مافيا الدروس الخصوصية


موضوعى فى مجلة على صوتك
http://3allisotak.net/apages.php?pids=674&ids=do
سؤال يتبادر إلى ذهني عادةً.....لماذا يستشرى سعار الدروس الخصوصية بهذا الشكل وينتشر بل ونساعد نحن في انتشاره ؟؟؟
وأتعجب حقا عندما أرى تلك الإعلانات الملصقة التي على الحوائط وكأنها بوستر لفيلم الموسم القادم... وكلما اقترب العام الدراسي كلما زادت الإعلانات وفى ذلك فليتنافس المدرسون.... الهذا الحد انحدر التعليم حتى أصبح كسلعه لابد لها من الإعلان.. وبالرغم من هذا الكم من الدروس والمدرسين إلا أن التعليم في انحدار وسلوكيات الطلاب مع مدرسيهم في انهيار.... لو عدنا بالذاكرة 15 عام فقط لوجدنا كيف كان المدرس يحترم مهنته فيشرح بكل ضمير في الحصة المدرسية كما وانه كانت هناك مجموعات للتقوية... كان الطالب يعرف حقوقه وماله وما عليه تجاه مدرسته ومدرسيه... كان يقف حقا للمعلم ويوافيه التبجيلا ... ولكن الآن الوضع تم قلبه وأصبح المدرس هو من يقف للطالب وذويه أيضا... فالمهم كيف يكسب زبوناً وليس المهم المادة العلمية..... فالسلبيات التي تنجم من الدروس الخصوصية تفوق الايجابيات بكثير جداً.. فالطالب يعتمد عليها شيئاً فشيئاً حتى يتعود على الإهمال لأنه معتمد على المدرس الخصوصي الذي سيمكنه من الحصول على نسبة مرتفعة فقط تؤهله للقبول والالتحاق في الجامعة أو الكليات المختلفة حتى يأتي في نهاية العام ليفاجأ بازدواجية بين ما يلقيه على سمعه المدرس الخصوصي ومدرس الفصل فلكل اسلوبه وطريقته المختلفة في إيصال المعلومة... والمعلم قد يكون هدفه الأساسي ماديا بحتاً... كما أن هناك البعض غير مؤهلين للتدريس ولكنهم وجدوا في الدروس الخصوصية الربح الوفير فأخذوها تجارة وذلك يعود إلى عدم وجود آليات قانونية فلا يوجد رقيب ولا حسيب.... كما أنه ظهرت أشكال غريبة وعديدة لهذه الدروس الخصوصية وتوسعت المراكز الخاصة المخصصة لهذا الغرض... حتى أن العديد من المدرسين الذين يشكلون مجموعات طلابية للدروس الخصوصية في منازل الطلاب أو المراكز التعليمية الخاصة يصبحون كاملي العدد قبل بدء العام الدراسي بشهر أو شهرين أحيانا
الدروس الخصوصية كأنها قدر محتوم، أو بلاء، أو داء يستفحل جيلا بعد جيل، فمنذ وقت ليس بالكثير كانت كالعيب الذي يسعى التلاميذ الذين يتلقون الدروس الخصوصية إلي إخفائها لأنها دليل فشل الآن أصبحت تجارة منتظمة الكل يشارك فيها ولم يعد بها أي استثناءات
فلو استسلمنا لتلك السعار الذي يحتم على رب الأسرة العمل طوال ساعات اليوم المتواصلة لتوفير ما يتقاضاه المدرس بالاضافه لمستلزمات بيته حتى انه يحتاج إلى يوم آخر على يومه كي يستطيع الوفاء بكل هذا العبء... ناهيك عن حرمان أنفسهم طوال العام من أبسط مباديء الحياة لتوفير مصروفات الدروس الخصوصية وغيرها وليتهم يعيشون هانئ البال ولو لحظات معدودة فتجد أولياء الأمور المسئولون عن أولاد في مراحل التعليم المختلفة يعيشون كل عام في رعب قاتل تحترق أعصابهم يتضرعون إلي الله أن يجتاز أبناؤهم هذه المحنة بسلام من بداية العام حتى الامتحانات... وكأنهم بعد اشهر معدودة سيذهبون لملاقاة جيش العدو وليس للإجابة على بعض الكلمات.... بالإضافة أيضا إلى عدم توانى أولادهم طوال العام بالانتقال من مدرس إلى الآخر وبدلاً من البحث عن حل لتلك الدوامة التي يعيشها أولياء الأمور.. تجدهم يبحثون هم بأنفسهم لأولادهم منذ بداية الأجازة عن المدرس الذي له سمعه طيبة في الشرح من بين تلك الإعلانات الملصقة... وهذه أيضا فكرة جادة للمدرس الخصوصى بإلحاق السي في مع الإعلان الملصق حتى يضمن اكبر عدد من الزبائن...... وبعد هذا القصور من جميع الجهات... نجد أن عملية التعليم كلها تحتاج إلى معجزة لحلها... فبدلاً من آلاف الجنيهات التي يتكبدها الآباء طوال العام... يبدأ الجميع يتحد ليصبح يدا بيد ويأخذوا قرار ليس به التباس وغير مرتبك يتبارى في صياغته أولياء الأمور كل يضع مرئياته والقاسم المشترك بينهم مصلحة أولادهم... يضعون مرئياتهم لكيفية القضاء على هذه المافيا.... فالدروس الخصوصية لا تدعم مقدرة مواجهه الطالب على الاختبارات وهو مدعم بالثقة ولكنها تجعله يواجه الاختبار وهو مدعم بالاعتماد على شرح المدرس الخصوصى الذي يمكن أن يأتي منه في الامتحان وغالبا لن يأتي... فيرجع بخفي حنين ليقول إن الاختبار ليس من المقرر... والمدرس هنا لا يهتم بتكريس العلم بقدر اهتمامه بعدد الطلاب وعدد الحصص
.

