Desert Cat Search
قطه الصحراء: وما الحياة إلا ؟!!

Sunday, October 24, 2010

وما الحياة إلا ؟!!


ما زلت أحاول أن أتدارك بعض الأشياء .. ما زلت أحاول قراءة رسائل موجهة من الحياة من الأقرباء من الأصدقاء من جميع المحيطين .. ولكن دائماً أفضل أن أحجز أول صفوف المتفرجين .. أفضل الصمت حتى النهاية لتكون كلمتى هى الفاصلة .. ولكن أى نهاية فى حياة لم تنتهى بعد ومع اشخاص لا زلت أحيا بينهم محافظة على المركز الأول فى صفوف المتفرجين مهما داروا ولفوا من حولى وانا ادور معهم فى نفس الدائرة يتشاجرون تارة ويتضاحكون تارة يحبون الحياة مرة ويزهدونها مرات وأنا بين هذا وهذاك لا يلح عليا الا سؤال واحد فقط .. ما ذنب شخص فى أن يتحمل خطأ غيره ويضطر لدفع الثمن طوال حياته من أعصابه وعمره ؟

احاول الهرب بعيداً عن المحيط الذى احيا به فأصطدم بواقع لا حديث له إلا عن الديموقراطية .. اضحك بشكل هستيرى أصل اللى اعرفه ان علشان نعرف يعنى ايه ديموقراطية انه لابد من احترم الآخر و تعلم الرقى فى الحوار وبالتالى الإبتعاد عن العنف فهل هذا يوجد بيننا ؟ فما أراه حتى فى عالمنا الإفتراضى هو الصوت العالى والشجار على أتفه الأسباب ولو ألقينا نظرة سريعة على أخبار الحوادث لقرأنا عن إعتداء طلاب على مدرسيهم أو قتل أطفال فى مراحل ابتدائية لبعضهم البعض بسلاح أبيض .. فهل أصبح السلاح هو القلم الذى يحمله التلميذ أثناء ذهابه إلى المدرسة اليوم ؟

وقفة مع النفس ماذا نريد ؟ وماذا نفعل ؟ لماذا نرفض الإعتراف بالآخر ؟ لماذا النظرة الأحادية بإمتلاك الحقيقة المطلقة وتناسى الآخرين ومشاعرهم ؟

مشاعرهم !!! لماذا ألوم على الآخرين فى تناسى مشاعر غيرهم إذا كان الاباء والأمهات فى خلافاتهم المستمرة يتناسون من يسمونهم فلذات أكبادهم .... فى الغالب يكون الطلاق هو الحل ولكن حتى هذا أرى فيه أنانية فإذا كان الطلاق حل حتى يستريحا من آلامهم وشجارهم المستمر فأنظر إلى المستقبل وما يصحبه من تشرد وضياع وتشتت وفراق وفقدان لرعاية الأسرة .. تقابله عقبة مع من سوف يكمل حياته مع من يملك المال ؟ أم مع من تملك العطف والحنان ؟ وإن حسم الإختيار حيث أمان المال فهل سيتحمل المعاملة القاسية سيتحمل الضرب سيتحمل التوبيخ والسخرية بداع وبدون ؟لماذا يتناسون زهورهم فى غمرة مشاكلهم التى تؤثر فيهم وتدفعهم للبحث الدائم عن من يترفق بهم وهل من يترفق بهم هذا سوف يكون أشد حرصاً عليهم أليس من الممكن أن تسر لشخص في لحظة ضعف بسر أثقل تفكيرك أو خطأ إرتكبته فى لحظة ضعف ليأتي في لحظة لم تتوقعها ( ويطلعلك) القديم والجديد ؟

إحنا ليه آسيين أوى كدا على نفسنا ؟ وليه أصبح من المستحيل خلق يوتيبا جميلة من العلاقات الإنسانية بين الناس وبعضها كنت خايفة اكون ظالمة فى تصوراتى أو تكون دى مجرد اوهام .. حاولت اتكلم مع ناس مختلفة لا اكون مبالغة إن قولت اغلبهم اكدوا صدق كلامى حسيت وقتها الجميع يحيا آلام مختلفة ومشاكل مختلفة تجعل الجميع يترنح كالطائر المذبوح وعلى الرغم من آلامة يستجمع قواة المنهكة ليضرب بأجنحته فى الهواء عله ياخذ من الحياة أخر نسماتها .. صديقة جميلة قالت لى تشبيه قتلنى .. انا كنت حاسة انى واقفة فى وسط ميدان عام عريانة وكل اللى رايح واللى جاى ماسك ازازة وواقف يشرح فيا .. طيب اقولها ايه ؟ أنتى نزيفك خارجى وجروحك ظاهرة وتنفع تتداوى بس ارجوكى مش تقفلى على نفسك وتنسى تعالجى جرحك حتى لا يقتلك تقيحه ؟ شعور آسى أوى وإحساس قاتل انك طول الوقت عايش فى تناقض بين غربة المكان والنفس وسط ناس انت مش لاقى نفسك بينهم ولا معاهم وكأن الحياة مستخسرة فيك متعة الصفاء الخالد

14 comments:

ELVIRA said...

