حاولـــت تعمــل حاجــه ؟؟؟؟

حاولت تعمل حاجه ؟؟؟ كل واحد مننا ربنا خلق له عقل وقلب وكل واحد ليه احلام وطموح نفسه يتحقق ... كلنا عارفين ان وضع البلد مش حلو ومش كويس ولا يصلح والجو العام من حوالينا كلنا واحد ومفيهوش اى اختلاف ... لكن فى فعلاً اللى بيسعى لتحقيق حلمه او طموحه ومش بينكسر من أول مرة وبيحاول مرة والتانية .... وفى برضه اللى من اول مرة يعمل دقن ويعتزل الحياة باللى فيها ... بس ده مش الحل ... الحل انى احاول مرة والتانية والوقعة اللى متكسرنيش تقوينى وتزيدنى اصرار على اصرارى ده مش كلام شعارات والله انما الحل بسيط جدا وسهل وهو عامل الاستمرار وضمان النجاح وطبعا النجاح بيد الله وهو وحده الضامن ... لكن برضه ربنا قال فى الحديث القدسى " انا عند ظنى عبدى بى " .... احنا كلنا متفقين ان الحكومة خلاص مش هتعمل لنا حاجه وهما بنفسهم بيجيبوا لنا اعلان القطر والطالب الجامعى اللى القطر فاته لكن الصنايعيى كسيب واتجوز وبيحوش كمان يا بخته وربنا يزيده... ليه مش كل الناس تتحد مع بعضها ... بس بشرط يتوفر بينا الحب .. يتوفر بينا اننا فعلا عايزين نعمل حاجه ونساعد بعض وناخد بايدين بعض .. ومش نعمل فى بعض مقالب ... والحكومة كمان عليها عامل كبير يعنى مش يكون لسه مجموعة شباب بيبتدوا اول خطوة فى مستقبلهم وتحقيق طموحهم وتلاقيها تجبرهم على قفل المشروع من قبل ما يبدء ضرايب وتامينات ورسوم عدم النظافه وحوارات ملهاش اى وجود فى البلد اصلا كل الموضوع اننا بندفع فلوس على حاجات عبارة عن وهم ... انا مقولتش ما ياخدوش ضرايب بس ربنا اسمه الرحمن الرحيم ... وبكدا المجتمع كله هيستفاد من المنظومة كلها
تعالوانلقى نظرة سريعة على العالم من حوالينا ... هتلاقى فى جميع البلاد الاوربية وساعات العربية مش كلها علشان الناس الى عندها بترول مانتخين شوية ... بيشتغلوا وبيدرسوا فى وقت واحد من سن 16 سنة بيبتدى يعتمد على نفسه ... يعنى بيكون لسه فى ثانوية عامة ... لكن احنا عندنا هنا الشاب عنده 30 سنة ولسه قاعد فى بيت باباه وبياخد المصروف احيانا من ماما وده دافع كبير هيشتغل ليه ما فى مكان عايش فيه وفى حد بيديله مصروف .. انا مش بقول نسيب بيوت اهالينا ونروح نعيش فى الشارع ... احنا اصلا وضعنا ميسمحش ولا عندنا الثقافة اللى تؤهلنا لكدا ... بعض الناس لوخرجت الشارع مش بترجع البيت الا بمشاكل بيعاكس على الناصيه دى وبيمشى ورا واحده على الناصية التانية وقاعد على الانترنت فى الكافيه اللى على الناصيه التالته يعمل شات شوية ومنتديات شوية ومشكور يا غالى .. وتسلم ايدك موضوع جنان ... الف الف مبروك لمصر انها كسبت انسان زيك يا غالى قاعد يتفنن فى كتابه كلمة تسلم ايدك بانهى طريقة ... فريق تانى مقضيها طول النهار مسلسلات على افلام على قنوات الرياضة يالهوووى التى فى نفسه ذهق منه والود وده يصرخ ويقوله ارحمنى يا اخى ابوس ايدك اعتقنى لوجه الله شوية ... ولو يقدر يوصل لاقرب قسم هيروح يعمل فيه محضر ... خطف تى فى وتعذيبه ... وزى ما فى النماذج دى فى كمان نماذج جميلة جدا ومشرفه والواحد يفتخر بيها فاكرين احمد الشاب الجامعى اللى بيبيع جرايد ... فيه منه كتير جدا .. هو مش الحالة الفريدة ... احنا مش محتاجين اكتر من شوية امل وعزيمة وتعاون برضه علشان الناس اللى عندها هواية فى فرقعه البمب من تحت لتحت ونحاول نسعى لتحقيق طموحنا مش نتكسر من اول محاولة ... ومحتاجين كمان مساعدة المسؤلين ... خصوصا اللى بيحطموا امال الشباب ... وبكدا بلدنا بدل ما هى من سيئ لأسوء ... هتكون بينا احنا احلى ... وقبل ماالبلد هتستفيد احنا كمان هنستفيد
ها بقى .. حاولت تعمل حاجه ؟؟؟؟
****************************************************************
زميلتنا بسمة عبدالباسط توفى احد اقربائها
اسالكم جميعا الدعاء