Comments

Misrdream said…
على الرغم من كل مساوء التعليم فى مصر
من دروس خصوصية وفساد وتسريب امتحانات لابناء الناس الكبيره
ستظل الكوادر المصريه هيه الاقوي والاكثر طلبا فى الشرق الاوسط على الاقل
ونلاحظ الاختلافات بيننا وبين دول اخري
فى ميزانية التعليم كأسرائيل مثلا او معظم الدول العربيه ميزانيات ضخمه تصرف على التعليم ورغم ذلك نحن فى المقدمه
المصري هيفضل مصري
دلوقتي ضيفي لقائمة اعدائك ياقطه المدرسيين اقعدوا بالعافيه
zOzO said…
عند كحق
الدروس الخصوصيه بقت ظاهره
بشعه
و اولياء الامور يدفعوا دم قلبهم ف الاخر نتيجه زفت


بس تعرفي
رغم دا احنا نتعبر احسن تعليم
لو شوفتي تعليم دول الخليج هتعرفي الفرق
ممكن اعترض
المدرس بياخد كام من الوزارة؟؟؟
ثانيا
هو المدرس ده مش له حق انه يبقى عنده بيزنس ؟؟؟
الدروس بيزنس
يعنى الدكتور لما بيشتغل فى مستشفى عام
و بالمجان و مرتبة فى الضياع
لما يعمل عيادة
و ياخد فى الكشف الواحد مثلا 100 جنية
ايه الكلام بقى
نفس الوضع
بس المدرس هو اللى بيطلع الدكتور و المهندس و كل الحاجات دى
انا شايف ان الظلم واقع عالمدرس
و هو اصلا سبب انه بيعمل كده
ظلم عالى عليه من فووووق
زى ما كل واحد فينا بيتظلم من فوق برضوا
تحياتى يا قطة
بوست جميل
يستحق الموضوع فعلا انه يبقى الجدال عليه فى بوست

اسلام
nody_1987 said…
بدايه العام الدراسى ايه يا قطه

تصدقى بالله
انا شفت وليه امر
كانت هاتوطى على ايد مدرس انجليزى تبوسها
علشان يقبل ياخد ينتهاعنده
فى السنه الى جايه
وهو مش راضى لانه
استكفى
عاااااااااااادى يعنى
مؤمنه said…
السلام عليكم ورحمة الله وبركاته
الدروس الخصوصيه من وجهة نظرى هى الى ادت الى انهيار التعليم
والتعليم هو اساس المجتمع فبالتالى هى الى قدت الى انهيار المجتمع وحين نقول ذلك لانبالغ
والى ادى لظهور الدروس الخصوصيه هى ضعف الكادر مقابل غلاء الاسعار
وبقت المسأله ربح
جزاكى الله كل خير على هذا الموضوع
دومتى بخير
والسلام عليكم ورحمة الله وبركاته
عزيزتي قطة الصحراء
موضوع الدروس هو غول صنعناه ليأكلنا، صنعه جيل من الآباء و الأمهات المتلهفين فوق العادة على كل ربع درجة، و العجيب أنه مع كل انخفاض في قيمة الشهادات العلمية يزداد جنوننا بالدرجات و التعليم ، بعهد صباي لم يكن هناك شرح في المدارس تماما كاليوم، و لكنني ببساطة كنت أذاكر، فقط لا غير، لا دروس الا بعض المواد و في الثانوية العامة، أما الان فمن كي جي للبكالوريوس، لاننا آباء و أمهات مجانين

هنا يوجد ما أظنه يهمك عن الاخوان المحظورين
تحياتي و تقديري
http://griefedcaliph.blogspot.com/2008/07/blog-post_31.html
عندك حق دلوقتى الطالب قبل ما تبدا الدراسة بيختار المدرس الخصوصى الاول و يشوف مين احسن و بقت تجارة
ربنا يعدل حال البلد ديه
هي صورة اخري من صور الاختلال

واول الاختلال اختلال التفكير عند السادة الاهالي

تحياتي لايرادك الموضوع الميئوس منه
almasry said…
بجد والله كنت هكتب عن نفس الموضوع قريب لكن كنت لسه بجمع المعلومات والاحصاائيات الكافيه لكتابة حاجه زى دى لكن المهم انا متفق معاكى تماما وكتير بنشوف الفيلسوف فىى الفلسفه والعببقرى فى الكمياء والاسطوره فى الفزياء وغيرهامن المسميات التى كثيرا ما تنفرنى فى التعليم ومن يتعلموه



تحيـــــــــاتى
المصـــــــــــــرى
دى ظهره انتشرت جامد والظاهره دى ليها كذا جانب من ناحية مرتب المدرس ولا الاعداد اللى فى المدارس ولا عقليات اولياء الامور بقيت حاجه تعقد والله ومهما نقول ومهما نعيد مفيش حاجه بتتغير واناعارف كام سنتر فى المنصوره هنا وعادى مدرسين طالعين ونازلين ووراهم الطلاب ودى بقت عاده بعيييييد عنكم
عارفه مع انى ضد الدروس الخصوصيه وبكرهها عمى
لكن فى بعض المدرسين(الاقليه)بيكونو عايزين يزودو دخلهم باى شكل دون الاهتمام للوسيله
اممممممم

طريقتك جميلة اوى فى عرض الموضوع ياديزيرت


بس انا من وجهة نظرى انى موضوع الدروس الخصوصية مالهوش حل

لان الاسر المصرية خدت عليه وبقى شىء مألوف جدا فى المجتمع

انا شايف حلها ضرايب وتسعيرة لحصة الدرس الخصوصى بجد

مفيش حل تانى
انا سمعت ان المدرسين بيعملوا للطالب اختبار تحديد مستوى قبل ما يقبلوه في الدرس الخصوصي و لازم يجيب درجات عالىه علشان يقبلوه
كان على ايامنا الطالب البليد بس هو اللي بياخد درس

