كفـــرت بالحيــاة


لم تعد لدى القدرة على المواصلة .. سجنت نفسى بين كيبورد وعالم افتراضى فلم تفلح محاولاتى للهروب فدائماً تضطرنى الظروف للخروج فتتلطخ قدماى بفضلات الشوارع وتتلوث اذناى بقذورات الكلمات ، حاولت التمرد بشتى الطرق إخترقت كل الخطوط الحمراء صدمت فى العديد وبان الذهب الحقيقى من التقليد ولكن لازالت القاذورات تملأ الطريق .

مددت يدى بالسلام – السلام اللى كنت مطمنة إنى ممكن ألاقيه فى الصداقة ولكن يالا سخرية القدر حتى ده مبقتش قادرة ادور عنه فيها ومش عارفة السبب فى إن الغدر بيحولك لمتأمل غير قابل للإستمرار ؟ ولا السبب هو الحرمان الطويل من الدفئ الإنسانى الكافى ليمنحك الإطمئنان والقوة ؟

حاولت مواجهة هذا العالم عارية دون أوراق توت فصعقنى بظلمه وعدم منطقيته فكفرت به هو الآخر .

حاولت الإندماج مع الواقع ولكنه كان مصر على السخرية من إيمانى الحصين فى قلاعه الحقيقة واللى ظنيت إنى ممكن أحتمى بأحضانها من قساوته كل ما تعضنى فكفرت به .

تمهلت وفكرت قليلاً حاولت أن أقنع نفسى فى وسط هذا العالم الموبوء بأن القوة والضعف رحلة ومسار مش قدر و مش هبه وحاولت ابنى علاقتى بالحياة ولكن فشلت نظريتى وكانت النتيجة وساخة بعد الأخرى ليتراكم اكوام زبالة على جدار الذات من الحياة اليومية .

كررت المحاولات ولكنى لم أزداد إلا خيبات بين أشخاص لا يكذبون حين يعلنون أن العدم هو دينهم الأخير .

لم يعد لدى سوى شعور قاتل بظهر مكشوف دون حماية من لطشات البرد رسمت فى أعلاه أظافر وهميه ودمعة متحجرة احاول مداراتها عن الجميع وصوت مبحوح احبسه دائما ونزيف داخلى لا يشعر به غيرى ولا يؤلم أحد غيرى .

لا اريد الشفقة من أحد ولا أريد العفو من أحد فكثيراً ما أشعر بأن الله ظالم لأنه أوجدنا فى هذا العالم الظالم وبين هؤلاء الأشخاص معدومى الإحساس لا يشعرون بمدى وجع أذاهم لحياة الآخرين

Comments

هذة هى نهاية الأمر ، فلنكفر بكل شئ الا الحياة لاننا لا نملك سواها
Anonymous said…
نانا
بعد مساء الخير
الحالة اللى انتى فيها دى وصلها ناس كتير قبلك و منهم العبد لله
لا عندى مواعظ اقولها و لا حكم افتيلك بيها عن جمال الحياة
بس كل اللى اقدر اقولهولك انا اسف على الزعل اللى انتى فيه لانه بشكل او بآخر احنا كلنا مشركين فى وصولك للحالة دى
اكدب و اقولك انا لقيت حل للحالة الزفت دى مش قادر
يعنى على اى حال اتمنى ان الحالة دى ما تدومش معاكى
و اتمنى لكى من السعادة مثلما تتمنين لنفسك
التوقيع: المنتحر الفاشل Lucifer
صديق قديم
كلام معبر جداً وحزين ويشعرني أنكي لن تردي على التعليقات لانك حينها قد إنتحرتي
(:

هي نظرة أخرى خاطئه للحياة بسبب خطأ التصرف معها مما يؤدي الى نتيجه حتميه
واحده هي الكفر بالحياة

لا أستطيع أن اقول لكي إنظري إلى الجانب المشرق من حياتك لأنه وكما يتضح لي لايوجد فيها جانب مشرق (: !؟

