ممنوع الخروج .. ممنوع الكلام .. جهزوا الأكفان

فى البداية البوست ده مقتطفات من كلام البنا الاب الروحى للجماعه المحظورة القادرة على قلب الحقائق والمرأة عورة فى كل زمان ومكان ولو خرجت ده لو سيدها الراجل سمح لها تخرج يعنى يبقى لازم تتكفن
رأي الشيخ حسن البنا في دخول المرأة للبرلمان"يعتبر منح المرأة حق الإنتخاب ثورة على الإسلام وثورة على الإنسانية، وكذلك يعتبر إنتخاب المرأة ثورة على الإنسانية بنوعيها لمناقضته لما يجب أن تكون عليه المرأة بحسب تكوينها ومرتبتها فى الوجود، فإنتخاب المرأة سبة فى النساء ونقص ترمى به الأنوثة " مجلة الإخوان المسلمون 5 يوليو 1947.
ايوا بالظبط كدا زى ما شوفتوا المرأة اللى بتدخل البرلمان سبه فى الانسانية كدا اللى ينتخبها مش بنى ادم اساسا ... وبعدين يعنى ثورة على الانسانية يعنى بتقلب النظام وبتهتف وتقول انا مش عايزة اكون انسانة
وكمان هى بالشكل ده بتتخلى على انوثتها ايشى خيال يا ناس

"إباحة عضوية البرلمان مطلقاً يتنافى مع خطر الخلوة والإختلاط بالأجانب على النساء، ويتنافى كذلك مع تحريم النظر، ويؤدى إلى كثير من المفاسد... المرأة لاتكون وزيرة ولاعضواً فى البرلمان بحال، فإن من مقتضى إسناد هذه الأعمال إليها الخلوة مع غير ذى المحرم، بل ربما إقتضى ذلك الخلوة مع غير المسلم" حسن البنا فى العدد 19 من مجلة النذير.
اه علشان كدا تم تفصيل وتاييف وتظبيط فتوى ارضاع الكبير ... يعنى طالما وافقت على الاختلاط وقعدت معاه فى مكان واحد يبقى تعرى عن صدرها وترضع زميلها وايييييه 5 رضعات مشبعات يعنى حرام تكلمه بس حلال تعرى له جسمها .. الهى ربنا يعركو قادر يا كريم "مايريده دعاة التفرنج وأصحاب الهوى من حقوق الإنتخاب والإشتغال بالمحاماة مردود عليهم بأن الرجال وهم أكمل عقلاً من النساء لم يحسنوا أداء هذا الحق، فكيف بالنساء وهن ناقصات عقل ودين " حسن البنا فى حديث الثلاثاء ص 370.
من الواضح انه ميعرفش ان فى ستات فى مناصب مهمة جدا فى الدولة ومن الواضح انه ميعرفش ان بعض الأماكن الوظيفيه سواء قطاع عام او خاص يرئسها سيدات ... الله يرحمه نسى يقولنا رايه فى الارملة او المطلقة التى تعول اطفالها ولا حرام تنزل تشتغل وترميهم فى الشارع علشان يطلعوا اطفال شوارع زى الفل كدا ولا تروح تبيع نفسها علشان تعرف تربيهم وكدا احسن لها من انها تشتغل وتدور على لقمة عيش حلال
حين طلب عميد كلية التجارة حمدى بك تعيين أربع طالبات فى وظائف الدولة، إستنكرت مجلتهم النذير وإستعملت الإيحاءات الجنسية فى ردها فقالت فى العدد 20 بتاريخ 15 جمادى الأولى 1358 ص 23 " إن كل واحدة من هؤلاء المتخرجات إذا لم تعثر على الجليل فهى فى وظيفتها لن تعدم الخليل "!!.
وده العادى عندما لا يعجبهم حديث بيستخدموا الايحاءات الجنسية علشان يكسروا ارادة من تخالفهم ماهى رايحه بقى علشان كدا وكدا يعنى ومن الواضح ان كل النساء اللى يعرفوهم كدا وعلشان كدا متخيلين كل النساء زيهم ...
يعقب حسن البنا على طلب الآنسة نعيمة الأيوبى للعمل كمحامية وفاطمه فهمى للتقدم لمدرسة الهندسة بقوله " للمرأة وظيفة فى الحياة وهى المنزل، وليس من النافع أن تشارك الرجال فيما يقومون به من الأعمال " مجلة الاخوان المسلمون العدد 8 ص 19
تانى والرملة والمطلقة برضه تقعد فى المنزل وتتسول لقمة العيش ولا تروح تعيش فى الحرام علشان ميتنلش شغل شريف تعيش منه ؟؟؟
"ليست المرأة فى حاجة إلى التبحر فى اللغات المختلفة، وليست فى حاجة إلى الدراسات الفنية الخاصة، فستعلم عن قريب أن المرأة للمنزل أولاً وأخيراً، وليست المرأة فى حاجة إلى التبحر فى دراسة الحقوق والقوانين" حسن البنا كتاب المرأة المسلمة - دار الكتب السلفية
يعنى مينفعش تكون دكتورة او مدرسة او مهندسة او رسامه او اى حاجه البيت يلمها هى تتكفن وتحط نفسها فى تابوت وتدفن نفسها وتموت احسن ... اصل علوم الدنيا حرااام للمراة ... لازم تكون جاهله ومش بتعرف تفك الخط هو ده الحلال ؟؟؟ هو ده الدين الصح ؟؟ المرحوم باين عليه مكانش يعرف " اطلبوا العلم ولو فى الصين """ ؟؟؟ ولا " الطلبوا العلم من المهد الى اللحد ؟؟؟؟؟ وللاسف ما اتحددش هنا راجل ولا مرأة
يعقب حسن البنا على مشروع دخول البنات جامعة الأزهر بقوله "لايجيز الدين للمرأة ان تكون بين طلبة الأزهر، بل لابد من الفصل بين المتعلمات والمتعلمين فصلاً لايمكن كلا الصنفين من الإتصال بالآخر، حتى ولا فى حدائق المعاهد وأفنيتها".• يؤكد حسن البنا على أن النقاب هو الأساس فى الإسلام وهاجم شيخ الأزهر الذى أباح كشف الوجه والكفين فقال "كشف وجه المرأة ويديها حرام إلا إذا أمنت الفتنة" حديث الثلاثاء 369.• يشجع حسن البنا تعدد الزوجات ويقول أنه يقضى على الفقر!!ويستشهد فى حديث الثلاثاء ص 375 بالحديث القائل "جاء رجل إلى النبى صلعم يشكو الفقر فقال له تزوج فتزوج، ثم جاء إليه ثانية يشكو الفقر فقال له تزوج فتزوج، ثم جاء إليه ثالثة يشكو إليه الفقر فقال له تزوج فتزوج، ثم جاء إليه رابعة يشكو الفقر فقال له تزوج فتزوج الرابعة وكانت تحسن الغزل، فعلمت ثلاث النسوة صنع الغزل والنسيج فإنفرجت بذلك ضائقة الرجل وصار من الأغنياء لأنه أصبح مدير مصنع تعمل فيه زوجاته" حسب تعليق البنا، وفى مجلة الإخوان المسلمون العدد 13 لسنة 1944 يقدم مبرراً مدهشاً وعجيباً فيقول "إن خيراً للمرأة وأقرب إلى العدالة الإجتماعية والإنصاف فى المجتمع أن تستمتع كل زوجة بربع رجل أو ثلثه أونصفه من أن تستمتع زوجة واحدة برجل كامل وإلى جانبها واحدة أو إثنتان أو ثلاث لايجدن شيئاً!!.عندما وجد حسن البنا أن المرأة ستبدأ فى الحصول على بعض المكاسب الإجتماعية، تحدث إلى مجلة النذير العدد 19 بتاريخ 8 جمادى الأولى 1358 هجرية غاضباً وقال "إسمع يامحرر النذير، أحب أن ألفت نظرك ونظر قرائك إلى هذه الأحاديث النبوية الكريمة والنصائح المحمدية الغالية فإن فيها تبصرة وذكرى :1- ماتركت بعدى فتنة هى أضر على الرجال من النساء، 2- الخمر جماع الإثم، والنساء حبائل الشيطان، وحب الدنيا رأس كل خطيئة، 3- إتقوا النساء فإن أول فتنة بنى إسرائيل كانت من النساء ،4- المرأة عورة، فإذا خرجت إستشرفها الشيطان، وإنها لا تكون أقرب إلى الله منها فى قعر بيتها".
قولوا انتوا رايكو بقى

