مبروك علينا الخواذيق يارجاله

الف الف مبروك علينا جميعا
اضخم ارتفاع حصل فى الاسعار
الف مبروك لاصحاب السيارات اصحاب النصيب الاكبر من الخوذئه
من زيادة فى البنزين وفى الضرايب وفى الرسوم
الف مبروك للمدخنين .. اصحاب النصيب الاقل شوية من الخوذئه الزيادة فى اسعار السجاير
وانت داخل اى محطة بنزين يا حبيبى منك ليه ليها له تعملوا حسابكو انكو هتدفعوا الأتى بدل اللى كان فعل ماضى

البنزين 95 يباع بسعر 250 قرش
البنزين 92 يباع بسعر 185 قرش
البنزين 90 يباع بسعر 175 قرش.
السولار يباع بسعر 110 قرش.

وبهذه المناسبة القومية العظيمة بدءاً من زيادة العلاوات 30 % للموظفين و حيث ان الشعب اتخوذق جمعااااااء ....... جمعااااااااااء ..

اهديكو هذه الابيات

بلادي بلادي بلادي
لكِ سخطي وامتعاضي
***
مصر يا أم الأذلة
البلاد ناهباها شلة
والنظام بقى ريحته جلة
هي دي ريحة بلادي
***مصر يا ارض الجحيم
والعصا في المستقيم
والكبير * مهما يولو
لما في منقذ م الاعادي***
يا بلادي عيشي عرة
زي شجرة سنط مرة
وانسجي م الفقر صرة
وزعيها بالأيادي***
مصر اولاد ضحايا
في البحار ما لهمش راية
يغرقوا تبقي النهاية
وعلى الله اعتمادي
***بلادي بلادي بلادي
لكِ سخطي وامتعاضي
الابيات دى منقوووووووولة
ولو غبت ابقوا اسالوا عنى والنبى العنوان ميتهوش اى قسم شرطة اسالوا فيه

تعليقات

‏قال Empress appy
عيب تقولى كده
احنا اخدنا بالشلاليت
اممممممم انا هبيع بطوط واجيب عجله
مش رياضه برضه انتم شعب جاهل
يعنى اونكل القطنه قال رغفين فى اليوم يبقى عاوزنا نخس
اونكل مبارك هو وابيه جيمى قال
لا لازم رياضه وبما اننا مبنجيش غير بلوى الدراع يبقى لازم يغلى البنزين علشان يا نشترى كوتشيات اميجو بيصوت
ونبقى شجعنا الصناعه التركيه
يا عجله ويبقى عملنا دايت يا شعب جاهل
عاااااااااااااااااااااا يا لهووووووووووى بجد انا بقول كل الالفاظ الاعتراضيه من امبارح ومش مكفيانى حتى الواد طول الليل اللى على لسانه سوسو
اقوله عيب يقولى دى بلد بنت سوسو
قولت خلاص سوسو وانا مالى هى من عيلتى
الشباب هيموت من الغيظ
عارفه كمان علشان الشباب يبطل يكروز فى الشوارع
نونا لو قعدت ارد هكتب بوست هنا سيبينى يا اوختى الحق احط لبطوط عصير قصب بدل ما يغلى ويتباع بالزعزوعه عاااااااااااااا
‏قال Abo 7anf
السلام عليكم
ازيك يقطه
مقلنا مفيش موارد
خلاص
ومش عارف يعنى ايه البنزين بس الغلى
زازاى بتتحسب
انهارده موصلات الجامعه زادت 25 فى الميه
وكل حاجه غليت
علشان يرفعوا عن كاهل المواطن الغلبان
ويريته مكان ادا علاوه
ولا حتى فكر فى مصلحتنا
‏قال وجهة نظري
لا وإنتي الصادقه، أضخم إرتفاع في الأسعار لسه حيحصل الأيام الجايه، كل دا المسببات (الفيروس)، بس الأعراض والنتائج مبانتش لسه
ههههههههههههههههههههههه
الاغنية تجنن

