وايه البجاحه فى اضراب اصحاب وسواقين المقطورات ؟؟؟

قريت بوست عند المدون العزيز مواطن مصرى عن اضراب اصحاب وسواقين المقطورات .. فى الحقيقة استأت جداً لرد فعله ووصفه الاضراب انهم بالبجاحه دى ازاى ؟؟؟
اسمح لى يا عزيزى اقولك ان الاضراب السلمى حق مشروع للجميع ده أولاً
ثانياً اصحاب المقطورات دول مش بجحين دول ناس محترمين ومحترمين جدا كمان ويكفى انهم فاتحين بيوت ناس كتير واسمح لى اقولك من واقع انا معيشاه لأن السيد الواد يمتلك 3وده طبعا بحكم شغله اللى يحتم عليه انه يمتلك عدد اكتر من كدا .. تخيل 3مقطورات كل واحدة عليها 2سواق علشان طبعا يساعدوا بعض لما يكونوا مسافرين مكان بعيد او فى زحمة شغل .. كل مقطورة عليها لا يقل عن عشر عتالين .. اضرب فى 3شوفت بقى المقطورة الواحدة فاتحة كام بيت ومصدر رزق لكام اسرة ؟؟ بخلاف ان المقطورة سعرها لا يقل عن 200الف جنيه تفتكر دى لو اتلغت الدولة هتعوضنا ؟؟؟ طيب مين هيشترى حاجه الدولة بتلغيها ؟؟
العجيب السبب الخايب اللى الحكومة منزلاه فى الجرايد واللى هو انهم بيلغوهم حفاظا على حياة المواطنين ... طيب مش لغوا العبارات ليه ماهو العبارات بتغرق فى البحر ومش لغوا القطوارت ليه ماهى بتتحرق وبتتقلب برضه وحياة ربنا يعنى زيها زى اى وسيلة مواصلات .. السبب الاخيب التانى ان سواقين المقطورات بيشربوا مخدرات .. وهنا افسحوا كلكوا واسمحوا لى اقرع بالصوت الحيانى .. طيب لما انتوا بتشوفوهم بيشربوا مخدرات مش بتقبضوا علي اللى بيشرب ليه ؟؟؟ ولا انتوا تسيبوه يشرب ويعيش حياته وبدل ما تعاقبوه هو تعاقبه آلاف الاسر وتلغوا مصدر رزقهم ؟؟؟ ده اذا كان السبب ده حقيقى يعنى ... اصلى بصراحة مش شوفت ولا سواق من اللى عندنا بيشرب حاجه غير القهوة علشان يبقوا مركزين
كان من الممكن ان الحكومة الرشيدة اللى مهتمة اوى بحياة الفرد تخصص طرق للمقطورات امريكا عاملة كدا تصدق يا مواطن يا مصرى ؟؟ وفى بلاد تانية كتير اوى عاملة كدا مش لغت المقطورات بس مخصصين ليهم طرق لانهم للاسف ناس بيفهموا .. عارفين ان المقطورة لو اتلغت حالهم حيقف .. لان العربيات اللى بتنقل البضائع من الموانى تخيل لما تبقى تريلا حتنقل حمولة اد ايه ؟؟ ولما يقل نقل الحمولة اكيد سعر السلعه هيزيد واللى هيدفع الزيادة دى بالطبع المستهلك وهى الحكومة هتدفع له كمان اهو ده اللى ناقص ؟؟ نفس المقطورات دى اللى بتنقل الخضار والاسمنت والطوب وخلافه .. كان المفروض بالفعل لو الحكومة ذكية زى ما بيقولوا على نفسهم وعاملين قرية كاملة مسمينها القرية الذكية المرتبات فيها بالدولار كان نظموا القوانين اللى بيفصلها الراجل بتاع تفصيل القوانين اللى ساكن جنب مجلس الشعب . مش اقدر انكر ان قانون المرور الجديد فيه بنود ممتازة جدا لكن ياترى يا هلترى هيتنفذ على الصغير قبل الكبير ؟؟؟
ياريت بدل من القرارات العشوائية دى الحكومة تفكر بالفعل فى مصالح الناس مش فى مصالحهم هما الشخصية الاضراب من امبارح لا تتخيل كم الشلل العام اللى ساد الموانى والتجارة بجميع انواعها .. تخيل بقى المقطورات دى اتلغت خالص .. اعتقد ان حالة الشلل دى هتكون هى السائدة فى كل الاوقات .

