ناس .. ذوق .. ذوق .. ذوق

كنت على موعد بصديقتى والتى تتسم بالنشاط والحركة الدائمة حتى من قبل التحاقها بالعمل الصحفى ... ولكن حينما جاء الموعد لم تأتى وهذا على غير عادتها .... فقمت بالأتصال بها لأطمئن على أحوالها ... فوجدتها تطمأننى وأخبرتنى انها تقوم بعمل تحقيق صحفى فى قسم الشرطة وستأتى بعد ساعه ومن خلال صوتها علمت ان هناك أمر ما ... فأخبرتها أنى سأنتظرها ... فأجابتنى هى ساعة بالكتير وهكون عندك ؟؟؟ وبالفعل جاءت هذه المرة فى موعدها ... واثناء دردشتنا سالتها عن ماهية التحقق ... فاجابتنى هحكى لك بس مش بالتفصيل علشان محرقش الموضوع ... قولت لها موضوع ووصل لقسم الشرطة يعنى اتحرق من اول ما الاحداث حصلت اصل اكيد كان فى شهود عيان ... ابتسمت واجابتنى هو انتى مش بيعدى عليكى حاجه كدا ... عموما هحكى لك .. اتفضلى يا ستى وكلى آذان صاغيه ... الموضوع بين طفل وست جارتهم ؟؟؟ نعم طفل وست ... قالت لى اوعى الفار يلعب فى حجرك دى مشكلة مش حاجه تانيه ... قولت لها اااااه كدا الموضوع يتظبط شوية .. لكن ازاى ؟؟؟
قالت لى الست دى عايشه لوحدها بعد ما زوجها توفى وهى ما انجبتش الطفل ده عنده 12 سنة وكان بيلعب كورة وهو وصاحبه فى الشارع وهى ماشية .. فالواد شاط الكورة جت فيها ... بتقوله عيب الولد شتمها ... ومش بس كدا ده اخد صحابه وراحوا وقفوا يردحوا لها قدام البيت ويقولوا لها الفاظ نابيه ... راحت تشتكى لاهله لأنهم ساكنين فى شارع واحد .. قابلت مامته وقتها مامته اعتذرت لها وضربته بالقلم قدامها ... قولت لها طيب كويس الموضوع على كدا خلص ؟؟ قالت لى لاء استنى لما جه ابو الواد .. طبعا مخلصوش ابنه ينضرب بالقلم قدام الاغراب ومسك مامته هزأها وأخد إبنه الكبير وراحوا للست ... انتى ازاى تشتمى ابننا فى الشارع وكمان ليكى عين تروحى تشتكى ده احنا حنبهدلك النهارده ... لما جت الست تتكلم وتقوله انت جاى تتهجم عليا فى بيتى ضربها بالقلم وقالها علشان يبقى تهجم بتهجم بقى ...... ده ايه موضوع الاقلام اللى نازل يرف ده .. طبعا الجيران اتلموا والست راحت تعمل لهم محضر فى القسم ... لقيتهم سبقوها على هناك رايحين يقولوا انها اعتدت على ابنهم الصغير .... فى الوقت نفسه كان موجود مع الست المعتدى عليها كل جيرانها اللى شهدوا على الواقعه وقالوا ان الر اجل ده كداب وكان فى واحد موجود جاب السى فى بتاعه كله واللى هو يبقى تاريخه الاسود ... ان الراجل البلطجى وطفله موظف فى احد المصالح الحكومية ومش من البلد اساسا ده علشان ملفه اسود من قرن الخروب جاى منقول من احدى قرى الصعيد وملفه مفيهوش ولا حسنة تسر عدو ولا حبيب ومعروف انه سيئ السمعه ومرتشى وبالرغم من كدا بجح كمااااان ... يعنى ناقلينه عندنا علشان يعقابونا بسيادته ..
انا مش مشكلتى كل اللى فات ده ... انا مشكلتى حاجه واحده بس هى دى التربية الحديثة اللى الراجل ده بيربها لابنه؟؟؟
الراجل ده مش خايف ابنه اللى بياخده يبلطج بيه على الناس يبلطج عليه هو شخصيا .. ماهو احيانا بينقلب السحر على الساحر
مش المفروض الناس دى بتخرج لنا اجيال تقرفنا فى الحياة ...
يعنى القانون السائد دلوقتى حد يشتكى لى من ابنى اضرب اللى جاى يشتكى لى وادخله اقسام كمان ؟؟؟؟
طبعا كان اخر كلامى مع صديقتى لو قابلتى الست دى تانى قولى لها اوعى تتنازلى عن حقك خلى المجتمع ينضف بقى من اشباه الرجال وتربيتهم لبلطجية

تعليقات

‏قال Heart Beat
الصديقة العزيزة جدا

Desert Cat

كان في مسرحية زمان لفؤاد المهندس اللي فيها مدرس و كان بيعلم التلميذ ان الارض كروية تلف حول نفسها

جه الولد قال لابوه الغير متعلم بلاش جاهل دي عشان في ناس عندها حساسية من الجهل

و ابوه جه المدرسة يزعق للمدرس انه بيقول كلام غلط

بدل ما يقول لابنه اسمع كلام استاذك راح يتخانق معاه

تبقى برضه دي تربية هايله بس ده جاهل يعني مسئوليته مش زي اللي بيفهم بعض الشيء زي الاب في حكاية القسم دي

الاب الهمام ده ماتشطرش ليه على اللي رموه بعيد عن شغله ... عشان جبان مايقدرش ... انما راح عند الست الغلبانة و عمل فيها راجل اودام العيل ابنه

قال يعني كرامته اتهانت ... طيب ما هو اتمسح بيها الارض في حتى تانية لكن بقى يطلع غلبه على الست دي

طبعا لازم تاخد حقها و تودي الراجل ده في ستين داهية خلي بقى القلم ينفعه

في ناس بتربي اولادها على انهم ياخدوا حقهم بقلة الادب ... و في ناس بتربي اولادهم على انهم ياخدوا حقهم اذا كان ليهم حق بس دول مش كتير

مش زي اللي عاملين فيها رجالة و هم و لا حاجه

يطلع ابنه زيه اكيد لا تربية و لا اخلاق يعني حتى اصحابه زيه لانهم وقفوا يزعقوا للست ... يبقى الطيور على اشكالها تتلم على بعضها

و الزبالة ما بتجبش غير زبالة حواليها

عندنا كده يتشطروا على الغلابة اما الكبار مايقدروش يقولوا كلمة اودامهم

و بجاحة مافيش بعدها يضربوها في بيتها و يجروا يشتكوا ... شغل بلطجية و عصابات

ربنا مع الست الغلبانة دي و ان شاء الله حقها هايرجع لها
‏قال nody
قططتى العزيزه
هو الرجل موهزء
لا زم يخلف واد سافل
يعنى ها يطلع لينا ايه
زويل؟
‏قال AHMED SAMIR
في الزمن دة كل شيء ممكن...كل شيء جايز
عادي
اذا كان الراجل نفسه مش متربي الواد هيطلع متربي ازاي
ربنا يستر ع البلد دي
تحيااتي
دة فعلا ناس ذوق ذوق اوى
لا بجد دى حاجة تشل
طب اللى ضرب الواد مش مامته كان يضرب مامته لكن يروح يضرب واحد من برة خالص
تحياتى لكى
‏قال محمد فوزي
الراجل ده عايز يضرب بال....في ميدان عام عشان يبقى عبره للي زيه
بس انتي مقولتيش ايه نهاية القصه ؟
‏قال إبن مصر
هو فين الزوق يا كات
قال على رأى المثل
ضربنى وبكى وسبقنى وإشتكى
تحياتى ليكى يا كات
‏قال سمراء
الموضوع قديم قوي
المثل بيقول ضربني وبكي وسبقني واشتكي
يعني دي حاجة معروفة من اول ما المثل ده طلع
اما عن ان الست متسبش حقها اتمني انها تحصل عليه والقسم يعتبر الموضوع كبير مش موضوع تافه وصغير وميستهلش السلطات تزعج نفسها
اشكرك
سمراء
‏قال سبهللة
عندك حق
الولد دة اول حاجة هايعملها لما يكبر انه يبلطج على ابوه ومش بعيد يمد ايده عليه
ماهو مالقاش اللى يربيه
‏قال Mafrousa
و الله يا قطه انا اتفرست الصراحه و دمي غلي
والله الواحد مش عارف يقول ايه؟؟؟
احنا قربنا اوي من يوم القيامه
هي البلد دي مش هاتنضف غير لما الأشكال دي تولع بجاز

