ومش قبضوا على القيادات ليه ؟؟

انا عتابى على امن الدولة انهم مش قبضوا على القيادات ليه ؟؟؟
سايبين راس الافعى ليه ؟؟
سايبين صاحب الطزات الثلاث فى مصر وابوها وشعبها ليه ؟؟؟
اذا كان اعضاء الاجتماع اللى اتقبض عليهم استاذ جامعه وباقى العناصر إعلاميين فأنا الحقيقة بشكر جهاز امن الدولة ولو أنهم فاقوا متأخر أوى .. لأن كان المفروض ان صوتهم ميطلعش من البداية .. يعنى ايه مذيعين قاعدين يبثوا سمومهم على الفضائيات وسايبينهم لحد دلوقتى .. كان لازم يمسكوا معاهم منشورات ؟؟
كان لازم يمسكو معاهم أجهزة تصنيع ادوية متهربة
كان لازم يمسكو معاهم حشيش ؟؟
بعض الناس قالت ازاى اخوان وازاى تم ضبط حشيش معاهم
عادى جداً حتى اللى مش مصدق يسأل طالبان تجار الحشيش والافيون وتصديره للخارج علنى
الاخوان تاريخهم الاسود من اول حسن البنا حتى اليوم من جرائم اغتيال خير شاهد
ASSASSIN = الإغتيالات السياسية
لم يترجم الغرب كلمة الحشاشين وتركها كما هى بدون تعديل وكل ما فعله هو أنهم أعادوا كتابتها بالحروف الإنجليزية فكانت ASSASSINومعناها بالإنجليزية كما جاء فى القاموس الإسترالىCOLLINS A murder of a prominent political figure ( Arabic hashshashin pl . of one who eat hashish )ASSASSIN وهذه الكلمة تعنى الإغتيالات السياسية وظهرت العصابات الإجرامية وكان أخطرها هم جماعة الحشاشين وكان مركز هذة الجماعة قلعة " المووت " فى المنطقة الجبلية الواقعة بين حدود إيران وأفغانستان - وقامت هذه العصابة على تحديد هدف دينى وهو إقامة دولة إسلامية قوية على حساب الإطاحة بالنظم القائمة الضعيفة والمتهالكة والحشاشين هم جماعة منشقة من الطائقة الإسماعيلية – وكانت جماعة الإسماعيلين هى الفرقة التى أنتجت أخطر وأكبر الحركات الإسلامية الإجرامية واهمها القرامطة
وده انا كنت وضحته فى بوست قديم قبل كدا
اذن مفيش وجه غرابه فعلا ان الاخوان حشاشين وارهابيين حتى اللى مش مصدق يسال مهديهم العاكف .. مرشد الجماعه السوابق
فإذا كان مرشدهم بالقتل ضارب فشيمة باقى عناصر الجماعه الحشيش و الارهاب

Comments

romansy said…
اول تعليق


ل



رومــــانسى
romansy said…
حشيش يا سعاد
ههههههههههههه
اتكلمى براحتك
احنا فى بلد ديمو قراطى
An Egyptian said…
مايقدروش يقفشوا قيادات كبيرة كده البلد ممكن تولع و الاخوان مش ضعاف للدرجة دى ان حركة زى دى تعدي.
الازهرى said…
للاسف الشديد مازلنا نصدق التمثيلية التى تقوم بها الحكومة مع هؤلاء ومن انهم اعداء النظام

