حوار مع شاهد عيان من المحله

الحوار ده اجريته اون لاين على النت مع احد زملائى من المحلة واثناء حوارى معاه الكهربا اتقطعت عندهم بسبب اندلاع المظاهرات مرة اخرى وكملنا كلامنا من خلال الموبايل
طبعا استاذنته انزل الحوار فى البلوج رحب جدا
كلام سيادتى اللى لونه اصفر والباقى كلام صديقى
اترككم مع الحوار

أنا متابعه الاخبار
أخبار ايه دا اعلام ابن ......
انا مش كنت متابعه فى الاعلام
الاعلام اصلا عمل صفقة مع النظام وكتموا على الموضوع
مفيش اعلام طلع وقال الحقيقة
ايوا دا الي حصل
و الموضوع كبير جدا
يابنتي اضرب عليا قنابل امبارح
في واحد جنبي خادله رصاصه
انا سمعت ان الكهربا قطعوها
اه قطعوا الكهربا
ومكنتش عارف اطلع على شارع رئيسي
دخلت في اراضي زراعية علشان اعرف ادخل المحلة
كنت شايف في بلد ار ياف جنب المحلة من البلاد الي عديت عليها وانا راجع المحلة الامن المركزي يضرب في
البيوت رصاص و قنابل مسيلة للدموع
والناس تجري
لغاية ما دخلنا البلد جوه
الواحد كان مش قادر عيني دمعت لما قولت بس
غير ضيق التنفس
لدرجة انو كان في اطفال صغيره مترمية في الارض
واهالي اعده بتجري
محدش عارف يعمل حاجة
و كانوا موقفين قطرين
قطر ولعوا فيه
وقطر تاني ادغدغ
وولعوا على قضيب القطر
اللى وقفوا القطرين دول الاهالى ولا الشرطة ؟؟
اه الاهالى
على فكرة معلومة بس الشرطة امبارح مكنتش قادرة اساسا على الاهالي
و ربنا كانت فلسطين التانية امبارح
طيب ودلوقتى البلد وضعها ازاى
مليانة امن مركزى ويقال ان المظاهرات بدأت تانى
انا هنزل بعد شوية وابقى اسالى مش تنفضى كالعادة
طيب انت اساسا ايه اللى نزلك امبارح فى وسط الغارات دى كلها
كنت في طنطا
كان عندي كورس و راجع
في الطريق من طنطا للمحلة نزلونا في نص الطريق
لانو السواق مقدرش يكمل علشان قدامه عربيا ت متولع فيها
نزلنا و خدنا الموضوع مشي وجري
كان في بنات
اها كان في بنات
وابن الـ ... الي اسمه عمرو اديب دا
لازم اتصل بيه في يوم واهزئه
لانه اثبت فعلا انه عميل
على فكرة يا نانا
الناس هنا امبارح كانت في الموضوع دا
ستات وبنات ورجاله وشبابا
فى اغلب محافظات مصر
على فكرة مصر كلها كوم والمحلة كوم تاني لوحدها
اه ما هى فعلا المحلة اللى اثبتت موقف بطولى امبارح
علشان رجاله
بس برضه باقى محافظات مصر ليها مواقف مشرفة زى طنطا
هنا والكهربا قطعت
اتصلت بيه لاقيته فى الشارع ومكنتش عارفه اسمع صوته من الاصوات العالية اللى كانت حواليه زعيق وضرب
قالى الوضع هنا دلوقتى زى ما انتى سامعه كدا بالظبط وكمان البلد كلها مفيهاش كهربا قطعوها تانى البلد كلها مظاهرات والامن المركزى مش راحم شغال طحن مش ضرب
وبعدها الخط قطع
...........................
معلشى بقى احنا فين من المحلة يا جماعه ... والناس اللى عمال تنطحن بقالها يومين دول هما بس اللى مصريين واحنا متفرجون ؟؟؟

طيب لو مش فى ايددينا اى حاجه يبقى
دعواتكوووووووو

تعليقات

الوضع فى المحله من سى لاسوء والحكومه بتقفل على المواضيع اصلى الجو ربيع والجزيره والعربيه عملو صفقه مع الحكومه والا حزاب فى التكيفات فى مكاتبها والاخوان بيدور على كراسى
وسابوا الشعب كلهم ولا
اللي بيحصل في المحلة انا معتقدش انه حتى يرضي اهالي المحلة نفسهم
من حقنا ان احنا نضرب ونعترض على الأوضاع السيئة
لكن مش بالطريقة الهمجية دي
يعني استفدنا ايه دلوقت من التكسير والتخريب اللي حصل
سواء من الأمن او من الناس اللي شاركت فيه

ايه الاستفادة؟
يعني ايه رجالة؟
هو معنى الرجولة اني اكسر واولع؟

انا عارف ومتأكد ان الاعلام مش بينقل الصورة الحقيقية كاملة
ده شيء مفروغ منه
لكن مهما كان، عمر الأمن ما هيعمل اللي عمله ده الا اذا سبقه افعال تانية من الناس

ده مش مبرر ليهم طبعا
بس لازم نكون منصفين
‏قال موناليزا
وقاطعين الكهربا ليه بقى احنا فى غزة
ده احنا كلنا مصريين
حسبى الله ونعم الوكيل
‏قال بحبك يامصر
الاخبار اللى لازم نثق فيها هناخدها من المدونيين لاننا ناس ملناش مصلحه الا الحق
واظهاره
الامن حاول قمع الاحتجاجات بالضرب والقنابل المسيله للدموع وكمان دس بين المتظاهرين من يخرب ويحرق حتى يبرروا قمعهم للمتظاهرين
‏قال وجهة نظري
خايف اقول رأيي بصراحة، بس أنا مش عارف هل يبسطك إلي حاصل دا؟ طب هية حاجة تشرف لما الناس تولع في قطر وتدغدغ قطر تاني؟ هوا الشخص إلي نقل الكلام دا كان فاكر إنو معدي في إسرائيل ودي إنتفاضة فلسطينية؟؟

لما سكان المحلة صدقوا التهريج إلي حصل إمبارح، وهيجهم العمال وبعدين؟؟ أول حاجة جورج إسحق قالها إنوا بيدين عمليات التخريب وغسل إيدة، والأخوان غسلين إيدهم من الأول، وراح دم الي ماتوا هدر

هما كانوا فاكرين الأمن حيطبطب عليهم ويتفرج؟؟ دول ما حيصدقوا يدربوا العساكر علي ضرب الناس، وحيخلوا المحلة عبرة لمن لا يعتبر.... يعتقلوا إية وكلام فارغ إية، دول حيدغدغوا عضامهم ويخلوهم مينفعوش تاني، أسهل من نيابة ومحكمة

حسبي اللة ونعم الوكيل في الي كان ورا الهوجة دي، وربنا يعلم حتنتهي علي إية، أهو كل واحد روح بيتوا وقالك مش تبعنا وندين التخريب وأعمال الشغب وبقوا حبايب في الأخر والناس هيا إلي بتدفع التمن
‏قال بنوته مصرية
حسبي الله ونعم الوكيل

لما اتفرجت علي الصور بتاعت المحلة
والاطفال والشباب بيضربو الامن المركزي بلطوب افتكرت فلسطين والحجارة

ربنا يسترها علي الاهالي والاطفال

بس سيبك انت والله رجاله بجد

ربنا معاهم

تحياتي لكي
رودي
‏قال Empress appy
يا نونا امبارح كانت العاشرة مساءا جايبه الموضوع على الهواء حتى الناس بتوع المحله يا حرام قالوا ان فيه بلطجيه بينهم وهما عارفنهم كويس وهما دول اللى خربوا وسرقوا المدارس والبلاوى دى وكان فيه واحد من الداخليه رئيس كليه لاشرطه سابقا قال ان لازم الشرطه تعمل كده امال يعنى تتصدى ازاى ...
بس تعقيبا على كلامه اقوله روح يا راجل ومترجعش تانى ما تمسكوا البلطجيه وسيبوا اهل البلد وانا عارفه بتوع المحله بما انى رحتها كتير هما طيبين بس عصبيين شويه وده بحكم عملهم لانهم اغلبيتهم عمال
وعموما ربنا معاهم وتعدى على خير
ومتكونش انتقام منهم علشان هما اول ناس دعوا للاضراب
‏قال غير معرف…
اول حوار احس انه بجد و مش متفبرك زي كل اللي بنسمعه في الجرايد و نشرات الأخبار بتاعتنا

شوفتي الأخبار كاتبه تقول ايه؟قمه الاستفزاز
حنعتبر يوم الأحد 6 ابريل عيد للعمل
و ال اللي كانوا بيقولوا علي لا للفساد لا للغلاء عملاء و مدسوسين

شوفتي الغباء ياقطه؟
بحييكي علي الحوار الجامد ده و فعلا احنا بنعتبر نفسنا متفرجين
لما بنسمع عن اللي بيحصل في المحله
انا كنت لسة ببعت ايميل لصديق ليا فلسطينى
وبقوله ان الوضع فى المحلة مختلف تماما عن اى محافظة تانية
انا فعلا حاسة ان الاضراب كان جايب نتيجة اكثر فى المحلة
الناس عملت اللى عليها بجد
وبعدين شغل التخريب والحاجات دى انا سمعت يا نانا ان الحكومة بنت الوسخة
هى اللى مسربة شوية عيال بلطجية يخربوا فى المنشات
ويلبسوها للاهالى وللمتظاهرين
علشان يتلككوا ويعتقلوا الناس
يعنى شغل البلطجة ده مش من الاهالى ده من عند الحكومة برضه


بجد الواحد مش عارف يعمل ايه لاهالى المحلة
لسة بنوتة عندى سايبالى تعليق وبتقولى افكر فى حاجة نساعد بيها اهل المحلة
انا معنديش اى افكار يا نانا
لو انتى عندك ممكن تقترحى علينا ونشوف نقدر نعمل ايه

تحياتى ليكى يا نانا
ولو عرفتى اى اخبار قوليهالنا برضه
سلام
اختك خيخة
‏قال Desert cat
معلشى يا جماعه مع احترامى لكل الناس اللى علقت فى البداية
بس تعليقى الاول هيكون على الباحث عن الحقيقة
بص يا احمد
انا لو نشرت ردك هتنقص اوى فى نظر الناس وعلشان انت صاحب محمد او ابن حجر العسقلانى وربنا يعلم محمد غالى عندى اد ايه انا مش هنشره .... ده اولا
ثانيا مش كل واحد يشتم فى الاخوان يبقى من زباينى يا احمد ثم ايه زباينى دى هو انا فاتحه دكانه ولا محل حلاق
ياريت تنقى الفاظك
ثم الاخوان ما 3/4 الشعب بيكرههم والربع الباقى اللى هما منهم بيشاور نفسه دلوقتى بعد حالة الشيزوفرنيا اللى اصابتهم
وبما ا نك اعتبرت كل اللى يشتم فى الاخوان يبقى من زباينى على كدا انا قوة مؤثرة اوى فى البلوجات وفى مصراوى وفى الجرايد وفى العربية ده انا المفروض على كدا يتعملى تمثال ياراجل
عموما اشكرك جدا على حسن ظنك فيا وثانيا اشكرك جدا جدا على طريقة كلامك والكومنت الهايل اللى انت سايبه ده
مش هقولك غير شرفت يا احمد
سلام
‏قال Desert cat
رئيس جمهوريه نفسى
الاعلام مكتم
والبلد بتولع
والاخوان مش فاضيين
هما اساسا بقوا مشتتيتن مش عارفين يعملوا ايه
شوية هنلعب وشوية لاء مش لاعبين
ربنا يشفيهم
‏قال Desert cat
آلام وآمال
بص يا محمود انا كمان معترضة على الشغب اللى بيحصل ومستاءه جدا لحالة الذعر والخراب اللى اصابت المحلة
فى النهاية كلنا مصريين سواء امن ولا مواطنيين
ايه الداعى للاشتباكات اكيد فى ناس مندسة ومصلحتها كدا
طبعا اهل المحلة مش هقدر اقول عليهم غير فعلا رجاله ورجاله بجد كمان
بدليل انهم مصرين على حقوقهم لحد دلوقتى
ربنا معاهم
‏قال Desert cat
monaliza
هما كل لما يحصل اشتباك يقطعوا الكهربا مش عارفه ليه بصراحة
يمكن طرريقة جديدة للمقاومة
هههههههه
ربنا معاهم
تحياتى
‏قال Desert cat
بحبك يامصر
الامن مبدأش بالضراب
الامن مضربش غير لما ولعوا فى قطر وبدؤوا تكسير فى المحلات وفى المملتكات العامة
الله اعلم بقى مين دول هل فعلا اهل المحلة ولا مين
انا نفسى مش عارفه احدد
تحياتى
‏قال Desert cat
وجهة نظري
بص حضرتك انا متعودة منك على حرية الرأى وبالتالى قول رايك براحتك وده شئ مش يزعلنى
انا برحب بكل الاراء
حضرتك اكتر واحد عارف انى بعتز جدا بارائك وعارف اكتر ان مش بيزعلنى غير الناس اللى بتدخل علشان تشتم وبس وطبعا شتان بين رائ حضرتك والاراء اللى بتكلم عنها
....
انا كمان ادين عمليات التخريب والحرق والتكسير اللى حصلت
بس بالفعل اهل المحلة اثبتوا موقف ممتاز بدليل صمودهم لحد دلوقتى
هما قبل كدا عملوا اعتصامات واضرابات ومكانش فيها خساير ولا اى حاجه معنى كدا انهم ناس فعلا عندهم ثقافة الاضراب
انما مين اللى اثار الفوضى والشغب ده هو السؤال
احترامى وتقديرى
‏قال Desert cat
بنوته مصرية
ما هو بالفعل المحلة اتحولت لغزة الفلسطينية
رصاص وطوب وقنابل
ربنا معاهم
تحياتى يا رودى
‏قال Desert cat
appy
يا قلبى عمال المحلة اصلا اول ناس فى مصر كلها عملوا اضرابات واعتصامات قبل كدا ومحصلش اى خراب او تكسير من الحاصل دلوقتى يعنى ناس فعلا عارفه ثقافة الاضراب كويس ... يبقى اكيد حد تانى اندس فى وسطهم وعمل كل البلاوى دى
ربنا معاهم ان شاء الله
‏قال Desert cat
اجندا حمرا
استفزاز يعنى الشعب كله مستفز
والله حاجه جميلة
طيب فى اضراب تانى يوم عيد ميلاد بسلامته اسم الله عليه
لما نشوف هيسموه ايه ده كمان

اشكرك جدا يا ارق اجندة على ذوقك ورقة اخلاقك
محبتى
‏قال Desert cat
بت خيخة وأى كلام
بالظبط كدا يا ام شرى اهل المحلة مش هيخربوا ىف بلدهم
اهل المحلة اول ناس فى الجمهورية عملوا اعتصامات يعنى ناس فاهمه
يعنى ناس كمان بتحب بعضها وبتحب بلدها مستحيل يدمروا فى بعض
اما احنا نعمل لهم ايه تعالى نفكر سوا ونحط افكارك على افكارى وربنا معانا ومعاهم
تحياتى
حب الفضول هيقتلنى يا قطوقطة
وعايزة اعرف هو الباحث عن الحقيقة كان كاتب ايه؟
سايقة عليكى النبى يا شيخة لا تنشرى تعليقه
الفضول هيقتلنى
الفضول هيقتلنى
الفضول هيقتلنىىىىىىىىىىىىىىى
‏قال Desert cat
بت خيخة واى كلام
يا نونو انا بضيف لك رد عندك وانتى بتكتبى لى رد هنا
ايه العسل ده
لما اشوفك هبقى اقولك الرد او ابى تقوله لك
لانى والله حذفته خالص
هو عموما كان كلام عصبى وانا مقدراه كويس .. اصلى ماشية بمبدأ حبيبك يبلع لك الزلط
ههههههههههه
انما لو حد من البعدة كنت رصيتهم له

تحياتى ليكى يا جميله
بوسى لى شيكو
إيه ده بس!!!أغيب يومين عن المدونة أرجع ألاقي كل المواضيع الجامدة دي..بالراحة علينا..بس واضح انك متابعة كويس اوي....شدي حيلك
‏قال hui mu han
اده ده البوسنة ولافلسطين

مش ممكن تبقى الاهالي كلها هي الغلط وولاد...هما الصح

كدة زادت اوي
‏قال Desert cat
دواير
هو مين فى البلد مش متابع يا دواير
هو دى مش بلدنا برضه وسواء المحلة او غيره كلنا مصريين
تحياتى ليكى يا جميلة
‏قال Desert cat
hui mu han
ماهو ده مبدأ من لا مبدأ له
ربنا يسترها على بلدنا ويعدى الازمة دى على خير
تحياتى
‏قال Abo 7anf
السلام عليكم
انا ردى متاخر بس خلاص الوضع هدى خالص
تقريبا ناهارده الثلاثاء القلق بسيط جدا
بسبب الةلد المات
‏قال Desert cat
Abo 7anf
اهلا بيك يا ابو حنف تشرف فى اى وقت
هو انا سمعت والله اعلم ان كان فى مظاهرات النهارده بعد خروج العمال من الشغل
بس بالفعل دلوقتى الوضع هادى جدا
ربنا معاهم
تحياتى
‏قال Asmaa mahaba
تحرشات الحكومه هى اللى عملت كدا مع الناس
سببتلهم هياج
الاضراب دا بين ناس على حقيقتهم كتير
تحياتى ليكى سومه_87
‏قال Desert cat
somaa mahaba
بصى يا سومة
اهل المحلة قبل كدا عملوا اعتصامات واضرابات ومكانش بيحصل اى حاجه من اللى حصلت فى اضراب ابريل
المشكلة فى البلطجية اللى انسوا بينهم واللى كانوازريعة للنظام انه يعتقل ناس كتير جدا منهم غير اصابات ناس تانية
بالنسبة للى ظهروا على حقيقتهم فهما ظاهرين من زمان مش كان لازم موقف
تحياتى
‏قال canary
انا بقى صديق عراقى بعتلى رساله على الموبايل بيقولى ايه الاخبار عندكو طمنينى انا سمعت ان الاوضاع عندكو صعبه خالص انتو باين عليكو اتعديتو مننا
انتهت الرساله القادمه من العراق
العراقيين بيقولو للمصريين ان الاوضاع بقت صعبه . طبعا دة من اللى ظهر على الفضائيات
ضرب نار واعيرة مطاطيه وغاز مسيل للدموع وقنابل دخان
وكمان بتقولى قطع كهربا؟ دةاحنا كدة ليهم حق يقولو علينا بقينا زى غزة
ربنا يستر عليهم
بجد ضايقتيني من اللي بيحصل هناك
هما اتجننوا ولا ايه ؟
‏قال Ahmed Al-Sabbagh

اوووه حوار جامد اوى
والله الوضع سئ جدا
بس عموما ما كنش منتظر اننا نضرب واحنا شايلين ورود
لازم ندفع تمن الحرية

تحياتى ليكى يا حنان
وكل سنة وانتى طيبة ويبقى سنة جديدة من عمرك سعيدة عليكى

احمد

‏قال Desert cat
canary
تعرفى لو قولنا العراق او فلسطين اسمهم عندهم احتلال اجنبى او غزو
انما لما يبقى اللى بيغزونا الحزب الحكام واللى مجوعنا ومبهدلنا الحاكم
يبقى يا فضيحتك يا مصر
ربنا معاهم و ومعانا
ومع كل المحتلين سواء داخليا او خارجيا
تحياتى
‏قال Desert cat
مفقوعة مرارتي من حماتــــــــــــي
اللهم امين
هما مش اتجننوا
هما مرعوبين
تحياتى
‏قال Desert cat
Ahmed Al-Sabbagh
مش اجمد من حوراتك ياباشا
بس انا شايفه ان لو هيبقى لحريتنا تمن لازم الشعب كله يشترك فيه مش اهل المحلة بس
ربنا معاهم ومع شعب مصر كله
كل سنة وانت كمان طيب
تحياتى
‏قال غير معرف…
فعلاً الوضع هناك خطير جداً
زميلاتي في الكلية بأكلمهم إمبارح على النت قالولي إسكت خالص دلوقت .. أتاري الضرب شغال وصوت القنابل مش بيقف لدرجة إن إنضرب عليهم قنبلة وهم في قلب بلكونة البيت
!!!!!!!!!!
ربنا يسترها بجد لإني عارف المحلاوية بحكم إن 3/4 زمايلي وأصحابي منهم ، وعارف إن دماغتهم ناشفة ومش حيسيبوا حقهم بإذن الله
ويمكنك نشر موضوعي (الإخوان المتأسلمين .. عندما تتجسد المصلحة) في أي مكان أختي وكذلك أي موضوع
أخوكي د. علام
‏قال Desert cat
DoctorAllam
ما ضاع حق وراءه مطالب وهما بيطالبوا بحقهم وحقوق كل المصريين
ربنا معاهم
واشكرك جدا جدا
على موافقتك على نشر الموضوع
احترامى وتقديرى
‏قال فرنسا هانم
المحله بخير
والشوارع هادئه
ومفيش اى مشاكل ولا مظاهرات ولا غيره
للاسف الشديد ده اللى سمعناه
وللاسف الشديد هى دى مصر يا عبله
هى دى الشفافيه
وتحيه
وتحيه
وتحيه لاهل المحله
مش عارف الحوار ده فكرني بالمشهد الشهير بتاع محمودالمليجي في فيلم الارض " كنا رجالة واقفين وقفة رجال "

