عـــيـــد ميـــــلاد بنتـــــى ...

زى النهارده من سنة بالظبط بدأت أول صرخات بنتى فى الدنيا ... أول ما نطقت برضه كانت بتخربش ... قطة مخربشة من اول ساعة اتولدت فيها ... كانت بتعترض على تعديل الدستور ... وفضلت تنونو وتقول لا يمكن ابدا .. الدستور يتعدل من غير ما يقولى ... نياوووووووو ... وبعدها بدأت كل لما تتكلم تخربش .. فى البداية بصراحة مكانش حد بيعبرنى لأنى طبيعى مكانش حد عارفينى ... بس برضه مش كنت ببطل وكنت باكتب اللى بيخطر فى بالى وفجأة لاقيت بنوتة جميلة كدا اسمها ايوية بتيجى تزورنى كتير وتسيب لى ردود فرحت بيها اوى ... بدأت اتشجع بصراحة وبعدين شوية لاقيت غمض عينيك محمد سمير قولت مش ممكن انا فى ناس بتعرفنى وبتيجى تزرونى .. ده ايه الهنا ده ... وفى يوم ما كتبت بوست فى كلنا ليلى لاقيت رئيس جمهورية نفسى ... انا قولت بس كدا حتتسلمى يا قطة النهاردة ده رئيس الجمهورية بنفسه هنا .... بس بصراحة .. طلع اطيب واجدع رئيس جمهورية قابلته فى حياتى ... ده على اساس انى قابلت رؤساء قبل كدا . و كمان كان اول واحد يقولى كل سنة والقطة طيبة ... ميرسى يا ريس على ذوقك وربنا يخليك للرعية وقططهم ... كمان فى ناس قابلتهم واتعرفت بيهم واتشرفت كمان بيهم .. وناس اثرت فى حياتى وعايشه بيهم وناس اول ما انزل بوست ادور على ردودهم اللى بحب استفيد منها ومن مواضيعهم ومن تجاربهم فى الحياة ..... كمان ناس مقدرش استغنى عنهم .... زى كلاكيت تانى وتانى واللى بجد لما بتكلم معاها بحس انى بتكلم مع اختى الكبيرة ولما بحس ان اختى وحشانى ومش عارفه اتكلم معاها بسبب غربتها بتكلم مع كلاكيت واقعد ارغى فى ودنها لحد ما تصدع وتقوم تاخد مسكن .... وكمان حبيبة قلبى آآبى اللى بجد دخلت قلبى بدون استئذان مش عارفه مش خبطت ليه .. تقريبا وقتها كنت بصلح الباب .... حتى لما الباب اتصلح قفلت عليها جوا قلبى حقيقى يا ابى اشهد الله انى احبك جدا جدا فى الله وبجد مقدرش اتخيل حياتى وانتى مش موجودة فيها ... ربنا يخليكى ليا .... وزى ما فى ناس حبتنى وانا كمان حبيتهم اوى وارتبطت بيهم اوى اوى ... كمان فى ناس هزأتنى ومسحت بيا الأرض .... سامعه حد بيقولى وهو ده وقته هرد عليه واقوله ايوا وقته ... اصل انا قلبى اسود ومش بنسى حاجه ... فى اللى دخل قالى روحى الهى يجى لك ويحط عليكى انتى واهلك ... بس القطة بنوتى الجميلة مش فتنت عليا وراحت قالت لاهلى انى جبت لهم التهزيق ... وفى اللى قالى انتى مريضة نفسيا روحى اتعالجى ... مش عارفه انا ايه اللى خلانى مريضة نفسيا فى نظر الكابتشن .. وفى اللى قالى يا قطة يا كافرة خرجتى عن دين ابائنا وأجدادنا يا زنديقة إذن سنأخذ من كل رجل قبيلة .... وفى اللى قالى يا عانس يا معقدة ... انتى جاية تطلعى عقدك علينا ... بصراحة هو مش قالى انا عندى كام عقدة وياترى ممكن يتفكو ولا لاء .. وبرضة انا مش عارفه انا عانس من انهى مقياس من وجهة نظر الأخ يمكن بمقياس رختر ... واخيراً وليس أخراً ...ايه ده انتى عندك سيبر يعنى انتى حرامية ... انا مش عارفه انا بسرق ايه من السيبر يكونش بسرق دخلى اليومى مثلا او بسرق النت واعبيه فى كياس واروح ابيعه فى السوق السودة لاء وايه اوعى تكتبى عليا حرف اقسم بالله هرفع عليكى قضية تشهير وأبهدلك فى المحاكم ... لووووول يا قطة يا مؤثرة الناس بقت بتخاف انك تكتبى عليهم وبيهددوك بالمحاكم ... نياهاهاهاهاها ...

بنتى حبيبتى كل سنة وانتى بتكبرى قدام عنيا وخربشى يا حبيبتى براحتك وانا هعملك بنفسى مانيكير وباديكير ... كل سنة وانتى قطقطوطة مخربشة بدون كلل او ملل .. كل سنة وانتى انيستى فى افراحى وفى احزانى فى مشاكلى وفى سعادتى .... طبعا اصحابى وحبايبى المدونين انا من غيرهم ولا قطة مخربشة ولا اى حاجه ... لما بحس انى فرحانة باجى اجرى عليكو واحكى لكو ... لما بحس ان فى حاجه مضيقانى ومزعلانى .. بفكر قبل ما اكتبها واقول هما ذنبهم ايه ازعلهم معايا لكنى بتخيل الجميلة فرنسا واستاذى الغالى الربان واحلى زعيم فى الدنيا زعيم كمورا مورا انا مش عارفه ايه البلد دى بس ما علينا وفاتيما احن قلب فى الدنيا مع انى عمرى ما قبلتهم فى حياتى ولا عرفتهم بتخيل كل واحد فيهم واقف قدامى و بيقولى

When you have problem remember me I will always beside you

مبكونش مرتبة الكلام واول ما افتح صفحة البوست باكتب اللى بخطر فى بالى وبلاقى كل اخواتى وحبايبى جنبى بيساندونى فى وقت ضيقى .. ياربى اشكرك على نعمتك هو فى احسن من كدا فى الدنيا ناس بتحبنى وبتفرح لفرحى وبتزعل على زعلى حتى وهما مش عارفينى .. مهما اوصف فى احساسى لا يمكن اقدر اوصله ..... ربنا يخليكو ليا جميعا يا اجمل اخوات واقرب اصحاب لقبلى فى الدنيا .. وعلشان انا بحبكو كلكوا وخايفه اذكر اسماء احسن يضيع منى اسماء تانية علشان كدا النهارده الدعوة عامة للجميع

اخواتى وحبايبى المدونين الحلوين

النهاردة فى عيد ميلاد بنتى الاول كلكوامدعوين لحفل ساهر حتى الصباح الباكر

واللى بيحبنا ميضربش نار فى فرحنا علشان العروسة حامل

وفى نهاية الحفل احب اتوجه بالشكر لكل السادة الحضور واخص بالشكر

لكم منى جميعا كل الحب والود