 سنين هيربوه برضه.. يبقى يتحرش بنملة بعد كدا لو قدر.. دا لو ما اتحرشوش بيه في السجن أصلا
مبروك يا قطة
مالك انتى ومال التحرش والبنات
انتى مش اسمك حنان انتى مفروض اسمك جفاااااااااء
هههههههههههههه
كان نفسي الناس..تتغير من جواها مش يستنوا قانون..مع إن القوانين والتشريعات موجودة في أي دين.لكن مش بيطبقوه.والبعض بينسى وصية الرسول ليهم للنساء :)
وكتير نسوا الأخلاق
شيء محزن:)
انتي عارفة..
أنا نفسي بس..بقانون..مساحة معينة بس..محدش يتعداها
لأن أكتر من المساحة دي..وفي الزحمة..الناس بتستغل المسألة قوي..
عارفة إن مش ينفع :)
كويس ان يكون فيه عقاب طبعا..دي حاجة كويسة قوي
بس يارب.ان كل شخص يراعي ربنا أولا..
التحرش..لو حتى بكلمة..بيجرح البنت قوي
حرام عليهم يروعوا أي بنت..ده الرسول قال..رفقا بالقوارير..يعني البنت زي قاوررة..زي الزجاج كدة..هش قوي
والرسول أوصى بالنساء..
بزعل قوي على الناس اللي بتنسى الوصية دي بجد قوي :)
..
عارفة..أنا بتابع مدونتك من زمان
فيه حاجات بتعجبني فيها ..وحاجات ببقى زعلانة منك..بس كتير بقول نفسي أدخل واتناقش معاها في حاجات كتيرة
بس بخاف تزعلي :)
مدونتك جميلة..عاجباني حاجات..وحاجات نفسي أناقشك فيها :)
ربنا يوفقك يارب :)
ربنا يكتبلك كل خير :)
أعتقد ان نهي خطت خطوة ايجابية و ستكون
دافع لاي انثي أخري يتم التحرش بها.
"ومبروك عليك الحكم بـ 3 سنين يا شريف وعقبال كل المتحرشين والذكور اللى موجودين فى المجتمع لما نشوفهم خلف القضبان علشان "
اعتقد ان الذكور الموجودين في المجتمع وهم اكثرية شريفة لا تتحرش بالاناث
وان أكيد حضرتك لا تقصديهم...
وان قله قليلة هي التي تتدني الي مستوي
التحرش...
عموما...ربنا يهدينا جميعا و يصلح من
احوالنا...و يهييء لنا من امرنا رشدا.
تحياتي و تقديري
الحكومة بتدفع معاشات للظباط علشان يتجاهلو تنفيذ القانون؟
ثنيا لو كانت نهى بتشتغل مومس كان الظابط حبسها على طول ولكن ان يتم تحويل كل البنات الى مومسات بالاكراه فياتي القانون ليقول : انا مليش دعوة؟
والاخوان النافقين هيعملو ثورة لو كان في محل مومسات, واما كل البنات تتحول الى ضحايا مرضى الشذوذ الجنسي والنفسي فيتم بتاييدهم وموش بعيد يكونو شركاء في الاغتصاب والتحرشات,, ولا تخلقو من طينة تانية؟؟؟
طيب انا موش نهى رشدي ومقدرش اخد حقي بدراعي, فيبقى هيتعودو في الشارع علية ويغتصبوني كل يوم؟ ولما اروح اشتكي هتقولي الشرطة حلو القضية بينكم؟؟؟
كان نفسي اشتم ودي الحاجة الوحيدة اللي اقدر اعملها, بس مقدرش اشتم قدام الكل لان الكل هينتقدني فرحت شتمت في مدونتي
بس لو كان بايدي كنت افصل الظابط والوزير كمان, بامارة ايه بياخدو معاشات على حسابنا وموش بيحمونا؟؟؟
وكل التحية لهذا القاضى
مبروك للمجتمع المصرى على على التصرف السليم
دى ناحية والناحية التانية يارب كل البنات يعملو زى نهى
انا كنت قريت فى مجلة ابداع قصة تتناول حوادث التحرش ومواجهة المجتمع ليها ونظرتهم للبنت
لقيت للأسف مجتمع ذكورى متخلف على حد وصف القصة
بس أن شاء الله هيتغير
ألف مبروك علينا تانى
و عقبال ما ترجع لنا اخلاقنا زي زمااان . . . .