ما دمنا لم نعرف اين العدو واين الصديق فما زال امامنا الكثير

تحياتى
Anonymous said…
خطير خطير
الأجانب اشتروا مصانع الأسمنت ليقتلوا الناس هنا لأنهم لا يسيتطيعون اقامة مصانع ملوثه قاتله فى بلادهم
اقروا تقرير حكومى ولبس من المعارضه وافيقوا
أثبت تقرير للجهاز المركزى للمحاسبات أن المخلفات الناتجة عن صناعة الاسمنت في مصر تتمثل فى تراب الاسمنت المعروف بتراب /الباى باص/ والذى يبلغ نحو 4106 أطنان يوميا بواقع 5ر1 مليون طن سنويا يساهم فى تلوث البيئة الهوائية وإصابة السكان بالعديد من الامراض من بينها التحجر الرئوى وأمراض ضيق التنفس وسرطان الرئة والتهاب الجلد والعين والسعال الحاد والالتهاب المزمن للانف.
شىء رائع ان نسمع هذا الكلام ولكن اين الحل ومن خلال هذا الموقع اناشد كل انسان فى مصر عندولو جزء بسيط من الرحمه فنحن سكان منطقة حلوان والمعصرة نناشد كل كل المسئولينفى مصر وسوفنحتكم غدا الى رب العزة جلا وعلا نناشكم ان ترحمونا من شركة اسمنت القوميه واسمنت حلوان واسمنت طره التى جعلت السرطان وكانه مرض انفلونزا من كثرة مامات به عدد ليس بقليل من سكان المعصرة وحلوان حتى ان المريض عندما يذهب الى القصر العينى يقولون له انت من حلوان اناشد كل من لديه رحمة ان يرحمنا ويجعل هؤلاء الايطاليين الذين اشتروا اسمنت طره ان يلتزموا بوضع الفلاتر رحمة بنا وباولادنا وليس من المعقول ان ياتوا من بلادهم ليتربحوا ويهلكونا باقبح الامراض وانا لله وانا اليه راجعون
أنا حر said…
انا مش عارف انتي متغاظة منهم قوي ليه كده
هما اه يفقعوا المرارة وبيجادلوا مش بيتناقشوا وبيغتالو وعار على البلد وعلى الدين وكل اللي عايزة تقوليه قوليه بس برده مش كده
خلي اللي في القلب في القلب
:)
تحياتي
السلام عليكم

عيبنا المزمن للأسف هو إننا مش بنقدر غير على بعض
وعلشان كده طول عمرنا مستضعفين وأي حد غيرنا بيقدر علينا

أما بالنسبه للحشيش فأنا لا أثق في كلام الحكومة لسوابقها في الكذب كما لا أنزه أعضاء الإخوان عن الخطأ فهم ليسوا أنبياء ولا معصومين
والله وحده يعلم الحقيقة

ربنا يوفقنا للخير ويألف ما بين قلوبنا

خالص تحياتي
ياستى الحكاية مش حكاية حشيش وسوابق وارهاب قد ما هى تضارب مصالح ..يعنى انت تفتكرى الاخوان عايزين ايه من الآخر ... اكيد طبعا وبديهى عايزين السلطة ..وطبعا عشان معظم الناس عارفين بل متأكدين من نواياهم وفاهمين الحدوتة فالحكاية ح تفضل فى حيز صراع القط والفار وعشان ساعات الفار بيبقى اذكى من القط(فى افلام توم وجيرى) فالحكاية محتاجة وقفة وصحصحة من مباحث امن دولتنا حتى لا يحدث مالايحمد عقباه
اللهم احمى مصر من اعدائها من الداخل قبل الخارج ..آمين
^ H@fSS@^ said…
صدقتي
ليه ممسكوش الراس الكبيرة؟؟

بس معلش عندي اعتراض شديد مع الاخ
الازهري
الحكومة مش بتتبلى انهم اعداء نظام
لانهم بالفعل اعداء لاي شئ يقف ضدهم
مش بس الحكومة
و ده مش تبلي
و هما نفسهم بيعلنوها انهم ضد الحكومة
لكن حركات المرشد سواء مهدي او اللي قبله ببوس *** الحكومة فهي من قبيل انهم يحاولوا يوصلوا لاي نوع من انواع السلطة
بس على مين

خلاص طرقهم اتكشفت و بانت حتى الانسان البسيط عرف انهم هجايص كلام على الفاضي فيما يختص مصالح الغير
و لكنهم اسود اشاوس فيما يختص بمصلحتهم


تحياتي
صديقتي العزيزة قطة الصحراء..
ها أنا أطل من جديد على مدونتك فأجدني كالدي يطل من شرفة على العالم بوجه آخر.. العالم من منظور آخر..العالم يتلون بألوان قطة الصحراء..