تعليقات

‏قال secret-love
السلام عليكم
فعلا لازم الانسان يحاول ويتوكل على ربنا ويسلم امره لله مع العمل واليقين الدائم فى ربنا
تحياتى ليكى
‏قال Tamer Nabil Moussa
بو ست مميز

الناس لو حبت بعضها

وكل واحد حاول يساعد التانى وبكل اخلاص الحياة هيكون ليها شكل تانى

المشكلة ان مع الجو المقرف اللى احنا فى اللى بيوصل زى ما بنقول فوق مش بيبص لحد تحت ويحاول يساعد

لان الاغلبية ماشية بنظام نفسى وبس

تحياتى
‏قال Wael Salem
بوست جميل جداً
أولاً انا بدأت اشتغل في مصر من سن 17 سنه
كنت دايماً بحط قدام عيني هدف واسعي اني احققه والحمد لله ربنا كان يسرلي الحال لغاية لما اوصل لهدفي ... وبعد ما أوصل احط قدامي هدف تاني وهكذا
طبعاً موضوع الدول الأوربية ده موضوع تاني
اساساً من سن 18 سنه الشاب أو البنت ... يا يدفعوا في مصاريف البيت زيهم زي الأب والأم ... أو مع السلامه يا قلبي
you in your own
get out ... act like a man .. face the real world

احنا 18 سنه في مصر لسه بيتعامل معاملة البيبي ..


تحياتي
‏قال R-H-S
المنظومه كلها محتاجه تتغير
وعلي فكره في شغل كتير بس اللي يدور ويتعب هيلاقي

بس هنعمل ايه في الناس ولاد اللذينه اللي عاوزه توقف حالهم واللي بيفتح الدرج واللي عاوز وسطه

بس مفيش حد تعبه بيروح

محلوظه نونه:ياريت تكبري الخط شويه حرامي عليكي عيني بتشوف طشاش
ع الله اكون رديت علي موضوع تاني

تحياتي
‏قال شـمو نشـادر
ازيك يا جميل ..
بصى هو طبعا لازم الشباب ينزل ويدور ويشتغل ومييأسش ويأنتخ ..
انا معاكى ..
بس ده ميمنعش ان شبابنا برده يا عيني مظلوم و محبط و طلعان عينيه ..
و عموما انى ابقى قنوع واقبل اشتغل شغلانه مش شغلانتى ده مش معناه انى افرط فى حقوقى ..
بوست جميل ..
تحياتى ..
أسامة أمين
‏قال محمد فوزي
هي دي حالة المعارضه الحقيقيه
أحييكي
لما نقول ان احنا بنعارض الفساد
يبقى لازم نكون احنا حماه للشرف
لما نقول اننا ضد الحلول التقليديه
يبقى لازم نبقى منبع للأفكاب الجميله المتجدده
انما عجيب أمر المعارض اللي بيشبه
اللي بيعارضه في كل حاجه

