عادتهـــم ولا حيشـــتروها

منذ ايام طالعنا مهديهم عاكف ببيان ماشاء الله يفرح .....بس برضه كان فى هاجس بيقولى مش تصدقى وانا اقوله عيب يا هاجس ده مهديهم يمكن يصدق القول المرة دى ... لكن للاسف الهاجس هو اللى انتصر عليا فى الاخر بس مستغربتش بصراحة لما قريت خبر تخاذلهم ...اصل ده العادى مفيش اى مصلحة شخصية هتيجى من الاضراب .... مفيش كرسى ولا انتهازية ولا الوصول لحكم مينفعش فى دى ضحك على الدقون ولعب فى عقول الغلابة اصل الغلابة هيكونوا مضربين ....
طبعا ده بيان د. محمود عزت


لا نعرف أهدافه ولا وسائله ولسنا مسئولين عن أي شيء فيه

مش عيب ياراجل تكدب كبيرك المهدى اذا كان هو بنفسه قال القى البيان ده

المرشد العام أوضح موقفنا من الإضرابات ولكننا ضد الفوضى
يعنى الاضراب هو اللى هيعمل فوضى امال لو ثورة كنتوا اتحججتوا بايه ولما الاضراب فوضى امال دى اسمها ايه



اه سورى ده عرض كارتية فى حرم الجامعة بترهبوا بيه باقى الطلبة بس

نؤيد مساعيَ كل فئةٍ في التعبير عن رأيها للحصول على حقوقها


تعرف اى فئات تانية اثبتت انها فئة محترمة على الاقل اللى اعلنوا مشاركتهم مرجعوش فى اللحظات الاخيرة وقالوا هييييييييه عليكو واحد ضحكنا عليكو اشتركوا انتوا احنا مش هنستفاد من الاضراب بحاجه يبقى نضرب ليه وقاموا قايلين بيان ضعيف .. واهى مينضحكش بيه على طفل عمره شهرين

لن ننسحب من المحليات مهما حدث وأحكام القضاء ملاذنا الأخير

ودى تيجى تنسحب من المحليات يعنى سلطة يعنى فيها مصلحة وفايدة يبقى هتنسحب من المحليات ده حتى لو انتخابات جمع الزبالة هتدخلوها وتشاركوا فيها وكالعاده تتباكو وتقولوا بنتسحل .. بننضرب بيتمسح بينا الارض ... اصل يهمنا مصلحة الوطن ... واضح جدا اهتمامكو بمصلحة الوطن ... النفاق زال القناع عن وجوهكم فى الوقت الحاسم

لم نغازل النظام وبعض الأحزاب جمَّلت وجه المحليات القبيح

حقيقى اللى اختشوا ماتوا على الاقل الاحزاب اللى بتشتم فيها دى اثبتت انهم مش منافقين ولا كدابين اعلنوا استعدادهم للاضراب وماتراجعوش فى اللحظات الاخيرة وادى الكدب انكشف والنفاق ظهر .. هو مش من آيات المنافق برضه إذا وعد أخلف ... فين مصلحة البلد اللى تهمكوا يا أصحاب المصالح الشخصية والشعارات الكدابة ....