دكرت المطلعين على مدونتك بالحشاشين.. وهؤلاء الدين نسيهم التاريخ مجموعة طريفة في التاريخ بامكانك أيتها العزيزة ادا اتيحت لك الفرصة لقراءة رائعة أمين معلوف سمرقند أن تجدي تفصيلا جميلا وفنيا لهده الطائفة التي يتزعمها حسن الصباح، وقريبا سأبت قصة من ابداعي تتضمن احدى خطب الدين حكموا ألموت، الحصن الحصين الدي أسقطه المغول في آخر المطاف
مودتي الفائثة
مفكر يخترم عقله وعقل القراء said…
انت تسالين عن الموقف المتذبذب للسلطه الحاكمه من جماعة الأخوان...شد احيانا وتراخى احيانا؟
لنفهم السبب اود ان اوضج انه صراع بين موقفين او مشروعين
الأول محاولة النظام دون نجاح اقامة راسماليهتبنى افتصادا قويا ولكنها فى ذلك اعتمدت على طبقه من رجال الأعمال ليسوا على المستوى المطلوب
علاوه على تفشى الفساد فى طبقة الكلفتوقراط
وتذمر الفقراء والطبقه المتوسطه
على الجانب الآحر محاولة الأخوان الدعوه الى راسماليه تجاريه وكثير منهم يعملون بالتجاره وهو مصدر ثرواتهم ولكنهم يغلفون الدعوه بغلاف لا نرى منه الا هذا حرام وهذا حلال
وهم يعرفون منزلة الدين عند الفئات المتذمره خاصة
الفقراء والطبقه المتوسطه
ولكنهم هم ايضا فشلوا بدليل ماقاله القرضاوى من التشوش الفكرى داخل الجماعه بين سلفيين متاثرين بالسعوديه وقطبيين متاثرين بدعاوى من الأردن
وهذا الحلاف نتيجه لأن بعض الأخوان اخذوا الغلاف الدين بشكل جدى ووقفوا عنده واستغرقهم دون وعى بحقيقة الأساس الأقتصادى لجرطتهم
....اذا نحن بصدد دعوتين متشابهتين لأقتصاد راسمالى ...السلطه تحلم باقتصاد حقيقى مثل ما حدث فى دول شرق آسيا ولكنها تعتمد على رجال اعمال انانيين فاسدين زمن ناحيه اخرى دعوه للأخوان لأقامة نظام راسمالى تجارى لا ينمى البلد ولا يحقق مصلحه للفئات العريضه من الشعب ولتغطية هذا يوظف الدين لضمان تاييد الفئات المتذمره وهذا يفسر تذبذب السلطخ معهم
بل وحيرتها وارتباكها ازاءهم
فهم يتشابهون فى الهدف الى حد ما وان اختلفوا فى الوسائل والنتيجه النهائيه المرجوه
مفكر يحترم عقله وعقل القارىء said…
معنى بعض الكلمات
الكلفتوكرات
هى طبقة البيروقراطيه المرتشيه الفاسده
او الأداره الحكوميه او السلطه المتحالفه مع الراسماليه الجشعه الطفيليه
لأقتسام الغنائم
على حساب الشعب
هل تذكرون العباره؟
كلفتو من كلفتى يعنى لص
ROSA E OLIVIER said…
Wonderful this way of writing!...and for you...

This is the end, beautiful friend
this is the end, my only friend, the end
...
I'll never look into your eyes again...

