قـصـاقـيــص ورق

كنت بدور النهاردة على صورة الإقرار الضريبى بتاع السنة اللى فاتت علشان اشوف المبلغ اللى كان فيه كام .. اصلى ناوية قريب اروح اعمل الاقرار بتاع السنة دى بقى دعواتكو كدا ... قعدت ادور عليه ابدا مش لاقيه حاجه ... اصلا انا كل اوراقى من اول شهادة الميلاد لحد شهادة التخرج محتفظة بيها داخل شنطة صغنونة مكتوب عليه always my heart اشمعنا الشنطة دى مش عارفه تقريبا كان جاى لى فيها هدية مش عجبانى فقولت اشيل فيها الاوراق الخاصة بالحكومة عقابا للهدية اللى مش عجبتنى .... وفضلت ادور وادور لحد ما جالى دوار البحر ولا لاقيت حاجه ... فى النهاية لاقيت شنطة صغنونة لونها ابيض جوا شنطة هاند باج ومليانة ... إيشى ورق متطقع على ورق شكولاتات على ورق بسكوتات على علبة بيبسى كنز فاضية ... وكمان علبة سجاير فيها سجارة واحدة بس جت لى منين دى ما علينا خليها على جنب دلوقتى .... وفضلت قاعدة اقلب بقى فى الحاجات دى واتنهههههههههههد وافتكر كل قصقوصة ورق بحد معين من صحابى ... لاقيت فيها جوابات كتيير لصديقة رحلة كفاحى وانتمتى ذاك الوقت أبتهال واللى مش عارفه هى فين دلوقتى ... لأننا بعد ما اتخرجنا فضلنا نتصل ببعض ونبعت لبعض جوابات ... وفى النهاية اتنقلوا من مطاى راحوا بنى مزار ايه الفرق مش عارفه وانا اتنقلت من عند التأمين الصحى روحى سكنت فى مكان تانى خالص ايمو عارفه ... احم احم ما علينا ... والدنيا اتلخبطت عندنا احنا الاتنين ومنعرفش عن بعض حاجه بقالنا كام سنة .....
القصقوصة التانية لاقيتها مكتوب فيها ... احنا صحاب صح .. امل 3/2 ... بصراحة مش فاكرة مين امل بالظبط وكان انهى 3/2 ياترى ابتدائى ولا اعدادى ولا ثانوى .... اللى يعرف امل بقى يبقى يقولها صح احنا صحاب بس اللى هيجننى انى عمرى ما كنت فى تالته تانى انا على طول يا اما اول يا اما رابع ... تانى دى جت منين مش عارفه ....
علبة البيبسى كنز بقى عندى تقريبا من سنتين وكانت من بور سعيد تحديدا تحديدا من النورس علشان اللى يروح هناك يبقى يفتكرنى ... اه والله بيبسى من بور سعيد للشرقية وفاضية على اساس انى ساكنة فى هونولولو معندناش ..... اما بقى علبة السجاير اللى فيها سجارة واحدة بس دى فهى اللغز اللى لو حليته اكيد هوصل للأمير .. قصدى لصاحبها يعنى .... بس يبقى مين وليه اخدت علبة السجاير بتاعته وليه الواحدة دى لسه فيها لحد دلوقتى ... عموما عادى حتتشرب محدش يقلق .....
قصقوصة تانية مكتوب فيها شوية عتاب كتيييير بس اللى لفت نظرى الجملة الاخيرة اللى مكتوب فيها هموت وتبطلى العصبية الى فيكى دى ... حاولى تتعاملى مع اى موقف بهدوء ومتبقيش تاخدى الكلام على صدرك ابقى نفخى فى الهوا دى حتى السما واسعه علشان مش تزعلى نفسك ولا تزعلى حد منك ... دى كانت من احمد كان زميل دراسة بس كنا بنتعاتب على ايه او ايه الموقف بالظبط مش فاكره... واشمعنا كتب لى فى ورقة هو ايامها مكانش فى نت ولا اس ام اس .. وبعدين ايه انفخ فى الهوا دى على اساس انه كان بيعزم عليا بسجارة حشيش ... هو فين دلوقتى .... برضه مش عارفه
القصقوصة دى .... لاء دى مش قصقوصة ده جواب كبير ومكتوب فيه كلام كله من عينة انتى اللى ليا انتى بس فى الدنيا دى انتى بس ... وده انا اللى كنت كاتباه لرحاب بنت عمتى ... كنا زعلانين من بعض بس مش فاكرة ليه لان تاريخ الجواب مكتوب الجمعة الساعة 5 الفجر 12/5/1998... انا دقيقة فى الحاجات الغرامية دى بكتب مواعيدها بالظبط والصبح كنت ناوية اروح ارميها ليها تحت الباب اه والله زى روميو كدا ... هو كان بيرمى لها جوابات ولا ورد ما علينا ... المهم هى اللى جت صحتنى من النوم وبعدين قولت ما احنا اتصالحنا بقى مش مديالها الجواب ... اساسا احنا زعلنا دى بيكون زى الاطفال اللى بيلعبوا مع بعض فى الشارع يضربوا بعض وبعد ثوانى يلعبوا مع بعض تانى ..... واثناء وانا ماسكة القصاقيص والمستندات المهمة اوى دى ... لاقيت ماما داخله تقولى انتى بتلمى الزبالة ولا ايه ... ايه يا ماما مش تصوتى قصدى تخبطى ... ايه يابنتى اللى انتى عاملاه ده .... بدور على البتاع .... لاقيتها بتقولى البتاع ... طيب سيبى البتاع ده دلوقتى وتعالى علشان تفطرى ...
طبعا فى حاجات كتير مش افتكرتها .... فكنت اللى مش افتكره اشيله ارميه فى جنب واللى افتكره ارميه فى الجنب التانى وفى النهاية جمعتهم كله تانى وحطيتهم جوا الشنطة ... ورحت علشان افطر مع مامتشى اللى بهرتنى بالفطار اللى كانت عامله لى اللى ياكل محافظتنا والمحافظات المجاورة جنبها الا وهو بيضة مسلوقة ... ولسه لحد دلوقتى ملقتش البتاع .... حدش شافه بقى ؟؟؟؟؟

