رحلة داخل عالم التناقض

ان تكره شيئ فهذا عادى ... لكن ان تكرهه وتفعله فانت إنسان متناقض

فى إحدى المرات سألتنى صديقتى المقربة مش ملاحظة حاجه غريبة

قولت لها خير ؟؟؟

قالت لى انك مش بتحبى جمال عبدالناصر ولما اتنقلتى لمحافظتنا العامرة روحتى سكنتى فى شارع جمال عبدالناصر ضحكت ضحكة عالية اوى وقولت لها حكم القوى ... قالت لى كنتى قولتى للاقوياء دول انك مش بتحبيه قولت لها عارفين وعلشان السيد الوالد من محبيه تقريبا حب يعاقبنى بهذا السكن الجديد كى اذكر اسمه دائما فى عنوانى

=======================

نعيب زماننا والعيب فينا وما لزماننا عيب سوانا

بالفعل قمة التناقض ... حينما نتخيل ونرسم اشياء وان لم تاتى على هوانا او كما تخيلنا نجلس لنلعن فى الزمن ونصب سخطنا عليه

وحينما يجلس احدهم اليك ليذكرك بالماضى تجد نفسك تقلب شفتيك لتترحم على الزمان وحلاوة الزمان وجمال الزمان ... حقيقى قمة التناقض ما دخل الزمان فيما يحدث إليك أهو العقل المفكر والساعد لك ؟؟؟؟

=============================

من شهر تقريبا ميمو اترقى واتنقل مكان اقرب من اللى كان فيه ولما سالته الناس لما بتترقى بتبعد خصوصا فى شغلكو ده وانت بتقرب ... قالى اصلهم بيخافوا عليا من الغربة .... نزلت معاه نشترى حاجات كان محتاجها فى الطريق لاقينا صف عربيات كتيييير وبيتحرك تاتا تاتا وعلى الجانبين عربيات امن مركزى والجانب التانى عربيات حريق ... لما وصلنا عند الكابتن اللى بيشوف الرخص ميمو ساله هو فى ايه .. قاله حادثة قتل .. مين قتل مين ؟؟؟ الكابتشن قاله 3 قتلوا بعض وال3 محامين واصحاب .. مشينا بس انا مش هديت عايزة اعرف السبب .. قالى هتعرفيه دلوقتى .. واتصل بحد من المؤكد انه متواجد فى مكان الحدث وبالفعل و المهم قاله واحد فيهم كان زعلان مع والده والاتنين التانيين راحوا يصالحوا قام قتلهم واهل القتيلين راحوا قتلوا الاولانى وولعوا فى بيتهم .. ده ايه الفيلم الهندى ده ؟؟؟؟ قاله والله ياباشا ده اللى حصل اصل الواد مختل عقليا محامى ومختل عقليا ... اذاى دخل كلية الحقوق ده واتخرج وبقى محامى وهو مختل الاختلال الشنيع ده انا مش مصدقة ... قالى لاء ماهو عامل بلاوى قبل كدا بس كلها عبارة عن خناقات

وضرب وما شابه ... طيب الاخ المحامى المختل ده اهله سايبينه كدا ولا معجبين بيه ولا ايه ؟؟؟ قالى معلشى انتى فى مجتمع متناقض

===========================

حى على الجهاد

يا اختى دى دعوة حق ... عايزين بس ربنا يهيدكى وتلبسى النقاب

ما تروح تلبس امك او اختك او مراتك وانت مالك بيا

انتى بتتكلمى ببجاحه كدا ليه ؟؟؟ وانت بتكلمنى كدا ليه مين فوضك انت تكلم الناس تلبس ولا مش تلبس ؟؟

قعد يقول ويقول ويقول وفى الاخر طلعت كافره ..

وتقريبا بقى موضوع التكفير ده بقى عاااااادى .. اصل من كام يوم مش فاكرة قمر الدين ولا مهلبية باين معلشى يا جماعه اصل رمضان قرب.. عملى بوست تكفير وردح فى ردح فى ردح ودخل الرادحين يردحوا ..... ولما اتسأل ليه كل ده ... كانت اجابته أصله كدا بيجاهد فى سبيل الله ... سبحان الله قبلها بيوم كنت بتكلم مع صحباتى على موضوع انت لست معى اذن انت كافر ولما نزل الموضوع ده كان خير اثبات لوجهه نظرى علشان كدا جبت اللنك واديته لصديقاتى العزيزات واللى كان هيغمن عليهم من الضحك لدرجة انهم قالوا لى تاثيرك بقى اقوى من النابلم علشان الهوس اللى وصلتيهم ليه ده قولت لهم لا والنبى ده انا قطة الصحراء مثيرة الجنون لادعياء الجهاد .... مياوووووو

والآن بعد كم التناقضات والمنقاضات واثبات وجهات النظر لابد من شوب مانجة كبييييير مع مكعبات الثلج المنعشه ومع رائعة يانى

Keys to Imagination

لكم كل التحية والود