المشكلة انا مش عارفة الحومة والريس بيناموا ازاى مرتاحين
يعنى هما فاكرينا ايه؟
هندعيلهم برضه علشان زودوا العلاوات
هما مايعرفوش ان احنا عندعى عليهم

هما فاكرينا ساذجين اوى كدة
ولا هما اللى ساذجين اوى
كدة
هما مايعرفوش انهم كدة بينرفزونا اكتر
هما كانوا بينيموا العملية علشان منعملش حاجة فى اربعة مايو

بجد انا بدات مافهمش هما عايزين ايه

ربنا يحرمنا منهم
قادر يا كريم تجيبلهم مصيبة تخدهم كلهم
جمعااااااااااء

والله هتوحشينا يا قطقوطة
كنتى طيبة وبتنونوى كويس

طب لو اتأخرت اد ايه يعنى نبتدى نسأل عليكى

انا بقول يومين
وبعد كدة نبتدى ناخد تحركاتنا

تحياتى ليكى
اختك خيخة
‏قال فاتيما
فاكرة يا قطة عادل امام فى الزعيم لما كان بيقول مواصلات إيه ميمشوا
الشعب هيمشى أهو
بس على بلد تانية
يا إما على الجنة بقى
و كدا ييجى علينا اليوم نشيدنا الوطنى يتبدل عشان يبقى لسان حالنا المايل
ربنا يفرجها
ايه يا قطة ينفع كده
اسيب البلد يومين كنت نايم فيهم اصحى الاقى الدنيا ولعت كدة
كل المواصلات ذادت ربع جنية النهاردة
مش لاقى السجاير اللى بشربها
الحمد لله معنديش عربية بس واحد زميلى فضل فى البنزينة امبارح 3 ساعات عشان يفول قبل الاسعار الجديدة
ولسةبقيت الحاجة هتغلى عشان تكلفة النقل ذادت
شوية حرامية بيحكمونا
سلالالالالالالالالالالام
‏قال غير معرف…
حاجه تحرق الدم فعلا ياقطه
من ساعه ماسمعت الخبر المشئوم بتاع زياده الأسعار و انا متنكده علي الاخر
يعني محدودي الدخل حيعانوا بزياده
و الأسم علاوه
طب مش عايزينها بس اظبطوا الأسعار

حرام فعلا اللي بيتعمل فينا
علي فكره الأبيات جامده
ربنا يستر عليكي
ياتري بعد كل الللي بيحصل من زياده الأسعار حيطلعلنا بسلامته مفتي الديار المصريه و يقولك برضه ان الشباب اللي بيسافر بطريق الهجره الغير مشروعه برضه مش ضحايا؟؟
ربنا يكون في عون الشعب
:(
‏قال Tamer Nabil Moussa
كل شىء فى العالى طالع.


الا الشعب الغلبان فى الغلب والقرف عايش


ربنا يعدلها ياقطة

تحياتى
‏قال Desert cat
مروة كمال
انا مش عارفه انشر الكومنت بتاعك علشان فيه ايميلك
ياريت لو عندك بلوج تبعتى لى اللنك
عموما انا اتشرفت اوى بيكى
نورتينى
‏قال الربان
تحياتي

تعرفي انا بالرغم من ان عندي سيارة
و سترتفع مصاريف تشغيلها بالطبع لكن
غير زعلان...

كان نفسي البنزين يستقر سعره و لا يزيد هو و السولار....لان مواصلات الناس
هاتزيد اجرتها...و سائقي الميكروباصات
سيستغلوا الموضوع لمصلحتهم...
يا ريت كانوا زادوا الضرائب و الجمارك
فقط علي السيارات...
ربنا يكون في عون الناس... و يستر عليهم...