تعليقات

‏قال AHMED SAMIR
انتي بتتكلمي على وجهة نظر من سنة 1947
يعني رأي عمره 61 سنة اعتقد ان الرأي دة كان مناسب لظروف المجتمع وقتها
معقول نحاسب حد على رأي اتقال من 61 سنة؟
‏قال Desert cat
A.SAMIR
اولا انا مبحاسبش حد من خلال البوست ومش ينفع اصلا احاسب واحد ميت لانه دلوقتى فوق حسابه عند ربنا انا برضه بعرض وجهة نظر سيادته وبما ان سيادته الاب الروحى للكتلة منهجهم لا يتجزأ الا هى فتوى ارضاع الكبير كانت من 61 سنة برضه وتسمى ايه الى بيحصل فى المجتمع من حوالينا لنشر الفكر الوهابى بشتى الطرق من خلال جماعتهم ماهو احنا
انا بس حبيت اربط بين الفكر من 61 سنة فاتوا وبين الوقت اللى احنا عايشينه
تحياتى
‏قال شهرزاد
للأسف الفتاوى بقت لكل من هب ودب هذه الأيام
أي شخص حاصل على ماجيستير ولادكتوراه في العلوم التشريعية وللأسف حتى المفتي بتاعنا
ممكن يفتي
صدقي الرسول صلى الله عليه وسلم حينما قال" من أفتى بغير علم فليتبوا مقعده من النار"
سلمت يداكِ
‏قال wanna b a physician
بصى ياستى اكيد عمر ما حد يقصد يقلل من شأن المرأة بس
محدش ينكر ان فى حاجات ماكنتش بتحصل من زمان بتحصل دلوقت بسبب اندماج المرأة فى سوق العمل
بس ده مش مرتبط بيها لوحدها لا مرتبط بالمجتمع ككل
وانا مش ضد عملها ولا حاجة طالما فى حدود الادب
يعنى انا لولا شغل والدتى مثلا ماكنتش بقيت كدا
وتحياتى للمرأة وباقولك اية ابقى هاتى اراء من دلوقت
‏قال واحد مصرى
القطة الصديقة العزيزة
و بعدين.....و بعدين...هانقول وهابيين و سلفيين....أحاديث تم جمعها بعد سنين طويلة من وفاة الرسول..و ناس جمعت الاف الاحاديث عن الرسول الكريم بالرغم من قصر المدة التي قضوها معه ..أحاديث نتواترة و منقولة و مسنجة و ضعيفة ومتفق عليها...ناهيك عن العنعنات (عن فلان عن فلان عن فلان )استخدم الامويين بعض من جمعوها لارساء حكمهم...و هاقول كمان ان فيه احاديث العقل لا يقبلها و لا يمكن ان يقولها رسول كريم علمه ربه و احسن ادبه و علمه..و هاقول ان النقل خطأ فادح و ان اعمال العقل فضيلة و ان الانسان حر فيما يعتقده و يفهمه و لا سلطان على العقل الا العقل.....رحم الله المعتزلة و واصل بن عطاء

لحسن البنا ان يصدق فيما يعتقده لكن التطور سيحتم التغيير و يفرضه

بمناسبة رضاع الكبير..فاكرة الكمودينو بتاع موضوع زميلتي العزيزة ممكن ترضعيني....:))))))))))