ياتري الحكومة بتتعامل معانا زي ما الانجليز كانت بتعامل المصريين ايام الاحتلال ؟؟؟؟

هو التقييم لكل اللي حصل ده ان الوصول لحالة العصيان المدني الكامل مش مستحيل وان ثورة الغلاء اللي حصلت ايام السادات وسماها وقتها انتفاضة الحرامية ممكن تحصل بصورة اعنف , وساعتها الامور اتخرج عن نظاق السيطرة بالنسبة للجميع ..

ياريت الباشوات الجدد اللي ماسكين البلد يدركوا الحقيقة دي قبل فوات الاوان

شكر يا قطة وموضوع متميز كالعادة

مع خالص تحياتي
‏قال الربان
تحياتي

الوضع في المحلة سيء جدا...البعض استغل موضوع الاضراب و اضر بالاخرين...علي قناة الجزيرة...رايت الناس و خاصة الشباب بيلقوا بالحجارة علي جنود الامن المركزي الواقفين...منظر مؤسف ..كأن هؤلاء الجنود من كوكب أخر
وليسوا أخي و اخيك... الجنود كانوا في حالة استعداد فقط...لم ار اي منهم يعتدي علي مواطن...لكن بعد ذلك رأيت رجال الشرطة و المباحث بيعتقلوا بعض الافراد...اكيد هؤلاء الذين اشعلوا النار في السيارات... لو انا اي منا صاحب سيارة و احترقت ماذا كان فاعلا؟

القطارات القي عليها البعض نارا مشتعلة...لو احترق القطار او ركابه هل سيكون مرتاح الضمير...؟

التعبير عن الراي بطريقة سلميه و الحرص علي عدم اندساس الاخرين عديمي الضمير بينهم....

مصر بلدنا جميعا و لابد ان نكون حريصين
عليها...و ان نحترم الملكية العامة و الخاصة...مع عدم إخلالنا بحق كل مواطن
ان يعبر عن رايه بطريقة حضارية و سلمية.

الإعلام الحكومي لابد ان يتناغم و يتماشي
مع سياسة الدولة...و للاسف القلة منهم
من يقول الحقيقة التي ينبغي ان يعرفها
الناس...و لهذا فإن الاعلام الحكومي فقد
مصداقيته.


تحياتي و تقديري و دمت بالف خير.
‏قال الربان
معذرة...نسيت اقول ان البعض اشاع اول يوم ان هناك ستة قتلي... و بمتابعتي لبرنامج الطبعة الاولي للاستاذ احمد المسلماني ( و لا نزكي علي الله أحد لكنني أحسبه أنسان محترم و ذو وعي و حس وطني )...اقول انه في البرنامج اورد انه اتصل بمعظم وكالات الانباء حتي يعلم عدد القتلي...و لكنهم جميعا افادوا بعدم وجود قتلي ...حتي موعد إذاعة البرنامج مساءً.

هذا يعني ان هناك فئة ضاله مضلله تريد
الاثارة و تهييج الناس....

علي فكرة انا رايت ايضا مدرسة و قد
حل بها الخراب....هل يعقل هذا...


