بين الســندان والمطرقـــة


بتحبينى ؟؟؟؟
آه عارفه إنك بتحبينى بس حب الدبة اللى قتلت صاحبها من خوفها عليه
بتقولى إنك بتخافى عليا وبكل ما تملكى بتحمينى .... طيب إزاى وأنتى اللى بتغرسى سكينك فى قلبى وبتقتلينى
وقال أيه فاكره إنك بتساعدينى
فاكرة الوقت اللى كانت فيه الدنيا كلها ضدى وبدل ما تكونى جنبى كنتى بسكينة بارده بتدبحينى .... ولما شوفتينى بموت قدامك جيتى تبكى وتقولى لى مكانش قصدى اسفه وسامحينى .. أنا على طول شيفاكى قوية .. على طول شيفاكى بتواجهى اى موقف وانتى وقفة شامخة ... عمرى ما تخيلت انى ممكن اشوفك للحظة واحدة ضعيفة او منهارة .... انا قوتى كنت بستمدها منك ومواجهتى لأى ظروف كنتى انتى قدوتى فيه .... طيب عايزانى ابقى قوية واوجه اى ظروف ازاى وانا فى وقت كل الدنيا فيه ضدى شايفة شاشة سوده قدامى مفيهاش اى شعاع من نور .. ومديتى لى ايديكى وقولت لى هنستنى الفجر مع بعض ينور لنا الدنيا بس خليكى معايا واوعى تسيبينى .... ومقدرتش اسيبك او ابعد عنك وانا عارفة ان فى اى وقت وفى اقرب موقف انتى برضه اول واحدة هتخذلينى ... والله عارفه انها بتكون تصرفات عفوية وبيكون قصدك تساعدينى ... بس معقول كل ده ولسه مش قادرة تفهمينى ... وبالرغم من كل ده بحبك ومقدرش ابعد عنك ... حتى لما بعدتى انتى عنى وسبتينى ... فاكرة لما كنتى كل يوم تكلمينى وتقولى لى بحبك ووحشتينى ... وانا مقدرتش اقولها ... لانى للاسف مبعرفش انطق كلام مش محسوس ... فاكرة لما رجعتى وعلى استقبالى البارد فضلتى تعاتبينى ووقتها شاورت لك على الحيطان والكراسى وقولت لك هى كمان مش حاسة بيكى .... ووقتها مقدرتش اشوف دموعك ومن غير ما احس كنتى فى حضنى وايديا هى اللى بتطبطب عليكى ...
دايماً بحس إنك بيعانى
وفى كل موقف بالاقيكى ضدى وباستمرار بكون شيفاكى مش عايزانى ...
وبالرغم من انك جرحتينى لاء ده انتى دبحتينى عارفه من بعد ما سبتينى
انا تعبانة والله
بموت والله
عارفه انك بتقرى لى علشان كدا فضلت اكتب لك هنا ... اصل مفيش اى طريقة تانية ممكن اوصلك بيها اللى جوايا ... حاسه اننا مش هنتقابل تانى ... تعرفى انى فكرت اجى لك واول ما قربت من مكانك حسيت انى بتخنق ... حسيت انى مبقتش قادرة على الحركة ... حاولت .. ووقفت افتكر كل موقف جميل مر بينا على الاقل يدينى دافع اقدر امشى خطوة واحدة لقدام .. لكن للأسف مرت كلها فى ثوانى وكأنها شريط وردى فى فيلم الأحلام وفجأة لاقيت نفسى بجرى وببعد لبعيد ... ازاى بتحبينى كل الحب ده وازاى بهون عليكى
عمرك شوفتى نجمة بتطفى بريقها
عمرك شوفتى شمس بتبعد عن شعاعها
عمرك شوفتى ارض بتقتل زرعها
بالرغم من انك عملتى فيا كل ده وبالرغم من انى بهون عليكى
لكن برضه لسه بحبك وعايزاكى
طيب ايه هترجعى لى ؟؟؟
تحبى اوصف لك يومها لما سبتينى انا حالى كان عامل ازاى ؟؟؟؟
عارفه اليتيم اللى ماتت امه قدام عينيه
هو فقد امه
وانا كنت بفقدك يا اعز الناس
دلوقتى بس اقدر اقولها لك وانا حاساها
بحبك ووحشتينى

المشاركات الشائعة