مداخـــــلات

على فكرة انتى لغز كبير أوى ... عندك قوة وجبروت واستبداد غير عاديين وعندية بس بالرغم من كل ده لذيذه

هههه اه لذيذه بالمكسرات ... بس ايه المدح الشبيه بالذم ده

انتى ليه كدا ... ليه فيكى كم الاختلافات دى كلها عن جنس حواء

لاء انا مش مختلفة عن حواء انا حواء وحواء انا ... انا بس بكره صورة امينة الست الضعيفة المغلوبة على أمرها ... بكره اوى الست اللى قررت برغبتها ان الرجل يتعامل معها على انها جسد من غير ان ترهقه فى الدخول الى اعماقها ... قررت بنفسها تدوس على مشاعرها فى مقابل الاستقرار بالرغم من ان مفيش اساسا حاجه اسمها استقرار بدون حب ..... اكره جدا الست اللى تسمح لنفسها انها تنام داخل عقل رجل يتعامل معها مثل صابون الحلاقة ... فيستخدمه متى يشاء ويزيله كيف يشاء ....

على فكرة بقى ... انتى قوية ومفترية

لاء خالص انا قولت لك قبل كدا انى انسانة عادية

بس محبش المرأة اللى تلقى بنفسها للتهلكة تحت مسمى نظرة المجتمع ... من اختارت الحياة كما يريدها الرجل بحجة انها انثى لا تستطيع المقاومة .... من تمارس متعة الظلم حتى ادمنتها ... فتجدها فى كل احاديثها انا مظلومة انا مضطهدة حتى وان كنت تتعرف عليها لاول مرة ...

بس مينفعش نتناسى المجتمع لاننا شرقيين

انا مقولتش نتناسى المجتمع لاننا عايشين فيه مش شرقيين وبس .. لكن الناس متفرضش عليا حياتى .. من حقى احقق احلامى وطموحاتى فالحلم والطموح ليس مقصور على الرجل ... ولا يوجد شئ اسمه نجاح رجل ونصف نجاح انثى .. قرار رجل ونصف قرار انثى ... لمعان رجل ونصف لمعان انثى ..... اثبات الذات مفيهوش حاجه اسمها راجل وانثى

بس مينفعش حياة الست تختزل فى الشغل والطموح وتحقيق الأحلام

وانا مقولتش انها تختزل حياتها لازم يكون فى توازن لانها برضه ليها مشاعرها اللى مينفعش تتجاهلها فالموضوع هنا نسبة وتناسب .... لكن انا اللى يهمنى الخروج من افلام الابيض واسود ... يهمنى اوى المونتاج ومقص الرقيب لحذف مشاهد هترجعنا لورا آلاف السنين بالرغم من اننا فى القرن الواحد والعشرين ... لكن مازالت هناك اصناف متعددة فمنهم من تقدر على موازنة حياتها وهذه اتمنى لها كل التوفيق .. وتوجد ايضا من لا تصلح الا للمتعة والانجاب ومسح الحمام ودى اسخم واضل سبيل من اكياس الزبالة السودة المتحركة اذن هنا لابد من المونتاج ومقص الرقيب

على فكرة انتى عليكى تشبيهات تودى الى ما وراء البحار

اه سمعت الكلمة دى قبل كدا ... بس رأى وانا حره فيه

تعليقات

على فكرة انتى لغز كبير أوى
..........

انتى فعلا لغز كبير اوى
:D

فكرة ذكية منك
انك توضحى وجهة نظرك فى الحياه


بس مين اللى عمل معاكى الريبورتاج ده؟؟

تحياتى وحبى
لاجمل قطة صحرا
‏قال اسامة يس
في الخلفية هو تسلط عام ممسك بتلابيب الطرفين الرجل والأنثى...
وقهر عام محيط ومسيطر على المجتمع بأسرة...
ثم قهر او لنقل احلال وتبديل (كحيلة دفاعية) من قبل الرجل ليخرج مكبوته وانفعالاته ويصب غضبه وقهره وذله العام على الانثى كطرف اضعف ولو بصورة جسديه بحته....
ان المجتمعات التي تحررت من قيود الاستبداد اصبح للأثى فيها شكل آخر ...