:))))
شكلنا عرفنا الخبر فى نفس ذات الوقت بس اوعى تكون صحبتك هى نفسها صحبتى
:)
يارب يكون عبرة لكل متحرش خلينا نخلص بقى
تحياتى
هو طالما الاهل مش عارفين يربوا وسايبين ولادهم للشوارع تربيهم يبقى يستحملوا بقى
تحياتى
طبعا حكم تاريخى يا فانتا اتمنى ان كل البنات ياخدوا موقف
وكل واحدة تعرف ترد كرامتها لو واحد غبى فكر نفسه سيد الارض حاول ياذيها
انا شخصيا من زمان اوى واخدة قرار ومش بسكت لحد اللى بيتكلم برد عليه واللى بيحوال يقرب بتف فى وشه بدون تفاهم ولو قل ادبه بهزئه ومش بستنى حد يتدخل لان خلاص المجتمع اصاب بالعقم الفكرى من زمان اوى
ياريت كل البنات يفوقوا ويبقى كلنا نهى
شرفتينى كل يا فانتا
والف مبروك لينا كلنا
بالعكس انا مش متنرفزة انا مبسوطة جدا علشان الذكور امثال حضرتك يتلموا وسعيدة جدا انى قدرت اوصلك الجفاء لان فى ناس مينفعش معاها غير كدا
المجتمع مش يهتغير لانه كل يوم فى انحدار وكل واحد مقهور بيمارس قهره على البنت اللى يقابلها
ان شاء الله يكون الحكم الصادر بداية جديدة لردع اى متحرش
ميرسى جدا لمتابعتك مدونتى
وابقى اتناقشى فى اللى تحبيه يا جميل
انا مش بزعل من النقاشات انا بزعل بس من الهجوم الغير مبرر
تحياتى
استاذى العزيز
مجلس الشعب الان يناقش قانون للتحرش الجنسى واتمنى سرعة سريانه والعمل به
بالنسبة للفظة الذكور فانا بعممها لان الذكور عندى هم المتحرشين وكل من يرتكب فعل خاطئ فى حق الآخرين
اما الرجال فهم الشرفاء من يعرفون معنى كلمة رجولة
لكن ليس كل ذكر رجل
ارجو اكون وضحت وجهة نظرى
مودتى واحترامى
سمعت امبارح فى العاشرة مساءاً منى الشاذلى بتقول ان وزارة الداخلية حولت امين الشرطة اللى قابل نهى وكل المسؤلين اللى كانوا موجودين فى النقطة للتحقيق .. وهنشوف الموضوع ده هينتهى على ايه
بالنسبة للذكور اللى ماليين الشارع فللاسف طول ما هو مفيش قانون يخرسهم هيفضلوا منتشرين بالشكل ده يبقى مفيش حل غير انك تحاولى تبقى زى نهى على الاقل لحين صدور قانون
الاخوان المنافقين مين قال انهم مش بيتحرشوا دول بيكون الواحد دقنه مترين وقاعد يقولك قال الله وقال الرسول وهو مدخل عينه تحت ملابسك الداخلية المضحك انهم عاملين مؤتمر للحد من ظاهرة التحرش الجنسى .. انا شوفت العنوان قولت اخيرا هيعملوا حاجه ايجابية الاقيهم بيقولوا احنا نتبنى المومس التائبة ونوفر لها شغل علشان مش ترجع تبقى مومس تانى .. يا حلولى زى ما بيستقطبوا المسجلين الخطر يدخوهم للجماعة تحت بند انه هيتوب ويدله فلوس علشان يبقى اداة فيما بعد يستخدمها وقت ما هو عايز .. اعتقد برضه ان المومس اللى هتدخل الجماعه مش هتوب اصلهم هيجوزوها من الاخ المسجل خطر تخيلى بقى مومس ومسجل خطر الحياة هتكون ازاى
:)
شرفتينى
برافو نهى ووالد نهى اللى مهتمش بان المجتمع هيقول او المجتمع هيعيد
والقاضى له تحيات 80 مليون مواطن مصرى
مودتى
لاء الذكور فى المجتمع كتير اوى
ده انت تابع المواضيع دى على اى موقع اخبارى يكتب فيه
او حاجه بسيطة ادخل الفيسبوك على جروب اسمه اللى عنده جاموسة يلمها
حاجة اخر قلة ادب
مودتى
تفتكر يا عمرو اخلاق زمان هترجع ؟؟
انا اتمنى
تخيلى لما تكون مصر اول دولة فى التحرش الجنسى يليها افغانستان الا ما عملوها فى حاجه تشرف حتى الكورة بيجيبوا فيها اصفار
لو الشارع المصرى كله اتحبس يبقى الستات هتعرف تعيش فى امان
تحياتى
الف مبروك ويارب دايما قضائنا نزيه
تحياتي
ومشكلته انه للاسف ساذج ؟
وده برضه بيعمل مشكله للولد لو محترم لانه مش هيقول للناس ان اتحرشت بيا بنت ؟
لانه ساعتها هيبقه ايه ؟
شكرا للرد
لكن الاختلاف لا يفسد
دى بداية يا احمد لكل الخنازير اللى فى الشوارع
بداية لفتح باب السجون ليهم علشان يتلموا
مبروك لنهى
ولكل بنت حست انها اتهانت من خنزير واقف فى الشارع يقل ادبه على بنات الناس
يا حرااااام تصدق الولد الساذج اللى البنت اتحرشت بيه ده صعب عليا
ولما انت شوفتها بتتحرش بيه مش قولت لها عيب كدا ليه عندك اخوات ولاد البنات هيتحرشوا بيهم ههههههههههه
معلشى اللى انت بتقوله ده مش خلاف فى الراى
ده انت بتقولى فى ولاد سذج يعنى المفروض افرح انهم خنازير وسذج كمان
و نهى دي بنت جدعة جدا و ما سككتش على حقها...