تحياتي و تقديري...
‏قال Desert cat
appy
شلاليت مين ياآبى الشلاليت دى انتهى العهد بتاعها من زمان
احنا دلوقتى فى نهارية مرحلة الخواذيق
والمرحلة اللى جاية ربنا يستر على بواسير اللشعب كله
‏قال Desert cat
Abo 7anf
ههههههههههه
انا كمان دافعه الصبح زيادة فى المواصلات
مش مسمحاهم
منه له
حسبى الله ونعم الوكيل
دى البداية
بعد كدا كل حاجه هتغلى على حس البنزين والسجاير
‏قال Desert cat
وجهة نظري
بدأت تبان يا استاذى بدأأت
انا عاملة ريجيم رايحة اشترى عيش ريجيم من شوية
لاقيته بيقولى سعر الكيلو زاد يا اوستاذه
قولت له خليهلك
انا بطلت ريجيم هاكل فينو علشان اتخن
راكبة مواصلات الصبح دافعه زيادة فى الاجرة
ومازل المسلسل مستمرا
‏قال انين الحزن
قتطي ياقمر عامله ايه

طب وبوعدين بقه في العالم دي

هنفضل كدا كتير

هما بيعملوا فينا كدا ليه

.......

انا بركب قطر هو القطر بيمشي بالبنزيين

سلامووووووووز

وزة
‏قال Desert cat
بت خيخة وأى كلام
هما عايزين الناس تتكلم تتحرك
بيقولوا لنا يا بجم احنا خليناكو تشتحتوا وتبيعوا اللى وراكو واللى قدامكو
وبرضه مكتومييين
طيب نعمل فيكو ايه اكتر من كدا علشان تتحركو
هما اعصابهم تعبت مننا ومن تنبلتنا بصراحة
حتى انا شايفه الريس والوزرا حواليه عمال يقولوا طيب نعمل فيهم ايه اكتر من كدا الناس دى اييييييه
انا طول النهار اعصابى بايظة والله يا نور
ناقلة هم كل حاجه
وقلقانة من كل حاجه
ربنا يسترها علينا جميعا
نورتينى يا ام شيكووو
‏قال R-H-S
ههههههههههههههه
كدا طبعا كل واحد هيشتريله عجله علشان الاجره بتاعه السرفيس هتغلي ونروح بالعجل الكليه مش عيب طبعا من اليابان بيروحوا بالعجل
ع الاقل نبقي نحزوا حزوا الناس المتقدمه
واحسن حاجه ان الناس اللي بيشربوا سجاير هياخدوا علي دماغتهم
سلامي
‏قال Desert cat
فاتيما
انا كنت بعمل ريجيم يا فاتيما بطلت
قولت انا هخس طبيعى من كتر المشى
ده انا عايزه لى مواصلات كل يوم يالهوووووى ملغ وقدرررررره
انا همشى احسن لى يا اوختشى