دمت بخير يا صديقتي العزيزة
‏قال واحد مصرى
كمالة سريعة

الاراء المذكورة في التدوينة على لسان او فكر حسن البنا او غيره لا يزال الكثيرين مصدقين فيها و لكن الزمن وحده كان كفيلا بنسفها من جذورها...المستشارة الالمانية سيدة...مخترعة عظيمة زي ماري كوري برضه سيدة...و القائمة طويلة
‏قال Unknown
تفتكرى لو كانت افكارة مظبوطة كان هايحصل عكسها

وكل يوم بيظهر دليل جديد

بيثبت عكس دة

سوا كان كلام حسن البنا او غيرة
‏قال سنووايت
كنت لسة بتكلم مع شهرزاد في موضوع قريب من اللي بتتكلمي فيه
وللأسف يا قطة اللي بيحصل دلوقتي محاولات لاعادة المرأة الي الأكفان مرة اخري بخطة طويلة المدي موضوعة من سنين , والاختلافات دي بين أقصي اليمين وأقصي اليسار هي سبب كل المصايب اللي بتحصل وحالة اللادين اللي بقينا عايشين فيها يعني لا بقي أبيض ولا أسود ولا حتي عارفين نبقي رمادي
تسلم ايدك علي الموضوع
‏قال أحمد بكر
يا قطه
الرأى السليم بيفرض نفسه و الافكار الى متقدرش تعيش الواقع هتموت بالواقع
تحياتى
‏قال Unknown
لا حول ولا قوة الا بالله
صدقينة فكرهم عمرة متغير لحد دلوقتى ومش هيتغير
‏قال Miso soup
ما حكم بيع وشراء القطط ؟
ذهب أكثر العلماء إلى جواز بيع القط ، وذهب بعض أهل العلم إلى تحريمه وهم الظاهرية ورواية عن الإمام أحمد رحمه الله ، وحكاه ابن المنذر عن أبي هريرة رضي الله عنه . والقول بتحريم بيعه هو الراجح ، لثبوت النهي عن بيعه عن النبي صلى الله عليه وسلم ، وليس له ما يعارضه .
هههههههههههههههههههههههههههههههههه
‏قال Miso soup
ما حكم بيع وشراء القطط ؟
ذهب أكثر العلماء إلى جواز بيع القط ، وذهب بعض أهل العلم إلى تحريمه وهم الظاهرية ورواية عن الإمام أحمد رحمه الله ، وحكاه ابن المنذر عن أبي هريرة رضي الله عنه . والقول بتحريم بيعه هو الراجح ، لثبوت النهي عن بيعه عن النبي صلى الله عليه وسلم ، وليس له ما يعارضه .
هههههههههههههههههههههههههههههههههه
‏قال إبن مصر
أن الأصل والقاعدة أن يكون عمل المرأة في بيتها قياما بالحقوق الزوجية وواجبات الأمومة وتربية الأبناء وأن هذه أمور ليست بالسهلة فإنها كما تعلمين تحتاج الى مجهود قوى تأخذ وقتا وجهدا كبيرين
وأن المكلف بالسعي والكسب والإنفاق هو الزوج لقوله تعالى : (( الرجال قوامون على النساء بما فضل الله بعضهم على بعض وبما أنفقوا من أموالهم )) ولكن إذا كانت هناك حاجة شخصية أو إجتماعية تدعو المرأة للعمل خارج البيت فهذا يجوز بقدر الحاجة وفي مجال أو عمل لا يترتب عليه محاذير ولا فتنة لنفسها أو غيرها ، فلو احتاجت المرأة إلى الأشتغال خارج بيتها لكسب رزقها لعدم وجود من يعولها أو أن يكون عائلها مريضا أو عاجزا أو فقيرا لا يكفيه عمله أو ليس بصاحب حرفة أو صنعه أو انشغاله بما هو أهم أو اشق من الأعمال الأخرى ، فعندئذ تضطر للعمل لكسب العيش أو للمساعدة فهذا جائز بالشرط السابق
وعندى كلام كثير فى هذا الموضوع ولو تحبى ممكن نتكلم فى هذا الموضوع
فيمابعد
فى وقت تحدديه
لأن اعلم ان كلامى هذا لن يرضيكى
واعلم ايضا مايدور برأسك الأن
منتظر ردك
‏قال الربان
تحياتي

بلا شك ان البعض مازالوا يؤمنون بوجهة النظر هذه...حتي انهم منعوا المرأة من الحصول علي رخصة قيادة.

لكن الحمد لله رب العالمين...مازالت مصرنا
واهلنا بخير....مازال الازهر الشريف منارة للوسطية...و الاعتدال بغير افراط
او تفريط...

ما زالت دار الافتاء المصرية...التي توالي عليها كبار العلماء و شيوخ افاضل ذو علم و نثق فيهم..مازالت شامخة نعطي الرأي الصحيح من خلال لجان
و ليس رأي واحد...

في رأيي اننا يجب ان نلجأ الي هاتين الجهتين فقط...( الازهر و دار الافتاء)
للحصول علي اية معلومات او فتاوي.

