اللى فى القلب فى القلب

كلمات دائما ً أشعر معها بالغثيان فلو كان هناك قلب حقاً ما استخدم هذا الشعار الأجوف اللى فى القلب فى القلب لتصبح مسكن الى ما لا يمكن علاجه .. أقصد ما لا يمكن علاجه وأعنيها لأن إحساس الخيانة للطرف الآخر يكون مثل الشرخ فى الزجاج ولا أحدد بالخيانة الرجل أو المرأة فالخيانة ليست مرتبطة بالنوع ، ولكن قوانين المجتمع جعلت من المرأة فقط هى الخاائنة و أجزم انه لو وجدت فهذا معناه انه لا يوجد إحترام للطرف الآخر لذلك لا معنى لكلمات لا تنبعث معها إلا فيروسات قاتلة مثل اللى فى القلب فى القلب .. ومش مشكلة دى نزوة وهتعدى .. والكلمة اللى بسمعها كتير الايام دى هو مش بيخلص نزاوته ويرجع لك انتى فى الآخر ؟ خلاص انتى اللى هو بيحبها .. ده بالنسبة طبعاً للراجل عفواً الذكر .. فالرجل الحق لا يكذب ولا يخون الرجل بالفعل هو من يجيد كيفية استخدام عقله ونفسه باعلى كفاءة .. اما الذكر فهو المقتنع بان الشرف ما يكمن بنى فخذى المرأة وإنما يكذب ويخون ويفعل كل الموبقات وبرضه شريف وايه المشكلة فهو ذكر فى مجتمع شرقى نصب منه نصف إله على الأرض ووجد لأخطائه جميع المبررات .. فإن تحرش بانثى .. مش مشكلة عنده كبت وان اغتصبها تروح تشوف نفسها السافلة كانت لابسه ايه او ماشية إزاى و اغرته هو يعنى حجر ده بنى آدم .. طيب لو انا شوفت ولد واعجبت بيه ممكن أغتصبه ؟؟ عيب يا سافلة تقولى كلام زى ده الولد بس هو اللى من حقه يتحرش ويغتصب ويخون ويعمل كل اللى فى نفسه انتى بس حاجة اتوجدت فى المجتمع لإفراغ شهواته ومتعته بأى طريقة .. ولأول مرة أشوف فى مجتمعات بتقول على نفسها متحضرة وتميز بين الناس على حسب ما بين أفخاذهم ، مجتمعات لا تشم منها المرأة سوى رائحة الموت والعفن مع بزوغ أدنى مشكلة الطرف فيها أنثى تجد الكلمات تنطلق من فم الطرف الآخر مثل نثار الريق عند العطس دون ضوابط ولا مجال لحديث اخر او اتهام اخر سوى الخوض فى شرفها حتى لو كانت تعبر عن رأيها .. رأى أيه هى اتجننت مين دى كمان اللى يبقى لها رأى وهكذا يتم المصادرة على رايها بكل جرأة وتبجح متطابقين السحنة و تميزهم ملامح العصر القاسية لتظل تدور حول نفسها داخل دائرة المعاناة السلبية حتى يمكنها التعرف على طبيعة التجرية البشرية وعليها ان تجد معها فن التعامل قدر الإمكان . . ونظراً لقوانين المجتمع فإن خيانة الرجل مغفورة أما المرأة فخيانتها جزاءها القتل واقل عقاب هو ان يتبرى منها الجميع الخاينة عديمة الشرف .. حتى الشرف جعلوه صفة تشريحية حسب الاعضاء التناسلية فعلاً إحنا اللى بندى الناس دروس فى التحضر .. بنديلهم دروس فى التحضر واحنا اجهل من الجهل بنفس المرأة التى هى نصف المجتمع أجهل من الجهل بتكوينها الجسمى والنفسى ولن أستثنى من هذا الإتهام أى شخص مهما كان