تعليقات

‏قال انين الحزن
ياقطه

حلوة اوي القصاقيص دي واحلي ما فيها القصقوصه الكبيرة قصدي الجواب الكبير

الا كان تاريخه 12/5/2008 ياعم الدقيق
اسلوبك جميل اوي بيخطف الواحد خطف كدا
اول تعليق انا واخد بالك انت

وزة

سلامووووز ياقمر
‏قال Desert cat
انين الحزن
معلشى اصلى ايما سابقة سنى
هههههههههههه
غلطة مطبعية معلشى بقى الدقة تحكم
طبعا شرفتى اول تعليق يا جميله
‏قال son's egypt
السلام عليكم
كلنا بتحفظ باوراقنا في شنط ودايما بتكون صغيرة
يعني انا من يومين شفت كده وانا بقلبفي الاوراق شهادتي من ابتدائي لحد اعدادي مثلا
وقعدت افتكر المدرسين واللي كان بيحصل
علي فكرة اوعي تنسي الضرائب مصلحتك اولالا
‏قال ملك الكبدة
و الله انا بحسدك

طول عمري بحاول يكون لي قصاقيص

وكل ما اقرر اعمل قصقوصة اقول ايه الهبل ده

دلوقتي

كل ماجي افتكر ذكرى حلوة الاقيني لوحدي فيها

تحياتي
‏قال nigro
أزال المؤلف هذا التعليق.
‏قال أحمد جلال
معلش بقالي كتير مباجيش هنا عشان بقالي أسبوع مبعدش عالجهاز ..الله يحرق الدراسة.
--------
شكل محمد شومان عامل شغل جامد بالعمة والشاي بلبن..كويس أوي إن عندك قصاصات زي دي..حاجة جميلة إن الواحد يفتكر إيام زمان..بس المهم تكوني لقيتي الإقرااااار.
السلام عليكم