قرأت مواضيعك القديمه اللي بالنسبه لي جديده و خاصة بالنسبه لموضوع المعاكسات و الصورة اللي مفروض تبقى للكبار فقط .. عشان ما نفتحش عنين الصغار أكتر ماهي مفنجله

المعاكسات شئ رخم أكيد أنا شايف إني من يوم ما دخلت الكليه كل ما اشوف عيل بيعاكس باحس إن عمري بقى 100 سنه من احتقاري لعالم الطفوله و الأمومه اللي بقيت فيه

عموما سعيد إني لقيت وقت الفراغ اللي خلاني أعلق لك عشان تتأكدي بس إني متابعك

سؤال رفيع يا ريت تجاوبي عليه عندي في المدونه

إنتي صحفيه بجد ؟

سلام عليكم
‏قال ادم المصرى
السلام عليكم

اول زياره

بصى يا اختى ما بنيا على باطل فهو باطل وكما تدين تودان والموضوع مش موضوع الراجل قليل الحيااء لا دى موعظه من الله اكيد عشان النوعيه دى معصيها كتير معكسه بنات تريقه على عباد الله وهكذا وكل ده طلع فى ابنو احييكى على البوست الرائع واتمنا ذيارتك مدونتى
‏قال R-H-S
انا بجد اتنرفزت من الراجل القبيح دا
دا ديته مخبر من بتوع القسم يديله الواجب

ومسيره فعلا ابنه دا يديله في يوم من الايام علشان معرفش يربيه كويس
‏قال خالتى بمبة
ههههههههه تربية ايه انتى لسه فاكرة من ساعة ما كل الابهات والامهات علمو ولادهم اوعى تسيب حقك اللى بصلك بعين افقعهاله موضوع التربية دا اتلغى من القاموس ياريت تعملى تحديث لقاموسك تحل فيه البلطجة مكان التربية
‏قال mostafa rayan
اولا دة مش راجل لأنه مافهوش ولا صفة من صفات الرجولة
ثانيا الست دي محترمة قوي لأنها اكتفت بعمل محضر في القسم انا لو منها كنت هلجأ لأربعة خمسة من البلطجية الحلوين ولتذهب كل القيم والأعراف للجحيم فالأسف نحن لا يحكمنا إلا قانون الغابة
‏قال غير معرف…
قطتنا العسل عامله ايه؟صباحك فل ياجميله

تصدقي ياقطه و انتي بتحكي انا قولت ممكن االبلطجي ده يعمل اكتر من الشتيمه اصلو وارد ف يالزمن الأغبر اللي عايشين فيه ده
انا بستغرب الحقيقه من الأهالي اللي بتربي ولادها انها تاخد حقها بأيدها و تلاقي الواد من دول في اولي ابتدائي و ابوه يقوله ان حد ضربك اضربه تربيه عجيبه
ربنا يستر علي الجميع و تحياتي ياقمرايه علي موضوعاتك اللي في الصميم دايما
:)
‏قال أنا حر
مش عارف ليه الاوضاع عندنا مقلوبة
يعني الطبيعي اننا نتعلم الشغل وبعدين نشتغل ونتعلم السواقة وبعدين نسوق والمفروض برده اننا نتعلم ازاي تكون التربية وبعد كده نخلف ونربي
احنا بنربي اولادنا في مجتمعنا بشكل فوضوي وعشوائي وده واضح في المجتمع بشكل كبير
دي مش اول حادثة هتكون بالشكل ده ولا اخرها وانت لو مشيتي في مكان ولقيتي اطفال بيلعبوا هتسمعي منهم اقذار الفاظ موجوده ف الدنيا لأننا ببساطة مبقيناش بنربي
تحياتي
‏قال أنا حر
مش عارف ليه الاوضاع عندنا مقلوبة
يعني الطبيعي اننا نتعلم الشغل وبعدين نشتغل ونتعلم السواقة وبعدين نسوق والمفروض برده اننا نتعلم ازاي تكون التربية وبعد كده نخلف ونربي
احنا بنربي اولادنا في مجتمعنا بشكل فوضوي وعشوائي وده واضح في المجتمع بشكل كبير
دي مش اول حادثة هتكون بالشكل ده ولا اخرها وانت لو مشيتي في مكان ولقيتي اطفال بيلعبوا هتسمعي منهم اقذار الفاظ موجوده ف الدنيا لأننا ببساطة مبقيناش بنربي
تحياتي
ايه قلة الذووووق دي ناس عايزة الحرق بجد
بقى هي دي التربيه اللي يربيها الاب لأبنه
غالبا الاب هو اللي محتاج تربيه
واكيد هيجي يوم وابنه هو اللي يربيه وهيدوق نتيجة تربيته الفاشله