ولـكـن ,, لابد من أن أدلو بـ دلوي لأن دلوي ليس كمثله دلو
(:
دلوي هو دواء
ممزوج بالفلسفه والحكمه
وقليلا من الهراء
المحلى بالغباء
أقدمه لكي في وعاء
إقرأيه بالمساء
وتناوليه على الغداء
بعدها لن تذهب هباء
حياتك يا قطة الصحراء

((:

حان وقت الـجـد

أيها القطه العزيزه , تعاملي مع الحياة كما هي واقعها من حولك وليس كما ترين أنتي واقعها ثم حاولي العيش والتأقلم مع حقيقة واقع من حولك لأن واقع من حولك هو الحقيقه وإن إستطعتي ذلك فهذا يعني أنك توصلتي الى الفهم الصحيح للواقع الحقيقي للحياة وعليها يجب أن تبني نظرتك وإحساسك تجاه الاخرين وبها ومنها تتكون ثقتك بهم وطريقة تعاملك معهم

أما الخطأ فهو في التعامل مع من حولك وفق واقع آخر معاكس لواقع البيئه التي انتي فيها وهذا لايؤدي إلا الى ما أدت إليه هذه الحياة التي كفرتي أنتي بها وتأكدي تماماً بأن الحياة المثاليه التي تحلمين بها وترسمينها في مخيلتك هي العدم ! والكفر هو العيش في واقعها

أخيراً

ربما أكون أنا الجانب المشرق من حياتك

(:

وآآسف على هكذا تعليق طويل وممل وثقيل دم

أتمنى لكي حياة سعيده ومديده

مع تحيات .. زميلك بالحياة

((:
BenBaz said…
رائع رائع ... اعجبني جداااااااا
Kontiki said…
عارفة ثورن هايردال لما عدى المحيط الهادى على طوف خشب اسمة كونتيكى عشان يثبت نظرية فى علم الانسان كل الناس قالت انه حيغرق لانه حيعبر المحيط على طوف بلا اى دعم كل الناس قالت مجنون وكل الناس قالت مش حيقدر وكل الناس قالت حيفشل بس هو نجح عارفة لية عشان كان مؤمن بنفسة مؤمن بافكارة خليكى مؤمنة بنفسك استمدى القوة من نفسك متستنيهاش من حد متستنيش حد يسعدك اسعدى انت نفسك واستمتعى بحياتك رغم انك قطة و القطة لها 7 ارواح الا انها للاسف فى حالة لانسان حياة واحدة بس اوعى تسيبى الاكتئاب و الدموع تسيطر عليكى قبل ما تتعبى افتكرى مين تعبان عشانك قبل ما تعيطى فكرى مين بعيط عشان انت مش معاه لو افتكرتى ظلم افتكرى برضة انك كنتى ضعيفة و سيبتى نفسك تتظلمى واتعلمى تكونى قوية ومتسمحيش لحد يظلمك
ربنا مش ظالم
ربنا حق وعدل
بس خلق جوانا الظلم و العدل و الخير و الشر عشان يشوف كل واحد مننا حيختار يكون اية
كفاية كدة عشان ممكن اكتب للابد
عاوزاكى بخير وفى حالة نفسية احسن :)
Migo Mishmish said…
من ساعه ماقرايت كلامك لغايه دلوقتي مش عارفه اقولك حاجة
فكرت ابعت تعليق فاضي وبعدين قولت اقولك معلش - بس انا بتعكنن لما حد يقولي كدة
بصي يا قطه انتي زيك زينا عايمه ضد التيار طبعي انك تحسي ان الحمل شديد قوي
بس طيب هانعلم ايه ما هو ده قدرنا
لسه النهاردة الصبح كنت حاسه اني عامله زي الغرقان اللي بتحدى البحر علشان يرفع وشه فوق الميه وياخد نفس
ساعات كتير بحس اني عايزة استسلم واسيب نفسي اغرق
لكن دايماً اقول لنفسي هاسيب بعد ماخد النفس الجاي
ومعيشه نفسي على اني هاغرق بس مش دلوقتي
Love,
MishMish
سواح said…
عزيزتى
هذه ضريبة التميز ولو سرت مع القطيع لكنتى فى حال غير الحال
....
لا تحزنى فالحياه تدخر لك ما هو افضل واحسن
لأنك تستحقين ماهو افضل واحسن
ولست اشعر بالقلق لأنى متاكد انك ستعبرين هذه الحاله بسرعه بقوة ارادتك
وما تتمتعين به من صفات نادره فى هذا الزمان الصعب الملتبس
فانت انسانه تجمعين بين الرقة والقوه
بين الشاعريه والعقل المتقد
تحياتى لك
***** said…
انهمرت السياط تقطع لحمي, على ظعري, على وجهي, وصرت استغيث بربي وليس هنالك من مغيث فاشتدت السياط تمزيقا بجسدي حتى كفرت بربي