Jim Morrison (The Doors)

Thanks

Olivier
بصى انا مش معترض على الحشيش مع انى مش بشربه
بس معترض على الاخوان فعلا معاكى ابسط مثل انهم كدابين وده كفايه ؟
Desert cat said…
romansy
اه ما هو انا فعلا واخدة راحتى فى الكلام وفى الديمو قراطيك
Desert cat said…
An Egyptian
لاء هما من ناحية ضعاف دى فأنا اصدقك القول
لأن من يملك جناح عكسرى وشبابه يقوموا بعمل ميلشيات لإرهاب كل من تسول له نفسه ولو بكلمة يتلفظها ضدهم ليس بالضعيف بل بلطجى
Desert cat said…
الازهرى
من الواضح انك بالفعل بتتكلم عن نفسك لانك حتى الآن لم تعرف من العدو ومن الصديق بالرغم من ان افعال العدو بارزة وواضحه وضوح الشمس لكن من يغمض عينيه ربما لأهداف شخصية يعتبرهم اصدقاء فهنيئا لك باصدقائك
Desert cat said…
Anonymous
سيروا على نفس نهج أهل دمياط وموقفهم تجاه أجر يوم
Desert cat said…
أنا حر
مش بعرف خالص يا احمد اخلى اللى فى القلب فى القلب
لازم اللى فى القلب يبان فى الانياب على طول
ههههههههههههههههه
Desert cat said…
علاء سالم
كلامك ليس له اى محل من الاعراب
يعنى ايه مش بنقدر غير على بعض
هو اللىق بض عليهم دول ناس اصحابهم كان قاعدين يحششوا معاهم ولا مهربين اجهزة معاهم ولا حكومة مسؤلة عن الامن ؟؟؟
انت لا تثق فى كلام الحكومة لأنهم واقفين للخارجين على القانون بالمرصاد لكن لو يسيسوا الدين ويتشدقون باسم الله بافواههم والرشاشات فى ايديهم اصبحوا ثقه ؟؟؟
من امتا الارهابيين والسفاحين يستحقوا ثقة طفل وليس شخص كبير عاقل بالغ ربنا وهبه عقل يميز بيه
Desert cat said…
وميض ابتسامة
طبعا كلام حضرتك لا غبار عليه ولكن هذا لا ينفى واقعة الحشيش يا سيدى
فقد سبق القبض على شباب اخوان منذ وقت قصير فى كمين على طريق كفر الدوار وكان بحوزتهم ايضا حشيش يعنى دى مش اول واقعه ولا اخر
تحياتى لحضرتك
Desert cat said…
^ H@fSS@^
اتفق معاكى جدا عزيزتى
وليست ببعيد فضيحة المهدى العاكف بتعدية على جارته الايطالية وابتها فى شقتها وكانت ليست الواقعة الاولى .. فاين عبائة الدين هنا أسقطت منه وهو طالع يبلطج واعوانة على جارته وابنتها
نورتينى جدا حفوصه
Desert cat said…
نبراس العتمة
يا الف اهلا وسهلا بيك رجعت نورت الدنيا كلها
يارب تكون كانت اجازة سعيدة
افتدقت كثيرا مداخلاتك القيمة
واشكر لك ما قدمته من المزيد اضافة لمعلوماتى
اضأت صفحتى من جديد صديقى العزيز
مفكر يحترم عقله وعقل قرائه said…
باختصار نحن بصدد مشروع لأقامة افتصاد حقيقى اعتمد على الطفيليين ومشروع يريد اقامة اقتصاد تجارى طفيلى يوظف الدين للتغطيه على الهدف الحقيقى ولجذب الفئات المتذمره من تعثر المشروع الأول وهم الفقراء والطبقه الوسطى التى همشت وادراكهم لمكانة الدين عند هذه الفئات
وهذه هى نقطة الأحتكاك الحقيقيه بين السلطه وبينهم
كلما احس النظام بتغلغلهم بين هذه الفئات حاول الحد من نشاطهم باى طريقه والا فانه يتركهم فى حالهم ومن ناحية اخرى تتجنب الجماعه اى موقف معارض حقيقى وتتخذ مواقف مائعه ويزيد من هذا التذبذب وتمييع المواقف انقسام ايديولوجى خطير وتشوش فكرى وصفه الشيخ القرضاوى وهو يذكر سبب تركه للجماعه
micheal said…
شعاري
يخرب بيت الإخوان علي الحزب الوثني في يوم واحد
تحياتي
صفا said…
انا ضد الاخوان جدا
بس للاسف فى ناس كتير ماشيه وراهم واللى اخد بمبدأ اهم ضد الحكومة مع انهم ميفرقوش عنهم بل ممكن اسوأ بس هارجع واقول انهم بردو من حقهم يعرضوا افكارهم ومن حقنا نعترض
Migo Mishmish said…
وحشتيني يا قطوطة