لا حول و لا قوة الا بالله
حتى الدروس بقى لها تنسيق

اوروفوار
Desert cat said…
Misrdream
مقدمة ايه اللى احنا فيها بالظبط يا احمد
اذا كان الجميه همه يهج ويسيب البلد
الدكتور مرتبه 250 جنيه بعد كام سنة تعب ومذاكرة ووجع قلب
المدرس اللى بيدى دروس خصوصية ده مرتبه مش يكفيه عيش حاف لمدة عشرين يوم مش شهر
وبتقولى كوادر
انا شكلى هضيف لقائمى اعدائى البلد كلها
تحياتى
Desert cat said…
zOzO
ماهى الكوادر بتاعتنا اللى هاجرت على دول الخليج يعنى مدرسين هنا هما نفسهم مدرسين هناك
تحياتى
Desert cat said…
مواطن مصرى نايم
اوكى يا سيدى اعترض براحتك
انا كمان معترضة زيك على مرتبات المدرسين لان المفروض ان المدرس هو اللى بيخرج لنا التخصصات المختلفة بما فيهم العلماء كمان
دلوقتى المدرس والدكتور بياخدوا مصروف من السيد الوالد بعد التخرج كما قبل التخرج
مودتى
Desert cat said…
nody_1987
اهو انتى جبتى المفيد
انا اعتراضى مش عىل المدرس
انا اعتراضى على تشجيع اولياء الامور للدروس الخصوصية وكانها مفتاح النجاة
مع ان اولادهم لو وفروا المجهود فى اللف من الدرس ده للدرس ده وقضوه فى المذاكرة مش هيكون هناك مشكلة
تحياتى
Desert cat said…
مؤمنه
عليكم السلام ورحمة الله وبركاته
بالفعل هو ما ادى الى انتشار الدروس الخصوصية قلة الدخل وفى ظل غلاء الاسعار كاد منعدم
ولكن فى المقابل لم يوجد تعليم بل اصبح سلعه
مودتى واحترامى
Desert cat said…
Dr. Eyad Harfoush
العزيز دكتور اياد
الجميل فى الموضوع ان الاهل نفسهم بيكونوا عارفين ان ابنهم هيتخرج يقعد جنبهم فى البيت ولو اشتغل مرتبه مش هيكفيه مواصلات
لكن برضه حرب الربع درجة والنص درجة تزال مستمرة
اشكر حضرتك جدا جدا على لفت انتباهى لهذا الرابط
الذى سعدت جدا بقراءة محتواة
احترامى وتقديرى
Desert cat said…
دعوة للأمل
هى تجارة للمدرس وللطالب اريح من المذارة ووجع القلب ولاولياء الامور استنزاف ميزانية
مودتى
Desert cat said…
تايه في وسط البلد
الاباء اصبح شغلهم الشاغل مواكبة اعباء الحياة لذلك فضوا عقولهم من اولادهم وتركوهم للمدرسين وهما كل مسؤليتهم تمثلت فى جلب الاموال
لذلك لن يزول الخلل بل يزداد سوءا
مودتى واحترامى
Desert cat said…
almasry
اشكرك جدا
وفى انتظار موضوعك الشيق ان شاء الله
تحياتى
Desert cat said…
محمد صالح
اولا التعليم فى انهيار مش نقدر ننكر بدليل المدارس التى اصبحت خاوية طوال ايام العام ومن يذهب اليها يذهب للترفيه لانه معتمد على الدروس وبالتالى ليس هناك اى مانع من طلوع ونزل المدرس والطلبة من والى السنتر
تحياتى
Desert cat said…
مدرسة الفشله بنات
المدرسين كلهم مرتباتهم بالكاد تكفى اسبوع فى الشهر خصوصا اذا كان رب اسرة
المشكلة مشكلة دولة لم تراعى حسن التنظيم وتوزيع الاولويات
مش مشكلة المدرس يدى درس صوصى المهم مش يطالب بزيادة المرتب
تحياتى
Desert cat said…
مدحت محمد
الاسرة اخدت عليه لانها اعتمدت عليه وتركت اولادها للمدرسين بدل من متابعتهم بانفسهم لانهم مشغولون بالاهم
حتى الضرايب مش هتعمل حاجه
احنا محتاجين احلال وتجديد من البداية خالص
تحياتى
Desert cat said…
bastokka طهقانة
انا كمان سمعت الموضوع ده يا طهقانة
وكان تعقيبى يالا للهول هو مقدم كلية الشرطة ولا ايه
طيب واخبار كشف الهيئة ايه
برضه لابد منه
تحياتى
Zika said…
بيتلخص الموضوع في ان التعليم اصبح سلعه
ما بقاش الواحد بيتعلم علشان العلم
وده مش ذنب الطلبه لوحدهم
ده ذنب النظام التعليمي ككل من اول وزير التربيه والتعليم لحد اقل بني ادم في المنظومه ككل
المنظومه اللي سبب تدهور الياه وانحدار الاخلاف والذوق العام وسبب انهيار الاراده الشعبيه
كل حاجه بايظه في مصر ممكن نتخيلها
كانت وستكون بسبب سوء نظام التعليم

Popular posts from this blog

قميص دهشور

كل تحرش وانتوا طيبين