بوست جميل

ممكن أهمس لك همسه
انتي شخصيه قويه وبتكتبي كويس
وعندك فكر , فبلاش تضيعي وقتك
ومجهودك في الدخول في صراعات

اشكرك وتحياتي
‏قال DantY ElMasrY
عارفة يا قطة :
التكوين الأسرى لمجتمعنا هو العائق قدامنا فى ان الحماس يطللع بشكل ايجابى
يعنى مثلا لما يبقى فى طفل موهوب فى حاجة
ابوه وامه بيفضلوا شايفين انه بيضيع وقته فى حاجة مالهاش لازمة
وامه تقعد تقوله التفت لدروسك وسيبك من الكلام الفارغ
رغم ان امه بتبقى اكتر
واحدة فرحانة لما ياخد جايزة فى الرسم مثلا
‏قال wanna b a physician
بصى فى ناس بتحاول بس ساعات الظروف بتبقى مش مساعداهم بس المهم هو عدم اليأس اما الناس اللى مش عايزه تحاول دى تستاهل اللى يجرالها
بس جامدة حته بيتفنن يكتب تسلم ايدك يا غالى
منتديات كلها تعبانه والله وشغل فاضى
‏قال بنوته مصرية
فعلا والله كلامك صح

الفرق كمان اني الشاب هنا في مصر يتكسف يشتغل اي شغلانه
رغم انه بيحلم انه يسافر برا وهناك بيكنسو الشوارع وبيغسلو الاطباق

يبق ايه الفرق تتهان في بلدك ولا تتهان في بلد غريبة

انا اقصد اني الشاب مش شرط يشتغل بشهادته لانه بكدا مش هيشتغل خالص وهيفضل علي القهاوي والنت كافية

كلامك كلة مظبوط فعلا

لكي تحياتي
‏قال غير معرف…
قطتنا العسل صباحك سكر انشاء الله

شوفي ياجميل اللي بتقوليه كله سليم
الحكومه لو اعتمدنا عليها يبقي اعتمدنا علي حيطه مايله
زي ماقلتي في الغرب بيعلموا الاعتماد علي النفس يعني تلاقي الولد او البنت و هما لسه في المدرسه بيشتغلوا و برضه بيرحوا المدرسه او الجامعه
للأسف احنا ماتعودناش علي كده بنستني لحد مانتخرج و بعد كده نبتدي ندور علي شغل

عارفه بنت خالي عايشه في امريكا و اتولدت هناك كنا بنتكلم لما نزلت اجازه عن العيشه هناك و كده يعني سألتني عن الكوافير اللي بروحله و بيعمل بكام الهاي لايت و انا كمان سألتها عن اللي عندها فقالتلي انه بيعمله عندها بحوالي 90 دولار فقلتلها طب حلو و بتروحي قالتلي لأ بحاول اعمله في البيت عشان اوفر ال90 دولار دول لحاجه اهم زي اننا ادفع مثلا فاتوره الكهربا
يعني عارفه نطلع من كده ان هناك بيعودوا الطلبه انهم يستغنوا عن حاجات بتعتبر كماليات
هي علي فكره عايشه في شقه مع واحده زميلتها قرب الجامعه بتاعتها و بتعتمد علي نفسها في دفع مصاريفها عشان بتشتغل
عارفه لو كل واحد مننا خد باله من مصاريفه و فلوسه بتروح فين و حاولنا نعمل حاجه ايجابيه لحياتنا الجايه صدقيني الوضع حيتغير للأحسن بس نعمل بجد مش نتكلم و بس

تحياتي علي موضوعك المميز و بخصوص المدونه بسمه من فضلك وصليلها عزائي و ربنا يجعله اخر الاحزان و بشكرك ياقطه علي اللفته الطيبه دي ربنا يجعله في ميزان حسناتك انشاء الله ياجميل