Comments

GHARAM said…
أنا طبعا عارفه أنه فيه عرف بين سواقي المقطورات على الطريق حتى لو كان نقل البضاعة دوليا خارج حدود بلده لازم يقفوا ويساعدوا بعض، والحقيقه أنا موش عارفه قرار الحكومه ده مبني على أيه، لكن سبب شرب المخدرات ده عجيب شويه لأن اي حد بيشرب مخدرات موش حايبطلها إذا الحكومه لغت مقطورته أو خدتها منه، لأن منع شرب المخدرات ده له طرق قانونية ،بصراحه أنا موش متابعه الموضوع لأني بره مصر، لكن من كل واحد يعتصم علشان يعترض إذا لقي هناك ظلم واقع عليه
القرارات العشوائية... هو ده مربط الفرس يا سيدتي الفاضلة

بس النهارده أجازة!!! مش يوم مشاكل بقي... كل سنه وانتي طيبه
تشاندرا said…
يا قطه أنا شايف إن الحل فى الحجاب
فلو تحجبت النساء لإنحلت المشكله فورا
معرفش إزاى بس أكيد برضو الحجاب هو الحل
ههههههههههه
Che said…
بصى يا قطه انا حكومتنا الرشيده عودتنى انها لما بتلغى حاجه بيكون ليها مصلحه شخصيه فيها او مصلحه لحد من حبايبها مش مصلحه الشعب و المواطنين و الهجص اللى بيتقال ده ، بس لغايه دلوقتى المصلحه مش باينه لمين لان الهبره كبيره المره دى
لو اتكلمنا عن المخدرات الحمدلله الواحد ممكن يجيب حشيش من البقال دلوقتى و لو بسبب الحوادث احنا كل يوم بنتعرض لاحتماليه اننا نعمل حادثه حتى لو كلنا ركبنا عجل زى الصين
يعنى فى ان فى الموضوع ده
قلم جاف said…
وهل تصدقين أن وراء الإضراب مصالح السواقين الغلابة ، أم مصالح المليارديرات الغلابة اللي مشغلينهم؟

وليه الصورة اللي اتنشرت في الأخبار من سنتين لسواق بيسوق لوري ورجله في الجبس ما لفتتش نظر أي حد من السادة الاعتصاميين؟ ما هو لولا أساطيل السادة الكبار ما كانش المسطول والمتجبس واللي عنده مية بيضا بيسوقوا لوريات على الطريق في مصر المسكينة..وكلنا عارفين إزاي الجنيه خلص ع الكارنيه..
يا عزيزتي ل الاسف المقطورات لا تحترم الطريق و النهاردة كانت هتحصل حادثة بسبب واحدة على طريق السويس

انا مع يا يلتزمو ب القانون يا

يتخصص ليهم طريق غير الطرق بتاعتنا
ثانيا انا مش ضد الاضراب و عارف انو حق الجميع ولكنة انا ضد ان تكون ثقافة الاضراب تكون عشوائية و تستخدم بمبدأ الغاية تبرر الوسيلة بمعنى انا ابين نفسي استخدمها عشان الخير و هي هتبقى شر

انا مع الاراب لما اضرب العمال في المحلة او الضرايب كان ناس محترمين و ليهم اهداف محددة و مظلومين بجد
الفلاحين في سرنداو و القرصاية كانو مظلومين


انما السواقين

يعني مش بتشوفيهم بيسقو ازاي الميكروباظ

بكرة تجارة المخدرات يعملو كمان اضراب عشان الحكومة بتقبض عليهم
نسيت اقولك هابي فلنتين هما لية عملو الفلتين لونة احمر مش يراعو احساس الزملكوية
حياة said…
هو القرار صح لا تتخيلى المقطورات شو تسوى فى احد المرات كانت سبب فى حدوث حادثة موت لى والسائق هرب اعتقدى الشخصى انها مدمرة للطرق وللبشر واعتقد ان الغائها اسهل من منع المخدرات

تحياتى
اولا انا لم اكن اعلم ان والد يملك 3 منهم ولكن هذا رائي قلتة فييما اراة يوميا على الطريق و اسف

مرة اخرى و لكني انتقد مما اراة
Desert cat said…
GHARAM
هى المشكلة ان الحكومة الذكية بتاعتنا مش بتقبض على اللى بيشربوا مخدرات دى بتلغى المقطورات يعنى مش مهم يشربوا عادى الاهم هو الغاء وسيلة العمل بتاعتهم طيب واصحاب المقطورات مالهم فى الليلة دى واهو كاه على عاتق المستهك

