هو ليه بقى العيد مرتبط بالتحرش

سؤال راودنى امبارح بالليل وانا ماشية فى الشارع وامبارح بالليل ده اللى هو كان ليله العيد تحديداً وانا شايفة الشارع على الجانبين شباب ومش سايبين ولا واحدة ست كبيرة ولا حتى طفلة الا لما يسمعوها ما لذ وطاب من الالفاظ .. وان الظروف ساعدته مفيش مانع يلمس اى حاجه ايده تقع عليها .. وبالطبع انا مش بنفى حالات السفالة دى طول السنة لانها عرض مستمر والاقى الولد متحفز للبنت اللى ماشية ولازما وحتما ولابد هيقل ادبه عليها باى لفظ قذر .. حتى لو البنت غيرت اتجاهها تلافيا لسماع اللفظ ده او اى حاجه ممكن تحصل لها .. تلاقيه بيجرى وراها بكل ما اوتى من طاقة لاتمام عمله على اكمل وجه وكأنه شغل بيقوم بيه ولازم يرضى ضميره ... ده لو شغل بجد مش هيشتغل بالامانة والضمير ويبذل الجهده كله .. لكن بتزيد وتتزايد اكتر فى الاعياد .. طب والحل ؟؟
ده انا لفت نظرى ولد بيعاكس بنت اخرها12 سنة وجسمها يكاد منعدم علشان الجماعة اللى بيقولوا اصل البنات اللى بيلبسوا مش عارف ايه علشان اثارة الشباب .. البنت مجرد هيكل ماشى على الارض فين الاثارة اللى فيها علشان اللوح اللى راح يقل ادبه عليها واصحابه واقفين يهللوا مبسوطين بانتصار صديقهم القذر فى موقعة التحرش العظمى .. والعيال الصغيرة كمان بتعاكس وتتحرش ليه ؟ عندها كبت ؟
ليه الشارع بيبقى على الجانبين شباب علشان لو بنت او ست مشيت تكون ماشية فى النص ويبتدى الشاب المثار على روحه باطلاق اقذع الالفاظ لمجرد ان حظها العاثر ساقها للنزول يمكن نازلة تتشرى اكل لولادها ولا دواء لاحد والديها ؟؟
لكن ازاى ؟؟ طالما نازلة فى اليوم ده يبقى نازلة مخصوص علشان الشباب يتحرشوا بيها مش تلوم الا نفسها بقى ..
بعد صلاة العيد المفروض الناس بتنصرف لذبح الاضحية او معايدة اهاليهم وقرايبهم او الخروج مع عائلتهم .. وشبابنا الواعد بينصرف لاكتر الاماكن تجمع يمكن ايده تلمس هنا ولا هناك .. وان حد فكر يقوله عيب كدا ده ان يعنى حد فكر يكون رده فى منتهى البجاحة .. الله وهى نازلة النهاردة ليه يعنى ماهو اكيد نازلة علشان كدا ..
من شوية كنت بتفرج على نايل سبورت شوفت اعلان فيه شوية شباب مصرى زى الورد وكل واحد بيقول جملة مختلفة عن التانى واحد بيقول انا من النهاردة هشتغل علشان افيد بلدى .. وواحد تانى بيقول انا من النهاردة ها اعامل كل البنات زى اخواتى .. انا اتبسطت اوى بامانة وقولت خلاص الاعلام بقى له فايدة وبيوجه الشباب كويس اهو ..الا فى اخر الاعلان الاقى كل واحد هيتغير علشان عربية ؟؟
اه بجد علشان عربية .. يعنى لو مش العربية دى يبقى شغل ايه وبتاع ايه ؟ هو ياخد المصروف من ماما وينزل يشرب حاجه ساقعة ويقف مع صحابه اللى شبهه فى الشوارع يقل ادبه على اللى رايحة واللى جاية .. ولو مش العربية مفيش حد زى اخته غير اخته ؟؟
من يجى اسبوعين كتبت فى الفيسبوك .. عايزين نكتب طلب لوزير الداخلية ونجمع عليه توقيعات كل الناس المستائة من التحرش والمعاكسات والسفالة اللى فى الشوارع دى .. نطالبه بوضع كاميرات مراقبة لضبط المتحرش .. فى ناس كتير اوى وافقت ومن بينهم رجالة سبحان الله لما سالتهم انتوا موافقين على اى اساس ومش بتقولوا اصل البنت السافلة هى السبب .. قاوا احنا مش من الناس اللى بتدين المجنى عليه ونطلع مبرر للجانى .. لينا اخوات بنات بيتبهدلوا هما كمان فى الشوارع .. بس برضه فى ناس احبطتنى وقالت لى الكاميرات مكلفة ووزير الداخلية مش هيعمل كدا حتى لو جمعتوا توقيع الـ80 مليون مصرى .. وفى ناس قالت البنت بتبقى مبسوطة بالتحرش والمعاكسة ..