تحياتي و احترامي ليكي ياقمرايه
‏قال واحد مصرى
اللي عايز يشتغل بيشتغل...اذكر نماذج كثيرة صادفتها البعض منهم كانوا من الاصدقاء المقربين..بعضهم كان من الطبقات المكافحة و البعض من الطبقات المتوسطة..و البعض كانوا اولاد رجال أعمال ...و القاسم المشترك بينهم انهم كانوا يعملون و هم في سن صغيرة.. البعض منهم بدأ العمل في سن الرابعة عشر او مايزيد قليلا..منهم من عمل في مطاعم لاعالة اسرته (شخصية حقيقي اعرفها و هو الان من اكبر مصنعي الاجهزة الرياضية في الشرق الاوسط) و منهم من عمل في اعمال اسرته(شخصية حقيقية ايضا من اصحاب توكيلات و مصانع السيارات)...أقصد أقول ان الحاجة المادية على الرغم من انها دافع قوي للعمل الا انها ليست الدافع الوحيد...المهم ان لابد من ان يدرك الجميع ان الشغل مش عيب...انا التقيت بشباب كتير في دول مختلفة اثناء اقامتي في اوربا لبعض من الوقت... شوفيهم في الصيف... حاجة تفرح... في اوائل التسعينيات في ميونيخ تحديدا التقيت بشابة جميلة قلبا و قالبا كانت جارتي في السكن و كانت تعمل في المقاهي و الحدائق المفتوحة في الصيف.. منتهى الهمة و النشاط اتناشر ساعة عمل يوميا.. طالبة في كلية الطب و حاليا جراحة عظام رائعة...الاحساس بقيمة العمل فضيلة أرجو ان ارسخها في عقل و ضمير ابنتي لتقوم هي الاخري بنفس الشيء مع اولادها و هكذا

دمت بخير يا صديقي العزيزة.. و الله فكرتيني يذكريات و اماكن و اشخاص جميلة
بوست جميل كعادتك من ساعه مادخلنا المدونة شايفين مشاء الله موضوعاتك رائعه وهادفة وسعداء اننا نكون 3 تعليق معلش ملحقناش اول تعليق تتعوض المرة اللي جاية باذن الله
لو كل واحد حاول فعلا يعمل حاجة ويبطل الياس اللي بقي مسيطر علي 3/4 الشباب واللي مخليهم عايزن يهجوا من البلد باي طريقة حتي لو تطلب الامر الي الخروج بطرق غير شرعية كان اكيد الوضع هيتغير وللاسف النفس البشرية امارة بالسوء يعني ممكن واحد يشوف صحبه مثلا اخد ارض زراعية ويحب يستصلحها والحال مشي معاه تلاقيه بيحاربه بكل الطرق
كلنا علينا دور وكلنا لازم نعمل حاجة مش نقف مكتوفي الايدي نقول احنا مالنا هي خربانه خربانه

زي مانتي قولتي لابد ان نحسن الظن بالله انه لن يضيع اجر من احسن عملا الشباب الجامعي اللي واقف في طابور البطالة بكرة ربنا هيفرجها عليه ويلاقي شغل بس هو يدور ومش يستني الشغل يجيله لحد عنده ناس كتير تقول انا مينفعش اشتغل الا بمؤهلي هو دا سبب البطالة بين شباب الجامعات علشان كدا تلاقي الحرفيين هم اللي بيتشغلوا

ناسف علي الاطالة بس موضوعك جميل جدا
تقبلي مرورنا
تحياتنا
‏قال أنا حر
حاولت اعمل حاجة بس للاسف المناخ اللي حوالينا اللي ملنشا دخل فيه بيهدم كل المحاولات

تحياتي
‏قال الربان
تحياتي

فعلا صدقت اختي الفاضلة....نحن لا نحاول..
وان حاولنا لا نستمر...نتحطم علي اول حجر عثرة نتعثر به....

العزيمة و الهمة و الارادة...يجب ان تكون سلاح كل منا في مواجهة حياة تتلاطم
كامواج بحر عاتي....