النشيد الوطنى
هو يعنى ايه وطن اصل الكلمة دى غريبة عليا حبتين
نورتينى
‏قال Desert cat
حـــــدوتـــــة
شوفت اهو كل اللى جرى لنا ده بسببك انت علشان نمت
حد قالك تنام
كل البنزينات هو مش جمعها كدا باين
المهم كلهم امبارح مرضيوش يبيعوا وكل لما حد يروحلهم يقولوا له مفييييييش اتاريهم بيرفعوا فى الاسعار
نياهاهاهاها
وبطل تشرب سجاير
اشرب المر من اللى كلنا شاربينه اشمعنا احنا يعنى
‏قال Desert cat
اجندا حمرا
ومين سمعك يا حبيبتى كلنا عمال نغلى وقلبنا موجوع هو اصلا مبقاش فى حاجه اسمها محدود الدخل علشان يطلع يتكلم عليه
هو بقى فى كل الشعب معدومى الدخل
المفتى بعد كدا هيطلع يقول عيشة الشعب المصرى على الدنيا حرام
المفروض يعملوا انتحار جماعى ويخلصونا
تحياتى يا جميله
‏قال Desert cat
Tamer Nabil
يارب يسمع منك يا تامر وتتعدل بجد
‏قال Desert cat
الربان
استاذى العزيز
الاسعار فعلا زادت
من الصبح بدفع فى المواصلات زيادة وكمان فى حاجات تانية اسعارها زادت
ربنا معانا ياااارب
‏قال Desert cat
انين الحزن
انتى بتركبى قطر يا وزة
طيب يا حبيبتى ابقى اعملى حسابك فى زيادة سعر التذكرة اصل حتى لو بيشتغل بالطاقة الشمسية برضه هيقولوا لك اسعاره زاذدت
‏قال Desert cat
gehad_fci
خلاص يا جهاد
مفيش سجاير
مفيش مواصلات
من النهارده فى مشى وجرى والجرى نص الجدعنه
متقولش عجل ليرفعوا اسعاره
اشتريها وانت ساكت
تحياتى
بقى انتي زعلانه ياقطه علشان البنزين غلي دا لسسسسسسسسه
ان كان وزيرة القوى العامله قالتها يوم خطاب الريس وبالفم المليان في البيت بيتك
قالت ان الحاجه هتغلى وارتفاع الاسعار هيستمر وبشكل اكبر بس هي تفضلت مشكورة ووضحت ان دا لفترة محدوده
يعني 3 او 4 شهور( صادقه طبعا)
وبعدها كل حاجه هترجع لوضعها الطبيعي
وطبعا احنا عارفين ان الوضع الطبيعي بيقول ان مفيش حاجه بتغلى وترجع ترخص تاني مهما حصل ..

دى البدايه بس عشان الناس تفرح بالزياده السخيه وما خفي كان اعظم
وربنا يجعله عامر
الاخبار دي من امبارح بالليل
والغريب لما سألت
قالوا ان كل حاجة هادية
ومفيش اي رد فعل
زى ما يكون الناس لسة تحت تأثير الصدمة
او مش مصدقة كعادتها انها مش بتصدق الحكومة فى اي حاجه
بس إلا قرارات الحكومة ضد المواطن
دى الحاجه الوحيدة اللى مصداقيتها تضاهى مصداقية شروق الشمس

لا حول ولا قوة إلا بالله

يارب ارحمنا

تحياتى
بصي أتشرطي عليهم ينقلوكي سجن الحضرة عشان الدنيا بتبقي مولعة في الصيف وبالمرة لما هانيجي نزورك ناخد لنا غطسين في البحر المتوسط
جيااااااالك يابحر
أوعي ترجعي في كلامك انا جهزت الشماسي ...
‏قال سمراء
مصر بريئة ممن يدعون انهم مصريين
اشكرك
سمراء
‏قال سمراء
مصر بريئة ممن يدعون انهم مصريين
اشكرك
سمراء
‏قال tamer.sala7
انا متوقع ثورة جياع
علي فكرة انا حبيع عربيتي سيبك من الموديل والامكانيات كفاية اقولك انها مفولة يوم الاثنين الساعة 11
مش احنا قولنا استعدوا لاكل الحلاوة واديكو بتاكلوها الحكومة مش حرماكم من حاجة بتاكلكم حلاوة وبقلاوة وباتون سالية
‏قال Unknown
اسف اني زيارتي لمدونتك في الظروف دي
بس بجد ده امر واقع عايزين نسسيبنا بقي من النقد والخنقه ونفكر في حلول

دي اول خطوه ع الطريق

تقبلي مروري
اتمني تشرفيني

سلام
‏قال mohamed
لا تمام كده معاكي عند سلومه الأقرع
‏قال رندا
أة يابلدى ياحبيبتى فيكى حاجة مجننانى
كل مانيجى نزرع قمح تطرح الكوسة فثوانى

وطنى حبيبى الوطن الاكبر يوم ورا يوم حرميته بتكتر
وانتكاساته ماليه حياته وطنى بيضعف وبيتقهقر
وطنى ياشاهد على سرقتهم قتلوا الناس وخربوا بيوتهم
غرقوا عباره وهدوا عماره هربوا وسافروا ومين يحاسبهم
فين اللوائح فين القوانين فين حكامنا راحوا فين
غموا عنيهم وسدوا ودانهم سابوا الناس يروحوا لقدرهم