تعليقات

‏قال Empress appy
انتى يا بنت
تعالى اقعدى هنا جنبى افهمك الحدوته وانتى وعقلك اذا كان باقى ليكى عقل وده مش كلامى ده كلام الاخوان او بعض الناس اللى اعرفهم
وجهه نظرهم اولا قالك احنا مش هنشترك مجمعين يعنى اللى عاوز يشترك يشترك بس فئات بمعنى يعنى نقابه الاطباء ممكن يجمعوا بعض و الاطباء الاخوان ويضربوا لوحدهم
وزيهم بقى عمال او محاميين او اى فئه من الفئات بتوع الاخوان
ليه بقى ايه السبب يا راجل قالك علشان اليوم ده الحكومه مش هتسكت وحتى لو وقفنا مظاهرة سليمه الحكومه هتحط ناس مشاغبه بين الافراد علشان يسيروا لاشغب ويدوا الحق للامن انه يقبض على الناس طيب ماشى وبعدين
قالك الناس دى هتبقى مسئوله مننا
يعنى فى النهايه مسئوليه اهل وبيت واكل وشرب يعنى اللى هيتقبض عليهم منهم معنى انهم يدولوا حاجه صريحه يبقى هما متكفلين بيه انما لما يقولوا براحتكم يبقى مش متكفلين بالموضوع
بس وبعدين هما زعلانين اصلا اصلا علشان مش هما اللى نظموا من الاول
وده مش كلامى ده كلامهم والله على ما اقول شهيد والبقاء لله علينا وربنا مع الناس الغلابه اللى هتقف بكرة ومش تبع اخوان ولا غد ولا عمال ولا محتاس ولا عباس
‏قال Desert cat
appy
يا حبيبتى انا جايبة البيان فى البوست
مفيهوش حاجه اسمها مش حنشترك مجمعين
لاكيد فعلا انهم زعلانين علشان الاضراب مش يتنسب ليهم مش هما اللى منظمينة يعنى
اكيد هتفرق معاهام جامد جدا
مش علشان التنظيم يبقى سليم لا سمح الله انما علشان مش هتبقى نقطة فى صالحهم
ثم هما بيقولوا الحكومة مش هتسكت يا سلام مش هما اللى بيقولوا احنا ضد الفساد واحنا اللى واقفين فى زور الحكومة
يقوم لما يتاكدوا فعلا ان الحكومة مش هتست يقعدوا من زورها خالص
علشان الحكومة تعرف تطلع صوتها
ولا ايه بالظبط
تحياتى يا قمرى
‏قال أنا حر
الاخوان عرفت ان الحكومة مستعدة كويس لليوم ده علشان كده التراجع منهم حصل بسرعة لأنهم بيخافوا ودي حاجة معروفة من بدري
اوعي تفتكري انهم مستعدين يضحوا بأي حاجة علشان خاطر البلد زي ما هما بيقولوا لأ طبعا هما البلد ما تفرقش معاهم هما بس بيحبوا يظهروا في الصورة علشان مصالحهم الخاصة فقط
انت انتهازي ومستغل اذا انت من الاخوان
تحياتي
‏قال Abo 7anf
السلام عليكم
المشكله مش اخوان ولا وطنى ولا وفد ولا ولا
لازم التغير يجيى مننا
لازم نغير بقى السنه الاحنا عليها دى
كل مره واحد يجى يخلينا نغير
مش كل مره هيطلع محمد على او مجلش قياده الثوره
ةيغيروا وبعدين يركبوا هما
مكل دول العالم بتتغير من شعبها
الاخوان زيهم زى غيرهم
مستنين الحكم
‏قال Desert cat
أنا حر
طبعا حوارات انهم بيموتوا فى تراب البلد وعايزين يطهروها من الفساد وضح كدبها اوى
يا فندم منذ قديم الازل معروف ان العالم دى شعارات وبس
اقوال وعند الافعال بيستخبوا تحت بير السلم
تحياتى
‏قال Desert cat
Abo 7anf
معلشى حضرتك بترد بحاجه مختلفة خالص عن اللى فى البوست
حضرتك قريت البوست فعلا
اصلى مذكرتش كلمة التغيير ولا الحزن الوطنى دى خالص فى البوست
والرد جاى على بوست مختلف خالص
وشكله كمان فى مدونة مختلفة نهائى
تحياتى
‏قال زعيم كمورا
يعنى فى الوقت الى المفروض انهم يبقوا اول ناس تقول احنا معاكم
واحنا اول ناس حنعمل كدة
يقوموا هما اول ناس تقول لا
لا حول ولا قوة الا بالله

تصدقى ياقطة
ان الناس الى مبتعرفش حاجة فى اى حاجة
ملهاش سيرة ولا كلام غير على الاضراب
وبيبدءو يحضروا نفسهم عشان يوم الحد البلد حتبقى قفلة
حتى مش حيبقى فيه مواصلات
ولازم يشتروا خزين عشان يبقوا قاعدين فى البيت مش محتاجين حاة من تحت
اه واله ياقطة
ناس كتيييييير اوى اوى
سمتهم بيقولوا كدة
الناس بد ملهاش سيرة غير عن يوم الحد والى حيحصل يوم الحد