تحياتى
Desert cat said…
Hassan El Helali
يا عزيزى كل سنة وانت فى حب وسعادة هابى فلانتين يا فندم
Desert cat said…
تشاندرا
هههههههههه
اويا بالظبط هما الستات دول اللى المشكلة فيهم
اصلهم عورة
Zika said…
قطه
بصي يا قطه اكيد الموضوع في ان
انا بصراحه اول مره اسمع حوار انهم عاوزين يلغوا المقطورات ده
جديده دي
بصراحه بيحسسوني بغباء رهيب يعني مثلا ازاي
يعني لو في سواقين عربيات ملاكي بيشربوا حشيش
يلغوا الملاكي
اما صحيح . حلول غريبه
الحل فعلا في طرق للمقطورات او علي الاقل يبقي فيه رقابه عليهم
وبدل ما يلغوا المقطورات يلغوا الحشيش اللي زي ما عمرو (تشي ) قالك ده بيتجاب من البقال
حاجه تغيظ والله العظيم
وقانون المرور الجديد
متهيالي قصدك ( علي الكبير قبل الصغير مش العكس ولا ايه :) )
تحياتي يا قطه
كل سنه وانتي طيبه
Desert cat said…
Che
انا برضه بقول ان الموضوع ده فيه إن وكان وحتى كمان وحياتك
بس مين اللى هيعوض ملاك المقطرات المبالغ بتاعتهم دى كلها ماهو من حقهم الاعتصام والاضراب وضرب النار كمان
تحياتى
Desert cat said…
قلم جاف
يا سيدى الفاضل المصلحة راجعه على الجميع
يعنى السواق اللى رجله فى الجبس اكيد مش هياخد فلوس وهو نايم فى بيته وانه مجبر انه ينزل يشوف رزقه وشغله
ويشهد ربنا اننا بنراعى ضميرنا اد ايه فى معاملة السواقين بتوعنا
انا شخصيا عندى مشروع وانا اللى بديرة بس برضه المنطقى والبديهى انى اجيب حد يساعدنى مش بقول على الشخص اللى بيساعدنى انه بيشتغل عندى بل دائما بقول انه بيشتغل معايا .. هكذا السواقين او التباعين اللى بيركبوا عربياتنا معاملتنا ليهم بما يرضى الله

تحياتى
Desert cat said…
مواطن مصري
تصدق والنهارده كان عربية شيروكى هتعمل حادثه على الطريق برضه ايه رايك ما يلغوا الشروكى كمان علشان الحوادث
Desert cat said…
مواطن مصري

كلامك مش منطقى
يعنى ايه سواقين يعملوا اضراب
اكل عيشهم ورزقهم ده ولا لاء
وبعدين ريح نفسك مش السواقين اللى عاملين اضراب لان العملية مش فارقه معاهم مش هيشتغل النهارده على مقطورة هيشتغل بكره على اى عربيه واهى محصلة بعضها
اللى عامل اضراب اصحاب المقطورات يعنى الملاك اللى اقل مقطورة عنده بـ 200ألف جنيه انا مقدرة طبعا انك مش فاهم الكلام ده وبتتكلم بعشوائية زى ما بتسمع من العشوائيين اللى بيتكلموا حواليك واهم العشوائيين دول اللى هيدفعوا التمن غالى
اصل بسبب اضرابهم اليومين اللى فاتوا اسعار السلع ارتفعت والاسمنت بقى الطن بـ1000جنيه ومش موجود كمان
ولسه
خلى الناس العشوائية تتعلم الادب لما تحس بزيادة الاسعار
ولما يشحتوا او يناموا من غير عشا وقتها فعلا هيعرفوا ان الجهل بتاعهم السبب فى اللى وصلوا له
Desert cat said…
حياة
لو هنتكلم بالمبدأ ده يا حياة
يبقى نقفل المصالح الحكومية لأن الموظفين مرتشين .. وعلشان مش ينفضوا جيب المواطن بدال ما نقوم سلوكهم لاء نسيب سلوكهم سيئ ونقفلها
وعلى نفس المبدأ ده مش هنشرب مية لانه يقال ان المية ملوثة ومات بسببها 20شخص .. مش مهم نقيها إحنا نموت من العطش احسن .. ده فعلاً إذا كانت اسباب الحكومة حقيقية مش اسباب واهيه
اعتقد كان من الممكن انك تاخدى رقم المقطورة وتبلغى عنها ووقتها كانوا هيجيبوا السواق من تحت الارض
الأهم من إلغاء المشكلة يا عزيزتى هو معالجة جذورها

