تم البدر بدرى

والله لسه بدرى والله يا شهر الصيام
انا حاسه رمضان السنة دى مش زى عوايده معانا كل سنة .... مش عايز يطول معانا .. حاسه انى من يومين بس كنت لسه بكتب بوست بمناسبة قدومة وبوصف فيه يومى بيكون ازاى وبحب الشارع قوى قبل المغرب والناس كل واحد بيجرى على بيته علشان يلحق المدفع فى وسط اهله وعيلته .. لسه شايفه كل قرايبنا وعيلتنا متجمعين عندنا فى العزومة اللى بنعملها كل سنة .. مع انها كانت تانى يوم من رمضان لسه حاسه انى كنت بفطر مع صحباتى امبارح الفطار اللى بنعمله كل يوم جمعه ... لسه مش لحقت افرح بيه بجد .. من يومين كنت بتفق مع صحابى اننا نصلى التراويح سوا فى المسجد والنهارده بنتفق ليله العيد نسهر للصبح علشان نصلى العيد سوا
حاسة من دلوقتى انى مفتقداك جدا يارمضان ..
حرجع افتقد من تانى لمة العيلة ساعه الفطار ... الشارع وبهجة الناس .. الرحمة والود والمحبة اللى مش بشوفها فى عيون الناس غير فى الشهر الكريم ..
ياريت الاخلاقيات ما تتغيرش والروحانيات ما تقلش .. عبادتنا لله سبحانه وتعالى مش رمضان بس عبادتنا طول السنة لا تنقطع
محتاجين لحظة صدق
محتاجين نوعد الله من النهارده حتى رمضان المقبل
يارب لئن أشهدنتي رمضان المقبل لترن مني ما أصنع
كما قال أنس ابن النضير لغيابه عن غزوة بدر ..
وعد الله سبحانه وتعالى حين قال لئن أشهدني الله مع النبي صلى الله عليه وسلم قتال المشركين ليرينَّ ما أصنع
وقد صدقه الله لانه صدق الله
وقاتل فى أحد ثم قتل فنزل فيه قول الحق سبحانه وتعالى
" من المؤمنين رجال صدقوا ما عاهدوا الله عليه فمنهم من قضى نحبه ومنهم من ينتظر وما بدلوا تبديلا "
لئن أشهدني الله رمضان المقبل ليرن مني ما أصنع
اللهم ارزقنا الصدق والإخلاص يارب العالمين ..وأحيِنا صادقين على الحقِّ ثابتين ...وأمِتنا صادقين ..واحشرنا مع الصادقين .. واجعلنا اللهم ممن قلت فيهم {هَذَا يَوْمُ يَنفَعُ الصَّادِقِينَ صِدْقُهُمْ لَهُمْ جَنَّاتٌ تَجْرِي مِن تَحْتِهَا الأَنْهَارُ خَالِدِينَ فِيهَا أَبَداً رَّضِيَ اللّهُ عَنْهُمْ وَرَضُواْ عَنْهُ ذَلِكَ الْفَوْزُ الْعَظِيمُ }
اللهم تقبل صيامنا وقيامنا وصالح اعمالنا
وكل عام والجميع بالف خير
عيد سعيد على كل المسلمين والمسلمات بقبول صيامنا عند الله سبحانه وتعالى
عيد سعيد على كل المسلمين والمسلمات بقبول سجودنا وقيامنا واجابة دعائنا
عيد سعيد على كل المسلمين والمسلمات بعبادتنا وبعادنا عن ما حرم الله طوال العام وليس رمضان
يارب نحن عبادك ربانيين لا رمضانيين
وصوما مقبولا وذنبا مغفورا باذن الله