الشغل بقه واكل البقسماط - اصل مفيش عيش زي مانتي عارفه - بصي يا ستي من وجهه نظري اللاوذعيه الراس الكبيرة عارف كويس ان رصيده على وش الدنيا قرب على النفاذ فيعمل ايه بقه.اولاً بيقول للي في اديهم كل حاجة انا كويس واللي بعدي اللي انا مرشحه كويس برضه. الشعب كله غجر وولاد جزم ما ينفعش معاهم حريه او ديموقراطيه دول شوية غجر او مجموعه من الاغنياء اللي عايشين في بلد تخيلي في مارينا وشرم واخواتها. وطبعاً كل من ليه راي او فكر ياما هاجر ياما اتسجن ياما هرب ياما اختفى في ظروف غامضه. والمعارضه الوحيدة هي الاخوان وانا مبحبهومش وبقفش فيهم اهو ولو وقفتوا مع ولي العهد هيكمل من بعدي.
اما بقه بالنوسبة للشعب ابن الجزمة فهو بيظهر بمظهر المخلص اللي لما عرف ان الناس عايزة تأكل عملهم علاوة مخصوصة. ولما اتغلبنا في الالومبكيات طلب تشكيل لجنه علشان يعرفوا احنا فشلنا ليه. علشان صعب عليه ان نفس الشعب اتكسرت ومحدش يجبلي سيرة الدويقه هو مفيش غيرة في البلد. وبرضه مع الغربان مفهمهم ان لولاه كانوا اتشدوا كلهم في جوانتانمو وهو بيعمل كدة علشان يخزي العين لكن سيابهم يبرتعوا في التكيه. وهما مبسطوين بكدة وكل ده برضه بيصب في انه بيحاول يشغل ابنه. ما هو غلبان برضه شوفي الواحد فينا على ما اشتغل طلعت روحه. وهو شغال شغلانه كويسة ما يبجبش ابنه معاه ليه؟
بس كدة
love,
MishMish
Desert cat said…
مفكر يخترم عقله وعقل القراء
الاخوان قدروا يتسلوا للفقراء من خلال عبائة الدين التى يرتدونها من حين لآخر فالفقير المغلوب على امره الذى لا يملك قوت يومه دائما ينتظر الفرج والاخوانجى الذى تاتيه المعونة من دبى وغيرها من بلاد التمويل يكون هدفها الاساسى هو استقطاب المحتاج فماذا يفعل شخص كان لا يجد قوت يومه الان يعيش فى رغد العيش سوى انه يلغى الشيئ المسمى بعقل ويسير كالدابة لا يعلم من الحياة سوى سمعا وطاعه
الحكومة تريد تزيين موقفها تجاه المنظمات الدولية فتجدها تترك للاخوان الحبل على الغارب ظنا منها بتطبيق كلمة الديمواقرطية
Desert cat said…
مفكر يحترم عقله وعقل القارىء
وهذا يرسخ مبدأ المصلحة والمنفعة الخاصة وعلى راى الكبير طز فى الشعب
Desert cat said…
ROSA E OLIVIER
thank you rosa i'm very happy for your words
regards
Desert cat said…
صوت من مصر
ماهو للاسف سقطت منهم عباية الدين محمد وظهرت حقيقتهم حتى اللى كان مخدوع فيهم فاق
Desert cat said…
مفكر يحترم عقله وعقل قرائه
متفقه مع حضرتك فى ان لازم يكون فى وعى للدين الحقيقى لدى الطبقات الوسطى والفقيرة لكن الاخوان يدخلوا لهم من ناحية المادة ايضا
الحاج الاخونجى قابض من التمويل اللى جه يهمه يستقطب اكبر عدد من الناس حتما سيجد ضالته فى الفقراء وطبعا لازم يحفظوا الجميل فجأة بين يوم وليله يلاقى نفسه اخوانجى محترف ردا للمعروف
Desert cat said…
مفكر يحترم عقله وعقل قرائه
متفقه مع حضرتك فى ان لازم يكون فى وعى للدين الحقيقى لدى الطبقات الوسطى والفقيرة لكن الاخوان يدخلوا لهم من ناحية المادة ايضا
الحاج الاخونجى قابض من التمويل اللى جه يهمه يستقطب اكبر عدد من الناس حتما سيجد ضالته فى الفقراء وطبعا لازم يحفظوا الجميل فجأة بين يوم وليله يلاقى نفسه اخوانجى محترف ردا للمعروف
Desert cat said…
micheal
شعار رنان
احسنت الاختيار
:)
Desert cat said…
صفا
مش لما يكون افكار يا صفا
فى الافكار فى التباكى للوصول للهدف وبعدها طز فى مصر وابو مصر
والمعارض بالجزمة
Desert cat said…
Migo Mishmish
يا الف اهلا وسهلا مشمشوشة شرفتينى جدا جدا
الراس الكبيرة يا قلبى لا تملك سوى البلطجة واعمال القتل والعنف
الراس الكبيرة تجديها فى اى برنامج حوارى قاعدة تشوح وتجعر بعلو الصوت ومينساش يزين كلامه بقال الله وقال الرسول وفجأة تسمعى تصريح لولبى ايوا احنا عندنا جناح عسكرى ايوا احنا عندنا ميلشيات .. هو حد يقدر يتكلم يعنى ماهو المعارض بالجزمة بقى
والطبيعى ان المسحوبين من اهل سمعا وطاعة واللى بيبوسوا الايادى فى الراحة والجاية يهللوا ويقولوا آآآآآآمين
المعونة تتقطع
شرفتينى يا مشمشوشة
قطتنا الجميله

بخصوص موضوع الأخوان دول اسخف نكته ممكن الواحد يسمعها و دايما بقول اننا حنشوف ايام سودا لو الأخوان مسكوا الحكم و العينه باينه من تصريحات المرشد بتاعهم اللي حيدي بالجزمه كل معارضيه و كل يوم بتتكشف لينا حقايق و مصايب عنهم و اهو اللي بينتموا ليهم حشيش و ارهاب يبقي فاضل ايه بقي؟و الناس اللي بتساندهم للاسف و لا واخده بالها و عامله ودن من طين وودن من عجين و بنطلع احنا اللي في الاخر غلطانيين و مش بعيد يقولوا اننا احنا اللي حاطينلهم الحشيش
دمتي بكل الحب ياجميله
Anonymous said…
ههههههههههههه
لا يجرؤوا انهم يقبضوا عليهم
والا والله ماكانو اتأخرو
ليه ؟
ها سايبه
هههههههههههههه
تحياتى ياقطة
أحمد علي said…
الإخوان عندهم مشاكل بشأن عدم وضوح أجندتهم المتعلقة ببعض القضايا زي حقوق المرأة والمواطنة وكيفية تداول السلطة، لكن علي الجانب الآخر أعتقد إن من حقهم دخول الانتخابات والتعبير عن رأيهم بحرية زيهم زي أي حزب، ولو اختلفنا معاهم يبقي بالحجة والدليل مش بالسيف والكرباج والتشهير وتلفيق التهم.

بصفة عامة، موضوع الأحزاب الدينية ده مش بدعة ولا حاجة، معظم الدول الغربية فيها أحزاب سياسية ذات توجه ديني، بل إن دولة زي ألمانيا، الحزب الحاكم فيها هو "الاتحاد الديمقراطي المسيحي"

الخلاصة: الإخوان المسلمون يعانون من الغموض وعدم الوضوح و"التلون" في بعض المواقف، بس في نفس الوقت هم أصحاب مبادئ وتوجههم "العام" ثابت، ومن الإجحاف اتهامهم بتهم رخيصة زي المخدرات و تدبير الاغتيالات.

Popular posts from this blog

قميص دهشور

كل تحرش وانتوا طيبين