تحياتى
مواطن عادى said…
ثلاثون الف صاحب مقطورة مشاركين فى الاضراب يعنى ثلاثون الف مقطورة منزلوش اشغالهم انزلى السوق النهارده واتفرجى على اسعار السلع عاملة ازاى جميع السلع التموينية والزراعية و مواد البناء من حديد و اسمنت ورمل وزلط زادت اسعارها النهارده
الحكومة تستعبط واصحاب المقطورات يعملوا اضرابات والموظفين الغلابة يسفوا تراب
حسبى الله ونعم الوكيل
Desert cat said…
Zika
لا يا زيكا الموضوع من اول تعديل قانون المرور بس كانوا محددين فترة 4 سنين وبعدين قللوا المدة لسنتين .. طبعا ده وان دل فانما يدل على جهل وعشوائية فى القرارات
المخدرات يا زيكا مع العيال فى الشوارع وبعدين ما يقبضوا على اللى يتمسك معاه مخدرات انما يهدروا اموال الناس بالشكل ده
ده بقى اللى مالوش اسم غير انه غباء
كل سنة وانت فى حب

تحياتى
Desert cat said…
مواطن عادى

تخيل بقى يومين اضراب الاسعار ارتفعت كام
طن الأسمنت يافندم النهارده فى السوق بـ1000جنيه والناس بتقول ياريتنا لاقينه هما فعلا مش لاقيينه هينقلوه على ايه
والسلع والخضار كانت بتتنقل على ايه
تخيل بقى لما تتحول لتريلات والحمولة تقل الضعف بالظبط
الناس هتعيش فى غلاء اسعار مستمر
بينى وبينك فى ناس تستاهل اللى بيحصل لهم ده لانهم بالفعل مش حاسين بخطورة القرار ده على الاقل دلوقتى
انا فعلا عايزة الاضراب يستمر كام يوم لحد ما الناس تعرف قيمتهم بجد

تحياتى
انا حرة said…
و هى المقطورات اللى بتقضى على ارواح المواطنين و الميكروباصات لا؟
تلاقى حد من الكبار هيستورد شحنة جديدة و عايزين يفضوله الجو..زة عربية الاسعافات و المثلث كده :))
Anonymous said…
اهم الناس العاله اللى زى المواطن المصرى ده السبب فى اللى الشعب وصله
انتى بتقولى له العربيات المقطورة دى فاتحة بيوت ناس كتير وقاعدة تعدى له عدد السواقين والتابعين اللى عندك عايزاه يفهم الكلام ده ازاى وهو تلاقيه موظف او ابوه موظف واخرهم الكام ملطوش اللى بترميه لهم الحكومة
علشان كدا لازم اى قرار تاخده يقولوا لها امين اصلها حتمنع عنهم المية وخمسين جنيه اللى بتديها لهم مرتب
Desert cat said…
انا حرة
المسؤلين حيستوردوا تريلات علشان كدا عايزين يلغوا المقطورة ولما التريلا تشيل اقل من اللى كانت المقطورة بتحمله بالطبيعى هيحصل زيادة فى الاسعار وادفع يا شعب يا مطحون والحكومة مالها

شرفتينى
Desert cat said…
Anonymous
يا فندم انا مش يهمنى هو مين ولا ابوه ايه انا بتكلم من منطلق ان الناس فعلا مش حاسه بالمصيبة اللى هتحصل لما المقطورات دى تتلغى
اولا حجم الخسارة فعلا كبير جدا للملاك ثانيا فى المقابل زيادة فى اسعار السلع لان النقل هيقل واهو من مجرد يومين تخيل حالة الشلل فى الاسواق
انا بعد له السواقين والتباعين مش فشخرة لا سمح الله لانى مش من الناس الناقصة دى .. انا بس بعرفه كام اسرة عايشة ومصدر رزقها المقطورة دى
اما لو بيخاف من مجرد الة التنبيه وبيترعب من منظر المقطورة يبقى يلزم بيتهم ومش يخرج منه حفاظا على حياته اللى ممكن برضه يطربق عليه وهو نايم سقف البيت وساعتها ارجح له ينام فى مكان مكشوف بعيد عن الحيطان والاسقف خالص يمكن ربنا يطول فى عمره
hkd,ls انيومس اتعلم الادب و تعالى اتناقش

اولا احنا مش شغالين في الحكومة ولا بناخد فلوس من الحكومة انا بقول رائي في الي بشوفة

عندك نقد قولة باحترام

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز