لطشة خفيفة .. طيب مش تاخد بالك

خلصت شغلى ومروحة عادى جدا زى كل يوم ماشية اتفرج على المحلات واستغرب على التخفيضات اللى نازلة لـ 60 % فى جميع محلات الملابس معقول .... عقبال يارب لما كل حاجه سعرها ينزل كدا ... فجأة والاقى نفسى محشورة بين عربيتين ... عربية واقفه والتانية جاية ماشية من جنبى ... الطبيعى انى اقرب جنب اللى واقفه علشان اللى ماشية جنبى متخبطنيش ... والاقى اللى قربت منها بتتحرك بس بالراحة جدا ... وقفت لاقيته وقف ... طبعا العربية اللى جنبى من الناحية التانية عدت من زمان ... بس اتفتح بعدها سيل من التكاتك الهى ربنا يقصف اجلهم قادر يا كريم ... لما وقف تانى قولت عادى بقى هو راكن على جنب وانا مشيت فى الجنب ده يعنى مش هاروح ارمى نفسى تحت العربية لانه كدا كدا واقف ... وفجأة الاقى الاخ برضه بكل هدوء وكل برود جه من ورايا وراح لاطنشى لاطشة خفيفة اسفرت عن اصابة رجلى الشمال بجرح برضه خفيف الحمد لله ... وبدون ما اشعر بنفسى واروح متوجهه له اااه يا غبىىىىىىىىى ... يا حيوان يا اللى مدينيك رخصة .. هما دلوقتى بيدوا رخص لذوى الاربع ... طبعا كأنى كنت بنادى فى مكرفون ... وألاقى الشارع كله اتقلب ... جم اتنين ستات .. ايه يا بينتشى ... فى ايه يا حبيبتشى .... البتاع اللى فى العربية ده خبطنى ... واحد واقف طيب الحمد لله جت سليمة ... قدر ولطف ... ايوا يعنى ايه جت سليمة يمشى يطلش فى خلق الله وتقولى لى جت سليمة ... طنط اللى جت هى واللى معاها .. ما هما كدا يا حبيبتشى علشان ركبو عربيات يبقا خلاص طلعوا السما ... ماشيين يخبطوا فى الناس .. طبعا الاخ نزل ... فى ايه بس اهدى كدا ... انت تخبطنى وتقولى اهدى ده انت بارد اوى .. وانت لسانك طويل اوى ... ايه يابنتى فى ايه بالراحة شوية حرام عليكى ... طنط التانية جرالك ايه يا حبيبتى ... رجلى يا طنط تقريبا اتعورت ... لاقيته بيقولى ورينى كدا ... فى الحلال يا معلم هى سايبه ولا ايه ( أحم أحم ) .. أوريك ايه انت بتقتل القتيل وتمشى فى جنازته .... انا مبوريش رجلى لحد ... عمو اللى واقف معلشى يا بنتى انتى شايفه الشارع عامل ازاى وغصب عنه قولت له بمزاجه مش غصب عنه .. ورحت حكيت لهم كلهم اللى حصل من الاول ... راحت طنط باصه له بصة احتقار جامدة اوى وقالت له روح يا شيخ منك لله .... طبعا هو مش رد عليها وفضل يقولى انا اسف والله ... ايوا يعنى واسفك ده هيعملى ايه .. وحياتك لاخد رقم العربية ... ورحت مطلعه الموبايل علشان اسجل عليه الرقم ... لاقيته بيقولى طيب ممكن بس رقمك علشان ابقى اطمن عليكى ... يا حج متشكرين باب بيتنا مفتوح اربعه وعشرين ساعه وبابايا موجود فى اى وقت ... احم احم .. لا طبعا مبديش حد رقمى انا لو رجلى جرى لها حاجه هوديك السجن ... راح قالى طيب انا اسف وده الكارت بتاعى ... وابص فى الكارت الاستاذ خلف خيلف خلاف المحامى .... طبعا ده مش اسمه بس هو مش عارفه مين كدا المحامى ... . جسر السويس .. بعد ما بصيت فى الكارت اديته له تانى .. لا مش باخد كروت من حد .. بس جسر السويس وايه اللى جايبك عندنا هو احنا ناقصين مش كفاية اللى عندنا كمان بيستوردوا لنا .. وطبعا كل واحد وقف يديله فى جنابه كلام من جميع الجهات وده واقف زى الفار المبلول ... انا شوفت المنظر كدا قولت طيب ... فتكوا بالعافية ... طيب استنى ابقى اطمن عليكى ازاى ... وانت مالك انت تطمن عليا من بقيت عيلتى مثلا والله عجايب .... وطبعا دخلت اول صيدلية قابلتنى ... لاقيته جرح عادى الحمد لله مش جامد ... والدكتور اللى هناك طهره وحط لى عليه لازق وقالى متقلقيش دى حاجه بسيطة .... وروحت البيت كأنى عامله عمله .. مش عايزه حد يشوف حاجه ... بس اتقفشت وسمعت الاسطوانة اللى كنت عاملة حسابها .. وانتى مش تمشى على الرصيف ليه .. هما عاملين الارصفه ليه وشوية ارشادات عن الطريق ووصف فى مميزات الرصيف كأنى هروح أتجوزه ... طيب ما بعد الاسطوانة الجامدة دى يا ماما .... ما تدينى مصروفى وسندوتشات المدرسة علشان يدوب كدا الجرس ضرب ... طيب اتريقى بس خليكى عارفه انا زعلانة .... وفى الوقت اللى زى ده لازم الواحد يستغل صحابه يبقى مين الى تنفع فى الموقف ده هى نهى مفيش غيرها ... رحت متصلة بيها .. فضلت تسالنى شوية حاجات ... وفى الاخر قالت طيب كويس ده جرح عادى مفيش اى قلق ... طيب ما انا قولت لك الصيدلى قالى كدا ... هو انتوا مش بتثقوا فى بعض ولا ايه .. ولا علشان انتى خريجة طب لازم تعمليهم علينا ... خلاص ياحجه ربنا يهديكى على الطيب ابقى تعالى لى المستشفى الصبح برضه علشان اطمن ... رحت لها المستشفى لاقيتها عملت لى نفس اللى الصيدلى عمله برضه ... ولاقيتها بتقولى ابقى تعالى لى من وقت للتانى بقى ... يا حبيبتى هو انا فاضيه لك علشان اجى لك من وقت للتانى ... هى مرة ومش هتعود ده حتى ريحة المستشفى وحشة ... وسبتها ومشيت وهى قاعدة فاتحة بوئها من غير ما ترد ولا كلمة
طبعا انا سامعه حد بيقول الله اكبر حى على الجهاد ... دى بركة دعاوينا عليكى ... احب ازعلهم واقولهم انا كويسة جدا وزى القردة كمان وعلى قلبكوا ان شاء الله ....
صحابى وحبايبى المدونين .... متقلقوش ومتنسوش انى قطة يعنى بسبع أرواح
لكم جميعا كل الود