دمتي في حفظ الله ياقمر
‏قال نونو
والله احزنتينى جدااااا
لو فى 100راجل زى الراجل دة البلد هتخرب وهى مش ناقصة
فعلا يبقى احنا اكييد فى مصر
محدش يسمع الحاجات اللى بتحصل غير فعلا فى مصر استحالة فى اى بلد تانية
‏قال Unknown
لو اتنازلت عن حقها عشان تتقى شرهم يبقى مش هيسيبوها فى حالها ابدا ولو عملت كدة واتنازلت تبقى تستاهل كل اللى يجرى لها
‏قال محمد صالح
ها انا اعود بعد كبوة من الامتحانات باحلى تعليقات وخلصت متحانات ومستنين ناخد العلقه التمام لما نعرف النتيجه ما علينا نيجى لموضوعنا
عجبنى اوى رد ابب مصر
ضربنى وبكى وسبقنى واشتكى ودا لخص الموضوع كله فى الكلمتين دول اما بالنسبه لموضوع التربيه الخاصه بالطفل
الاب بيربى ابنه حسب ما الاب اتعود انه يشوف ابوه بيعمل معه ايه والبيئه اللى حوليه بتاثر فى التربيه دى وعجبنى اوى ردك فى الاخر ان البلد لازم تنضف بس دا شئ صعب بس مش مستحيل
بس لازم نبدء نتلقى الثقافات اللى مش موجوده فى مصر
اولها الشفافيه اللى موجوده اسميا فى مصر ثانيا تقبل الراى الاخر
يعنى بلدنا محتاجه تتعدل فى حاجات
وهتتعدل على ايدينا ان شاء الله
تحياتى قطتى الجميله
‏قال أم فريده
ازيك يا قطة عارفة اية الحل للمشكلة وكمان ان الدولة عايزة تقلل عدد السكان انها تعمل اخيبارات لاى اتنين عايزين يتجوزا ويشوفوا هما قادرين يربوا الناس ازاىولو مش عندهم خبرة تعلمهم وساعتها لما يعرفوا التربية على اصولها وانها متعبة لانها ساعتها هتبقى اللى على حق هيخلفوا بحساب مش عيال تخلف عيال ومش عارفين مين فيهم اللى عايز يتربى
ويبقى عالم عيال عيال عيال

وسلام يا قمر
‏قال واحد مصرى
بصراحة انا الدم غلي في عروقي و دماغي...تصدقي لو حاجة زي دي حصلت في دولة فيها ذرة من قانون كان الراجل اللي عايش دور البلطجي ده اتحبس لحد ما يبان له صاحب و بالقانون برضه
‏قال Desert cat
اغلى صديقة على قلبى واحلى اخت فى الدنيا
Heart Beat
تعرفى ان مشهد المسرحية ده بقى منتشر اوى فى مدارسنا وصدقينى منناس المفروض انهم متعلمين ده المفروض يعنى .. تلاقى ابنه يروح يشتكى له من المدرس اللى ضربه فى المدرسة او زعق فيه علشان معملش واجب او مش مذاكر بدال ما الاب يخلى ابنه يذاكر او ينتبه لاداء واجباته يروح تانى للمدرس يحاسبه على اللى هو عمله وممكن كمان يروح يكتب فه شكوى فى الادارة التابع ليها
بالنسبة للاب البلطجى فده فعلا انسان سيئ وسمعته مش كويسه وكمان مترشى يعنى اللى عمله مع الست ده شيئ متوقع من شخصية بالشكل ده
المفروض يكون فى قانون رادع للناس دى
تحياتى ليكى يا جميله وشرفتينى جدااا
‏قال Desert cat
nody_1987
لاء يانودى للاسف مش طلع زويل
طلع لنا شخصية نبتلى بيها
تحياتى
‏قال Desert cat
A.SAMIR
ماهى المشكلة يا احمد ان المفروض الناس اللى مش متربية دى متتجوزش اصلا اصل المجتمع مش ناقص بلطجية
تحياتى
‏قال Desert cat
رئـــــيسـة حزب الأحلام
ماهى مامته اتهزأت وحب يكمل عمله البطولى راح للست كمل بقى
ناس متخلفة
تحياتى
‏قال Desert cat
محمد فوزي
عندك حق فعلا
عايز ينضرب الجزم لحد ما يموت اصل لو انضرب بالنار هيستريح على طول وانا نفسى انه يتعذب فى الاول
تحياتى
‏قال Desert cat
Son of Egypt
ماهو علشان عارف ان الست مش هتسكت او لانه انسان قليل الادب جرى يسبقها هو
تحياتى
‏قال Desert cat
سمراء
تعرفى يا سمراء لو فعلا القسم استهان بالموضوع
ده وقتها يبقى كملت
اصل الراجل ده هيبلطج على اد ما يقدر
ربنا يستر
تحياتى
‏قال Desert cat
سبهللة عالاخر
والله انا نفسى اتمنى كدا علشان الراجل يعرف مدى خطأة ويحس باللى كان بيعمله فى غيره
تحياتى
‏قال Desert cat
واحدة مفروسة
هى فعلا حاجه تفرس يا مفروسة
تحياتى
‏قال Desert cat
واحدة مفروسة
هى فعلا حاجه تفرس يا مفروسة
تحياتى
‏قال Desert cat
الإتربي اللولبي
ربنا يريحنا من البلطجية واللى بيعاكسو واللى يسرقوا واللى بيعملوا اى حاجه مش كويسه فى القريب العاجل ان شاء الله
بالنسبة لسؤالك انا مش صحفية ولا عمرى قولت كدا حتى
تحياتى
‏قال Desert cat
ادم المصرى
يعنى ازاى معصية وذنوب كتير وطلعت فى ابنه
طيب والست اللى اعتدوا عليها ذنبها ايه
تحياتى
‏قال Desert cat
GeHaD-----(male)
والله انا نفسى ابنه يبلطج عليها علشان يجنى ما زرع
تحياتى
‏قال Desert cat
خالتى بمبة
على رايك يا خالتى
البيت من الاساس بقى فاسد علشان كدا بيطلع فى المجتمع الاشكال دى
تحياتى
‏قال Desert cat
mostafa rayan
بالظبط يا مصطفى لان اللى يعتدى على الناس حتى لو راجل مش ست بدون فهم ووعى للامور بيكون بنى ادم سطحى
والست لجات للشرطة لان اعتقد انها الحل اللى قدامها
ربنا ينصرها عليه
تحياتى
‏قال Desert cat
صديقتى الحبيبة
اجندا حمرا
صباحك جورى وياسمين يا قلبى
للاسف الناس بتخرج للمجتمع بلطجية
بدون ما يدركو الخطأ الفادح اللى بيرتكبوه فى حق انفسهم قبل غيرهم
لان ابنه اتعود على البجاحه وقلة الادب وبالتالى الاب والام اللى بيقولوا لولادهم مش تسيبوا حقكو هما نفسهم اول ناس حيتاذوا منهم
وساعاتها لا يلمون الا انفسهم
نورتينى يا ارق اجندة
‏قال Desert cat
أنا حر
ياه يا احمد على الاطفال اللى بتحكى عنهم ده الواحد بيستغرب من اللى بيشوفه ازاى طفل زى ده بيقول الالفاظ دى
وتلاقيهم ماليين الشوارع وعمال يشتموا فى بعض وتفتكرهم بيتحانقوا وفى الاخر يطلعوا بيهزروا وحتى لو بيهزر ازاى الولد ده اتربى على الكلام الزبالة والالفاظ اللى مش بينطقها المجنون حتى
ده كله بسبب اب وام فوضويين معرفوش يربوا لانهم فى الاساس محتاجين تربيه
تحياتى
‏قال Desert cat
حبيبـــــــة القمـــــر
مهو ده رائي برضه يا بيبه
ان الاب ده ابنه هيجى يوم وهو اللى يربيه لانه محتج تربيه بجد
نورتينى يا جميله
‏قال Desert cat
نونو
وده معناه ان النظام متسيب يا نونو
والمفروض يكون فى رادع وكل واحد يتعدى حدوده هتكون العاقبه وخيمة
تحياتى
‏قال Desert cat
enjy
ومش شرط هى يا انجى
يعنى لو اتنازلت عن حقها هيبلطجوا على غيرها وغيرها
ربنا ينصرها عليهم
تحياتى
‏قال Desert cat
محمد صالح
الحمد لله انك خلصت امتحانات عقبال النتيجة يارب وتكون مشرفه
بلنسبة للموضوع واحد مترباش يا محمد عايزة يربى ابنه احسن ما هو اتربى ازاى
ازاكان قاموس حياته خالى من الكلمة دى
احنا محتاجين رادع وقانون يتنفذ بجد فى البلد
تحياتى
‏قال Desert cat
دعوة للحب
هو حل وكمان انه يكون فى بجال امن موجودين فى كل الشوارع لاى فعل خطأ ويكون فى عقاب رادع لمرتكبه حتى لو طفل يتحمل ولى امره الذنب علشان الناس تربى ولادها كويس
‏قال Desert cat
واحد مصرى
ده لو يا ايهاب
لكن احنا هنا عايشين فى قانون الغاب والبقاء للاقوى حتى لو بلطجى
تحياتى
‏قال سنووايت
للأسف يا قطة هي دي التربية الحديثة
انا كتير بشوف خناقات بين بنات صغيرة وسيدات كبار في سن امهاتنا وبشمه شتايم في منتهي الانحطاط وقلة الادب
ما بقاش فيه العفو عند المقدرة والتراحم والتسامح
كل واحد عايز ياخد حقه وغير حقه بدراعه
ناس ذوق ذوق ذوق فعلا
‏قال funckydoctor
فعلا ناس زبالة.......زبالة اخر حاجة
البهبهات دول يستاهلوا الحرق أنا شايف انهم مايستخقوش يبقوا أولياء أمور
أنا مش فاهم احنا رايحين على فين ربنا يستر
‏قال Misrdream
كنت اتكلمت عن الناس اللى زي دول قبل كده وقلت اساس كل الشرور
اللى هما بينخروا فى اصل مجتمعنا زي السوس لحد ما هيجي يوم المجتمع كله يسوس
حسبي اللى ونعم الوكيل
تحياتي لطرحك يا قطه
‏قال blackcairorose
هوه ليه محدش رد على الموضوع الأول؟؟!!