كلمات اعجبتنى
كان عندى امل
بس امل ماتت وراحت مع المتاهة
يخسارة على بلدى كانت مصرية
بقت دلوقتى كلها حرامية
امريكية
والصمت اصبح صرخات وجوع
صوتنا ضاع ماهو مفيش حرية
كانوا بيقوللنا اننا احرار
بقينا دلوقتى ملهيين مع انهيار الاسعار

يااااااااااااااارب

رندا
‏قال mostafa rayan
ربنا يستر علينا من الغباء الحكومي المركز دة
‏قال رندا
فين التعليق بتاعى
راح فين ياقطة مش ظاهر لية

رندا
‏قال wanna b a physician
ايها الشعب العظيم هذا يوم تاريخى يوم الخاذوق نعم ايها الشعب اليكم الاتى قد تم رفع المرتبات ورفع اسعار البنزين والسولار والسجاير وضرائب السيارات واستهلاك الغاز الطبيعى لدى الشركات ورفع اسعار الضرائب والدمغات فى المدارس الخاصة والمنشأت وقد تم رفع المواطنون على الخازوقات انتهى البيان
اوبجكشننننننننننننننننننننننننننننننننن
‏قال Ahmed Al-Sabbagh
الله يبارك فى حضرتك يا افندم

والله الخوازق كان كبير عليا

ومن ساعتها وانا زورقى وجعنى

والله اول مرة احس فعلا ان الشعب المصرى بيتضحك عليها كدة

اوووف

تحياتى

احمد
‏قال rovy
السلام عليكم
ازيك يا قطه يالى غاويه خربشه
على كل حال ربنا يكون فى عون الناس كلها .
ربنا يوفقك ودمت بألف خير
تحياتى
rovy
‏قال aya
يا ترى يا مصر مين هيغطيكى ومين هيصوت؟

ادعوا ربنا يخرجنا منها على خير
‏قال الميكروباص
ليست أول مره
ولكن الجديد ان الناس مركزه في الامر عن كل مره
يعني الصوت عالي المره دي
انا متوقع انهم يشغلوا البلد بموضوع جحديد اليومين الجايين كعادتهم عشان الناس تتلهي في حاجه تانيه - زي مشكلة عصام الحضري مثلا
بس يا ترى هايكون الموضوع الجديد ايه؟؟
‏قال dr.Roufy
يااااه
والله ..النشيد الوطني الجديد دا رااااااااائع
فعلا ماينفعش تقريبا ينقال غيره دلوقتي
دا مش خوازيق وبس ..دي شلاليت وكمان اقلام على رأي آبي
مش عارفة الناس دي بجد مستنية مننا ايه
تفتكري مستنيين
مزيد من السلبية والطناش الوطني المزدهر؟

:(
شوفى يا قطة
عصبيتك دى زادت شوية وممكن نختلف مع الحكومة لكن ما نختلفش مع مصر لان الحكومة بتيجى وتروح لكن مصر باقية يا عبلة ....عموما الاصلاح الاقتصادى مطلوب ...صح لية اثار جانبية ..اه
لكن دائما الدواء مر
فيه فساد ...لا انكر
فيه محسوبية ...اه لا انكر
لكن الشعب مع الحكومة نفس المسئولية
ونفس الواجب
والغلط مشترك بينا
وعلى فكرة واللهى انا موظف بسيط ومطحون....لكن كل المتخصصين بيقولو لازم من الاصلاح ومحاولة بيع السلعة بسعرها الحقيقى ...لان السلعة طالما ليها سعرين لا زم يحصل تهريب وسمسرة
وخلينا مع الحكومة لغاية الباب
‏قال Rania Lelah
و الله ما انا عارفه اقول ايه بس
ادوا باليمين و خدوا قوت الغلابه بالشمال
الناس بقت محبطة
و فى حاله سخط شديد جدااااااا

حاجة بجد بقت تجنن
تحياتى
‏قال Unknown
انتا جامده واحسن حاجه اسلوبك الساخر
‏قال Hypatia
فلتشخري يا انشراح من معاميق قلبك
البلد ديه قهرتنى وكبرتني خمسين سنه على عمرى والله انا فى اليومين اللى فاتو دول عجزت وبقيت شايله الهم
‏قال Desert cat
حبيبـــــــة القمـــــر
هى كانت طالعة تستعبطنا ما هى عندها حق تستعبطنا وتستهبلنا كمان ما احنا شعب نخاف منختشيش
‏قال Desert cat
كاميليا
ماهى دى المشكلة يا كامى
الناس عمال تغلى من جواها
وقرفانة اخر ارف
وبالرغم من كدا مكتوميين
مش عارفه خرس دول ولا ايه
تحياتى
‏قال Desert cat
مفقوعة مرارتي من حماتــــــــــــي
من عنيا الاتنين
بس تيجى تزورينى مش تصيفى وتزوغى من بره بره كدا
ومش تنسى وانتى جاية تزورينى تجيبى لى معاكى محشى من اللى فيفى مش بتحبه
نورتينى
‏قال Desert cat
سمراء
طب والحل يا سمراء
‏قال Desert cat
tamer.sala7
الشعب كله هيبيع يا تامر
واوشك على بيع هدومه وبرضه لسه خرس
اااااااااااه
رحمتك يارب
‏قال Desert cat
رئـــــيسـة حزب الأحلام
دى بتاكلنا على قفانا لحد ما قفانا ورم
‏قال Desert cat
bar2ash
اولا الف اهلا وسهلا بيك نورت البلوج
ثانيا فكر فى اى حلول واحنا وراك ياريس
‏قال Mafrousa
لا حول و لا قوة الا ب الله
فوضت امرى و امركم الى الله ان الله بصير بالعباد
انا عندى احساس انى ضعيفة جدا قدام اللى بيحصل لنا علشان كده انا حوكل ربنا سبحانه و تعالى ياخدلى بتارى منهم...سلام
‏قال Desert cat
cenotaph
ههههههههههههه
طيب كلم حد يقوم لنا محامى بقى
‏قال Desert cat
رندا
الف اهلا وسهلا بيكى يا رندا نورتينى
انا بفكر اطبع النشيد ونوزعه على كل المدارس والجاماعت ويبقى النشيد الوطنى الجديد هو كلامك واكتب تحته تاليف واخراج راندا وانا مالى
يادوب تجهزى شنطتك وتحجزى جنبى وانا هاروح سجن الحضرة لوحدى يعنى
ههههههههههههه
نورتينى
‏قال Desert cat
mostafarayan
ربنا يسترها علينا جميعا يا مصطفى
‏قال Desert cat
رندا
ظهر يا جميل هو انا اقدر اكله لما اجوع
معلشى اصل فى مودريشين الكومنت بشوفه الاول وبعدين انشره
تحياتى
‏قال Desert cat
wanna b a physician
اجمل حاجه ان الشعب موجوع اخر وجع من الخوازيق ومش عارق يقول اى
‏قال Desert cat
Ahmed Al-Sabbagh
الخاذوق كان كبير اوى على الجميع يا احمد الناس كلها اتخوذئت واخدت على قفاها فى عز غفلتها
عموما كل واحد يلحق يحجز عند دكتور بواسير كويس قبل ما يبقوا طوابير زى طوابير العيش كدا
تحياتى يا خالو
‏قال Desert cat
rovy
انا الحمد لله يا جميلة وانتى اخبارك ايه
ربنا يكون فى عون الجميع
نورتينى
‏قال Desert cat
aya
هى الحكومة هتغطى وترمى فى اقبر بحر بس مش هتصوت دى هتزغرط
نورتينى
‏قال Desert cat
لورنس العرب
انا بقول مثلا انهم هيخترعوا دورة افريقية جديدة بعد اسبوع
عارفين ان الشعب يموت فى الهيافه علشان كدا بيصدروها له
تحياتى
‏قال Desert cat
dr.Roufy
هما مش متسنيين مننا هما زهقوا فينا
جربوا كل حاجه علشان ننطق نقول اى حاجه
واحنا برضه ساكتين ومكتومين
مش عارفين يخلونا ننطق ازاى
تحياتى
‏قال Desert cat
alabalatta
والله انا صعبان عليا اللى بيحصل لمصر الست الاميرة اللى كانت عايشه له عزة نفس وكرامة ودلوقتى بقت مرتع لكل من هب ودب ويخوض فى سيرتها وفى سيرة اولادها لما بقينا عالم ملهومش اى قيمة ولا لازمة
على فكرة المسؤلية كلها علينا احنا مش على الحكومة لان قال يا فرعون ايه فرعنك قال ملقتش اللى مش عارف ايه
احنا اللى بناخد على قفانا وساكتين ولا بنعترض ولا بننطق وبالتالى ما يرفعوا اسعار ما يولعوا فينا هو حد هيقولهم انتوا بتعملوا ايه
تحياتى
‏قال Desert cat
Rania
ماهو للاسف يا رانيا الناس محبطة وفى سخط وبتغلى من جواها وفى نفس الوقت مش قادرة تنطق ليه وعلشان ايه انا مش فاهمه خايفين من ايه هيجرى لهم ايه اكتر من اللى بيجرى
تحياتى يا جميله
‏قال Desert cat
ken kemp
ميرسى لذوقك
تحياتى
‏قال Desert cat
Nsreen Bsunee
البلد كلها صغيرين وكبار ماشيين يشخروا مش انشراح بس
افل حل خليكى بره هنا مبقاش بتاعنا
بقى بتاع الحكومة بس
تحياتى
‏قال Desert cat
واحدة مفروسة
الظاهر ان هو ده اللى الجميع عمله بالفعل كله وكل ربنا وربنا على الظالم والمفترى واللى بيرفع على الغلابة الاسعار
تحياتى
‏قال Layla
مصر يا ارض الجحيم...والعصا في المستقيم