كل واحد عندو الصندوق او الشنطة ديه
وبتكون جميلة ايو لما الواحد يفتحها ويفتكر اللي كان فيها من زمان

علي فكرة انا كنت في 3 /2 في أبتدائي وإعدادي وثانوي

سبحان الله ومركزتش في الحكاية ديه غير بعد موضوعك

أصل اخر الزكريات كانت ثانوية عامة...3/2 علمي...وبدأت ابقي اعصر الزاكرة لغاية ما افتركت التلاتين التانيين


وبلاش (ميش) كتير عشان دي علامة مميزة في الشراقوة


اصلي خريج هندسة الزقازيق وفاهم بقي


سلام
‏قال oceaneyes
ياااااااااااااااارب تلاقى البتاع يا قطقوطة

دورى انتى بس عليه كويس وهاتلاقيه ان شاء الله

وبعد كدة ابقى عينى الحاجات المهمة دى فى مكان تبقى متأكدة انك لو دورتى فيه تانى هاتلاقيها ان شاء الله



ابقى طمنينى لاقفيتيه ولا لا



صحيح


الاحتفاظ بالذكريات المتمثلة فى الورق وعلب البيبسى والحاجات دى صحى جداااااااااااا

:D



وحشتينى يا جميل

ويارب تكونى بخير



:)
‏قال صوت من مصر
علبه السجاير كان نوعها ايه عموما مش فارقه هاتى السجاره
ههههههههههههههههه
على فكره انا محتفظ بحاجات غريبه برضه زى اى بنى ادم
تفتكرى دنيتنا بتختلف عن شويه قصاقيص بس بدل ما تكون ورق بتكون ذكريات
‏قال بحبك يامصر
طبعا كل واحد مننا تقريبا عنده شنطه زى شنطتك وانا بع اما قرأت البوست ده هقوم افتش فى شنطتى وافتكر معاها ذكرياتى وعلى فكره انا الاقرار عندى
ههههههههههههه
ومش هتلاقي قصوقصتك اللي في الصل بتدوري عليها
‏قال فاتيما
قطتى الحلوة
أيه دا إقرار ضريبى مرة واحدة دا أنا مصاحبة سيدات أعمال بقى و انا مش عارفة ..
ان شاءالله تلاقيه ..
بس الحقيقة ان المفروض كل واحد يبقى عنده شنطة قصاقيص .. ذكرياته متجسدة فى ورق ووردة مجففة و ورق لف هدايا وكروت صغيرة و.. و..
أختك بقى عندها دلاوب حيطة مكون من 7 رفوف كلها ذكريات و كراكيب زى بتاعة نهى محمود
بس نهى كراكيبها نفسية أدبية ..
انا بقى كراكيبى مادية بحتة .. ورق وكشاكيل محاضرات و اتوجرفات و كل ما يخطر لك على بال ..
هما الى باقينلى من العمر الى فات و بيونسونى للعمر الى جاى
تحياتى
‏قال قلوب بتغنى
صباحو عسل يا احلى قطه
انا جيت ارد الزياره لقيت بنوته لذيذه بتكتب عن قصاقيصها
والى كل واحد فينا عنده منها قصاقيص كتير فى الذاكره حتى لو مكنتش موجوده فشنطه
ودورى على البتاع ويارب تلاقيه
وكررى الزياره يا جميل
‏قال akeed
تحياتى على البوست الرائع والمدونة الجميلة دة اول مرور عليها ...
الموضوع جميل وفعلاكل واحد منا محتاج يراجع اوراقة القديمة ويبحث فى ذكرياتة ممكن شىء فى الذكريات يغير حاجات كتير ويعيد الثقة بالنفس ...