نحن نسلك الطريق الاسهل و الايسر...وهو
ندب الحظ...و تحميل معظم اخطائنا عليه
و علي الاخرين....

اشكرك علي الموضوع لانه محاولة لكي نتنبه و نشحذ الهمم...دعوة للعمل و
الصمود...


تحياتي و تقديري
‏قال Abo 7anf
السلام عليكم
هندك حق
المشكله مش البلد بس
احنا بردوا بنتكاسل
والمشكله التانيه ان التعليم المهنى مش موجود
مهو لو عندنا تعليم كويس كان زمان العمال ليهم حقوق
والنا مش بتتخانق على الكليات
وهى عارفه ان مفيش شغل

والنظره المتخلفه ببتاعه المجتمع للعمال
زى ميكون سواف التاكسى او عامل البنزينه بيسرق وبيعمل حاجه عيب
وان بنتى متجوزش غير مش عارف ايه
وتفضل فى حضن امها
‏قال الميكروباص
لفت نظري في موضوعك حكاية أن الواحد يطلع وهو عنده 16 سنه
دي كانت نصيحة الطبيب النفسي اللي صديقي تعالج عنده من سنوات وله قصه صغيره سأحكي لك عنها
....
ذهب صديقي للسعوديه لكي يعمل براتب كبير، لم يستطيع أن يبتعد عن بيت أهله، وكانت النتيجة أنه جاء له اكتئاب شديد جدا نتج عنه انه كان بيشوف حاجات مش موجوده ويتخيل امه واقفه امامه ويتحدث معها ويكلمها طول الليل إلى ان ذهب لطبيب مصري نفسي هناك وعالجه وقال له االحل الوحيد هو ان تنزل مصر لأن حالتك متأخره، بالفعل نزل مصر وأكمل العلاج وأصبح زي الفل ولكنه لم يستطيع أن يذهب مره أخرى وهذا كله بسبب ارتباطه بالبيت ارتباط شديد جدا، وعلى فكره بيتعالج إلى الآن نفسيا على فترات
ايه رأيك؟
‏قال Unknown
كل الى اقدر اقولة
ان الله لا يغير ما بقوم حتى يغيروا ما بانفسهم
يمكن لو حاولنا نغير نفسنا ونعمل حاجة فى اى حاجة ان شاء الله ربنا يساعدنا ويقف معانا
‏قال محمد صالح
والله يا نونو فى مصر بلد بيروقراطى بالمعنى والحرف يعنى لازم يطبقوم النظام بالحرف مفيش اى رؤيه مستقبليه للبلد كل رئيس وزراء بيجى بيطبق نظام اللى قبله ومفيش اى حد بيجدد حاجه وانا معاكى فى كل كلمه قولتيها وفى احلام كبيره وحلوة اوى لشباب كتير فى مصر وفى مجالات لسه مش منتشره اوى فى مصر وعلى النت وفى الاعمال الهندسيه والتجاريه وخلافه ببساطه مصر تمتلك عقول فذه ولكن بتتاخر ليه من الاحباط اللى شايفه من اوضاع اقتصاديه والكل عنده حالة احتقان ومش من السهل انك تشيل هذه الحاله ولكن حاول ان تخفف منها ويارب نحاول ان احنا نشوف مصلحة البلد دى فين فعلا من قلبنا لان لو معملناش كدا يبقى نقول على نفسنا يا رحمن يا رحيم
اولا وبدون مقدمات احب ابدى اعجابى الشديد بالبوست الجميل ده
بجد الكلام اثر فيا اوى