شعورى هيكون ولا حاجة

اللمبات عندى هتنور وتطفى

والاقى اوتوماتيكيا هناك رسالة صادرة منى بتوجيه الشكر للروبوت وابلاغه بسعادتى بالمعلومة الجديدة عنه بأنه روبوت

ثم اضافة ان هذه الرسالة الصادرة منى بشكل اوتوماتيكى لأنى أيضا روبوت

يعنى فى الحقيقة همه اتنين روبوت اتعرفوا واعجبوا ببعض
‏قال Tamer Nabil Moussa
حاجة غريبة

دة بقى الانتاج القادم ولا اية

بدل ما يكون قدوة حسنة بقى العكس

ربنا معانا

تحياتى
‏قال Desert cat
سنووايت
هما هيجيبوا منين بس يا دكتورة العفو عند المقدرة والتراحم
وهما اتربوا ان اللى يقلع لك عين اقلع له عنيه الاتنين
التربية عليها عامل كبير
تحياتى
‏قال Desert cat
funckydoctor
احنا رايحين على سكة اللى يروح ميرجعش
لو فضلنا على الحالة دى
هنغرق قريب جدا
تحياتى
‏قال Desert cat
Misrdream
انا فعلا كنت قريت البوست عندك يا احمد
الحل ان يكون فى رادع
للناس دى علشان السوس مش ينتشر اكتر من كدا فى المجتمع
تحياتى
‏قال Desert cat
blackcairorose
علشان يا جميل بيجاوبوه فى مدونة البرنامج
وانا نقلت ردك هناك
http://netradio.blogspot.com

تحياتى ليكى
‏قال Desert cat
Tamer Nabil
تقريبا يا تامر واحد بالاخلاق دى مينفعش يكون قدوة حتى لكلب جربان
تحياتى
‏قال Zika
اه دول بقي
فريق الناشئين في منتخب البلطجيه
دول اللي لسه عضمهم طري وان شاء الله بكره يكبر ويدي ابوه بالجزمه عشان خلاه يفتري علي الناي وبكره هيفتري عليه
ماهو مش متربي
هيعرف منين الاحترام وابوه اساسا مش محترم
‏قال Desert cat
Zika
تعرف بما انى معرفش الراجل ده
بس بتمنى انه لما ابنه يكبر يديله بالجزمة ويبلطج عليه
علشان يجنى اللى زرعه
تحياتى
‏قال Unknown
عزيزتى قطة
تفتكرى اب باالاخلاق دة ممكن يربى ابنة ازاى اكيد دة التربية المثالية من وجة نظرة
‏قال blue-wave
كلامك مظبوط جدا بس على فكرة احنا كمان بنعمل كدا لما التليفون يرن ونقول للطفل الصغير رد ولو حد عايزنى قلو مش موجود
للأسف دى زى دى
‏قال شـمو نشـادر
ازيك يا قطة ..

عادى جدا .. العدوانه والبلطجه بقت حاجه عاديه خالص على فكره .. فى زمننا ده مين هيستحمل مين .. هى هتبقى الحكومه والجيران عليه كمان ..

مبقاش فى الروح الحلوه خلاص .. ماتت جوانا .. رغيف العيش الممتنع و الاتوبيس المخربأ اللى عامل زى علبة السردين مخليين الناس مش طايقين نفسها مش كمان هيطيقو جيرانهم .. ولا عزاء للعلاقات الانسانيه !!

تحياتى ليكي ..

أسامة أمين
‏قال rovy
السلام عليكم
يعنى يا قطه حتنتظرى ايه من بلطجى غير كده و بعدين الناس دى متعرفش يعنى ايه تربيه ..
الموضوع مش موضوع تعليم او جهل الموضوع اكبر بكثير الموضوع موضوع اخلاق و للاسف مبقتش موجوده فى ناس كثير ..
ربنا يرحمنا و يكون فى عون الاجيال اللى بتنشأ فى البيئات دى .
دمتى بخير فى حفظ الله
تحياتى
rovy
‏قال الربان
تحياتي

نموذج سيء جدا لاشياء كثيرة اصبحت تتم
في حياتنا اليومية...

الجيرة...و حقوقها اولي هذه الفوضي العارمة في حياتنا...قليلا ما نجد من
يحترم حقوق الجار التي اوصي بها جبريل عليه السلام سيدي رسول الله...و الذي بدوره اوصانا بهذه الحقوق...

التربية علي ( التبجح ) و البلطجة...
اصبح هو النموذج...يمكن لاسباب كثيرة
اهمها بالتأكيد غياب دور الامن الفاعل
و الوقائي....ننتظر وقوع الجريمة و بعدين نبقي نحقق من الجاني و من المجني عليه....ثم اجراءات طويلة من التقاضي
ثم بعد سنوات حكم محكم لا يجد من ينفذه...

يا ريت جيران هذه السيدة يقفوا الي جوارها...يحموها من بطش انسان تجرد
من الضمير...فأصبح انسانا بلا معني او قيمة....