قد اكون شطحت بعيدا جدا عن مرادك ولكن في النهاية طموح هذه الانثى لن يتحقق بدون معالجة القهر العام....


دمت بكل ود...
خالص تحياتي
لا لا لا انتى جامدة اوى وفكرك ممتاز
المجتمع ينظر للمراة نظره دونية ومنتهى الاحتقار وارى نساء يخضعن بالقول والفعل والامثلة امامى لعلها تحصل على العريس المنتظر اللى هو ظل الحيطة اللى بدور علية بطريقة مبتذلة
الرجل بحجة انها انثى لا تستطيع المقاومة .... من تمارس
جملة جامدة اوى تحياتى لكى عليها
‏قال Unknown
قررت بنفسها تدوس على مشاعرها فى مقابل الاستقرار بالرغم من ان مفيش اساسا حاجه اسمها استقرار بدون حب


انا قفشت الكلمة دى


تدوس على مشاعرها

كلمة خاطئة

مقابل الاستقرار

الاستقرار والتقلب

حالتين فى تبادل مستمر

مش عارف بقى

انا عاوز اقولك ان مش كل حاجة لها قانون
‏قال غير معرف…
قطتنا الجميله

عارفه فكرتني المداخالات دي بنظام التاج اللي شغال موضه اليومين دول بس ردودك جميله ياقطه
فعلا الست مش مجرد جسد اتخلق عشان المتعه و بس

علي الرغم من ان فيه ستات كل همها في الحياه ده و بس لكن مش ده موضوعنا

الست لما بتقدر توازن بين مشاعرها و مستقبلها بيكون شئ جميل
المجتمع دايما واخد فكره عن البنت اللي بتاخد حقها انها قليله الربايه وواجبنا اننا نغير الفكره دي لأننا بقينا في مجتمع مابيرحمش و الناس كده كده حتتكلم و طالما احنا مقتنعين باللي بنعمله يبقي مايهمناش حاجه تانيه

تحياتي علي ردودك اللي ان دلت فبتدل علي شخصيه بنت جدعه
و مثقفه

تحياتي ليكي ياقطتنا الجميله
‏قال وجهة نظري
إيه يعني، عاملالي حوار مع القطه المشمشيه؟؟ لا يا هانم انا مينفعنيش
الكلام دا خالص