تحياتي و تقديري
‏قال Migo Mishmish
معلش يا قطة الظاهر الشيخ الهدام - البنا - كان بتكلم عالست والدته اللي تحقفتنا بالشيخ اللاوزعي فمن الواضح انها كانت كما قال
"ليست المرأة فى حاجة إلى التبحر فى اللغات المختلفة، وليست فى حاجة إلى الدراسات الفنية الخاصة، فستعلم عن قريب أن المرأة للمنزل أولاً وأخيراً، وليست المرأة فى حاجة إلى التبحر فى دراسة الحقوق والقوانين" حسن البنا كتاب المرأة
لان الست حتى لو هتقعد في البيت لازم تبقى متعلمة يمكن اكتر من جوزها لانها ساعتها هتبقى المحتكم الاساسي في البيت حتى ولو بطريقة غير مباشرة فلو هي مهمهتا بس المتعه الجنسية وخلفه العيال هنلاقي اجيال كامله زي الهدادم كدة واكتر
اللي يغيظ كمان يا قطة ان كان معايا بنت في ثانوي كانت مؤمنه بالنظرية ديه. وقالت انها هتكمل تعليمها وتقعد في البيت لان الست حرام تشتغل. انا سمعت الكلمتين دول وكل عفاريت الدنيا اطنطت في وشي
كنت عايزة اقولها ازاي تبقي كيان تابع. افرضي عايزة تشتري حاجة ليك هيبقى لازم تتسولي من جوزك وممكن يقولك لا مفيش فلوس دلوقتي. ازاي تقطعي علاقتك بالعالم من حواليك وتبقى مش عارفه غير اللي بيجي في برامج التليفزيون. انا مش ضدد ان الوحدة تقعد في البيت علشان لو اضطرتها الظروف انما ده يبقى اتجاه وفكر اهو ده اللي غباوة لا مؤاخذة
وبعدين الاخت ديه كانت معانا بتتعلم في مدارس الحكومة بتاعه التعليم المجاني يعني واخدة مكان بنت تانيه كان نفسها تبقى حاجة تخدم مجتمعها بس يمكن اهلها معهومش فلوس لتعليمها. مش خسارة المكان اللي كانت واخداه في المدرسة
يلا منهم لله
Love,
MishMish
‏قال Asmaa mahaba
انا رايى اننا بغض النظر عن كل ما يحدث هى فتنه وتلحق بالمسلمين ولكل نسان اجتهاده
وكلام حيتحاسب عليه عند ربنا
اما بالنسبه للمراه فشوفى اراء قناه النسناس مش محتاجين نرجع للبنى وكلامه
يعنى اما يطلع شيخ يقولك المراه مصدر للفتنه فاقعدو فى البيوت ومتشتغلوش والبسوا ملس دا معناه انهم بيرفعوا من على كاهل الرجال ايات واحاديث غض البصر ولو كانت لمراه هى العنصر السىء فى المجتمع لما خلقها الله؟؟؟
هم ليس عندهم ايمان كافى ليتفهموا ان المراه خلقت لتكمل الرجل وان شانها شان الرجال فى الحياه فهى بشر لا حيوان للمتعه فقط واداه للانجاب
والقرن مبين حقوقنا هو والسنه بالتمام لكن احنا اللى مبنحبش نشوف الصح اصله بيوجعنا
تحياتى ليكى سومه_87
‏قال محمد صالح
انا من رائى ان حسن البنا قال الكلام دا وقته لان المراه كان دورها فى المجتمع انها ترعى الاولاد وتشوف مصالح المنزل
ولك مع التقدم والتطور العلمى والمجتمعى اقتدت الحاجه ان لابد من عمل السيده يعنى مينفعش نخلى راجل يشتغل فى محل لبيع ملابس السيدات ولكن لكل شخص وجهة نظره اما بالنسبه لارضاء الكبير فاحنا عندنا فى مصر شوية ناس يا سلام احسن ناي ترضى الكبير او بمعنى اصح انها تنافق الكبير بغرض اقتضاء مصلحه
وفى النهايه ربنا يكون فى عونا ونعرف نصلح البلد دى اللى كل ما نسد خرم فى الماسوره نلاقى خرم اتخرم الناحيه التانيه هيا الناس دى فران مبتكنش
تحياتى قطتى الجميله
‏قال Misrdream
انا ليا راي
انك بتدي التيار ده اكتر
من حقه فى النقد انا شايف انه
اخد مساحه كافيه ووجهة نظرك
دلوقتي الكل عرفها الجماعه
فكرهمموشهيتغير واسلوبهم وطريقيتهم موش هتتغير لانهم فاكريين انهم هما بس اللى بيفهموا وهما بس اللى خايفيين على مصر
وده طبعا فكر كوميدي صرف
كفايه عليهم كده
‏قال Desert cat
مع احترامى للجميع هرد على المؤدب المحترم اللى اتربى كويس واتعلم يعنى ايه ذوق وادب اللى اول حرف من اسمه نور ...
واذا خاطبهم السفهاء قالوا سلاما
وانا بقولك سلاما
ونصيحة من سيدتك القطة ... بدل ما تنصح الناس يعرضوا نفسهم على دكاتره .. روح انت لاقرب دكتور جراح اصل تقريبا على راسك بطحه كبيرة اووووووى ربنا معاك
‏قال Desert cat
مطرح ما ترسى دق لها
انا عندى هوياة فى تضييع الوقت وفتح مدونتى للكلا م على الناس اللى عمال تقول كلام وخرابيط واعتقد ان ده مش كلام انا كاتباه ده كلام منقول على لسانى استاذكو العلامة الكبير المرحوم بقى
ونقلته هنا اصلى بحب الرز بالخلطة يعنى مش انا اللى ضارباه فى الخلاط هو جاى لى مخلوط طبيعى وجاهز ومعاه كمان السلطات ... لا شكر على واجب
‏قال Desert cat
نسيت اقول لحضرتك حاجه انا ممكن كمان افتح مدونتين تلاته اربعه اصلى بحب الفضايح ومش بحب اسكت على كلام حد بيناقض نفسه ومعندوش غير الجزمة للمعارضه وطز فى مصر وشعب مصر يبقى مش خسارة عشرين مدونة فى واحد بالعقلية دى وعايز يحكمنا هو وجماعته
‏قال الدرعمي
السلام عليكم

قطتي العزيزة

أرجو أن تعرفي الفرق بين هؤلاء الإخوان

الذين أنشأوا الجماعة

وبين هؤلاء الإخوان الذين يعيشون بيننا

أما الإمام حسن البنا رحمه الله وأصحابه

فكانوا محترمين وعلماء أفاضل

وأما الذين هم بيننا اليوم

فلا أي وزن لهم

وهم مجرد باحثين عن الكرسيّ

لا عن الدين ولا الوطن

وإنما المصلحة هدفهم وبغيتهم

فإن رأيت ِ شرا في تصرفاتهم وأقوالهم

فانتقديه

أما السابقون الأفاضل

فلا تربطي بينهم

لأن لا رابط بينهم

ولو كان الشيخ حسن البنا

والشيخ سيد قطب على قيد الحياة

لأعلنوا الحرب على الإخوان

لأنهم لن يرضوا بذلك أبدا

تحياتي


آدم
‏قال rovy
السلام عليكم
هو لسه فيه حد دلوقت بيفكر كده .. طبعا مش معقول الكلام ده كان ناتج عن عادات واعراف خاطئه ..
لكن اللى فعلا يقلق هو الفتاوى اللى بقت لكل من هب ودب واللى احيانا تلاقى اثنين فى نفس الوقت كل منهم قال فتوى ضد الاخر .
وبعدين مع الاسف فى ناس نظرتهم للمرأه مش حتتغير ابدا
ربنا يهديهم ويرحمنا منهم وينصرنا عليم ويهدينا للحق .
دمت بخير
تحياتى
‏قال Unknown
اعتقد ان فى الكثير والكثير من الاراء
اختلف الان خاصة فى ظل دخلهم مجلس الشعب ومحاولتهم استماله الناس وايضا موالاه الحكومة حتى وان كانت موالاه غير معلنة

كل الاحترام
‏قال HANY YASSIN
السلام عليكم
" من أفتى بغير علم فليتبوا مقعده من النار"

صدق رسول الله صلى الله عليه وسلم

السيدة خديجة كانت تعمل
انا ارفض عمل المرأة لكنه ليس حراماً
تحياتى هانى يس
‏قال Zika
بصي بعيدا عن ان الكلام ده اتقال زمان اوي وماعرفش مصر كانت عامله ازاي ساعتها
بس البلد اللي في سنة 1947
كانت بتفكر كده
كان لازم تتهزم هزيمه نكراء في 48
ومتهيالي ان عنوان البوست
يبقي
الوجه القبيح للاخوان
تحياتي يا قطه
‏قال غير معرف…
قطتنا العسل

صباح الفل ياجميل

فكر الجماعه و مؤسسها من زمان كده و حتفضل كده عمرها ماحتتغير
هما من وجهه نظرهم بيطبقوا الدين و اللي بيخالفهم يبقي بيخالف الشريعه و الدين
المجتمع اللي بنعيش فيه ياقطه بقه بيساعدهم و ان اظهر عكس كده
الفقر و الظروف المعيشيه السيئه هي اللي بتساهم في كده في ان يظهر ناس من النوعيات دي

لسه كانوا عاملين ايسته بالمرتبات بتاعت اعضاء جماعه الأخوان يعني لو واحد مش لاقي ياكل و قالولوا انضم لينا و حنديك فلوس تفتكري حيقول ايه؟حيوافق طبعا

الفلوس بتشتري ساعات الذمم ياقمر

تحياتي علي الموضوع المميز و الي الامام سر
:)
‏قال غير معرف…
قطتنا العسل

صباح الفل ياجميل

فكر الجماعه و مؤسسها من زمان كده و حتفضل كده عمرها ماحتتغير
هما من وجهه نظرهم بيطبقوا الدين و اللي بيخالفهم يبقي بيخالف الشريعه و الدين
المجتمع اللي بنعيش فيه ياقطه بقه بيساعدهم و ان اظهر عكس كده
الفقر و الظروف المعيشيه السيئه هي اللي بتساهم في كده في ان يظهر ناس من النوعيات دي

لسه كانوا عاملين ايسته بالمرتبات بتاعت اعضاء جماعه الأخوان يعني لو واحد مش لاقي ياكل و قالولوا انضم لينا و حنديك فلوس تفتكري حيقول ايه؟حيوافق طبعا

الفلوس بتشتري ساعات الذمم ياقمر

تحياتي علي الموضوع المميز و الي الامام سر
:)
‏قال فى حب الله
ربنا لا تؤاخذنا بما فعل السفهاء منا
ما هو خلاص الفتاوى بقت خلاص مشاع لكل واحد شايف نفسه فاهم فى أصول الدين ربنا يرحمنا برحمته
‏قال blackcairorose
قطة

صدقينى معرفش نرفزتنى من تصريحات حسن البنا أكتر ولا من بعض التعليقات، ولكن على أى حال فيه سؤال معرفش اجابته

هل الاخوان غيروا فى اى معتقدات للشيخ حسن البنا ولا دى بالنسبة لهم مرجعية لا تتغير؟؟

متهيألى صعب الاجابة لان مخالفة اراءه ـ حتى بافتراضها ـ ممكن تكون مجرد مناورة للضهور بشكل اكثر عصرية دون تغيير حقيقى فى الفكر
‏قال Desert cat
شهرزاد
للأسف كمان يا شهرزاد احنا فى ظل انتشار حالة الدروشة اللى تفشت اصبح كل من هب ودب يفتى حتى لو حاصل على الابتدائية مش علوم شرعية
ولما تساليه ايه مصدر كلامك يقولك الشيخ فلان او علان من قناة العفريت الازرق الفضائية ومع انتشار الفضائيات وموضة شيخ لكل مواطن انتشرت الفتاوى بدون حساب او رادع
شرفتينى جدا يا شهرزاد
تحياتى
‏قال Desert cat
wanna b a physician
طبعا انا متفقه معاك يا دكتور
ثم ان مينفعش امنع المرأة من ممارسة حقها فى العمل بحجة انها غير اهل او كفء لذلك او اناها مرأة خروجها من البيت عورة
لانها فى بعض الاحيان بتكون مسؤله عن اعالة اسرة
تحياتى
‏قال Desert cat
واحد مصرى
صديقى العزيز ايهاب
المضحك المبكى ان البعض استغل لهث ادعياء التدين ونقلهم لاى حديث حتى لو كلام لا يفقهه عقل المهم انه طالما بدأ بقال رسول الله وصدق رسول الله يبقى حديث وبدأوا يلعبوا لعبة قذرة وينشروها خلال المنتديات
انشر فقد حلم فلان ابن علان انه راى الرسول فى المنام ولو بلغت عنه هذا الحديث ستربح مليون جنيه ولو مش بلغته هتفتقر ويبقى وقعتك سودة المهم الناس بتصدق من غير ما تكلف نفسها وتبحث فى السنة عن صحة الحديث
ولما تيجى تتبين صحة الحديث مش تلاقيه حديث اساسا ولا له اى وجود من الصحة ومن اخترع هذا الكلام يجلسون يتسامرون ويضحكون على ما يفعله البعض من تناقل كلام مغلوط
طبعا فتوى ارضاع الكبير انا مش رايح من بالى كاركتير واحد طول بعرض رايح لزميلته فى الشغل وبيقولها ممكن ترضعينى
يا فضيحتنا فى الدنيا
نورتنى يا بوب
‏قال Desert cat
واحد مصرى
للاسف يا بوب مازال فى ناس بتامن بالفكر ده
والمحزن انك ممكن تلاقى كمان ستات مقتنعين بالكلام ده
طيب ياريت اللى مقتنعه بيه تسيب مكانها فى المجتمع لحد يستفاد بيه يعنى لا تتعلم ولا تقصد اى مصالح حكومية واللى عايز يطبقه على اهل بيته برضه يقعدهم فى البيت ومش يخرهم خالص
ماهو علشان نتحرم فكرهم ورايهم ياريت ميزاحموناش وياخدوا اماكن ناس تانية اولى منهم بيها ونفسها تعمل حاجه مفيدة للمجتمع
شرفتنى
‏قال Desert cat
واحد مش فاهم حاجة
طبعا سواء حسن البنا او غيره افكارهم هدامه وملهاش اى اساس من الصحة وعلشان كدا المجتمع بيتقدم رغم انف الجميع
بس ده ميمنعش برضه ان وجودهم امثالهم فى المجتمع يعيق بعض الشيئ
عايزين ننسفهم
كان فى ناسف للحاجات القديمة بدور عليه دلوقتى
:)
تحياتى
‏قال Desert cat
سنووايت
تعرفى يا دكتورة اساسا المرأة بره عليها عامل كبير لان للاسف فى بعض السيدات مقتنعين بكدا ولما تتناقشى معاها تقولك اصل الشيخ فلان قال والشيخ علان عاد
وكان الشيوخ دول كلامهم قرآن منزل
الناس من شدة الترهيب اللى بتسمعه وفتاوى الثعبان الاقرع لغت عقلها وبقت بتجرى ورا اى حد يقول قال الله وقال الرسول حتى لو كان له هدف معين
تحياتى
‏قال Desert cat
Baker
بالظبط كدا يا بكر
الراى السليم بيفرض نفسه غصبا عن ادعياء التدين
اخبار امتحناتك ايه
ربنا يوفقك يا فندم
‏قال Desert cat
سنووايت
تعرفى يا دكتورة اساسا المرأة بره عليها عامل كبير لان للاسف فى بعض السيدات مقتنعين بكدا ولما تتناقشى معاها تقولك اصل الشيخ فلان قال والشيخ علان عاد
وكان الشيوخ دول كلامهم قرآن منزل
الناس من شدة الترهيب اللى بتسمعه وفتاوى الثعبان الاقرع لغت عقلها وبقت بتجرى ورا اى حد يقول قال الله وقال الرسول حتى لو كان له هدف معين
تحياتى
‏قال Desert cat
ايوية
ماهو للاسف يا يويو افكارهم مش بتتغير لانهم مش بيفكروا اصلا ومالهومش ر اى هما بياخدوا اوامر وينفذوا وخلاص
نورتينى يا جميله
‏قال Desert cat
Miso soup
صديقى العزيز
مالك ومال القطط بس ابعد بعيد الخربشة القطط بالذات يا فندم عاملين لهم قلق علشان كدا الود ودهم مش يحرموا البيع دول يحرموا كمان عيشتهم على الدنيا
هههههههههههههه
شرفتنى جدا بس المرة الجاية مش تنسى بقى
والله شكلك نسيت
‏قال Unknown
يا بنتى يا حبيبتى البت مالهاش الابيتها وجوزها يعنى ما تشتغلش ما تخرجش ما تتعلمش ماتروحش ماتجيش واحمدى ربنا انهم سمحوا للستات يتنفسوا...... مش تحمدى ربنا؟؟
‏قال Unknown
انا مش هكرر كلام اللى قال ان لكل زمن فتواه

يعنى جزئية ان دخول المراه للبرلمان- دا على اعتبار ان الامام البنا قال كدا - دلوقتى بقى في مرشحات من الاخوان لدخول مجلس الشعب....
ولولا الخوف عليهم من التعرض للايذاء اللى بيتعرضله الرجال لكنتى شوفتى مرشحات كتير منهم
دى حاجه

لمعلوماتك الاخوان اكثر الاتجاهات الفكريه فهم وتفتح....وموضوع الكلام ده وتلزيقه فيهم بحجة ان الامام البنا اللى قاله فدى بقت حاجه قديمه اوى....وملهاش لازمه

لان الناس كلها عارفه الاخوان كويس ومعاشرينهم...والكلام لو قيس بالواقع لن يقبل....دا بعض الناس بقت تنكر على الاخوان تفتحهم ومرونتهم بالنسبه للمراه او غيرها من المواضيع

وافررررض ان الامام البنا قال كده....هو مش نبي....يعنى يؤخذ من كلامه ويرد....رغم يقينى بان الفتاوى تراعى اختلاف الزمن....كلامه مش قران عشان نقول انه وضع لكل زمان