دة برضه ممكن نقول عليه مشكلة ثقة فى النفس و فى قلة احترامنا و حبنا لنفسنا
لاننا مش بنثق فى بعض فأحنا عندنا أستعداد لمهاجمة الأخر لأننا شايفين نفسنا فيه

و لو بنحب نفسنا مكناش هنضيع عمرنا علشان أخطاء أرتكبت عن قلة خبرة أو خطأ فى الحكم على موقف معين
و مكناش هنفضل شايلين ذنب و عُقد متستاهلش تكون مقيدة حياتنا بالطريقة دى

BenBaz said...

مش كل الناس عايشة الام .. بس كتير منهم في حاجات مهمة ناقصاة .. بيقولو ان دا سر متعة الدنيا .. معرفش انا مش شايف دا .. انا شايف ان متعه الدنيا في التحديات مثل العلم والاكتشاف والانجاز المهني والعاطفي .. مش المشاكل المالية والصحية والعائلية !! تحياتي لكي

karim said...

سيدتى كل اللى بتقولى دة ناتج عن عدم الوعى و المسؤولية, ازاى بتطلبى من ناس انهم يبقوا احسن و هم يعبانين فى كل شىء حتى احتياجتهم الاساسية , حتى التربية مش صح, يبقى هايجى منين اللى انتى عايزاة , استحالة فاقد الشىء لا يعطية , وربنا يستر

Kontiki said...

قطة
اصبحت القلوب حجارة والناس ظلمة و اننا ندفع تمن اخطاء غيرنا من عمرنا بقى عادى الامل شايفاة فى القوة يعنى المشاكل بتخلى الانسان اقوى واكثر حكمة وبالتالى المشاكل مش حتكون هى محور حياتنا و تفكيرنا لازم نتخطاها و نخلق حياة احسن لنفسنا عشان احنا حنعيش مرة واحدة بس
ولازم غصب عن الجميع نعيشها كويس
تحياتى و حبى :)

Ms Venus said...

فى بوستات كده بلاقى نفسى مبعرفش ارد عليها


لانى فاهمة وحاسة كل حرف فيها

وقالت اللى عاوزة اقوله

هرد اقول ايه ؟

اقولك شكرا او ميرسى يا قطة ؟

هحس وقتها انها كلمة باردة وملهاش ولا طعم ولا لون

هسكت وبس

حموت من الضحك said...

معلهش الكلام خارج الموضوع لكن مايسكتش عليه
....شيكولاته ببول البعير ...عفوا قصدى بلبن البعير تقاوم السرطان...آه والله
http://www.youtube.com/watch?v=wusjI0InzUw

***** said...

كان نفسي ابقى جنبك علشان افهمك واحيانا باحس انك عايشة نفس افكاري ونفس الاحداث اللي انا بامر فيها

شوفي يا انا: النوايا السيئة تسيطر على تصرفات الناس وعلشان كدة الشر بيمتلك الحقيقة المطلقة في كل مكان

احيانا انا باخش الحرب مكانك وجها لوجه مع الشر وباقول علية وعلى اعدائي ومش مهم الثمن اللي هادفعه بس اكيد هم دفعو التمن غالي


احيانا باعلن الحرب في الخفاء من خلف السحب السوداء ومحدش عارف اني انا اللي عاملة الحرب علشان انا ادامهم

انا موش فاهمة قوي ليه لازم اخوض مواجهات على اشساء مليش فيها ذنب غير ان حد شافني هدف ضعيف وحب يوري قوته للناس على انسانة ضعيفة بس ولا مرة كان فصدي اوصل لنفطة واقول يا وكسته او حتى ست بئول يا وكستها, الله؟ هي كمان من حقها تلائي انسانة ضعيفة وتنتصر عليها

اهو كدة على وعلى اعدائي

بس انا مش عايزة حرب مع حد

كنت عايزة بس هدوء وطمأنينة

Desert cat said...

ELVIRA
ياريت تعيدى قراءة البوست تانى علشان تفهمى قصدى

تحياتى

Desert cat said...

BenBaz

اى متعة فى المشاكل ؟

Desert cat said...

karim
ماهو الحل مش هيبتدى الا مننا احنا
التغيير للأفضل مش هيبتدى الا بالتربية الصحيحة
الظروف الاقتصادية ملهاش اى علاقة بالاخلاق
اصل ياما ناس فقيرة وعندها مبادئ ويما اصحاب مليارات بس يبيعوا اللى يقابلهم فى سبيل مكاسب شخصية

Desert cat said...

Kontiki

مش كل الناس بقوتك يا كونتا فى ناس المشاكل بتقتلها

Desert cat said...

Ms Venus

مش مهم يا حبيبتى تردى او تقولى شكرا او ميرسى
المهم انك مشرففانى ومنورة الدنيا

Desert cat said...

حموت من الضحك

انا شوفته بصراحة حاجه اخر فضيحة
هستأذنك فى اعادة نشره

Desert cat said...

بصى يا انا
اولا سعيدة ان فى حد قادر يفهمنى ويحسنى
ثانيا احنا فى مجتمع زبالة
ويمكن كلمة زبالة دى هينة شوية
الحروب اللى بنخوضها من اجل بقائنا وبالمناسبة ده المفروض انه حقنا الطبيعى انا شيفاها مجرد استهلاك للوقت علشان كدا بحتقرهم وابعد عنهم ومحاولش الاحتكاك بيهم باى شكل