واحنا فعلا اوقات كتير بنرمى كل همومنا على شماعة البلد والحياه والضغوط الى حولينا

بس نسينا ان ربنا مش بيعطى غير للأنسان المجتهد

يارب كلامك الناس تعمل بيه ونحاول ولو مره نعتمد على نفسنا ونتوكل على الله

تحياتى

رئيس جمهورية اسوان العربية

وياريت تشرف مدونتى المتواضعة
‏قال MIND TO THINK
قطة الصحراء
تحياتى
يمكن الآن سماع حلقة برنامجنا الأذاعى عن مدونتك بالدخول الى موقعنا والضغط على عنوان رسالة قطه فى بوكس جديد اضفناه للأرشيف اى الحلقات السابقه
CAT MESSAGE
مكتوب العنوان فى البوكس كده وهو تحت صورة اسرة البرنامج الى اليسار
ونفس الشىء ممكن من مدونتنا ونحب نسمع آراء الجميع فى هذا التجديد
العناوين هى
الموقع
http://dear.to/cairo
المدونه
http://netonradio.blogspot.com
وتحيه خاصه حاره لصاحبة هذه المدونه
اسرة برنامج انت تسال والكمبيوتر يجيب
‏قال Zika
احم احم
والله الموضوع ده انا بقالي تقريبا شهرين في مشاكل بسببه لان فيه صديق ( مش صديق صديق يعني) واحد اعرفه تقريبا نسبة اللامبالاه في جسمه عدت ال80%
وده مش موجود فيه هو بس لا ده واضح انه موجود في شباب كتير اوي ..
لكن بارضه زي مانتي قولتي ده مايمنعش ان فيه نماذج كويسه
بس مش باينه في لان الحسنه تخص والسيئه تعم
.........
انا حاولت اعمل حاجه اه
انا اشتغلت بعد الثانويه العامه يعني من سنتين
والحمد لله خرجت بره اللامبالاه دي من ساعتها
بصراحه البني ادم من غير الشغل بحس انه مالوش لازمه
الشغل ده له قيمه كبيره في حياتنا ماديه اه مفيش اختلاف
بس اكيد معنويا اكتر
بوست رائع
تحياتي
‏قال tamer.sala7
لو حد حاول يعمل اي حاجة حيلاقي مليون واحد واقفين ضده واولهم الحكومة بتاعتنا غير ان البلد بتاعتنا اثلا مفيهاش شغل للمتخرجين يبقي اللي لسى بيدرس حيعرف يشتغل