هزمت هزيمة نكراء, امام سيط من ظننت انهم اخل او اصدقاء وهربت الى العتمة الى لجج الظلمة الى سراب مليئ بظلام دامس

لم اجفف دموعي ولم اشفق على جروحي فان كبريائي فوق انين الامي


تكبرت وتعاليت عن من اصيحو اعدائي وانزلت بهم عقابي, انزلت بهم انتقامي حتى استنجدو بي رؤحمهم فلم يستطيعو معرفة اين مكاني وسط سراب في ظلام دامس

كبريائي فوق الامي وفوق اعدائي وفوق كل اعتبار

وفقط حين تخلى عني ربي كفرت بربي, كفرت بنفسي, كفرت بكل شيئ الا كبريائي
Desert cat said…
ابن المليونير

حتى الحياة يا عزيزى لا نملكها لانها بيد الخالق
Desert cat said…
ياااااااه
انا لو عارفة ان البوست ده هيرجعك تانى كنت كتبته من زمااااان
انت بجد واحشنى اوى ومدونتك مفتقداك اكتر منى انا اكتر واحدة عارفة ظروفك كلها بس صدقنى طول ما فى ناس حقيرة فى الحياة بنقول خلاص مش عايزينها خليها ليهم علشان الوساخة تتلم على بعضها وانت عارف لما الزبالين بيتلموا على بعض اكيد ريحتهم بتطلع لكن وجود نلس نضيفة بينهم بيغطى على الريحة المتقيحة اللى ماشيين بيها واللى عايشينها

يلا بقى عايزة اشوف لك بوست جديد
شوفت بقى مين اللى جاى يشجع مين على المواصلة
Desert cat said…
(( أبوغرايم ))

هو انا بامانة يعنى كنت ممكن مش ارد على الكومنت لنفس الفكرة اللى جت فى بالك بس فى حد جميل اوى زيك اتكلم معايا واتكلم معايا بنفس اسلوبك وبعدين لغيت فكرة الانتحار بس قولى ازاى اعايش الواقع اذا كان الواقع ده عبارة عن مستنقع مكون من شوية زبالين لابسين لباس التقوى وهما جواهم قذارة الدنيا كلها
ازاى اعايش الواقع وانا اتربيت على عدم النفاق مش عارفة غلطة اهلى انهم فعلا ربونى على ان السافل اديله بالجزمة وارميه ورا ضهرك ولما بدات اواجه الحياة اتفاجات بشوية سفلة قمة فى الانحطاط والوساخة وتكلمه تلاقيه مغلف كلامه بالعفة والدين اللى هما ابعد ما يكون عنهم
مش بحاول الهروب بس بحاول ارتقى بنفسى بعيد شوية زبالين منافقين
Desert cat said…
عايزة اقولك مش تعتذر على تعليقك هو مش طويل ولا ممل بالعكس هو فعلا الجانب المشرق فى حياتى يبقى ازاى تعتذر عن جانب مشرق فى حياة انسان
انت شرفتنى جدا
Desert cat said…
BenBaz