تحياتي و تقديري
عارفة انا كنت حعلق زى اول تعليق خالص على البوست
بس اللى سبق
المهم ان هنا الام مشتركة فى الخطأ
قلتى لى ليه ؟
اقولت
لانها سلبيه
لو كان ليها وقفة مع الراجل ده
من الاول
اول الجواز يعنى
ما كنش بقى هو المتحكم بالاسرة
غالبا الست هى اللى بتربى مش الراجل
لانها بتقضى اطول وقت مع الطفل فى البيت
و الا ايه رايك ؟
انا لعب الفار فى دماغى فى الاول زى ما لعب فى دماغك
بس ربنا ستر

تحياتى
eslam
مش عارفه ليه دلوقتى كل اللى عنده ولد فى الطبقه المتوسطه خصوصا بيبقى مش طايق نفسه و عامل نفسه فله
انا فى واحد جارنا عنده ابن فى تانيه ابتدائى و علمه سواقه العربيهو من ساعتها الواد برضه ممروع على العيال و كل شويه يسأل ابنى اللى زيه فى السن انت بتعرف تسوق
رحت انا رديت قلت له هوا بيصلى 5 مرات فى اليوم انت بتعمل زيه
طب حقوله ايه غير كده عشان اسكته و انصف ابنى
مش حاجه تقرف و النبى
‏قال Desert cat
ايوية
والله يا ايوية المفروض ان اى حد بالاخلاق دى مينفعش يكون اب اساسا لانه بيصدر لنا عاهات فى المجتمع
تحياتى
‏قال Desert cat
blue-wave
انا الحمد لله مبعملش كدا
لانى مبردش على تليفون اساسا غير موبايلى وده مستحيل حد يرد عليه غيرى
كمان انا معنديش اطفال
تحياتى
:)
‏قال Desert cat
شـمو نشـادر
وده كله ماله يا اسامة بالتربية والتنشئة
يعنى انا علشان مش لاقيه رغيف العيش اعلم ولادى البلطجة
طبعا مش عذر ولا حجه
تحياتى
‏قال Desert cat
rovy
صح يا روفى
حطيتى ايدك على موطن الداء
فعلا الاخلاق مبقتش موجودة
تحياتى
‏قال Desert cat
الربان
استاذى العزيز اهلا وسهلا بحضرتك بعد طول غياب
بالفعل يا فندم غياب الامن تسبب فى تسيب واضح جدا فى المجتمع وعدم لا مبالاة ولا اكتراث
وتخيل لو حصلت مشكلة بين شخصين واحد الطرفين هدد الاخر بانه سيشتكيه فى الشرطة الاخر يسخر وكانه يسمع نكتة بايخة
تحياتى
‏قال Desert cat
مواطن مصرى نايم
طيب هى مراته هتعمل ايه
وقفة ازاى حتى لو وقفت على شعر راسها
ممكن يمثل انه اتغير لكن فى النهاية الطبع يغلب التطبع
تحياتى
‏قال Desert cat
صيدلانيه طالعه نازله
الناس دى اغلب الاحيان بيكونوا محدثين نعمة
وعلشان كدا بيعلم ابنه قلة الادب والبلطجة
تحياتى
‏قال Migo Mishmish
اغيب شوية الاقي حكاوي عن اقسام وبوليس وبلاوي من ديه
عموماً يا ستي هو ده السوستوم اللي ماشي دلوقتي العقلاء والمثقفين واواخر الرجال المحترمين سابوا البلد وهاجروا ياما ماتوا بالانفجار في المخ من الغيظ. وفضلنا دود الارض والعائدون من بلاد الجاز بثقافتهم القالحة
بصي يا ستي بما اننا قاعدين هنا ومش هانمشي يبقى الحل في ايدينا لو كل واحد مننا عمل زي الست ديه هنقدر نقف قدام الغوغائية .
مش ممكن تبقى البلطجه هي الحل. زي ما هما فاكرين ان الدنيا ليهم لازم يعرفوا نها مش سايبه ولسه في ناس بتفهم
وكلامي للي شغال في مجال فيه تعامل مع الاولاد الصغيرين او الشباب او حتى عنده طفل او طفله لازم قبل ما يعلمهم ياخدوا حقهم ازاي يعلمهم يوفوا حقوق اللي حواليهم الاول علشان يبقى لهم عين يطالبوا بحقهم. البلطجة ممكن تكسب جولة لكن عمرها ما تنتصر في معركة
Love,
MishMish

المشاركات الشائعة