Comments

للاسف عشان اخنا فى محتمع ذكورى وتربيتنا من البدايه بتفرق بين الولد والبنت ...الولد بياخد كل حقوقه والبنت مهضوم حقها
karim said…
عزيزتى انا اوافقك تماما فى رايك وان كل شخص لة حريتة ولكن فى الاخر لا تنسى اننا شرقيين و لا تقولى انة تخلف لان الاسس مش متخلفة لكن التطبيق ممكن جدا ان يكون كذلك, واعلم ان ديننا كرم المراءة ويحافظ عليها لكن كما قلت المشكلة فى التطبيق و كل على هواة. ولكن كل الشرقيين بنفس العقلية تقريبا من اليابان الى المغرب برغم اختلاف سنوات التقدم لكن الشرقى هو هو فى اى زمان و مكان, تحياتى
nareman said…
رائعة يا حنون
واقع معبر عايشاه كل انصى شرقية للاسف
salma ali said…
وحشتنا مقالاتك اللى كلها تحدى واصرار ودافع للمرأة للدفاع عن كرامتها وحقها فى الحياة
ارجعى لنا بقى يا قطة وكفياكى من قصص الثورة
Anonymous said…
هو كل حاجه الراجل الشرقى لسه برضه بتحاربيه نفسى اعرف الراجل الشرقى حارقك كدا ليه
تحبى يا حبيبتى اروح اجيب لك راجل اجنبى بالكاتشاب وتحلى عننا وتسيبينا فى حالنا
marwa said…
بت يا قطة هاتى بوسة
قولتى كل اللى فى نفسى يا رائعه يا جميلة
Hatem Wagdy said…
انا مقدرش اظلم الراجل الشرقى لكن ابحثى وراء الخيانة يا قطة
اكيد الطرف الآخر يوجد به شئ من النقص
Anonymous said…
يلعن ابو النسوان اللى فى الشرق كلهم
زعلتى ما انتى قاعدة مفشوخة من سنين على النت وكل همك هو شتيمة الراجل الشرقى احترمى نفسك نحترمك يا بسبس
Desert cat said…
اسيره الاحزان

اتقف تماما مع كلماتك يا عزيزتى
Desert cat said…
karim

انا مش معارضاك خالص يا كريم
بدليل ان المراة فى بداية الاسلام كانت بتنزل الحروب وكانت صفا بصف وايده بايد الرجل فى جميع المجالات لكن يا عزيزتى ليه اختلف اسلام اليوم واصبحت المراة مهانة فى شتى المجالات ؟
ELVIRA said…
فاكرة يا قطة حلقة مرتضى نصور السنة اللى فاتت و هو بيقول أن من حق الراجل اللى يقتل زوجة خائنة و تبقى جريمة شرف ، لكن الست لا ... ليه ؟
القانون العبقرى بيقول طالما الراجل من حقه 4 يبقى ممكن اللى نايمة معاه تبقى مراته و فى هذه الحالة متبقاش خيانة

طب فين مشاعر واحدة مجروحة من حاجة زى دى

أما اللى فى القلب فى القلب فخديها بالمعنى دة لو كانت الزوجة هى اللى حاسة بالخيانة يبقى هتتكلم ازاى فى مجتمع زى دة أهى قفلة على روحها وقلبها و بتلعن اليوم اللى أتولدت فيه أنثى و ليس حتى إمرأة
Desert cat said…
nareman

شكرا يا نرمو
Desert cat said…
salma ali

ميرسى يا سلمى
بس الثورة دى تشكيل لمستقبل بلد الله اعلم شكله هيكون ايه
عموما من وقت للتانى هتلاقينى جنبك
تحياتى يا جميله
Desert cat said…
Anonymous

ده على اساس ان انا لازقة فيكو يا اخ
والنبى حل انت عن دماغى
Desert cat said…
marwa

مواااااااااااه يا احلى مروة
Desert cat said…
Hatem Wagdy

لا يوجد اى مبرر للخيانة يا عزيزى
Desert cat said…
Anonymous

عيب
عيب
عيب
يا راجل يا شرقى يا محترم
Desert cat said…
ELVIRA

مشاعر ايه دى بقى يا حبيبتى اللى بتتكلمى عليها
هى الست اصلا مش من حقها يبقى عندها مشاعر ولا تملك احساس دى البنت اللى تفكر تحب كانها ارتكبت جريمة
وطبعا قانون سكسونيا اعطى للراجل حقوق لا حصر لها اما المرأة فدى مجرد شئ لمتهة الراجل مهما كان حتى لو كان بلطجى مالوش اى قيمة فى المجتمع

Popular posts from this blog

قميص دهشور

كل تحرش وانتوا طيبين