تحياتى

أكيــــــد
‏قال بنت القمر
طبعا كلنا عندنا صندوق عبيط كده مليان ذكريات وصور النس احنا مش فاكرينهم وبننستغرب اصلا معقوله اد كده كدا كتعلقين بيهم؟؟
وازاي اتفرقنا عنهم ونسيونا ونسيناهم
علي فكرة بوست العريس حلوووو اوووي
قريته في وقتها علي ريدر بتاعي ونسيت اعلق
بس تحفه
حلو الخط الانساني ده
تحياتي
‏قال Abd-Alrahman
هههههههه
بجد جميل اوي لما الواحد بيفتح حاجاته وكراكيبة القديمة
ويدور فيها بيلاقي عمرة كله فيها
بس اكيد مش في الاقرار الضريبي

انا بقي عايز اعرف حاجة
علبة السجاير دي جت منين
واشمعني سيجارة واحدة بالذات ؟؟؟

وياتري انتي في يوم كنتي بتفكري تشربيها
وبعدين رميتيها ولا اية ؟؟

هههههههههههههههههههه
بصراحة حاجة تشد الانتباه
قال علبة سجاير بسجارة واحدة

(ايقون ميت من الضحك)

جميلة اوي طريقتك في الكتابة
اعذريني علي عدم الزيارة لاني بصراحة مشغول اوي اوي

عبدالرحمن
‏قال زعيم كمورا
تلاقيه جه يصيف مع ام فاروق




مع انى مليش فى حكاية القصاقيص
بس بجد احلى لحظة ممكن الانسان يعيشها هى لحظة الماضى
لما بتفتكرى حد معين كنت تعرفيه
او تفتكرى موقف معين حصلك زمان
من مجرد لمسك لحتة ورقة مثلا
ويبدء شريط الذكريات بالمرور قدام عنيكى
وتعدى مع نفسك كدة وتندمجى فى الموضوع
وتنسى انتى كنتى بتعملى ايه اساسا
انابنتهز اى فرصة وببقى لوحدى واقوم مشغل الشريط دة
بحس انى مرتاح نفسيا وانى هادى
وببقى مقضيها ضحك
لما بفتكر موقف محرج مثلا حصلى وفتكر شعورى ساعتها وانى كنت عايز الارض تنشق وتبعلنى ولا طيارة سواقها يكون جدع
يعملى زى معمل لرامبو وينزلى الحبل واطير من قدام الناس الى وقفها
ومثلا لما بفتكر صحابى زمان الى الدنيا فرقتنا عن بعض

فعلا اجمل نعمة ربنا عطهالنا
نعمة الذاكرة الى بتخزلنا كل لحظة بنعشها


الحمد الله على كل شئ
بجد ياقطة اسلوبك هايل ولذيذ
انا قريت البوست بتاع مية مرة
وكل ماجى اكتب رد
اقوم راجع وقريه تانى


تحياتى ياقطة

قبل مامشى اشوفلك البتاع مع ام فاروق
ولا انتى لاقتيه

سلااااااام
dear cat i miss your funny joks and your since of hummer you had any way ill talk to you by phone soon but now i have to learen how to use my english lab top arabic word its soooo diffecult i love you
‏قال Desert cat
son's egypt
بالظبط الواحد لما بيشوف حاجه قديمة وخصوصا من ابتدائى يكون تاثيرها جميل جدا
بالنسبة للضرايب مش ينفع انساها دى غرامة عشر آلاف جنيه
بس انا لسه بدور على البتاع بقى
‏قال Desert cat
ملك الكبدة
بتحسدنى لعى شوية القصاقيص اذا كنت انا مش لاقية الناس ولا بقيت عارفة عنهم اى حاجه
عموما اهو احسن من مفيش خالص
( وش مطلع لسانه )
طبعا بغيظك ودى عايزة كلام
‏قال Desert cat
Nigro
طبعا الذكريات شئ جميل والاجمل لو الاشخاص اللى لينا ذكريات معاهم لسه موجودين فى حياتنا كمان
تحياتى
‏قال Desert cat
أحمد المصري
الله يحرق الدراسة 100 مرة ياباشا
بس معلشى سؤال حلزونى
هو يبقى مين محمد شومان ده
معلشى اصل اختك ملهاش فى السياسة
‏قال Desert cat
الراقص مع الذئاب
طالما انت كنت تالتة تانى يبقى تعرف امل ... عموما ابقى سلم لى عليها
ومش تقول يا راجل انك كنت هندسة الزقازيق كنا فرشنا لك الارض ورد وفل وياسمين
عموما تتعوض
‏قال Desert cat
oceaneyes
حبيب قلبى
اخبارك ايه وحشانى بجد
انا لحد دلوقتى مش لاقيت البتاع انا قلبت الدنيا فى البيت لسه هقلب عاليها واطيها فى الشغل وربنا يسهل والاقيه
شكرا لاهتمامك يا حبيبة قلبى
‏قال Desert cat
صوت من مصر
علبة السجارة
LM
عايزها بجد
ده انت اهون عندك تنزل تشترى 10 علبات سجاير بدل المواصلات والجمارك وضريبة المبيعات وكل اللى هدفعه لك على السجارة اللى فى العلبة
‏قال Desert cat
رئيس جمهوريه نفسى
لا أظن ياريس
تفتكر انت ؟؟
‏قال Desert cat
بحبك يامصر
طيب ما تبعته لى مع اى حمام زاجل ينوبك ثواب علشان مش اروح اعمل الاقرار الجديد بمبلغ اعلى من المبلغ الاولانى ولا اقل بكتير منه
‏قال Desert cat
الفجر الباسم
طيب ليه كدا بس
ده حتى تفائلو الخير تجدوه
‏قال Desert cat
fatima
حبيبتى ام يوسف ازيك
هو سيدات اعمل على ادهم لسه بيبتدوا بس سيبك انتى شوقتينى للكراكيب بتاعتك
الواحد لما بيقعد مع نفسه ويشوف الحاجات دى بتتقلب فى عقله ذكريات كتير اوى وخصوصا ذكريات الطفولة
محبتى ليكى يا قمرى
‏قال Desert cat
قلوب بتغنى

حبيبة انا خلاص هتلاقينى عندك كل يووووم
البتاع مازال جارى البحث عنه
على من يجده يتوجه بيه الى قطة الصحراء وشكرا
‏قال Desert cat
akeed
راى حضرتك صح
وتعرف كمان حاجه لما الشخص مننا بيكون فى احلك ظروفه ويفتكر موقف قديم حصله بيرجع يبتسم للدنيا
لان الحياة مش على وتيرة واحدة
احتراماتى
‏قال Desert cat
بنت القمر
تقريبا نفس اللى دار فى تفكيرى لما شوفت القصاقيص اللى عندى
وافتكرت صحبتى اللى مكنتش باكل غير معاها ومفيش واحدة تروح مكان من غير التانية وكل لحظة ازاى كانت بتجمعنا سوا ودلوقتى هى فين وبتعمل ايه مش عارفه
بالنسبة لبوست العريس طبعا شرف ليا انك تقرى حتى لو سطر من مدونتى
تحياتى
‏قال Desert cat
Abd-Alrahman & NOUR
طبعا جميل ان الانسان فعلا يدور فى ذكرياته القديمة ويحس انه كان عايش حياة تانية خالص وكان اللى عايش دلوقتى واحد تانى غيره
بالنسبة لعلبة السجاير هو فعلا كان شكلها متقلبة من بس صدقنى والله مش فاكراه عموما
عموما يا جماعة محدش ينقل للسجارة هم دى زمانها دلوقتى اشتريت فى الحمام عااادى
شرفت البلوج يا فندم
ويارب دايما منورنى
‏قال Desert cat
زعيم كمورا مورا
طيب ما تبعته لى اشوزف المبلغ اللى كان مكتوب فيه كام وخلاص وبعد كدا ابعتها تانى لام فاروق
مش تقلق مش هخليه يتاخر
يا فندم الذكريات دى خصوصا لو ذكريات حلوة بتكون دافع دايما للانسان فى مواصلة حياته كما يحب وكيف يشاء
احترامى وتقديرى
‏قال Desert cat
كلاكيت تانى وتانى
حبيبة قلبى انتى وحشانى اكتر
ووحشنى كمان صوتك
بوسى لى أمر لانه وحشنى جدا وكمان لينا
انا متاكد لو راجعنا تاريخ حياتنا كله حتلاقى انى كل الى بيفضل معانا ذكريات متناثره عن ايام الطفوله وايام الشباب بنستعيديها فى اوقات معينه ومش دائما وابدا تفتكرى فلاشات الذاكره دى اختلفت عن قصاقيص الورق بتعتك
‏قال زعيم كمورا
يعنى عايزانى اطلع البتاع من المية واخليه ينزل لغاية فاقوس
دة حتى يستبرد دمى
بس ماشى من عنية ياقطة
اول منلاقى ام فاروق
ادعلينا بس نلاقيها احسن دى تايهة بقالها قرنين
ولفينا عليها المنطقة والمناطق المجاورة
ومافيش اثار باينة
بس اوعدك اول منلاقيها حخليها تبعتلك البتاع

مهو فعلا لولا الماضى بحلوه وبمره مكنش حيبقى فيه حاضر
كنا حنفضل محلك سر
ومكناش حنقدم فى حياتنا
بس انتى عارفة اهم حاجة فى المووضع كله اننا نتعلم من الماضى
وميبقاش مجرد ذكرة
نفتكرها

تحياتى ياقطة
‏قال شريف طلال
رحله البحث عن البتاع
هههههههههههههه
أحسن حاجه فى الدنيا الذكريات
احتفظى بيها لحد ما يبقى عندك 70 سنه كده ان شاء الله
تحياتى
‏قال فرنسا هانم
ايه يا بنتى ده انتى مش فاكره حاجه خالص ؟؟؟
هو حد خبطك على راسك ولا ايه ؟
دى مش فكراها ودى مش فاكره بتاعه مين وده مش عارفه بتاع ايه
ربنا يستر وتقومى الصبح تروحى السيبر تعرفى طريقه
عارفه يا نانا
الرجل او الست العمليه
بتكون ذاكرتهم فى الاشياء البسيطه ضعيفه
لان تفكيرهم اكبر منها
‏قال الربان
تحياتي

الله يكون في عونك....لكن حقيقي القصاصات بترجعنا الي الماضي بكل ما فيه.

المهم (البتاع ) أقصد الاقرار الضريبي اعتقد ان ممكن يكون في محل عملك...محفوظ هناك.

طبعا انت تعلمي اكثر مني لكن ياريت تعملي نسخة اليكترونية علي الفلاش ميموري...و تحفظيها عندك...لانها بتنفع
حتي لو كنت بعيدة عن المنزل.

تحياتي و ان شاء الله تجدي صورة الاقرار.
بالمناسبة هناك دعاء مأثور يمكن يساعدك
في ايجاد الاقرار:

اللهم اجمع علي ضالتي.....