قوم ايه خير الله اجعله خير كدا الاقى النهاردة جريدة الدستور ناشرة ان حديقة الحيوانات بالجيزة وضعت كاميرات مراقبة فى الجونينة لضبط المتحرشين .. اى والله وده لنك الخبر اهون

كاميرات مراقبة في حديقة حيوان الجيزة لمنع التحرش الجنسي في أيام العيد

طيب طالما فى خطوات ايجيابية وموضوع الكاميرات ده متاح ليه بقى سايبين البلطجية والعواطلية والسفلة دايرين كدا فى الشوارع دون وازع او رادع ؟؟

Comments

عمو عصام said…
إسمحى لى من خلال مدونتك أن أقدم نصيحه لكل من تتعرض للتحرش..إصرخى بأعلى صوت:يسقط الحزب الوطنى يسقط نظام الحكم هتلاقى مليون عسكرى شرطه طلعوا من تحت الأرض
Sahran said…
قطتي العزيزة

أولا خليني أقوللك كل عام وانت بخير , وعقبال كل سنة وانت بعيدة عن العراعير المهابيل

قصة التحرش الجنسي ليست إدانة للشخص المرتكب لهذا العمل بقدر ما هي إدانة لفكر اجتماعي منغلق قائم على الكبت والضيق الشديد,,

طبعا أنا لن أكون يوما من الأيام مدافعا عن هذه الظاهرة المثيرة للإشمئزاز والقرف , ولكن يبقى علينا أن نواجه أولئك الذين يفاخرون بعفة المجتمع المسلم لنضع الحقائق المرة نصب أعينهم ونريهم ما آل إليه حال المجتمع بعد أن سادت أفكارهم الظلامية في المجتمع

تحيااااااااااتي لك


ودمت سالمة
هااااااااااااااااااااا .... مين هناك

حبيت بس افكرك بالصوت الجميل الي كان ابائنا بيسمعوه زماااااااااااان لما كانو صغيرين
صوت الشاويش .. الي كان بيرج سكون الليل .. ويحسسك بالامان حتي لو كنتي ماشية في البطنية الساعة 12 باليل

اعتقد ان هو دة الدور الريسي لراجل الشرطة ... نشر الامان في الشارع ليل ونهار

للاسف .... جهاز الشرطة دلوقت بقي زي قلتة من الناحية دي
يا تري امتي اخر مرة شفتي فية عسكري دورية ماشي بالليل؟؟
وياتري اية سبب الغاء الموضوع دة ...
هل عشان الشوارع بقت اكثر امانا من ايام زمان؟؟
ولا عشان مايصحش ان حضرة الظابط تامر يمشي في الشارع باللي حفاظاً علي برستيجة؟؟
حياة said…
عيد مبارك وعساك من عواده

تحياتى
لان الكبت كله بيخرج مع خروج الشباب اللى شغاله
على سبيل المثال واحد شغال حداد اشترى لبس ووووو وفجاة خرج ولابس شيك بس مع اصحابه رجاله لقى واحده ماشية بطريقه مستفزه هيعمل ايه
اكيد هيطرقع
karim said…
فكرتك جميلة جداا ومرحب بها, بس مش يمكن موضوع كاميرات حديقة الحيوان دة موضوعة علشان تحرشات الانسان بالحيوانات فى الاعياد ووهى لاتستطيع ان تفعل شيئا هههههههه, مانتى عارفة اللى بيروحوا فى الاعياد عاملين ازاى , زى بتوع الشوارع اللى شفتيهم بالضبط, تحياتى
Manamino said…
معلش بقي انت عارفة العيد فرحة وكدة
ولازم الناس تعبر عن فرحتها بطرق مختلفة
وسلو بلدنا الناس مابتكملش فرحتها الا لما ينكدوا علي خلق الله
انا جاي بس اقولك كل سنة وحضرتك طيبة
وكل عيد اضحي وانت بخير
ويارب ايامك كلها اعياد
بس من غير تحرشششششششششش
عمو عصام...مع خالص إعتذارى said…
كم هو ثقيل على قلبى كتابة تعليق على هذا الموضوع البشع وقد كتبت تعليقى السابق لأهرب من شعورى بالقرف من العار الذى إلتصق بنا كمصريين حتى أن أى أجنبيه تزور مصر ينصحونها بأن تتعامل مع التحرش على أنه شئ عادى أو لاتأتى لمصر أصلا أما المصريات فقد ضايقنى لحد القرف أن تقول لى إحدى البنات (وتعمل محاسبه محترمه)أنها لم تتعرض لتحرش من النوع التقيل ولكنه (التحرش العادى بتاع المواصلات يعنى)وكأن بناتنا قد تعودن على ذلك وأنه أصبح شيئا عاديالايتسبب حتى فى إحراجهاوإسمحى لى أن ألفت نظرك لظاهره أخرى ستفتك بالمجتمع المصرى كله وهى (زنا المحارم)فقد إنضممت لمجموعة عمل تابعه لإحدى الجهات المعنيه بالعمل الإجتماعى وبعد أن قمنا ببحث أهم المشكلات التى تواجه الأسر الفقيره إنفجرت فى وجوهنا هذه المشكله الى حصلت فى تصنيف المشكلات على رقم1والمصيبه أن ردود الأمهات اللاتى تعرضت بناتهن للإغتصاب أو التحرش كانت تدور حول أن الله أمر بالستر وبلاش فضائح ذلك أن المعتدى على البنت هو أبوها او خالها أو عمها وأرجو ألا تصدمى مثلما صدمت عندما قالت إحداهن:(أنا عارفه إن البنت أبوها بيغتصبها مرتين فى الأسبوع وقلت لها خليه يعمل اللى هو عاوزه ومتقاوحيش معاه خلينا نخلص وبلاش فضايح)بينما قامت إحدى البنات بتمزيق وجهها وجسمها بموس حلاقه لأنها كرهت جمالها الذى جلب عليها هذه الفضيحه بعد أن تعرضت للإغتصاب المتكرر من ثلاثه رجال وشباب فى العائله حتى أن إثنين منهما كانا يتلذذان بمواقعتها سوياولذلك أرجو لا تتعجبى مما يحدث فى الشارع ومن سلبيتنا تجاه هذه المأساه الأخلاقيه وأخيرا أعتذر عما ورد بتعليقى من قسوة الواقع تاركا لك حرية نشره إذا وجدتيه لائقا لذلك
عمو عصام...مع خالص إعتذارى said…
كم هو ثقيل على قلبى كتابة تعليق على هذا الموضوع البشع وقد كتبت تعليقى السابق لأهرب من شعورى بالقرف من العار الذى إلتصق بنا كمصريين حتى أن أى أجنبيه تزور مصر ينصحونها بأن تتعامل مع التحرش على أنه شئ عادى أو لاتأتى لمصر أصلا أما المصريات فقد ضايقنى لحد القرف أن تقول لى إحدى البنات (وتعمل محاسبه محترمه)أنها لم تتعرض لتحرش من النوع التقيل ولكنه (التحرش العادى بتاع المواصلات يعنى)وكأن بناتنا قد تعودن على ذلك وأنه أصبح شيئا عاديالايتسبب حتى فى إحراجهاوإسمحى لى أن ألفت نظرك لظاهره أخرى ستفتك بالمجتمع المصرى كله وهى (زنا المحارم)فقد إنضممت لمجموعة عمل تابعه لإحدى الجهات المعنيه بالعمل الإجتماعى وبعد أن قمنا ببحث أهم المشكلات التى تواجه الأسر الفقيره إنفجرت فى وجوهنا هذه المشكله الى حصلت فى تصنيف المشكلات على رقم1والمصيبه أن ردود الأمهات اللاتى تعرضت بناتهن للإغتصاب أو التحرش كانت تدور حول أن الله أمر بالستر وبلاش فضائح ذلك أن المعتدى على البنت هو أبوها او خالها أو عمها وأرجو ألا تصدمى مثلما صدمت عندما قالت إحداهن:(أنا عارفه إن البنت أبوها بيغتصبها مرتين فى الأسبوع وقلت لها خليه يعمل اللى هو عاوزه ومتقاوحيش معاه خلينا نخلص وبلاش فضايح)بينما قامت إحدى البنات بتمزيق وجهها وجسمها بموس حلاقه لأنها كرهت جمالها الذى جلب عليها هذه الفضيحه بعد أن تعرضت للإغتصاب المتكرر من ثلاثه رجال وشباب فى العائله حتى أن إثنين منهما كانا يتلذذان بمواقعتها سوياولذلك أرجو لا تتعجبى مما يحدث فى الشارع ومن سلبيتنا تجاه هذه المأساه الأخلاقيه وأخيرا أعتذر عما ورد بتعليقى من قسوة الواقع تاركا لك حرية نشره إذا وجدتيه لائقا لذلك
Migo Mishmish said…
قطه العزيزة
كل سنه وانتى طيبه بمناسبه عيد الاضحى
انتى عارفه ليه التحرش بيبقى فى العيد ؟ عشان بعد العيد مابيتفتلش تحرش ...ههههههه...بايخه وسخيفه ...هم يضحك وهم يبكى ..اذا كنت بمشي مع مشمش وهى حامل وبتتعاكس وبنسمع الفاظ اقل مايمكن وصفها بانها الفاظ حيوانات..متوقعه ايه من ناس بتسمع انا شارب سيجارة بنى والعبد والشيطان وبتشرب بانجو وابوصليبه وبرشام هلوسه ..متوقعه ايه من عيال ضاربه جيل معمول تحت بير السلم ...حاجه تقرف
انا خايف على ساندوووووو حتى الموت
تحياتى
ميجوووووو
ITHat said…
علشان كده انا قلت لخطيبتي متنزلش لوحدها في العيد ..
و كل سنه و انتم طيبين
Anonymous said…
صراع فى النيل