لازم حاجات زي كده تحصل عشان نظرة المجتمع للمتحرش بيها و المغتصبة تتغير...دول ضحايا مش جناة
طب والله فرحانة..مع اني اصلا الاول مكنتش بسكت على المسخرة دي وكنت بعلي صوتي وبزعق وبعمل اللي نفسي فيه
والنبي فرحانة...دي باينها مصر بتتقدم بينا فعلا..ولا ايه ياقطة؟
منذ ان شاهدت هذه الفتاة تتحدث على المحور تقريبا
ارتعش قلبي أن هناك واعيات بحقوقهن
قادرات على قول لا
لن أقبل الظلم
والمجد للشيطان معبود الرياح
المجد لمن قال لا
ولكن السؤال الأكبر والأخطر
هذه لأنها من طبقة تقدر أنها ضحية
وتقدر رغبتها في نيل حقها وإلآ كانت ستنكسر بحسب تعبيرها هي شخصيا
فما بال الفقيرات الضعيفات في المناطق الشعبية
والمهمشة
والعشوائية ؟
ترى لو أن إحداهن قالت لا
أصرخ لأنني اغتصبت او تحرش أحدهم بي
ترى من سيسمع صوتها ؟
ترى من سينصفها ؟
ترى من سيقول أنها ضحية
؟
وأنها لم تكن المذنبة لأنها خرجت بالشكل الفلاني والشباب معذور ؟
علامة استفهام كبرى
تطرح هاهنا
!!!!!
ليه يا بنتي جمع الذكور ده اكيد قصدك الذكور المتحرشين برضه بس يعني
و على العموم الحكم ده كان شئ جميل جدا و خطوة كويسة لعلها تحد من التحرش
تحياتي
شكرا ياقمرايه علي الخبر الحلو
محبتنا ليكي دايما
:))
انا عايزة اقول ل "محمد ياسر" المقصود هو انه في المجتمع يوجد رجال ويوجد ذكور
التعريف "رجال" يشمل البنات الجدعان التي تساوي كل واحدو منهن بين دزينة الى الف رجل
واما الرجالة تعني اللي عندهم نخوة وكرامة وشرف ويحمون الضعفاء ومن يستجير بهم او يطلب منهم النجدة
اما الذكور فهي تعريف يشمل الحيوانات البشرية والحمير الحساسة وحيواات الغاب والحوانات الاليفة الذكور
الرجولة هي بمعنى الشهامة والشجاعة ولا تحدد ذكور او اناث
ليس كل ذكر هو رجل وليس كل انثى هي امراة خانعة وخجولة وجبانة وهي صفات طبيعية للانوثة ولا مانع من استبدال صفات الانوثة بصفات رجولة انسانية
يعني اخص على الذكور الانذال والذكور الحيوانت مرضى الجنس,, فلا علاقة بين الرجال وبين الذكور
الخبر ده فرح ناس كتير جدا
ونهى بالفعل بنت جدعه على الاقل مش سابت حقها
تحياتى
ازيك يا جميلة
انا شايفه فعلا انها نقطة تحول غير طبييعة وان شاء الله تكون بداية لمجتمع ناضج
تحياتى
اديبتنا الجميلة
ازيك يا بنت العم
طبعا ما فعلته نهى لا يستحق الا الثناء
ووادلها يستحق الاحترام والتقدير انه ساندها ووقف جنبها ولا القى بالا للمجتمع
اعتقد ان الاحترام الذى حظيت به نهى وحكم القاضى المشجع لاى بنت انها مش تسكت عن حقها بداية افاقة للجميع من الغفوة التى طالت فى مجتمعنا
واتمنى ان اى واحدة مش تسكت ابدا عن حقها
شرفتينى جدا
:)
يا فندم لا وجه مقارنة بين الذكر والرجل
وانظر رد الغالية واحة فى الصحراء اسفله
تحياتى
بس على الله البوبيهات يتلموا يا قلبى
والبنات مش يسكتوا لهم
اى واحد يتعرض لواحدة حتى لو بلفظ توقفه عند حده
شرفتينى يا احلى اجندة
المدونة مدونتك
قولى اللى انتى عايزاه
وردى على اللى انتى عايزاه