تحياتى يا صديقى العزيز
:))
Desert cat said…
Kontiki

كونتا يا روحى بجد انا من غيرك مش عارفه كنت عملت ايه فى الحياة الكئيبة دى
انا بجد بعد كلامكو الجميل ده وتعليقاتكو اللى كلها حب وتفاؤل دى تخلينى اقول انا بحبكو كلكو وبحب الحياة علشان فيها ناس جميلة اوى زيكو وزيك يا كونتا بجد حاسة اننا شبه بعض اوى فى حاجات كتير
Desert cat said…
Migo Mishmish

الا انتى يا مشمشة بجد الا انتى مفيش مرة بنتكلم فيها غير لما بتحسسينى ان الحياة كوووول على راى احمد مكى
وطبيعى بعد الحب الحقيقى اللى انا شايفاه منكو ده لازم نكمل ونقف ضد اى قذر يحاول يشوه حياتنا ان كان مش علشانا يبقى علشان اولادنا يبقى اسمنا عملنا لهم حاجه
وحشتينى بجد
Desert cat said…
سواح

استاذى العزيز تحياتى ومودتى لكلامك الجميل واللى هو بجد دافع قوى جدا لاى حد واقف جنبه وبيسانده انسان بروعتك
Desert cat said…
*****

واضح ان كل من فكر يجدف ضد التيار عايشين معاناه واحدة وحياة مش فيها اى اختلاف
على الرغم من مرارة كلماتك واحساسى بالظلم البين منها الا انى حسيت انى محتاجة اطبطب على روحك
Anonymous said…
أنا حاسة بالحزن اللي إنتي غرقانة فيه. بس ماينفعش تستسلمي ماينفعش. إنتي ابتديتي مشوار ولازم تكمليه. من زمان قوي الكلمات الحرة المستنيرة بتتحارب واصحابها بيعانوا. مفيش جديد. بس متنسيش إن الدنيا اتغيرت والناس بقى عندهم وعي إلى حد كبير. متبصيش للشرق الاوسط المنكوب بصي للعالم ككل. أكيد فيه تطور للاحسن في الحقوق والمساواة والحريات.

نونوتك يا قطة بتريح ناس كتير وبتشيل همومهم وبتعبر عنهم. أنا باحييكي على جرأتك وشجاعتك في مواجهة التخلف والجهل. أنا عارفة إنك حاسة إنك بتنحتي في الصخر. بس صدقيني الخرابيش بتاعتك ليها تأثير كبير وخربوش على خربوش يعلموا برضه.

من فضلك ... استمري في النونوه.

مصرية من كندا.
Desert cat said…
حبيبتى مصرية من كندا

انا استمرارى مش ليكو
انا استمرارى بيكو
بجد مش عارفه اعبر لك عن تغييرى 180 درجة بعد ما شوفت تعلقياتكو الجميلة
اللى كلها دافع قوى وتشجيع
محبتى
Ameerov said…
هاى يا كيتى
سعيد انك تجاوزتى أزمتك دى
وأتمنى أى أزمة خنيقة تمر عليكى تتعاملى معاها بقوة و هدوء أكتر
مانتى عارفة عايشين فى عالم يخنق
ومش بناخد منه غير وجع الدماغ

خدى خظوة لورا و بصى على المشهد كله من بعيد.. وخللى لنفسك عقلين, ثانيهما فى قلبك ومشاعرك

(الحياة ملهاة لمن يفكر.. مأساة لمن يشعر )!!

بالتوفيق دوما

تحيتى الخضراء
و دمتى سعيدة ورايقة
Desert cat said…
Ameerov

ميرسى جدا لكلماتك الجميلة
بس حكاية عقلين دى بحسها صعبة شوية
:))

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز