مدرسين الكادر "التشكيكى" يتذمرون!

حوارى مع مدرس ... خاص بمجلة على صوتك
هو منارة العلم بل إنه جسر التواصل الثقافي الذى تعبر عليه الأجيال تلو الأجيال فى الحياة .. من لم يؤثر فى حياته أحد أستاذته إن لم يكن قد اتخذه قدوة له فى تصرفاته وأفعاله يقتدى بها طوال حياته، من ينسى أول مدرس أخذ بيده وعلمه "ألف باء" كتابة وقراءة .. ولسمو مكانة العلم فكانت أول سورة نزلت من القرآن الكريم وهى الأمر الإلهي للرسول صلى الله عليه وسلم " اقرأ " .. ولكن فى وقتنا الحالي أصبح صاحب هذه المهنة السامية محل شك حتى وإن كان قد قضى ضعف عمره فى مهنته التي حث عليها الله سبحانه فرأت وزارة التربية والتعليم إعادتهم طلبة من جديد للتأكد من مدى معلوماتهم وهل سيستحقون الكادر أم يظلوا محلك سر وما موقع مثل هذا القرار على نفوس المدرسين والموجهين وجميع الكوادر المنتمية للتربية والتعليم :-
نتعرف بحضرتك ؟
آسر عبد العظيم – مدرس لغة إنجليزية
كم يبلغ عمرك الوظيفي ؟
15عاماً عانيت خلالها طويلاً
طل علينا وزير التربية والتعليم هذا العام بما يسمى إمتحان الكادر التعليمي – فما هو أول شعور إنتابك عند سماعك بهذا الخبر ؟؟
- شعرت أنه عملية تعطيلية لصرف الكادر بطريقة محنكة لأن الكادر لا يستدعى إختبار للمدرسين ..
ولماذا لا تقول إنه لتجديد معلومات المدرسين ؟
لأنه لو كان الهدف كذلك لكانت قامت الوزارة بعمل دورات تثقيفية إذا كان عندها شك بالفعل فى قدرات المدرسين أو إعادة تثقيفهم .
ما وقع كلمة إختبار كادر على أفراد أسرتك ؟
منهم من إستقبله بالتعجب والإستنكار كزوجتى . ومنهم من أخذ منه مزحة طوال الوقت كأولادي... فأخذوا يتندرون من وقت لآخر "بابا راح الإمتحان – بابا جاى من الإمتحان بابا سقط فى الإمتحان" !!
ما رد فعلك وأنت البوابة الرئيسية التي عبر من خلالها أجيال منهم الآن المهندس والدكتور؟
اشعر بالفخر عندما أرى نموذج مشرف فى المجتمع كان يوماً تلميذاً يتلقى العلم على يدي ولا أنكر أنى أشعر بالحسرة حينما أعلم أنه يتقاضى أضعاف أضعاف راتبي وأنا اعمل فى التعليم منذ 15 عام وهو معين منذ عامين مثلاً.
لماذا لم يدخل المدرس المتعاقد إختبار الكادر ؟
يرد مستنكراً: لأنهم لن يحصلوا على الكادر فإذا كان إختبار الكادر تعجيزي للمدرسين المثبتين كي لا يحصلون عليه جميعهم لأنه بالتأكيد منهم من سيسقط فكيف يسمح بدخول المتعاقدين!
تردد أن عدد دخول إختبار الكادر 5 مرات وإذا رسب المدرس يتم فصله فهل هذا الكلام صحيح ؟
مستحيل لأنه لا يوجد نص دستوري أو قانوني يقول هذا الكلام – لكنه لما يسقط فى الإمتحان يظل على الدرجة التي هو عليها.
كيف تم استعدادك وأنت ذاهب للإمتحان ؟
الحقيقة أنا لأخر لحظة مش متخيل نفسي وأنا ماشى أحمل قلم رصاص وادخل لجنة وأمتحن.
ولماذا فعلا من شروط اختبار الكادر القلم الرصاص والأستيكة ؟
يرد ضاحكاً: يمكن علشان يسهلوا على المدرس لما يغلط يمسح الإجابة ويكتبها مرة تانية
بعض المدرسين رفضوا دخول إختبار الكادر ألم يفسر هذا على أنه هروب أو أنه ليس لديه ثقة فى قدراته ؟
ليس هروب لأنها وسيلة الاعتراض الوحيدة المسموح بها .. فليس من المعقول عمل اعتصام وأنا مخير بين الحضور وعدم الحضور .
معلشى اخر حاجه بقى
اسمعوا بكرة الصبح برنامج انت تسأل والكمبيوتر يجيب على إذاعة البرنامج العام الساعه 9.10 صباحاً
علشان فى كومنت يخصنى فيه
احتراماتى للجميع

Comments

OverForty said…
معرفش ليه افتكرت عبله كامل وهى بتوصى اللمبى قبل الامتحان مطوتك فى جيبك سندوتشاتك معاك و اللى يقول لك غششنى قطعه ده غير 2 جنيه بتوع زجاجه البيره بعد الامتحان ههههههه
OverForty said…
معرفش ليه افتكرت عبله كامل وهى بتوصى اللمبى قبل الامتحان مطوتك فى جيبك سندوتشاتك معاك و اللى يقول لك غششنى قطعه ده غير 2 جنيه بتوع زجاجه البيره بعد الامتحان ههههههه
romansy said…
ايه الحوار الجامد دا
كادر تشكيكى
مش عارف انتى دايما بتعاجى الموضوع بخفه دم ليه دا اجمل بكتير

وهسمع البرنامج بكره
Desert cat said…
OverForty
والله ما انا
ده الوزارة هى اللى بتعمل فيهم كدا
وبناء على عمايل الوزارة
فانا اتبعت النهج وعملت الحوار التشكيكى ده
ههههههههههه
شرفتنى جدا
Desert cat said…
romansy
ميرسى جدا رومانسى لكلامك ده من زوقك
هو تقريبا كل محبين كاظم ناس زوق زوق زووووووق .. طبعا مين يشهد ده كاظم ده حبيب قلبى
هههههههه
ابقى قولى رايك بقى البرنامج بعد ما تسمعه اللى بالطبع هيسعدنى جدا
تحياتى ليك
انا حرة said…
كنت عايزة ارد على البوست اللى فات بس ما لقيتش وشوش مسخسخة من الضحك هنا مع الاسف :D

بالنسبة للكادر فده من اهم نكت السنة على الاطلاق..الاول كنت متحمسه له من خيبتى و قلت اخيرا الحكومة بتاعتنا الغراء على راى عمرو اديب هتعرف تفصل بين الناس اللى عندهم كفاءة حقيقية و اللى محسوبين غلط على اهم مهنة على الاطلاق فى رايي

طلع فاصل جديد من الظلم و المماطلة و البهدلة اللى مالهاش اى لازمة..فى حق ناس شغلتهم انهم يربوا اجيال و يربوها صح عشان تطلع عقول محترمة تفيد البلد دى فى حاجة..تفتكرى يكون فى علاقة بين الكادر و بين التلاميذ اللى ماتوا تحت جزم المدرسين؟
شوكت said…
تدوينة جميلة

و شوكت كاظم السلحدار

يدعوكم الى حضور

مصطبة شوكت

يايت تشرفونا
http://shawkat85.blogspot.com/
blackcairorose said…
بصراحة معنديش معلومات كافية فى الموضوع ده علشان اعلق بكلام له معنى! ولكن فكرة الاختبارات فى حد ذاتها فكرة كويسة لتحسين الاداء مش بس للمدرسين ولكن لكتير من المهن الاخرى، بس سؤالى هو هل فطاحل وزارة التربية والتعليم والذين يختبروا الاخرين هل عندهم هم نفسهم معلومات محدثة عن احدث السبل التربوية والتعليمية؟ معتقدشن بل على العكس بشوف انه فى الجهاز الحكومى اكثر الناس تعقيدا للأمور هى الدرجات العليان لأن النظام الفاسد أصبح بينخر فيهم فى نفس الوقت اللى بيكونوا فقدوا أى حماس او رغبة وقدرة فعلية على التغيير
الربان said…
تحياتي

موضوع الكادر و المدرسين موضوع حيوي يمس
قطاع عريض من الناس سواء المدرسين او الطلبة...
كما انه ايضا يمس مستقبل وطن...لان العملية التربوية هي التي تؤسس و تشكل
مستقبل وطن من خلال التعليم الجيد و التربية السليمة.

في رأيي ، ان التعليم المستمر ، ضرورة للجميع ، سواء المدرسين او غيرهم...من العاملين بكافة القطاعات الاخري..لان
كل يوم هناك الجديد في مجال التخصص او
الحياة بصفة عامة.
الا ان بعض الفئات علي وجه الخصوص لابد
لها من التعليم المستمر لان مجال عملها
أكثر حيوية...من هؤلاء الاطباء و المدرسون و اساتذة الجامعات....

تحياتي و تقديري
Desert cat said…
انا حرة
البوست اللى فات ده مكتوب تحت تاثير الحبة الحمرا السداسية .. لاء انا مش اخدتها حاشا لله بس وقتها كنت لسه شايفه الاعلان ومش قادرة اتخيل كم السماجة اللى بقينا فيها
اما مدرسين الكادر التشكيكى فبعد ما امتحنوا دلوقتى عندهم اخطاء بالكوم فى الوزارة منها المدرس يروح يشوف نتيجته مش يلاقى له كود
وممكن يلاقى نفسه ناجح فى مادة مش دخلها اصلا ولا سمع عنها
ومهازل
Desert cat said…
شوكت
يا الف اهلا وسهلا بيك يا استاذ شوكت
ومبارك عليك المصطبة يا فندم
:)
Desert cat said…
blackcairorose
حبيبتى تعالى شوفى كم الاخطاء اللى بتطلع للمدرس فى نتيجة الكادر
ده من الاهمال مدرس ناجح فى مادة مش دخلها وساقط فى مادة التخصص بتاعته .. جت ازاى وانضافت له بناء على ايه متعرفيش
بس اهو كادر بقى لازم يكروا عليهم عيشتهم ويا عالم بقى هياخدوا فعلا فلوس ولا لاء

نورتينى يا احلى روزة
Desert cat said…
الربان
استاذى العزيز اتفق مع حضرتك فى حالة لو الهدف بالفعل هو تمية العملية التربوية وليس عرقله صرف الكادر
تحياتى
Zika said…
والله انا مش عارف الموضوع كوميدي ولا تراجيدي حاجه تحزن علي حال الناس وحال البلد اللي بحس نا الحكومه لو بكره الصبح باعت مصر ماحدش هيفهم حاجه
وماحدش هيعمل حاجه
الكادر نكته سخيفه بس للاسف
كلنا بنضحك عليها
أيمن نخلة said…
يا قطة الصحراء يا محترمة
إنتي بجد بتعالجي الموضوع بحرفية شديدة جميلة
حوار ومقالة في الجون كأني كنت قاعد مع ألف مدرس
تحياتي يا محترمة
أيمن نخلة

Popular posts from this blog

قميص دهشور

كل تحرش وانتوا طيبين