سياســـة القهر

كلنا متفقين إن المجتمع كله عايش فى قهر بسبب الجمايل التى لا تعد ولا تحصى من حكومتنا الرشيدة واللى كل يوم تغرقنا بيها فى صور مختلفه

لكن لما يبقى القهر مننا لبعض .... لما نكون عايشين فى مجتمع واحد واللى بيحصلى هو نفسه اللى بيحصلك ..... يبقى كدا محدش يستغرب من حالة الحقد والكره اللى غزت المجتمع من حوالينا ... حاضر هقولكوا انا بقول الكلام ده ليه

الصبح توجهت لإحدى المصالح الحكومية أخلص أوراق خاصة بالسيد الوالد .... طبعا الأوراق دى المفروض هو اللى يخلصها بنفسه ... لكن لاسباب صحية مينفعش وبما إن انا الوحيدة اللى قاعده له فى البيت فانا الوحيدة برضه اللى معايا توكيل بالتصرف فى الاوراق محدش يفهم غلط ... اوراق بس .... وبناء على هذا التوكيل قمت بالذهاب الى المكان المنشود وهنا تفضل الموظف المختص وسألنى على بطاقتى ... اتفضل ... مسك البطاقة وفضل يبص فيها ... انا شكيت ان البطاقة مزورة بصراحة ... وبعد ما ظنونى قعدت تودى وتجيب ... لاقيته بيقولى يعنى ايه مساحة جوية ... قولت له ده تخصصى يا فندم ... راح قالى وبتشتغلى فين بتخصصك ده .. قولت له فى حالة لو هشتغل بتخصصى ده يبقى اولى بيا موطنى الاصلى وهو الهيئة العامة المصرية للمساحة ... راح قالى يعنى انا دلوقتى اكتب مهنتك ايه فى الورق اللى قدامى ده ... قولت له اكتب اللى قدامك فى البطاقة ... يعنى انتى بتشتغلى كدا فعلا ... هو مكتوب فى الورق بشتغل ولا حاصله ؟؟؟ ... امال بتشتغلى ايه ... انا صاحبة كوفى نت .. راح راكن الورق فى جنب وابتسم ابتسامة عريضة ..... خير يا فندم فى حاجه ؟؟؟ لاء .. بس ايه علاقة دة باللى مكتوب فى البطاقة مش بتشتغلى فى تخصصك ليه ... بطر بعيد عنك .... هو فى حد فى البلد دى بيشتغل فى تخصصه ... عمرك ما شوفت خريج تجارة بيشتغل مهندس ولا خريج هندسة بيشتغل مندوب ... اه على رايك ... فى الوقت ده دخل واحد ولسه الراجل بيقوله صباح الخير ... لاقيت الموظف اللى كان قاعد منشكح وضحكته من الودن للودن قلب على شكل ديناصور ويقوله انا مش قولت لك لما ورقك يجى هبقى ابعتلك ... انت ايه اللى جابك اتفضل من هنا ... الراجل بمنتهى الاستكانة حقك على راسى من فوق يابنى ولف بضهره ورجع .... مهما وصفت مستحيل اقدر اعبر عن حالة الذل والانكسار اللى الراجل خرج بيها ... وبعد ماخرج قعد يكلم نفسه ويقول الواحد هيلاقيها منين ولا منين ... كل شوية دوشة وورقى جه من الوزارة ومجاش ... قولت له اللى انا اعرفه ان الشخص المضغوط هو اللى بيتعامل مع الناس بالطريقة دى بعنى مثلا عنده زحمة شغل وكل واحد بيساله من ناحية وهو مش ملاحق على طلباتهم يعنى عنده ضغط شغل مع ان برضه مش مبرر انه يعامل الناس كانهم جايين يشحتوا منه مش جايين مصلحة حكومية المفروض انها محترمة .... قالى وانتى ايه عرفك انتى شايفه الاوراق دى كلها مطلوب تخلص النهارده ... وراح واخد بطاقتى والتوكيل وقالى انتظرينى دقيقتين وجاى ... وانا قاعده مؤشرات عقلى كلها عمال تعمل حوادث مع بعضها .... هو مش المفروض ان ده المكان المخصص لخدمة المواطنين ... والمفروض انه له حق عندهم .. حتى لو توقيع على ورقه اسمه حقه لان الموظف ده قاعد هنا لخدمته وخدمة غيره .... هو بياخد مرتب من جيب الشعب كله ... مش علشان يخلص لهم خدماتهم ولا علشان يطلع عليهم حالة الحقد والكره اللى اتولدت عند الغالبية بسبب الاحساس بالخيبة والعجز من تغير واقع مستبد او نابعه من التربية نفسها كاحساسه بالدونية او نسب وضيع او تحصيل علمى دون المستوى ايا كان بقى الشخص سواء كان موظف او حتى مدير مراجيح مولد النبى ... بتتولد جواه حالة من الحقد والكره تخليه يمارس سياسة القهر على اى حد لأنه دايما حاسس ان الشخص اللى قدامه احسن منه ... واثناء وانا قاعده اصلح الحوادث اللى حصلت من رد الفعل اللى حصل قدامى دخل الموظف ولاقيته بيقولى وقعى هنا ... خلصت الاوراق وخلاص همشى لاقيته بيقولى مش قولت لى مش بتشتغلى فى مجالك ليه ... قلت له لما الاقى نظرية " انطونينى اتمحت من المجتمع ... قالى نعم مين ده ... قولت له ابدا ده واحد كنت قريت له مقولة جميله جدا زمان بيقول فيها
" يوجد في كل الحالات تقريباً جهداً لطرد العدوانية إلى خارج الذات بغرض نفيها والتعامي عنها وعدم بقاءها في الذات. فاكتشاف الحقد الكامن فى ذات الشخص يسبب حالة من القلق والبحث عن الشر عند الآخرين كمحاولة لنفي الشر عنه "

لاقيته بيقولى يعنى ايه

قولت له من فضلك البطاقة