تحياتي و تقديري.
‏قال Desert cat
رئيس جمهوريه نفسى
انت تعرف اساسا انى لما بفتكر طفولتى والايام اللى مريت بيها زمان واقرنها بدلوقتى بحس ان اللى عايشه دلوقتى دى واحدة تانية غيرى او الطفلة اللى كانت زمان دى مش انا ... المهم حد فينا مختلف حالة شيزوفرنيا غريبة
بس انا كل الظروف من حواليا اتبدلت والاحوال اتغيرت علشان كدا حاسة باغتراب
تحياتى
‏قال Desert cat
زعيم كمورا مورا
هههههههههههههههه
يارب دايما منور البلوج يا زعيم
‏قال Desert cat
شريف طلال
دى رحلة بحث مضنية
انا هبقى اكتب فى وصيتى ان القصاقيص تتوزع على الورثة
دى فيها حاجات من ابتدائى والله
وبالرغم من اننا اتنقلنا فى اكتر من مكان بس برضه لسه موجودة
تحياتى
‏قال Desert cat
فرنسا هانم
اه والله عاملة زى اللى فاقد الذاكرة
بس هعمل ايه انا اتحولت فجأة من البحث عن الاقرار لمراجعة الذكريات ... فالدنيا بطبيعة الحال اتحولت عندى ...
وبعدين انا من النوع اللى بيفقد الذاكرة بسرعة
ويارب يخليكى ليا ودايما رافعه معنوياتى كدا
منورانى يا احلى رئيسة جمهورية
‏قال Desert cat
الربان
هو فعلا المفروض انه يكون فى الشغل بس انا ساعات بكون فى اى مصلحة حكومية بخلص اوراق وارجع البيت مباشرة وبالتالى ببقى اشيل الاوراق احيانا فى البيت ... بالنسبة للنسخة الالكترونية هى طبعا فكرة جميلة ولازم انفذها فى كل حاجه عموما مش الاقرار بس المفروض يبقى كل الاوراق ..
واشكر حضرتك جدا على الدعاء الجميل ده
احترامى وتقديرى
جربي تسألي جوجل



وهاتيلك شنطة اكبر شوية
لسة في قصاقيص جاية كتير
البتاع؟

و الله نهاية البوست بتاعك فكرتنى بالقصيدة الشهيرة بتاعت احمد فؤاد نجم

قصيدة والله مشهورة جدا اسمها البتــــــاع

لما تسمعيها تحسى ان لفظ البتاع ممكن يشمل كل ما نقصدن وكل ما لا نقصد، وكل ما نذكر و تقريبا كل ما نسينا

احيانا بنستعمل لفظ البتاع بشكل بليغ عشان نتوه نفسنا عن عمد مع اننا عارفين البتاع فين و البتاع يبقى ايه بالظبط

ربنا يهدك يا احمد يا فؤاد يا نجم
‏قال david santos
Hello, desert cat!
Thanks for your posting and have a good week.
انا عاملة ذيك كدة بحب اشيل حاجتي لوحدها بس في درج بس برضه بتدوخني وانا بتفحصها
‏قال Desert cat
اسكندراني في الغربة
لاء مبحبش اسال حد غريب على حاجتى
ومتاخفش الشنطة بتكبر وبتصغر لوحدها
اصلها تتمدد بالقاقيص وتنكمش بالأوراق الحكومية
‏قال Desert cat
Omar... [ خروشات ]
اه انا كنت فعلا فاكمرة قصيدة زى كدا اسمها البتاع
بس معنى كلمة البتاع بقى هبقى اسال فيه لبلبة ان شاء الله
‏قال Desert cat
david santos
thank's mr david
‏قال حواء
حلوة القصاصات دى مهما كنا مش فاكرين هى من مين كفاية بتخلينا نسرح لأيام المذاكرة والصداقة اللى بجد وتخلينا نقول ياترى هى دى كانت عشان كذا ولا .. لا .. دى كانت بسبب كذا ... يعنى بتخلينا نفتكر كل حاجة مش حاجة واحدة .. تحياتى
‏قال Desert cat
أنا وهي
ازيك يا جميل
كلنا تقريبا عندنا القصاقيص دى بس المهم الذاكرة بقى
تحياتى ليكى يا قمر
‏قال Desert cat
bocycat
بالظبط كدا
اى واحد مننا بيشوف قصوصة من ذكرياته بترجعه لاحلى ايام
تحياتى
‏قال Foxology
بوست جميلة جداااا يا قطة والله والأجمل انك محتفظة بالقصاقيص وبتحاولى تفتكرى وقت كل قصقوصة فيها لكن يا ترى انتى لقيتى الشنطة دى بالصدفة ولا فعلا كنتى عاوزة القصاقيص وانتى مش واخدة بالك ؟؟؟
‏قال Desert cat
Foxology
هو انا كنت بقلب فى كل حاجه ... ولما شوفت الهاند باج قولت افتحها لعل وعسى وبالتالى وقعت فى ايدى القصاقيص
تحياتى

المشاركات الشائعة