يا ريت تفضل في المستقيم ومتطلعش من نافوخنا
‏قال ابو احمد
جلا جلا
جلا جلا
فتح لى عينك
ياولا
جلا جلا
بص ف ايديك
هتلاقى بيضه مقشره
افتح ايديك
تلاقيها فاضيه مقشفره
جلا جلا
ريسنا جه يمسى عليك
اهو جى اهه
فتح عينك
جايب عديه
جايب علاوه
شايف ياعم
شايف الغلاوه
فتح ودقق
وشوف وحقق
تلاقيها طارت زى الحمامه
مفضلش ليك غير الندامه
بس اتبسطت وعشت كام
تحلم بانك بتاكل حمام
شفت المعزه
شفت الغلاوه
غمض عينيك
فتح عينيك
معدتش فارقه
عدت عليك
جلا جلا
جلا جلا
‏قال رندا
الف اهلا وسهلا بيكى يا رندا نورتينى
انا بفكر اطبع النشيد ونوزعه على كل المدارس والجاماعت ويبقى النشيد الوطنى الجديد هو كلامك واكتب تحته تاليف واخراج راندا وانا مالى
يادوب تجهزى شنطتك وتحجزى جنبى وانا هاروح سجن الحضرة لوحدى يعنى
,,,,,,,,,,

مش تقلقى ياقطتى
انا من امبارح محضراها ويعملوا الى يعملوة
بس هقولهم بعد الامتحانات بقى هههههههه
اعمل حاسبك معايا فى الاكل كمان
اصل جوزى قالى هيبعتلى
اتنين كيلو جوافة
هعمل حاسبك بقى

رندا
‏قال Desert cat
رندا
الله جوافه بحبها اوى
خلاص اذا كان فى جوافة اعملى حسابى والحمد لله ان فى حد حيونسنى ومش اى حد ده قمرنا راندا

المشاركات الشائعة