بس حلوه حكاية صابون الحلاقه دي
‏قال R-H-S
ديالوج دا ولا ايه ؟؟
بس افكار فزيعه
انتي طلعتي قطه متوحشه
‏قال Mafrousa
ده على اساس انك واقفه قدام المرايا و بتكلمى نفسك يا قطقوطه و لا ايه
...............
بس تصدقى فكره لطيفه و نميسه ومقطقطه
‏قال tamer.sala7
عندي احساس ان ده موقف شخصي .... اعترفي أنهي قط اللي عمل فيكي كدة
:p
‏قال Desert cat
كاميليا
ده ريبورتاج يا كامى عبر الهاتف كان تقريبا قبل الفجر بلحظات
علشان كدا تحسى ان انا ومحمد مهيسين على بعض .. تعرفى اننا كنا متخاصمين وانا وهو بنتكلم طول الوقت ده وفى النهاية افتكرت اننا متخاصمين ولما سالته حد بيصالح حد بالطريقة دى قالى هو لازم كدا الواحد يدخل فيكى وش على طووول
ههههههههه
هو ده محمد ذو العقلية الغريبة والجميلة فى نفس الوقت اللى حصل فيما بعض تفاصيل تانية مكانش ينفع تتحكى فى البوست لانها دخلت فى كوردن الخصوصيات زى كوردون المبانى كدا ههههههه
يارب تكون وجهة نظرى وضحت
محبتى ليكى يا جميله
‏قال Desert cat
osama
فيلسوفنا العظيم اسامه
ولانى مقتنعه جدا بوجهة نظرك
فاتفق معاك فى جميع ما ذكرت
دمت بكل خير
‏قال Desert cat
رئـــــيسـة حزب الأحلام
اسوء نموذج واللى دائما تبحث عن العريس
فتتلون حسب الوانالطيف السبع فى ظرف اسبوع المهم لفت انتباهه وكانها فتارة محجبة واخرى بدون الحجاب وتارة ضعيفه واخرى لئيمه والنموذج ده بيكون نفسى اخربشه فى عينه
لانها تهدر كرامتها بدون وعى
شرفتينى يا جميلة
‏قال Desert cat
واحد مش فاهم حاجة
انا قصدى يا فندم الاستقرار النفسى والعاطفى .. بمعنى ان هناك العديدات من تضحى بالانسان اللى بتحبه فى مقابل الانسان الغنى اللى عنده فلوس
اذن الحالة هنا ربحت صفقة الاستقرار الوهمية فى مقابل المشاعر
مودتى
‏قال Desert cat
اجندا حمرا
انا موضوع التاج ده يا حبيبتى جالى تخمة منه .. كل لما ادخل بلوج الاقى تاج ... لاء ده مش تاج ده حوار بينى وبين انسان غالى عندى اوى بس حبيت انقله .. ثم لازم يكون فى اقتناع من جانب المرأة عموم انها طالما متبغلطش فى حق ربنا وفى حق نفسها ثم فى حق الاخريم يبقى اعتقد كدا عندها الثقة الكافية اللى تواجه بيها الدنيا كلها ... وفعلا انتى صح المجتمع كدا كدا بيتكلم ومحدش سايب حد فى حاله بالرغم من ان لو كل واحد نظر لنفسه هينشغل عن عيوب الاخرين
... وزى ما فى اللى بتفيد فى المتجمع فى المتخلفة اللى ينطبق عليها تماما كيس الزبالة الاسود المربوط ..
شرفتينى ودمتى بكل خير يا جميله
‏قال Desert cat
وجهة نظري
لاء القطة المشمشية هى اللى كان بيتحقق معاها بالليل
ههههههههه
تعرف هو كمان علق لى اوى على كلمة صابون الحلاقة
تحياتى
‏قال Desert cat
gehad_fci
شكرا يا جهاد
بس ايه موضوع قطة متوحشه ده
ده انا لحد دلوقتى مش خربشت لسه
تحياتى
‏قال Desert cat
واحدة مفروسة
لاء مكنتش واقفه قدام المراية كنت واقفه فى البلكونة حتى اخدت برد الله يسامحه بقى
‏قال Desert cat
tamer.sala7
امممممممم
انا كنت حاسه ان الموبايل متراقب انت اللى اعترفت على نفسك بقى
اينعم يا فندم هو موقف شخصى وهذا القط يبقى .... اولا مش ينفع اقول لانه اصلا مالوش فى عالم النت بالمرة
عموما لو استفزنى تانى وقتها ممكن انشر بياناته كاملة
أنا بس بافكرك بيا
بس أنا مشغول جدا
تحياتى ليكى
‏قال Desert cat
واحد من البلد دى
لا يا فندم انا مش ناسية الحمد لله انك بخير
وان شاء الله المشغوليات تنتهى بسرعه
تحياتى
‏قال Miso soup
انا بمووووت في الصنف ده من الستات :)
‏قال Desert cat
Miso soup
انهى صنف بالظبط من الستات ما انا عددت له 3 اصناف
سؤال خبيث حبتين
تحياتى
قطقوطة الجميلة
انا قلت من زمان انك قطة
بس قوية ومفترية

بس فعلا تشبيهاتك جامدة اوى وجارحة اوى يا قطقوطة

يا بنتى خفى اللعب شوية هيقيموا عليك الحد بعد كدة
ومش هنلاقيكى وسطنا

تحياتى ليكى
اختك خيخة
‏قال Desert cat
بت خيخة وأى كلام
ما انا اول ما سمعت كلمة قوية ومفترية اللى محمد قالها لى ضحكت لانى فاكرة انك اول واحدة قولتيها لى ... تشابه افكار بقى
بالنسبة للتشبيهات يا حبيبة قلبى فهى مثلا زى انى اشوف واحدة جميلة والتانية قبيحة فلما اشبه انسانة بالجميلة بتكون فرحانة ولما اشبه اخرى بالقبيحة بتثور فيبقى انا مش ذنبى انها شبه حاجه مش كويسه
محبتى ليكى وبوسة كبيرة اوى لشريف
‏قال Miso soup
افتكرت ان كلامي مفهوم .. عامة انا محبش الست امينة و مطقش مدمنات متعة الشعور بالظلم .... عرفتي بقي!!!! :)
تحياتي و تقديري
‏قال Desert cat
Miso soup
ههههههههه
طب ما انا عارفه
مش قولت لك سؤال خبيث حبتين
اشكرك جدا على التوضيح
احترامى وتقديرى
‏قال Unknown
تشبيهاتك الى تودى ورا البحر دى لو يعقلوها جنس بنى ادم كان الحال باه غير الحال

لنا الله
‏قال Miso soup
صحيح قطة مشاكسة (يمكن ده سر سحرها و جاذبيتها) !!! بس عسسسسسسسل :)
‏قال Desert cat
عاليا حليم
اتمنى والله انهم يعقلوها يا عاليا
لكن تيجى تكتبى التشبيه اللايق تلاقيهم طالعين زى القرود وشغالين رمى كلام نظام الى على راسه بطحه
نورتينى يا جميلة
‏قال Desert cat
Miso soup
ميرسى جدا لذوقك
شرفتنى والله
‏قال Eldebug
يا نهار ابيض ... هوه احنا رجعنا تانى لعصر المطالبة بالمساواة

يابنتى ده انتوا اللى واكلين البلد ... شوفى كده فى اى حتة هتلاقى مطلوب انسة للعمل ... عمرك شفتى مطلوب انس للعمل

ليكى عليه انا لو بقيت رئيس جمهورية هاطلع قرار تانى يوم الصبح ان سن المعاش للمراه المتزوجة اللى عندها اكتر من عيلين يبقى 35 سنة ... اصلهم بعد كده بيقعدوا يقمعوا بامية فى الشغل
وبعدين كمان يدوا فرصة للشباب الغلبان اللى زى حالاتنا يلاقوا شغل ويعرفوا يتجوزوا ... على الاقل هيقضوا على مشكلة العنوسة فى البلد

سلام بقى علشان الحق احضر نفسى للخرابيش اللى هتخربيشيهالى
‏قال Abo 7anf
ازيك يقطه
بصراحه دايما بكون اراء كتير فى كتاباتك
مش دايما أيجابيه
لان اى حد فيه سلبيات
بس انتى تفكيرك جميل
لما اتعرفت علي المدونات اكتشفت ان لسه فى ناس بتشغل عقلها
و عندها رايها
خصوصا البنات لانى للاسف معظم القابلتهم فى كليتى
كان تشغيل العقل اخر حاجه عندهم
بس انا بحترم اى حد عندوا راى
وبيعرضوا من غير ميفرضوا
وتحياتى ليكى
‏قال الربان
تحياتي

لكل منا شخصيته المميزة له عن الاخرين.

والمهم ان يتكيف الشخص نفسيا و اجتماعيا مع سماته الشخصية.

علي فكرة...شخصيتك جميلة رغم الشدة التي قد تكون من فترة الي اخري..الا
انني علي يقين من طيبة القلب.