انا مش بكسر روحكم المعنوية بس ده عن تجربة
‏قال Desert cat
secret-love
طبعا من توكل على الله فهو حسبه
شرفتنى جدا
‏قال Desert cat
Tamer Nabil
ده مش الاغلبية يا تامر ده تقريبا الجميع هو اللى ماشى بنظام نفسى نفسى حتى اللى بيبان انه طيب
فى النهاية بتكتشف انه العكس تماما
تحياتى
‏قال Desert cat
mohager
انت كنت بتعمل الصح يا مهاجر
المفروض ان كل واحد فعلا يحدد لنفسه هدف معين ويسعى لتحقيقه
فى موضوع 18 سنة ده احنا بقى مش زى اوربا فى الحاجات الصح انا زيهم واسخم فى الغلط
تحياتى
‏قال Desert cat
GeHaD
ماهو احنا محتاجين نتكاتف علشان نقضى على اللى بيفتح الدرج
واللى بيوقف مصالح الناس
ولازم الجميع يبتدى يتغير من جواه
ان الله لا يغير ما بقوم حتى يغيروا ما بانفسهم
تحياتى
‏قال Desert cat
شـمو نشـادر
ماهو انا يا اسامه مقولتش اننا مش متبهدلين بس بقول اننا مش نيأس والمفروض كمان المسؤلين يساعدوا الشباب كل واحد همه ابته وعايزه يقعد مكانه وكان باقى الشباب عاله عليهم
شرفتنى جدا يا اسامه
تحياتى
‏قال Desert cat
محمد فوزي
اولا الف اهلا وسهلا بحضرتك فى البلوج نورتنى
ثانيا احنا محتاجين نعرف ايه حقوقنا بالظبط علشان نبتدى نطالب بيها مش يبقى بعارض لمجرد المعارضه وخلاص ولما حد يسالنى طلباتك ايه اقوله ادينى بعارض
ميرسى جدا على الهمسة الطيبة
تحياتى لحضرتك
‏قال Desert cat
DantY ElMasrY
يا هلا يا اهلا نورتنى وشرفتنى جدا
التكوين الاسرى ده مشكله تانية
يعنى بدل ما يشعوا اولادهم على تنمية مواهبهم بيكبتوهم علشان كدا تلاقى الواحد يبقى طول بعرض ويخاف يعمل حاجه احسن ماما تغضب عليه وميعرفش ياخد قر ار الا لما يرجع لها
ودى مشكلة فعلا وحلها عند كل اب وام
تحياتى
‏قال Desert cat
wanna b a physician
ماهو ده اللى انا اقصده يا دكتور عدم اليأس
مش من اول مرة اقرر انى اعتزل الدنيا واقضيها لعب وتهريج او العكس تماما
تحياتى
‏قال Desert cat
بنوته مصرية
احلى ام نور
تعرفى لو كل واحد عمل نص المجهود اللى بيعمله فى بلد بيسافر فيها هنبقى احسن من اى بلد تانية والله
هناك بيصحو من النوم الفجر ويشتغل 12 ساعه ويشتغل فى اى مكان
هنا ان مش كان يقعد على مكتب مينفعش
وكمان نظرة الدونية لاى صاحب شغل متواضع
تحياتى يا جميله وبوسه كبيرة اوى لنور
تحياتى
‏قال Desert cat
اجندا حمرا
حبيبة قلبى الجميلة اجندة
الحكومة نفسها اخلت مسؤليتها
وقالت لنا اتصرفوا احنا مش مشغلين حد بس مطلوب منهم مش يحبطونا ويسيبوان بقى نتصرف
طبعا فى الغرب يا قلبى احنا بنقلدهم فى الحاجات الوحشه وبتكون بصورة اوحش بكتير انما الحلو سايبينه ليهم هما
تحياتى يا احلى اجندة فى الدنيا
‏قال غير معرف…
يانونو يانونو
حلوه و كميله اوي الصوره الجديده اللي في بروفايلك ياقطه
برافوا عليكي
:))
‏قال Desert cat
اجندا حمرا
اهم حاجه انها نالت اعجابك يا قلبى
ربنا يخليكى ليا
‏قال Desert cat
واحد مصرى
صديقى العزيز ايهاب

فعلا الاحساس بقيمة العمل اجه عظيمة
انا طول عمرى بقول تعب الشغل اهون واحسن الف مرة من تعب قلة الشغل
احنا ياريتنا بنقلد الغرب فى الحاجه الكويسة واللى فيها نفع لينا
مودتى واحترامى
‏قال Desert cat
بنات صاحبة الجلالة
تانى تعليق ولا تالت المهم انكو نورتوني وشرفتوا البلوج جدا
فعلا زى ما ذكرتى البعض عندنا يتسم بالحقد الالى تلاقيه لما يشوف صاحبه او جاره او قريبه حتى ناجح وبقى كويس فى شغله تلاقيه بيعمل المستحيل علشان يهدمه وبدل ما يقلده او يعمل هو حاجه نافعه بيتفنن فى ايذائه لفشل هدفه ربنا يرحمنا من العقول والقلوب اللى بالشكل ده
تحياتى وشرفتوا البلوج
‏قال Desert cat
أنا حر
والله انا عارفه يا احمد ومجربه كل الحاجات دى بس انا بقول نحاول وما نقتلش طموحنا جوانا علشان حد فى قلبه مرض
نعتمد على الله ونحاول مرة والتانية وان شاء الله ربنا موجود وهيساعدنا
حمدالله على سلامتك
وشرفتنى جدا
‏قال Desert cat
الربان
استاذى العزيز انا اللى بشكر حضرتك جدا على التعليق الذى اثرى البوست قيمة وجمالا
دمت بكل خير
احترامى وتقديرى
‏قال Desert cat
Abo 7anf
صح يا ابو حنف
انت نظرتك صحيحة 100%
المهم اننا نقدر نتقبل الاخر
احنا اصلا مش عارفين نقبل انفسنا
عندنا النظرة الدونية للعامل
و الى بيفرسنى اكتر ان فى ناس ممكن تكون عارفه اللى قامها حرامى او مرتشى وتفضل تقوله يا بيه وياباشا فى مقابل انه معاه فلوس انما العامل الشريف بنظر له على انه واحد من كوكب تانى
تحياتى
‏قال Desert cat
لورنس العرب
اهم حاجه ان صديقك رجع لحضن ماما تانى علشان ميتخيلهاش وحالتة النفسية مستقرة والحمد لله
طيب مش مهم الشغل بقى ومش مهم الحياة ومش مهم المستقبل المهم ماما
فى اول سنة ليا فى المدينة الجامعية جت بنت من وجه قبلى واول ما دخلت فضلت تبص فى وشنا واحدة واحدة من غير ما تنطق بكلمة المهم كعادتان لما بتيجى اى بنت جديدة بنسلم وبنتعرف على بعض وهى اول ما نطقت قالت انتوا عارفين تعيشوا ازاى بعيد حضن اهاليكو انا عايزه اورح وفضلت قاعده طول الليل تعيط وتانى يوم اخدت شنطتها وروحت ...
للاسف النماذج دى موجودة برضه
محتاجين ان كل اسرة تدى فرصه لاودها يتحملوا ولو جزء من مسؤلية نفسهم
تحياتى لورانس
شرفتنى جدا
‏قال Desert cat
ايوية
بالظبط يا يويو احنا محتاجين نتغير من جوانا الاول علشان نعرف نغير من حوالينا
شرفتينى يا جميله
‏قال Desert cat
محمد صالح
والله يا محمد هما بيطبقوا النظام بالحرف على الناس اللى عايزه تجتهد وتعيش وتاكل لقمة عيش حلال
اما الحرامية الكبار دول الطريق متيسر ليهم
مش هقول اكتر من اللى ايوية قالته
ان الله لا يغير ما بقوم حتى يغيروا ما بانفسهم
مطلوب مننا نحاول برضه مرة والتانية
وربنا يهدى الجميع للخير
تحياتى
‏قال Desert cat
عمرو النوبى
اولا الف اهلا وسهلا بيك وميرسى جدا على زوقك
ثانيا السعى برضه مننا مطلوب
ان الله يهب لكل طائر رزقه ولكن لا يلقيه له فى العش
نورتينى وشرفت البلوج ياريس
‏قال Desert cat
sal
انا بشكر حضرتك واسرة البرنامج جدا ويارب دايما فى تقدم ونجاح
شكر وتحية خاصة لحضرتك استاذ صلاح
احترامى وتقديرى
‏قال Desert cat
Zika
طيب يا سيادة المخرج صديقك حاولت توجهه مرة والتانية وهو خلاص اتعود على اللامبالاة
هتعمل له ايه
لازم يفوق ويعرف ان اللامبالاة حتهدميه مش حتفيده
وانت ربنا يوفقك ويزيدك نجاح والله انا بفرح جدا لما بشوف شاب بيشتغل وعايز يعمل حاجه بجد
ربنا معاك يا زيكا ويوفقك
تحياتى يا سيادة المخرج
‏قال Desert cat
tamer.sala7
طيب والحل يا تامر فى الناس اللى وقافه ضدنا على طول دى
ماهو لازم يكون فى حل علشان نعرف نحقق طموحنا
يبقى هو الاصرار
مش هما دول اللى هيكسرونا ولو حد حاول يعمل حاجه تاذينا فى قوانين فى البلد
محتاجين شوية اصرار والله وربنا دايما مع المجتهد
تحياتى ياباشا
‏قال PrInCeSS BeRy
حلو اوى البوست دة بجد وفعال جدا ولية رسالة واضحة وبجد انتى مميزة
‏قال Desert cat
PrInCeSS BeRy
ميرسى اوى يا برنسيس على زوقك
شرفتينى

المشاركات الشائعة