شعب مصر في كارثه حقيقية‏ .غالبية طعام المصريين يحتوي الآن على نسب عالية من بكتيريا القولون البرازية والعديد غيرها من البكتيريا والطفيليات التي تسبب أمراضا قاتلة على رأسها السرطان والفشل الكلوي علاوة على إصابة الأطفال بالقصور الذهني ونقص النمو.مزيد من التفاصيل فى مقالات ثقافة الهزيمة بالموقع التالى

www.ouregypt.us
Desert cat said…
Manamino
ده واى نكد
ده منتهى السفالة والانحطاط
كل سنة وحضرتك بالف خير
عيد سعيد عليك وكل احبائك
Desert cat said…
karim
حتى الحيوانات مش سايبينها فى حالها يا كريم
للدرجة دى مبقوش عارفين حتى يفرقوا بين الحيوانات
بنا يتولانا
كل سنة وانت بالف خير
عيد سعيد ياباشا
Desert cat said…
حياة
كل سنة وانتى بالف خير
عيد سعيد عليكى وعلى اسرتك وكل احبائك
Desert cat said…
صوت من مصر
وياترى من وجهة نظرك ونظر الحداد على اساس حددتو ان اللى ماشية دى طريقتها فى المشى مستفزة وعليه طرقع ؟؟
Desert cat said…
ناجي العلي 2000
الصوت ده اختفى زى ما حاجات كتير جميلة فى حياتنا اختفت واختفى معاها الامان
تحياتى ناجى ومش تطول الغيبة تانى بعد اذنك
Desert cat said…
بابا عصام
فى الحالة دى الناس هتتم عليها ويقولو لها يا مجنونة
:))
ما انت عارف بلدنا فى لكل حاجه مبرر
Desert cat said…
Sahran
هى فين العفة دى يا سهران ؟
اذا كان الانحطاط فى الاطفال والشباب والراجل اللى عنده 80 سنة
كل سنة وانت بالف خير
Desert cat said…
بابا عصام
عايزة اقولك انى ليلة راس السنة فى 2009
كنت فى شرم الشيخ برفقة صديقتين احداهما امريكية والاخرى من بلد عربى
عايزة اقولك ان صديقتى الامريكية كانت ماشية تتلفت حواليها مع ان شرم فيها امن وحماية لا يجرؤ اى شخص على انه يقترب من واحدة ابدا
ولما سالتها انتى بتبصى حواليكى كتير ليه ؟ قالت لى اصل شركات السياحة بتوزع منشور على السائحات الوافدات لمصر تحذرهم فيه من الرجال المصريين علشان كلهم متحرشين .. وانها فكرت كتير قبل ما تيجى مصر فى اليوم ده لكنها اخدت قرارها بانها تنزل فى مطار شرم وترجع تانى منه .. يعنى مش هتخرج بره شرم خالص .. وقعدت اجازتها بالظبط 3 ايام قضتها فى شرم الشيخ ورجعت تانى .. شوفت رجالتنا الحلويين علموا فينا ايه ؟ بيقولك الصيت ولا الغنى واحنا صيتنا سمع اوى
موضوع زنى المحارم ده مصيبة تانية وعلشان الام اللى بتقول لبنتها خليه يعمل اللى هو عايزة علشان الفضايح وامثلة كتير من الست دى هى السبب فى تفاقم الزبالة دى لان لو كل واحدة حصل لبنتها كدا من حد قريب منها وبدل ما تدارى عليه خوفا من الفضايح اخدت بنتها المعتدى عليها وراحت حررت للمعتدى محضر او كانت صوتت باعلى صوتها وعملت له فضيحة كان تم القضاء على المشكلة دى قبل بدايتها .. زى برضه موضوع التحرش كدا لما يقولوا للبنت مش تردى على اللى بيعاكسك او تشتمى اللى بيتحرش بيكى اصلك كدا بتفضحى نفسك .. ده منطق ده ؟؟ يعنى مين اللى بيتفضح دلوقتى المعتدى عليها ولا المعتدى ؟
Desert cat said…
ITHat
بعد الانحلال وقلة الادب المستمرة دى قولها مش تنزل فى اى وقت خالص لوحدها
تحياتى
وكل سنة وانت بالف خير
Desert cat said…
Migo Mishmish
تخيل يا مجو قريت النهارده خبر فى المصرى اليوم عن رصدهمن لحالات التحرش فى العيد .. وبالرغم من ان فى بنت من جمعية حقوقية نزلت ورصدت بنفسها وقالت ان لبسها التقيل مش شفع ليها من التحرش برضه الا انى لاقيت التعليقات السخيفة اللى اصحابها مش عندهم دم ولا احساس ولا اخلاق بتقول برضه لبس البنت والبنت هى السبب
طول ما فى النماذج المنحطة دى فى المجتمع الظاهره دى عمرها ما هتختفى .. تحياتى ليكى وربنا يحفظ ساندو
يمكن اجيالها تكون افضل مننا حال
Desert cat said…
Anonymous
ماهو المصرينن مش فاضيين دلوقتى يثوروا على الطعام اللى بيسبب لهم الامراض المزمنة هما بس فاضيين للتحرش احنا فى ايام عيد بقى وموسم التحرش على اشده دلوقتى

تحياتى

Popular posts from this blog

قميص دهشور

كل تحرش وانتوا طيبين