تحياتي و تقديري
‏قال Tamer Nabil Moussa
كل حاجة فى الدنيا ممكن يكون لها قانون وفى بعض الحاجات بتكون ليس لها قاتون والاسهل فيها

فن التعامل

العلاقة بين الرجل والست

علاقة بسيطة ومش مستحيلة

كل طرف بيكمل التانى لان كل طرف فى اختلاف عن التانى والاختلاف دة شىء طبيعى عشان التكامل

وعشان العلاقة تكون صح لازم يكون فى حب وتفاعم مودة ورحمة بين الطرفين


تحياتى
‏قال Misrdream
انا ببقي سعيد قوي لما بدخل وبشوف
موضوع جديد فى المدونه دي
بهديلك اغنية احمد عدويه اللى موش فاكرها
تقبلي كامل انشكاحي وتحياتي
‏قال Desert cat
Eldebug
ههههههههههههه
انا مش بنادى بالمساوة لاننا غلبناكو فى معترك الحياة
اعترف بقى يا راجل
بدليل انك كمان بتقول ان اى محل بيطلب انسة للعمل مش راجل للعمل
عرفت بقى اننا انتصرنا
ده بس كان حوار
وحبيت انشره مش اكتر
لا تقلق مفيش خرابيش هعضك على طول

تحياتى
‏قال Desert cat
Abo 7anf
مش رايك لوحدك يا محمود
ههههههههههههه
كل اللى يكلمنى يقولى انا بتكلم مع اللبنات بحس انهم تافهين
بس والله مش كل البنات همهم المكياج والموضه والمطربين وافلام السينما
ثم ان دول كمان نسبة ضئيلة
والحمد لله انك غيرت رأيك
تحياتى
‏قال Desert cat
الربان
استاذى العزيز
دخلت معترك الحياة فى وقت بدرى جدا
ولذلك تعلمت متى اكون شديدة وكيف اكون لينة
مبهتمش اوى بعواطف اللى قدامى لانى ياما اخدت طعنات بسبب اهتمامى بهم قديما
اشكر حضرتك جدا
احترامى وتقديرى
‏قال Desert cat
Tamer Nabil
بالظبط كدا يا تامر الرجل والمرأة كل واحد بيكمل التانى
بس المهم التفاهم بينهم
وفن المعاملة علشان الحياة تستمر
مودتى
‏قال Desert cat
Misrdream
يارب يسعدك دايما يا احمد
وبالمناسبة السعيدة بانك سعيد علشان المواضيع يا احمد يا سعيد
اهديك اغنية شعبولا القلة اللى برضه مش فاكرة اسمها ايه
‏قال micheal
عن نفسي أنا بحب المرأه القوية ذات الشخصيه البعيده عن تأثيرات و توجهات المجتمع الذي لا يزال ينظر لها بنظرة القرون الوسطي
تحياتي
‏قال Desert cat
micheal
وده الطبيعى ان محدش بيحب الضعف
لكن هناك من تستسلم ومن هى ضعيفه بطبعها ومن تمثل دور الضعف
تحياتى
‏قال محظوظة
ايوة كدة

وريهم الرجالة العين الحمر وياريت السودة بالمرة

دول ياختى فاكرين اننا سهلين

ويضحك عليهم

بالازن بقى لااحسن سى السيد بيندهة عليا هههههه

سلامووووووووو
‏قال Heart Beat
Dear Desert Cat

امممم رجل يتعامل مع المرأة مثل صابون الحلاقة

تشبيه جميل جدا فعلا بحييكي عليه لان الكثير من الرجال بيتعاملوا مع المرأة على اساس الاحتياج اليومي بغض النظر عن نوع الاحتياج ده

اخر الامثلة على النوعية دي الاب القاتل فيرتزل بتاع النمسا ... هو قالت لانه قتل بنته لما عمل فيها اللي حصل ده كله

جميل كمان انك قلتي رأيك بمنتهى الوضوح و من غير خوف او تعدي على حرية الاخرين و ده عهدنا بيكي دايما يا اشجع القطط و ارقها