هو مش الاضراب يوم الحد برده

ياله ماعلينا



مع ان الناس دى الى متعرفش يعنى ايه اضراب
بس فهمت انها لازم تعمل كدة
عشان بعد كدة تلاقى رغيف العيش

تخيلى الناس دى فهمت
احنا ليه نعمل كدة
لي حنعمل اضراب
والناس التانية الى


مبهدلين نفسهم مظاهرات
وشتيمة فى الحكومة
واعتقالات
وكل الحاجات دى عشان يقولوا احنا بنحب مصر
وفى اليوم الى مصر كلها حتخرج فيه تقول لا للمجاعة
لا للظلم
لا للاستغلال
لا للقهر
يقولوا لا احنا مش معاكم
احنا مش مع الفوضى
امال الى بتعملوه دة اي بالظبط
كنتوا بتعلبوا ماتش مصارعة
مع عساكر الحكومة
بس الحلبة كانت كبيرة شوية
ولا كنتم بتهزروا انتوا وعساكر الحكومة بس الهزار قلب بجد


لاحول ولا قوة الا بالله

ربنا يهديكم ويهدى مهديكم
ويهدى كل البشر يارب

اللهم امين

قولى امين ياقطة
وادعيلهم والنبى
بس من قلبك
عشان الدعوة تتقبل بس


تحياتى ياقطة
‏قال micheal
عادي...الاخوان علي طول كده
مش جديده يعني
:)
تحياتي
‏قال Hypatia
بجد انا مصدومه
رغم انى مستوعبه جدا ان الاخوان يطلع منهم اوسخ من كده بس برضه مش مصدقه انهم يتراجعو بعد كل ده وبعد ما الناس البسيطه كلها بقت بتحلم بالاحد 6 ابريل

يعني عيب عيب وشكلهم بقي اوحش يعني وعلى العموم هما كده ابتدو اول خطوه فى طريق تحطم شعبيتهم عند الناس البسيطه اللى مصدقاهم
على البركه خليهم يظهرو على حقيقتهم
‏قال فرنسا هانم
رغم انى مع الاضراب قلبا وقالبا
وبكره هاضرب وزى ما ترسى دقلها
لكن مش متفأله ان الاضراب ده هينجح
لانى كل ما اسأل حد غير متصل بالنت عن الاضراب يقولى اضراب ايه ؟؟؟؟
‏قال Ahmed Al-Sabbagh

كااااااااات

وحشتينا والله

احلى حاجة انك ما بتفوتيش فرصة فى الكلام عن الاخوان

ورغم ان كتاباتك بتزعل كتير من اصدقائى الاخوانجية

بس تعرفى كلام فى سرك .. انا بحب كتاباتك اوى

اهديكى بقى الكلمات دى عن الاضراب


أنا ليه هعمل الاضراب ؟؟


لما الفســـاد وقــّـفوه حـارس على وطنى
ولهيب الغلا كوانى .. وحتّ ف بدنى
لما الحرامى سرق منى اللقمة والميه
وسرق هدوءى وسكنى .. حتى من سكنى
لما الحلم حتى اتسرق .. من يومى .. من زمنى
لما النظام نسج - فى عز الشباب - كفنى
أنا قلت هعلن العصيان
فى يوم حزين مـَدنى

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم


لما سألت عالعيش .. قالوا مفيش
وقالو العيش على الأبونية
وسألت عالزيت .. وعزّيت
لما عرفت إن الزيت بتسعة جنيه
وسألت على حديد البُــنا
قالوا الحديد .. خلاص فى كرش البيه

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم


لما البشر والحجر
ووادى النيل ببنى أدمينــــه
لما زمان الوطن بايامة وشهورة وسنينه
لما الصغير والكبير
قالوا كفاية مش عايزينــة
كفاية علينا حكم سنين
تخرج الواحـــــد من دينـه

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم


لما المبيد صبح سرطان
يهرى ف ارضنا .. فى الزرع .. فى مواطن
لما بؤ الميه صبح وسخ داكن
لما خرب الاقتصاد .. واحد على تلـّـــهَ
قاعد وشارب وواكل وساكن
لما الشباب بيصرخ .. فى ذل ومهانة
ولا شغل ولا توظيف ولا شقة ومساكن

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم

تحياتى
أحمد الصباغ


يا كات يا عالم افهمو والله العظيم الاخوان والاحزاب بما فيهم الوطنى معزومين فى عيد ميلاد وكل واحد باصص للتورته لو حده ومش عايز يدى حد وصاحب التورته الى هو الشعب ولا هامم حد فيهم لو الشعب محولش يغير بنفسه لنفسه محدش حيعمل ليه حاجه خالص ليه مش عايز تقتنعو بده مش عارف
‏قال شريف طلال
الاخوانجيه مصلحجيه
كل هدفهم الوصول للحكم فقط
شكراً ليكى على هجومك القوى ده
تحياتى
‏قال shreen
قطة الصحراء

لا ادرى لماذا اشعر دوما حين اقرأ موضوعاتك

انى اقرأ لجريدة .. او صحفية ناشطة

تعشق بلدها حقا وليس زيفا او شعارات

صحفية
ترفض ان يملى عليها احد افكارها

او ان تكون مجردد بوق يررد ما ترددة الكثير من وسائل الاعلان

لكى افكارك الحرة
وارائك الخاصة

والاجمل انك تجهرين بها
ولا تخشين لوم اللائمين

لانى اعرف بعضا ممن يمتلكون ذات افكارك ولكنهم يخشون الجهر بها

بل واذا استلزم الامر يعلنون عكسها حتى لا يثيروا استياء من حولها

ولذا قبل كل شئ
اعلنك اسدا قويا وليس قطة ضعيفة

الاخوان من جديد
وشعارتهم البراقة الكاذبه

التى يستخدمونها باسلوب دس السم فى العسل الشهير

هو لا يهتمون بالبلد ولا باى شئ غير رغبة واحدة قوية

هى الوصول للسلطة
لان السلطة تعنى لهم القوة

الاخوان ايا كان ما يقولون
وايا ما كانت مظاهر التحضر التى يدعونها

الغرض منها فقط ازالة صورتهم كمتطرفين
حتى يحصلوا على اكبر عدد من المؤيدين

المصيبة ان هنك البعض الذى وقع فى هذة الخدعه وبدء يصدق انهم تغيروا ولم يعودوا نفس المتطرفين المتأسلمين

الذين دوما كانوهم

صديقتى
احيى عقليتك الواعية
وقلمك الذى تستخدمينة كافضل ما يكون

فى فضح اكاذيب هولاء وغيرهم

صديقتى لا تلقى بالا الى لوم الالئمين
ومحاولتهم لاحباط حق قلمك فى قول الصواب

ويكفيك فخرا ان انت هو انت
بلا زيف او خداع او تملق

كل الود
‏قال الربان
تحياتي

لقد اصبحنادولة فؤية...بمعني...انقسمنا الي محامين...اطباء...مهندسين...عمال..موظفين
وخلافة...

كل فئة تسعي الي مكاسبها هي فقط...فإذا حصلت عليها انتهي الامر..

لله در عامة الشعب لمن لا ينتمون الي حزب
او نقابه مهنية قوية تطالب بحقوقهم
او جماعة او حزب.....

تحياتي و تقديري و دمت بألف خير.
‏قال Heart Beat
الصديقة العزيزة
Desert Cat

انا فعلا قريت الكلام ده على لسان محمود عزت فيما معناه ان مالهمش دعوة بالاضراب بس هو كويس لكن يشاركوا فيه لا طبعا
هم عندهم حاجات تانية اهم زي ان مهدي عاكف يقول بيان يجي واحد تاني منهم يقول عكسه و كده يعني

شوفي لو حصل ثورة هاتلاقيهم اختفوا ساعتها و استخبوا و اذا نجحت هايخرحوا من جحورهم و يقولوا انهم ماكنوش موجودين على الشاشات و لا خلف الميكروفونات لانهم كانوا في الشارع مع الشعب الكادح بينادوا بالثورة و يساهموا فيها

اصل ساعتها ماحدش هاياخد باله مين عمل ايه و هم طبعا احسن ناس تستغل الفرص اللي زي دي