الامر يااختى محتاج منك اتساع رؤيه...ومتحكميش الا بعد التحقق ...مش مجرد نقد جاف يخلو من الادله المعاينه والمشاهده
‏قال Desert cat
Son of Egypt
انهى اصل وانهى قاعدة اللى بتقول الغى انسانية بنى ادم واغتصب حق من حقوقه
فين القاعده بتاعة حضرتك ولاى مرجعيه تستند ؟؟؟؟
الاية الكريمة اللى حضرتك استشهدت بيها مش فى العمل والسعى يا فندم .. لأن ربنا لما طلب حتى من الطير السعى للعمل والرزق فما بالك ببنى ادم وانسان ميزه الله بنعمة العقل ... راجع تفسير الاية لتعلم معناها وفى اى موقف ذكرت ...
حضرتك فى النهاية بتقول كلامى مش هيعجبك بناء على ايه حكمت ان الكلام مش هيعجبنى هل حضرتك مطلع على النوايا التى لا يعلمها الا الله سبحانه وتعالى ؟؟؟
شرفت يا فندم
‏قال Desert cat
الربان
استاذى العزيز الدين الاسلامى دين الوسطية ولقد منح المرأة حقها
وواجباتها .. ولكن ادعياء التدين يريدون اخفاقها حقها لماذا ؟؟ وما الهدف ؟؟؟ يمكن لتكون مصرنا هى افغانستان الاخرى وكلن هيهات ؟؟؟
شرفتنى جدا استاذى الفاضل
احترامى وتقديرى
‏قال Desert cat
Migo Mishmish
يا مشموشة الهدام مش البنا هو وجماعته كتلة واحدة وافكارهم لا تتغير على مرور الزمن لانهم ممنوع يفكروا ممنوع يتناقشوا ممنوع يكون ليهم موقف هما ياخدوا اوامر وينفذوا ومبدأئهم معروف السمع والطاعه واللى يخالف يبقى يا ويله ... طبعا البنت اللى كانت معاكى فى المدرسة دى نموذج حى وموجود فى العصر الحالى مش من ايام زمان زى ما البعض تفضل وذكر وقال لكل زمان فتوى ... طيب واللى بيطبق الفتاوى بتاعتهم فى وقتنا الحالى ده ايه يا متخلف يا جاهل والاتنين مبيفرقوش عن بعض كتير
واللى فكرها بالشكل ده يبقى من باب اولى تدفن نفسها ومتخرجش خالص تسيب مكانها للى تستحقه ...
نورتينى يا جميله
‏قال Desert cat
سومه...مجنونه فى بلد عاقل
اولا يا سومة احنا متفقين فى ان من افتى بدون علم فليتبوأ مقعده من النار "

قناة النسناس التجارية اللى بيجيبوا لنا الشيخ حسان يقعد يصرخ طول النهار وبين كل صرخة وصرخه 20 اعلان
مش شوفتى الفضايح الاخيرة لما عمرو خالد دخل عملوا ايه ؟؟؟
المرأة مكانتها عاليه جدا فى الاسلام وربنا سبحانه وتعالى كرمها وكمان الرسول اعطى لها حقها
لكن المتاسلمين الجدد عايزين يطبقوا اوامر من اجل تحقيق اغراضهم الشخصية
تحياتى يا جميل
‏قال Desert cat
محمد صالح
مفيش حجاه اسمها حسن البنا لما قال الكلام ده كان له وقته لانهم بيسعوا لتطبيقه حتى الان ومتنساش ان مبدأ جماعته تسير على الولاء والطاعه
اما باقى كلامك فلا غبار عليه
تحياتى
‏قال Desert cat
Misrdream
صديقى العزيز
بص يا احمد
انا مش بحب التمثيل الكتير ولعب ادوار المضطهدين والتباكى عمال على بطال علشان كدا مش لازم نفوت عليهم الفرصه
لان عباية الدين اللى بيتستروا بيها سقطت وبانت سؤتهم واصبحوا معروفين حتى عند اللابة اللى بينساقوا وراهم
شرفتنى جدا يا احمد
تحياتى
‏قال Desert cat
ADAM
العزيز آدم
يا عزيزى لا فرق بين الاب الروحى ومن أنشأ مدرسة الاخوان بالاسماعيلية وبين الاخوان الموجودين على الساحة حاليا
فتاريخهم الدموى خير شاهد انه لا تغيير وانما المجودين حالين حافظين للدرس وللاوامر ممن سبقوهم فهم القدوة التى يقتدون بها فى افعالهم الاجرامية واللهث وراء المصلحة ولا جديد قدموه ولا افادوا بيه المجتمع
تحياتى يا ادم
‏قال Desert cat
rovy
صديقتى العزيزة
للاسف يا روفى مازال هناك من يفكر بمنطقهم وكانه يريد الغاء المرأة ككيان ولكن فليذهب كلامهم مهب الرياح وكانه هباء منثورا
دمتى بود
‏قال Desert cat
نهر الحب
طيب يا حبيبتى هما دلوقتى فى المجلس عملوا ايه للناس اللى اعطتهم ثقتها
قدروا يوقوفا نزيف غلاء الاسعار قدروا يصلحوا حاجه
هما دلوقتى مبقاش يهمهم الناس قد ما يهمهم موالاة الحكومة
مودتى يا جميل
‏قال Desert cat
HANY YASSIN
بالظبط يا هانى
كل واحد يتحمل وزر اقواله وافعاله
تحياتى
‏قال Desert cat
Zika
ماهو يا زيكا الكلام ده كان زمان ولسه بيطبقوا وبينادوا بيه
وبما ان مصر هزمت فى 48
مش هنسمح لهم بالهزيمة فى 2008
تحياتى
‏قال Desert cat
اجندا حمرا
صديقتى الغالية ارق اجندة
للاسف يا جميلة فعلا زى ما ذكرتى الظروف الاقتصادية مساعداهم طبعا هما هيقولوا منين يا قلبى
ماهو كفاية بس اللى بيجى لهم من كبارهم اللى فى دبى والدول التانية ومن الطبيعى ان الفقير الغلبان حتى لو مش مقتنع بفكرهم بس هما عندهم فلوس وهيساعدوه فبينضم وحسب مبدأ السمع والطاعة ولا يقدر يفتح بؤه والا هيرجع تانى لسابق عهده مش لاقى ياكل ...
شرفتينى جدا يا جميله
‏قال Desert cat
فى حب الله
هما مش اسمهم الاخوان المسلمين
على اساس ان باقى الناس مش يعرفوا الاسلام وهما بس اللى مسلمين
علشان كدا مديين نفسهم الحق يفتوا ويعجنوا ويلخبطوا فى اى حاجه
ربنا يرحمنا جميعا
تحياتى
‏قال Desert cat
blackcairorose
ماهو من المعروف والواضح يا روزة انهم مبدأهم السمع و الطاعه اما بعض الردود اللى بتقول الكلام ده كان زمان وكان فى وقت مختلف اعتقد انهم لازم يلقوا نظرة على المجتمع من حواليهم ويعرفوا تاريخهم الدموى الاسود اللى بدأ منذ نشاة مدرستهم وحتى الان
تحياتى يا جميله
‏قال Desert cat
enjy
الف حمد وشكر ليك يارب
وانا بجد نفسى حد فيهم يجى يقف قدامى ويقولى كلمتين من اللى فى التصريح ده وساعتها يبقى هو اللى جابه لنفسه
هههههههههههه
شرفتينى يا انجى
‏قال Desert cat
حطم القيود
وانا مش هكرر كلامى تانى واقول ان منهج البنا متغيرش وان جماعته بتتعامل بيه لحد النهارده لانهم لا يملكون سوى مبدأ السمع والطاعه

