يقولون ما لا يفعلون

موضوع تحدثت عنه الاميرة اوسا الاخوان قادمون فى مدونتها
والبوست ده انا كنت هكتبه رد عندها بس لاقيته حيبقا طويل اوى
لان الاحداث حصلت لى شخصيا ....
فى اول ما فكرت اعمل لنفسى مشروع مستقل طبعا المكان بالنسبة لى كان مجهول وعلشان اختار المكان المناسب وفى نفس الوقت يكون حيوى اخدت وقت شوية والمكان اللى اخترته كان محصور بين مطبعة وسوبر ماركت صاحب المطبعة من الناس اللى عندها لحية هو شاب مش كبير ولا حاجه يعنى اخره حوالى 30 سنة ... بدأنا فى تجهيز المكان وكل صحابى ومعارفى جنبى ومحدش يقولى اخواتك فين لان اخواتى البنات كل واحده فى بيت زوجها واخويا الولد الوحيد مشغول باستمرار مش بشوفه الا فى المناسبات ده ان شوفته اصلا ... فكان صحابى معايا قلبا وقالبا ... جه الشخص جارى بتاع المطبعة ده وبصراحة اظهر ود واحترام محصلش وكان كل شوية يجى يقولى لو احتجتى اى حاجه انا تحت امرك وانا بدورى اقوله متشكرة جدا وممنونة لحضرتك جدا .. وخلصنا وبدأ مشروعى يشتغل والحمد لله ... والراجل بصراحة كتر الف خيرة كل شوية يجى يقولى مش محتاجه حاجه ... انا بطبيعتى مبحبش الاختلاط يعنى اللى هو بمعنى انت جارى على عينى وراسى من فوق بس انت فى حالك وانا فى حالى وده طبعى حتى مع جيرانى فى البيت ... لاقيته فى يوم جاى بيقولى انا شايف انك مش بتتكلمى مع حد او بتتعاملى مع حد .. ده الجار للجار وموصر انه يعزمنى على حاجه ... اعتذرت له وبعد ما فهمته انى مش بحب كدا وبحب اكون مع نفسى ... تانى يوم انا جاية الصبح لاقيته واقف فى الشارع .. بعد ما قعد يبص عليا يجى نص ساعه لاقيته جاى بيقولى ممكن اخد من وقتك ثوانى .. قولت له اتفضل .. راح قالى انا ملاحظ ان معظم لبسك بنطلونات انتى مش تعرفى انه ده تشبه بالرجال .. وكمان حتى لو لبستى جيبه بحس ان جسمك متقسم فيها .. قولت له بس انا شايفه ان لبسى عادى واهلى بيشوفونى بيه وعلى ما اعتقد ان اللبس حرية شخصية .. قالى حرية شخصية دى فى بيتكوا لكن انتى لازم تلبسى عبايات وبعدين تلبسى نقاب ... انا بصراحة استغربت جدا من بجاحته فى الكلام اصله يبقا مين ده علشان يفرض عليا لبسى كمان وملقتش رد غير انى اقوله وانت بتبص اصلا عليا ليه ... راح بيقولى انتى كدا بتشيلى ذنوب قولت له وانا اللى هتحاسب مش انت محدش بيحاسب مكان حد .. قالى ما احنا كمان بنشيل ذنوب .. قولت له لو غضيت بصرك مش حتشيل ذنوب ولا حاجه وبعدين اصلا انت تبص عليا ولا على غيرى ليه ...
مش المفروض اللى عامل لحية زى حضرتك كدا بتكون متوفرة فيه كل صفات المسلم الورع التقى ... لاقيته بيقولى انتى بنى ادمه معندكيش زوق ولا ادنى تحمل للمسؤلية ... وانتى فى نار جهنم انتى واهلك ... انا تنحت بصراحة مش عرفت ارد ...
انا افتكرت على كدا الموضوع انتهى ... لكن فى نفس اليوم كل شوية الاقى شخص جاى يقولى الشيخ احمد بيقولى انك انسانة مش كويسة وانا بصراحة كنت بارد واقوله البنت فى حالها ومش بتكلم حد ومحترمة ... وكمان احنا عندنا حريم مش عايزين نجيب فى سيرة الناس ... الكلام ده سمعته فى نفس اليوم من شخصين على اساس ان خايفين عليا مش بيسخنونى عليه يعنى ولا حاجه ههههه ... ما اهتمتش قوى بالكلام قولت واحد اهبل هعمل له ايه ...يومين كمان وبدأ يتبع اسلوب ان يرمى لى زبالة قدام السيبر اى ورق اى حاجه الاقيه جايبها راميها قدامى وفى يوم جه صاحب العقار علشان ياخد الايجار .. حكيت له على كل حاجه ... راح قاله عيب اللى بتعمله ده ده انت اسمك راجل يعنى ميصحش تأذى بنت .. انا شايف ان البنت محترمة اساسا وانت مالك بلبسها ثم ما هى لبسها كويس اشمعنا ملفتش نظر حد فى الدنيا الا انت .. انت عايز منها ايه .. هو انت مش متجوز ... التانى قاله لاء انا مش بعمل كدا علشان عايز منها حاجه .. اصل هى بيجى عندها السيبر بنات كتير وكلهم متبرجات .. صاحب العقار قاله وانت مالك اصلا متبرجات ولا غيره انت حد عينك وصى على شئون المسلمين .. لو اشتكت منك تانى هيكون لى تصرف اخر معاك..... وسابه صاحب العقار وجه قالى لو الشخص ده اتعرض لك فى اى حاجه اتصلى بيا فورا .... بعد كل ده يسكت ؟!
أبداً
الاقيه كل شوية واقف لى هو وبتاع السوبر ماركت جارى اللى من الناحية التانية وعاملين زى الست اللى جوزها اتجوز عليها واحده احلى منها .. وتلقيح الكلام الله ينور ... شوية متبرجات وشوية سافرات ... لحد ما جات لى بنت بتشتغل عند محامى فى نفس الشارع بتقولى هو الشيخ بتاع ده ماله بيكى .. قولت لها اهوه شغل نسوان بقا تعملى ايه بس انا مش زعلانه من اللى بيحصل ده انا مبسوطة لانى واخده كل اهتمامهم .. يكفى انهم سايبين اللى وراهم واللى قدامهم وشاغلين نفسهم بيا .. قالت لى بس مش ينفع كدا اللى هتلمه بعيد عنك البت مديحة اصلها تبقا الموزة بتاعته .. قولت لها نعم .. قالت لى اه والله دى موزته من سنة .. انا هكلمها واقولها تبعده عنك ... قولت لها طيب استنى بس افهم ازاى هو بيعمل كدا وازاى مديحة دى تبقا موزته ومن سنة وهو اصلا متجوز .. قالت لى ده كمان كان عايز يتجوزها فى السر بعد زواجه من مراته ب 3شهور .. بس هى خافت من اهلها ورفضت .. قالت له احنا نفضل كدا احسن .. قولت يا حلاوة .. تانى يوم مباشرة لاقيت البنت مديحة مزته دى سابت المحامى .. فسالت جارتى اللى تطوعت وتدخلت فى الموضوع .. واتاريها مش متطوعه لوجه الله .. كان فى تار قديم بنها وبينه وما صدقت تشوف حاجه زى كدا علشان تولعها هى كمان .. المهم قالت لى هو قالها لازم تسيب الشغل والا مش هيحصل لها طيب وهددها انه يعمل حاجات مش كويسة ... قولت لها والشخص بتاع السوبر ماركت ده دوره ايه فى الليلة راخر .. قالت لى صديقه الصدوق بقا .. سبتها قاعده ورحت رايحه للشخص بتاع المطبعة ده .. بص بقا انت هتجيب سيرتى بنص كلمة انا هتكلم عليك برضه وعندى الادلة وهعملك فضيحة انا متبرجة وبلبس بنطلون الحمد لله قدام الناس كلها واهلى بيشفونى مش بعمل دقن واستخبى وراها وارتكب الفحشاء والذنوب وده اول واخر تنبيه ليك والا بعد كدا ها اجى انتف لك دقنك ده فى قلب الشارع شعراية شعراية جتكو البلاوى مليتو البلد .. ده كان قاعد قدامى وجهه عمال يجيب الوان الطيف السبعه .. فات اسبوع بالظبط قولت يمكن ربنا هده عقبال ما ياخده .. واجى بعد كدا الاقيه بيحط لى اعواد الكبريت فى القفل بتاع باب السيبر ... عملى الحوار ده يجى 5 مرات .. كنت كل يومين بالكتير الاقيه عامل نفس العملة المهببة دى واروح ادور على حد يكسر لى القفل .. اخر ما زهقت منه رحت واخده بعضى وطالعه على قسم الشرطة وعملت محضر كتبت فيه كل حاجه من اول ما بدأت اخد المكان واعمله سيبر لحد الكبريت ... فى نفس اليوم كانوا جابوه ودخل الحجز ... تانى يوم من الفجر كانت والدته عندنا فى البيت عمال تعيط بقا ونظام ابنى اللى بيصرف علينا وابنى مش عارفه اللى يبقا ايه .. حكيت لها على كل حاجه ...وقولت لها لو ترضى الكلام الفاضى ده يحصل لبنتك يبقا انا هروح اتنازل عن المحضر واعتذر لابنك فى قلب الشارع كمان .. قالت لاء طبعا ما ارضاش وهو يستاهل اللى جرى له وانا اتعهد لك ان مش حاجه من دى تحصل ابدا .. طبعا ماما قاعده تسمع ولاول مرة تعرف كل الحاجات دى ذوهلت من الى سمعته وفضلت تلومنى ازاى مش قولت لها كان حد من اهلى اتدخل ولا اى حاجه ... بس انا فهمتها انى مش صغيرة واعرف اخد حقى بنفسى ... المهم اتصلت بالمحامى وجه معايا ورحنا اتنازلنا بس بعد ما اخدوا عليه التعهد اللازم بعدم التعرض ... ومن بعدها لو انا جايه السيبر وهو واقف قدام المطبعه بتاعته يدخل جوا جرى ... يمشى من قدام السيبر بتاعى حاطط وشه فى الارض ....
طبعا الرغى ده كله مش علشان اقول الملتحيين او المنقبات وحشين .. لاء فيهم ناس محترمة بس مش كتير بصراحة
هو مش الدين برضه المعاملة
ولا الدين انك لو مش عبرتنى يبقا اتفنن فى ايذائك والف بين الناس علشان اسوء سمعتك
هو المسلم اللى بجد وملتحى وبيتقى ربنا حق تقاته بيخاف من ربنا وبيعامل الناس بما يحبه الله ويرضاه
ولا بيعصى ربنا وبيخاف من اقسام الشرطة وبينفذ اوامرهم ...
وعلى فكرة وعلشان الناس اللى حتدخل ترزع لى بس
انا مسلمة ومأمنة وموحدة بالله وبرسوله
واشهد ان لا اله الا الله وانا سيدنا محمد رسول الله