صحيح بمناسبة استعراض القوة اسفه الكارتيه طبعا هم عملوه من وجهة نظرهم يعني لان دول طلبة حلوين و شاطرين و بيعرفوا في الكاراتيه فقالوا يفرجونا الكاراتيه

هل ممكن اذا ابدع اي طالب ايا كانت ميوله السياسية في اي مجال كان نقول مثلا الرقص الشرقي و جه وسط الجامعة وقعد يستعرض مواهبه الفنية دي

ياترى الاخوان هايزعلوا من حاجه زي كده و لا هايقولوا عادي و ايه يعني ده استعراض فني مش اكتر

و لا يمكن بقى ساعتها هايكون ليهم تفسير تاني

مش هم دول برضه اللي طلعوا علينا بالليل و قالوا مش هانشارك في المحليات و الصبح غيروا كلام الليل ده و قالوا هانشارك

مش بعيد عنهم بقى انهم يقولوا حاجه و يغيروها تاني يوم خلاص احنا اتعودنا على عدم المصداقية دي ... المهم بقى السادة المحامين بتوعهم يشوفوا الكلام ده

هم دايما بيشوفوا ان اي حد تاني غيرهم هو الغلطان انما هم على الصراط المستقيم على طول اللهم لا حسد يعني

و اسهل حاجه عندهم انهم يقولوا انهم مظلومين و معتقلين و مضروبين و ممسوح بكرامتهم الارض

دي حجة الضعيف دايما و اللي مالوش صوت و لا صورة حتى انه يعمل فيها المظلوم الغلبان يمكن حد يعطف عليه

و بكرة هاتبان الحقيقة اللي بتظهر كل يوم عن التاني و يتفضحوا اكتر و نخلص منهم بقى
‏قال همس الاحباب
فعلا عادتهم ولا حيشتروها
فعلا الكل طمعان فى البلد بس عايز الكعكة لوحده
بس مستنى لحد ما تيجى لحد عنده مش عايز يتعب فى الوصول اليها موقف الاخوان غير مستغرب فى الوقت الراهن لانها جزء من مسرحية سخيفة بين الاخوان والحكومة
فى الوقت الراهن مسرحية باطنها الرحمة والمودة وظاهرها العذاب والتنكيل والسحل والاضهاد
وفعلا وما الدنيا الا مسرح كبير
تتقاسمه الحكومة والاخوان ولا عزاء للشعب واليوم يومك يا قطة مكتوبالك
.واتبقى بطل قومى قريب
تحياتى خالد
‏قال R.O.U.R.O.U.
ana ma3 ana 7oor fi ra2you la2n 2l 2nse7ab kan metwaka3 mnhoum we kol dy mogarad mazaher msh aktar
wallah 2a3lm 3ashan 2h tany 2w fi masla7t min
‏قال The Alien
عادتهم ومن زمان
ومع اﻷسف الناس مش فاهمة دا مع إنه واضح وضوح الشمس

تحياتي
‏قال oceaneyes
وهما من امتى عملوا حاجة من اللى قالوها يا نانا ؟

!!!


وبعدين ما انتى فاهمة اللعبة بقى يا جميل ..بيشوفوا المصلحة الشخصية فيييييييييين وجرى وراها على طول ..يعنى استحالة هاتهمهم الاضرابات والناس الغلابة والحاجات الهايافات دى



الواحد مش عارف هايلاقيها من مين ولا مين


الله يرحم ايام زماااااااان ..وقت ما الحكومة فكرت تغلى الاسعار ولمجرد انتشار فكرة الاضراب عند الشعب تراجعت الحكومة عن قرارها ..انما دلوقتى ..الحكومة جتتها نحست خلاص


ماعلينا

روقى يا جميل


تحياتى

:)
‏قال hui mu han
غني معايا
بانو بانو على اصلكو بانو

اللي اتاكدت منه ان الاخوان مش مستعدين انهم يعملو حاجة حتى لوكانت لمصلحة حتمية في مصر طول ماالهيد مش هيتكب عليه الاخوان فعلو

وبعدين انتي عاوزة الاخوان يشتركو عشان يبقى في معارضة حقيقية على الساحة

المشاركات الشائعة