مرشحات وكتيييير مش المرشحات الكتير دول اللى هما يبقى جيهان الحلفاوى زوجة ابراهيم الزعفرانى ... واللى لما اتعرض الموضوع على مكتب الارشاد قابلوها بالاستنكار بل ان البعض قضوها تريقه ... وقالوا تترشح بس تكون عدت الخمسين وجده وعندها احفاد ليطمع الذى فى قلبه مرض .. ده على اساس انها داخله كازينو مش مجلس الشعب .. لاء وكمان فوق الخمسين وجده علشان لما تدخل المجلس بدل ما تساعد فى اتخاذ قرار لمصلحة الشعب تدور على دوا ضغط ولا سكر ..
...........
لعلم حضرتك انا مش بلزق الكلام ده فى الاخوان لان ده فعلا تصريح للبنا كونك مش مقتنع بالصحف اللى نشرت تصريحه فى الوقت ده هو بنفسه يا سيدى اللى ابطل حجتك واتهامك ليا ولغيرى اننا بنلزق كلام وراح منزله فى الكتاب بتاعه عن المرأة وهجوم حضرتك الغير مبرر بانى بلزق لهم كلام ده معناه ان حضرتك منضم لجماعه لا قريت ولا عرفت عنهم اى حاجه ... المصادر موجودة كتير جدا بخلاف التصريح اللى فى البوست اللى اتهمتنى انه كلام بلزقه ليهم راجع كتاب البنا ياريت قبل ما تلقى اتهامات باطلة تقرأ وتتعلم علشان ترد وانت عندك حجه قوية

ورجعت تانى تقولى افرض ان البنا قال .. هو حاجه من الاتنين يا قال يا اما ما قالش .. هو مش طفل صغير ده واحد صاحب قرار وانشئ مدرسة ليها فى فروع فى كل الدول ... وبعدين حاضر خلينى مع حضرتك هو مش نبى ولا هو ولا اتخن واحد فى جماعته هيوصل لمنزله الانبياء لانهم كدابين ومنافقين وقتالين قتلة وتاريخهم الاسود شاهد عليهم وده اللى كتير اوى من الناس عارفاه ومش عارفين عكس الكلام ده والمصار كتير جدا وموجوده للى عايز يفهم

اما بالنسبة لاختك اللى بتقول انها معندهاش رؤية وبيتكلموا من غير ما يتاكدوا فبما انى مش اختك ولا بصراحة عندى النية اكون من الاخوات ... فانا متفقه معاك جدا جدا فى الكلام ده ... لان اخواتك فعلا مبيعرفوش يشوفوا ابعد من تحت رجليهم وكمان مش من حقهم يتكلموا اصل الكلا م عيب وحرام وميصحش سيدهم الراجل بس هو اللى يتكلم

شرفت
‏قال Miso soup
هههههههههههههههههههههههههههههههه
http://bloggah.wordpress.com/2007/06/05/زنا-القرود-وإقامة-الحد-عليها/#commen
ده بقي جامدة جامدة
الا ايه بقي اللي انا نسيته؟ فكريني كده
‏قال Miso soup
ى عصر الخليفة المأمون كان الشاعر العتابى يسير فى شوارع بغداد، فدخل السوق وهو يأكل الطعام ،وكان ذلك يخالف المروءة أو" الاتيكيت"لدى ارباب الطبقة العليا،ولذلك احتج عليه صديقه قائلا "أتأكل الطعام فى السوق ويراك الناس؟" فقال له العتابى ساخرا:"وهل اولئك ناس؟انهم بقر" ، فاحتج صديق العتابى وزمجر،فقال له العتابى:"سأريك ان كانوا ناسا أم بقرا" ثم صعد الى الربوة ونادى فى الناس"ياقوم هلموا أحدثكم عن رسول الله(صلى الله عليه وسلم )،فتدافع اليه الناس واجتمعوا حوله،واقبل يحدثهم يقول:روى فلان عن فلان عن فلان ان رسول الله.(صلى الله عليه وسلم)قال.وظل يخرج من حديث الى أخر وقد تعلقت به العقول والقلوب والعيون،وسيطر على المستمعين ،اذا حرك يده يمينا تحركت رؤوسهم يمينا،واذا أومأ برأسه يسارا التفتوا يسارا ،الى أن قال لهم ...وروى غير واحد(اى أكثر من واحد)أنه صلى الله عليه وسلم قال :اذا بلغ لسان احدكم ارنبة انفه دخل الجنة))وسكت...فاذا بكل واحد من المستمعين يخرج لسانه يحاول ان يصل به الى ٍٍٍٍٍٍٍٍٍٍٍٍٍٍٍٍانفه،واصبح منظرهم جميعا مضحكا،فالتفت العتابى الى صديقه ساخرا وقال:ألم اقل لك انهم بقر؟

المشاركات الشائعة