تحياتي و تقديري
ربنا على الظلمة
تحياتي
‏قال همس الاحباب
كان معكم من قلب الاحداث مراسلكم ...
تعرفى بتفكرينى بمحمد هنيدى فى فيلم جاءنا البيان التالى
بس بجد برافو عليكى
ليكى مستقبل فى تغطية الاحداث القادمة
تحياتى
خالد
‏قال Desert cat
فرنسا هانم
يا حبيبتى جريدة البديل نزلت احداث المحلة يوم 7 ابريل يعنى تانى يوم الاضراب
العدد اختفى فى اقل من ساعه
تفتكرى مين السبب خلف اختفاء العدد ده
فعلا هى دى مصر يا عبله
نورتينى
‏قال Desert cat
الفارس الملثم
محمود المليجى يا فارس هى دى اخرتها
هههههههههههههه
المفروض بقى انهم عرفوا ان المصريين مش عايزينهم المصريين زهقوا منهم يسبوها بقى للى احنا نختاره
الناس مبقتش قادرة تعمل حاجه غير الانتحار
تحياتى
‏قال Desert cat
الربان
استاذى العزيز
انا كمان رافضه بشدة التخريب والدمار اللى حصل
لكن كلنا عارفين ان اهل المحلة ليهم باع طويل فى الاضرابات والاعتصامات وعمرها ما كانت بالشكل ده
وكمان كلنا عارفين ان مش هما اللى خربوا بلدهم بالشكل ده دى اعمال بلطجة حد ميهموش حاجه
بالنسبة للاعلام
فالاعلام منقلش الصورة لا صح ولا غلط
لا الاعلام المصرى ولا حتى الفضائيات
اخر حالة وفاة حصلت فى المحلة طفل امبارح عمره 15 سنة اصيب بطلق
مات فورا على اثره
حاجه كمان اؤكد لك ان الاعلام ولا الجرايد نقلت اى حاجه
جريدة البديل نشرت فى عدد 7 ابريل بالصور جميع احداث المحل وفور نزولها اختفت من السوق
التفسير ايه ياترى ؟؟؟
احترامى وتقديرى
‏قال Desert cat
أحمد سعيد بسيوني
اللهم امين
‏قال Desert cat
همس الاحباب
انا محمد هنيدى
ههههههههه
الله يسامحك
بس ايه الاحداث القادمة دى هو فى حرب جاية ولا ايه
ربنا يبشرك بالخير
‏قال ميرا ( وومن )
كات
اولا شكرا لمرورك الكريم بمدونتي
ثانيا تحياتي علي مدونتك الجميلة
ثالثا اللي حصل في المحلة ودى وجهه نظري خطة مقصودة علشان نبان اننا شعب همجي وملوش غبر السك ومن خبرتي في مشاهدة المظاهرات ايام الجامعه اللي كانت بتبدي سلمية وتنتهي بتدريب عسكري للأمن بتاعانا ان الأمن اكيد جر شكل المواطنين وممكن نفهم كويس قوي اللي حصل من دعوه عمرو اديب لرجال الأعمال الوطنين للتبرع لإعادة اعمار المحلة يعنى الشعب يخرب ورجال الأعمال اللي احنا عارفينهم يصلحوا يبقي هو ده شعب مصر
‏قال Desert cat
وومن
اولا مدونتك جميلة وفعلا تستحق المرور
ثتانيا بالنسبة لاهل المحلة مش هما اللى رخبوا بلدهم الناس دى بتضرب من زمان وعارفه يعنى ايه اضراب واعتصام
عمرو اديب كان بيدعو رجال الاعمال ازاى لاعمار المحلة وهو اصلا ما اعترفش بالاضراب
ده قال الوضع فى مصر وردى وبمبى وكل الالوان الجميلة بمناسبة فصل الربيع
‏قال Hook
يا ريت يا جماعة كل مدون و مدونة يعمل بوست يوم 4 مايو يهني فيه الريس بطريقته الخاصة...الخاصة جدا!
المحله هى النقطة الىى انطلقت منها شعلة التحرير وشعبها هو فعلا اللى هيقود تحرير مصر .والمفروض كل بلد فى مصر تثور زى المحلة .أما عساكر الأمن المركزى فيستاهلوا الدهس وأن شاء الله وهم راجعين المعسكرات تحصلهم حوادث تاخد أجلهم وتفرحنا فيهم.
‏قال Astronaute
صنعت فيديو بإمكانيات متواضعه عن أحداث الإضراب و المحله
http://freespacecraft.blogspot.com/2008/04/6-2008.html
‏قال د/اجدع بنوته
لا حول ولا قوة الا بالله

وموقفين قطرين واحد متولع فيه والتانى مدغدغ

اهالى ولا الشرطه

لا اهالى

هو ده الوضع التهب

م ان دول التهبوا ودول كمان التهبوا

ومحدش هدى وامتص غضب التانى

المشاركات الشائعة