لكم الله يا ولاد مصر
بالرغم من علمهم بالمخاطر اللى هيتعرضوا لها
الا انهم فضلوا المخاطر عن قلة الحيلة وقعدتهم فى البيت جنب اهاليهم زى البنت اللى مستنية العدل
بالرغم من الحلم الملحق به شبح يهددهم فى كل ثانية
الا انهم خاضوا التجربة
واليوم يعودون فى اكفانهم داخل صناديق ... مغلفة بالحسرة والألم واللوعة
حتى الناجون أنكروا الجنسية
ادعوا انهم عراقيين يمكن حلمهم يتحقق منه لو جزء
على فين يا وطن باولادك
بتجبرهم يكرهوك ليه ؟!
بتجبرهم يتخلوا عنك ليه وانت اللى محتاجهم ؟!
علشان ايه قلوب الامهات دى تتحرق ؟؟!!
ذنبهم ايه يتحرموا من الزهرة اللى اتزرعت وحملوها ..... شهور وشافوها قدامهم بتكبر يوم ورا التانى ... حرموا نفسهم من قوتهم علشانهم .... كل واحد بيكبر فى السن وشايف ابنه بيجسده ... وبيحلم معاه انه يحقق اللى مقدرش هو يحققه ...
كل ده يتقتل فى لحظة .... وكأن ذنبهم أنهم أبناء هذا الوطن
اهل كل شاب غريق
عذراً فأولادكم ماتوا غدراً
عذراً يا أمى لن ترى أبنك يعود ليسدد الديون التى اقترضها لهجرته
لن ترى ابتسامة ابنك بتحقيق ولو جزء من حلمة
فقد حرموكى من فرحة عمرك
وقد حرموه من فرحته
حرموه من مجرد التفكير فى اختيار شريكته
حرموه فرحته بجلستة فى الكوشة بجوار اميرته
عذراً أبى
كان يود ان يرد لك ولو جزء من تعبك من اجله
كان يود ان يتحمل معك مسؤليته اخوته
كان يود لك تحقيق حلمك وحلمه
ولكنهم استكثروا عليكم الحلم
ان ظل فالبطالة هى الحل
وان بحث عن بارقة نور فلا مصير الا الموت
وليقتل الامل فى احشاء الامهات افضل الف الف مرة
من ان يقتل بهذه الطريقة المهينة
عذراً يا وطن فقد انكرك ابناؤك بعد ان تنكرت انت لهم
.................................................
كلماتى بناء على الخبر ده
فى المصرى اليوم
السفير المصري في إيطاليا : بعض الناجين هربوا خوفاً من إعادتهم إلي مصر
للغارقين المغفرة ولذويهم الصبر والسلوان
تعليقات
بس ايه السبب ومين السبب ربنا يجازى الى كان السبب لو مكنش البوست اتغير لما اجى تانى حعلق بس ده على السريع علشان ميعاد المكتب
حادثة ايه ؟!!
قولوا حوادث كتيرة!!!
....
وعلى الرغم من اللى بنسمعه ده ومن اللى بيحصل فبرده سلسلة الحوادث دى مش هاتقف عند اللى ماتوا دول ...لسة فى ناس تانية هاتجاذف بحياتها
ومش هايهمها اللى هايحصل معاها لمجرد انهم يعيشوا زى البنى ادمين
......
ربنا يغفر لكل اللى غرقوا ويعين ذويهم على ما ابتلاهم بيه
.....
حسبى اللة ونعم الوكيل
دا كل اللي اقدر اقوله
حين لا يكون الوطن ملاذا بل يفر منه كفرار الحمر من اسد الغابات ...
حين يكون الوطن هو الهلاك، الذي يخاطر الانسان من اجل ان يتخلص منه .. يخاطر بحياته ذاتها .. بوجوده في الحياة .. ...
البوست هنا حمل الكثير مما اردت ان ابح به .. فلك خالص الشكر والتحية
ولجميع الغرقى وحتى الناجين الرحمه ...
ماذا جرالك يا وطن
مننت يوم بالسكن
والان تبخل بالكفن
الله يرحمهم ويصبر اهاليهم
فى انتظار عودتك
انا معاكى ان سلسلة الحوادث دى عمرها لا هتقف ولا حتنتهى طول ما بلادنا كارهانا وطردنا
الله يرحمنا جميعا
تحياتى
احنا متفقين كلنا ان اللى بيحصل ده حرام
بس اللى عايزين نعرفه امتا المسلسل ده حينتهى
احتراماتى
على راى حبيب الملاين
سلامتك من الآه
كاظم طبعا هو حد يقدر يعترض
الوطن خالص مبقاش عايزنا
الوطن بيقولك اهرب واخرج انا مبقتش عايزك
جميعنا لنا الله
خالص مودتى
اه هو بصراحة بخل علينا بكل حاجه
الشغل والسكن والتعليم النضيف والاكل النضيف وكل حاجه
احترماتى واهلا بعودتك
بس مفيش كلام ينفع يتقال عشان نقول السبب
كلنا عارفين وحاسين
والكارثة إن دا هيحصل تاني وإحنا برضه عارفين ليه
تحياتي
طيب احنا عارفين ان الكارثة حتحصل تانى وتالت والمسلسل مش حينتهى
طيب الحل ايه
هذا هو السؤال
دمت بكل ود
وانا معكى احتسب عند الله
مودتى
الى جمع مبالغ الى بنسمع عنها علشان يسافر كان بقدر يستغل المبلغ دة فى عمل اى مشروع ويفضل فى بلدة بدل الدخول فى بلد سرقة والتعرض لما تعرض لة
انا قلبـــــــــي واااجعنى يا نانا
وسمعتى اخر نكتة
بيوقولك ان مرة واحد حزب وطنى
قال ان مصر هتتقدم بينا
يا عزيزتى ما انا متفقه معاكى فى نفس النقطة دى
بس بلدك اساسا ما تشجعش
من اول يوم تفكرى تفتحى فيه مشروع
حتلاقى ضرايب على تامينات على اموال عامة على رسوم نظافة على حجج غير مقنعه لسحب فلوسك وكان الفلوس اللى من مجهودك وتعبك متحرمة عليكى علشان كدا الناس بتهرب
ربنا يرحمنا برحمته الواسعه
سلامة قلبك يا جميل
نكتة الحزب الوطنة حلوة جدا الناس دى عمرها ما بتكدب
اصل فعلا بتتقدم بينا
لقاع البحار
فينك من زمان وحشتينى
:(
" لانهم القوا بأنفسهم الى التهلكة.. لا يعتبرون في عداد الشهداء "
من اقوال مفتي مصر علي جمعة متحدثا عن المهاجرين المصريين الذين غرقوا خلال محاولتهم الوصول الى اوروبا
يعني مش بس الفتاوى الغريبة بتاعة كل ساعة دي لا كمان تحديد هوية الناس دول بعد موتهم لا مش شهداء يعني مش هايدخلوا الجنة و اذا كان عاجبكم يعني
و كل ده ليه هو كان حد فيهم استلف من معالي الشيخ و لا حاجه عشان يسافر و يغرق بعدها... و مع ذلك لازلت الحكومة و مفسديها يعلنون من يدخل الجنة و من يمنع منها
الناس دي لو وجدت وظيفة في اي حاجه في بلدها ماكنتش عمرها هاتسيبها و لا تعرض نفسها لاي خطر عشان لقمة العيش لكن للاسف اللي بياخدوا مرتبات كبيرة و كل حاجه بتيجي لحد عندهم ببلاش عمرهم ما هايحسوا اد ايه الناس اللي ماتوا دول كان بيتعذبوا قبل ما ياخدوا قرار بالبعد عن كل حاجه بيحبوها و في الآخر يغرقوا
و يجي السيد المفتي بكل بساطة و يقول انهم مش شهداء يعني حتى شرف الشهادة عايزين ياخدوا منهم
ربنا سبحانه و تعالى بس اللي يحكم اذا كانوا شهداء و لا لأ بس نقول لمين
اللهم امين
ربنا يرحمهم ويرحمنا
تحياتى
هو الى انا اعرفه ان الغريق يبقا شهيد بس فى حالات معينة
لكن بصراحة مقدرش افتى فى غير كدا والشيخ اللى افتى بقا يتحمل نتيجة فتوته
ربنا يرحمهم ويلهم اهلهم الصبر والسلوان
محبتى