مش هانخسر حاجه اما نقول الرأي الصحيح لكن هانخسر كل حاجه لما نخاف نقوله يبقى الموت احسن للي بيخافوا دول

اهم حاجه الصراحة و الوضوح عشان وجهات النظر اللي من النوعية دي تتضح و مايكنش في ملامة بعد كده في العلاقة

المرأة القوية الشخصية هي التي تفرض على الرجل ان يحترم عقلها و مشاعر قلبها قبل ان ينظر الى جسدها

تحياتي يا جميلة
‏قال اهو ده عيبه
موضوع هايل بجد

انا كمان ضد فكرة ان المراة تبقى مجرد اكسسوار فى حياه الرجل بدون عقل او روح

واذا كان اعتراضهم اننا فى مجتمع شرقى فالدين الاسلامى ادى حقوق كتير للمراة بس للاسف ضاع منها كتير بفعل الرجل او جهل المراة نفسها

وعايزة اقولك ان الراجل اللى بيدور على واحده على هامش حياته ومجرد زوجه بدون عقل هو هو اللى بيرجع تانى يدور على واحده تفهمه وتبقى على مستوى تفكيره
‏قال Nasimlibya `√
ع فكرة كلامك لذيذ اوي
مدونة حلوة
‏قال Unknown
السلام عليكم احلي قطه
هي دي فضفضه مع ضميرك ولا حد كان بيسألك وفي الحالتين بجد اجاباتك حلوه اوي تحسي انها مرحه ومستفزه في نفس الوقت ههههه
جميله اوي
تحياتي
‏قال Desert cat
محظوظة
انتى تؤمرى ده انا هوريهم كل الوان الطيف فى الفصول الاربعه
ابقى سلمى لى على سى السيد
ههههههههه
‏قال Desert cat
Heart Beat
بصى يا حبيبتى انا مبتدايقش من استبداد الراجل وطريقة معاملتة للمرأة لأن هى اللى اديته الحق لكدا هى اللى من الاول فهمته انها لا تصلح انها تكون انسان متكامل له فكر وراى وحرية شخصية ... وبذلك اصبح يستخدمها كيف يشاء
اما بالنسبة للتعبير عن راى فانا شايفه ان كل واحد حر فى تفكيره وعمرى ما سمحت ولا هسمح لحد انه يفرض عليا فكر معين طالما انا مش مقتنعه وربنا وهب كل واحد مننا عقل نميز بيه مش وهب لكل واحد شخص تانى جنبه يملى عليه اللى المفروض يعمله او ميعملوهش ... وبالتالى اللى عاجبه اهلا وسهلا بيه واللى مش عاجبه وبيتكلم بادب برضه الف اهلا وسهلا بيه واللى مش عاجبه وبيقل ادبه يبقى يخبط دماغه فى حيطة مبنيه على قاعدة خرسانية مسلحة عريضة ولو حيطان الدنيا خلصت هبنى له انا حيطة على حسابى الخاص علشان يخبط راسه فيها طول اليوم
نورتينى يا جميله
‏قال Desert cat
اهو ده عيبه
بالظبط يا داليا
وده اللى بيحصل فعلا
الارجل يبقى عنده الست فى البيت كل اهتمامتها العيال وتطبخ وتمسح ومنفصله انفصال تام عن المجتمع اخرها تعرف ان كيلو القوطة بـ 3 جنيه وكان الله بالسر عليم وبالتالى اول واحده يقابلها عقلها ناضح ويحس انها قادرة تستوعب افكاره بيرتبط بيها شعوريا من غير ما يحس ويبقى اللى فى البيت متنساش تمسح الحمام كويس
تحياتى
‏قال Desert cat
nasimlibya
ميرسى جدا
اشكرك
‏قال Desert cat
bar2ash
لاء ده كان حوار بينى وبين روحى مش ضميرى وضميرى عمه ما اتدخل بينى وبين روحى اصله مش فضولى
نورت

المشاركات الشائعة