حتضرب . ولا حتبلطـــج ؟؟؟

اكيد كلنا كمدونين عارفين ان فى أضراب يوم 6 ابريل ان شاء الله

طبعاً كخطوة لتصحية الشعب اللى اصبح ميت وبياخد على قفاه وهو ماشى ضهره مقطوم من الاسعار اللى كل يوم فى زيادة والعيشة الذل اللى احنا فيها ... فى حد ذاتها جميلة جدا

لكن لحظة من فضلك ... كام واحد من الشعب عارف

احنا مجتمع المدونيين .. طيب احنا معظمنا اللى من أقاليم واللى خارج مصر اساسا ..... فى موظفين مسمعوش عنه ... وفى فلاحين مش عارفين يعنى ايه اضراب اصلا ومش بعيد لو رحت لواحد فيهم قولت له اعمل اضراب ومش تنزل الارض النهاردده .. تلاقيه بيبصلك من فوق لتحت و يخلى عياله يجروا وراك ويحدفوك بالطوب ... طيب الإضراب ده علشان يكون منظم ما هو لازم يكون فى تكاتف للشعب كله .... لازم تضمن مفيش موظف هيخرج من بيته ولا مهندس ولا طبيب ولا اى فئة من فئات الشعب .. علشان تقدر تعمل حركة شلل تامة للشارع ككل ... انما اللى احنا بنفكر فيه دلوقتى اثره مش هيكون قوى ... لان اقدر اقولك وبكل ثقة عدد المضربين لن يتجاوز الألف وإن الألف اضربوا اساسا ... اقدر برضه احدثك بنفس الثقة اللى فاتت ... ان فى ناس حتقولك انا هعمل اضراب ومش خارج من بيتنا وهعتصم .. وهتلاقيه نازل شغله فى معاده ولا كان فى اى حاجه ... نيجى لنقطة تانية وهى ان الإضراب ده حيأثر على مين ؟؟؟

اكيد مش على الحكومة ... لأن الحكومة لو خسرت فى اليوم ده مليون جنيه مثلا .. هتعوضه 2 مليون ... بتفصيل وتأييف قوانين تحت اختراع اى مسمى وكلنا عارفين الراجل بتاع تفصيل القوانين قاعد وجاهز تحت الطلب .... هترفع اسعار السلع الاساسية أكتر ما هى مرفوعة ورفعت ضغطنا معاها ... انا مش بقول انا ضد الإضراب ... بس الإضراب ده هيكون حاجه وقتيه ... يعنى يوم وهينتهى والحكومة لو خسرت هتعرف تعوض خسارتها كويس اوى ومن دمنا احنا ... بس تخيل الطبيب مش ينزل المستشفى .. كام حالة حرجة هيحصل لها ايه ... لو المهندس منزلش شغله ... ايه اللى ممكن يحصل ... طلبة المدارس كدا كدا بيهربوا من فوق السور وطلبة الجامعات بيروحوا يقابلوا فى الكافتريا فالفئة دى خليهم فى حالهم... انا من وجهة نظرى واللى عنده تصحيح ليها يتفضل ... ان الاضراب مش هو الحل ... احنا محتاجين نعمل حاجه اقوى واكبر حاجه تستمر علشان نقدر نأثر .. يعنى عمال المحلة وموظفين الضرائب العقارية ما اعتصموش يوم ورجعوا .... دول مش اتحركوا غير لما طلباتهم اتنفذت أصل يوم دى ما هى الحركة هترجع تانى يوم اللى غاب عن شغله هيتسجل غياب ويتخصم منه اليوم اللى غابة ويادار ما دخلك شر ... انا فرحانة اوى بالصحوة اللى احنا فيها .... وسعيدة ان فى ناس بتفكر وبدأت تتحرك وبتفكر تعمل خطوة ايجابية ... عايزين نقول للحكومة احنا اهوه ... لازم نبقى ايد واحدة ... لازم نكون موجودين فى صف واحد طلبة وموظفين وعمال وفلاحين ومثقفين ... جميع فئات المجتمع .. نقولهم احنا خلاص تعبنا من الغلاء اللى قطم وسطنا قرفنا من القوانيين اللى حبستنا جوا جحور ... عايزين نعمل حاجه تفيد فعلا وتجيب نتيجة فعلية ... من الاخر محتاجين اتحاد ... محتاجين نبقى صوت واحد صرخة واحدة لسبب بسيط إن همنا واحد

محتاجين تعليم افضل ... صوتك مش هيتسمع من يوم واحد اضراب

محتاجين نعيش كويس .. وكرامتنا محفوظة

محتاجين ناكل اكل من غير سرطان

محتاجين نشرب مية نضيفه مش مية ميت فيها حمير ولا مقلوب فيها باكورتات

محتاجين جو صحى من غير تلوث

محتاجين وطن يحس بينا ويحفظ لنا ولادنا اللى اكلهم السمك فى عرض البحار

محتاجين مصالح حكومية نضيفة مفيهاش فساد ولا موظفين مرتشين

محتاجين نقول لاء لغلاء الاسعار

من الاخر محتاجين نعيش كبنى ادمين

تفتكروا يوم هيعمل كل ده؟؟؟؟؟

احنا بدأنا نفكر .. صح .. يبقى لازم نوصل صوتنا صح